ਇੰਸਟਾਗ੍ਰਾਮ 'ਤੇ ਪੀਐੱਮ ਮੋਦੀ ਦਾ ਵੱਡਾ ਧਮਾਕਾ: ਫਾਲੋਅਰਜ਼ ਦੀ ਗਿਣਤੀ 10.5 ਕਰੋੜ ਤੋਂ ਪਾਰ, ਇੱਕ ਹਫ਼ਤੇ 'ਚ ਜੁੜੇ 40 ਲੱਖ ਨਵੇਂ ਯੂਜ਼ਰਸ

ਸੋਸ਼ਲ ਮੀਡੀਆ ਦੀ ਦੁਨੀਆ ਵਿੱਚ ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਇੱਕ ਹੋਰ ਨਵਾਂ ਮੀਲ ਪੱਥਰ ਹਾਸਲ ਕਰ ਲਿਆ ਹੈ। ਇੰਸਟਾਗ੍ਰਾਮ 'ਤੇ ਪੀਐੱਮ ਮੋਦੀ ਦੇ ਫਾਲੋਅਰਜ਼ ਦੀ ਗਿਣਤੀ 10.5 ਕਰੋੜ (105 ਮਿਲੀਅਨ) ਤੋਂ ਵਧੇਰੇ ਹੋ ਗਈ ਹੈ। ਹੈਰਾਨੀਜਨਕ ਗੱਲ ਇਹ ਹੈ ਕਿ ਉਨ੍ਹਾਂ ਦੇ ਅਕਾਊਂਟ 'ਤੇ ਸਿਰਫ਼ ਇੱਕ ਹਫ਼ਤੇ ਦੇ ਅੰਦਰ ਹੀ 40 ਲੱਖ (4 ਮਿਲੀਅਨ) ਨਵੇਂ ਫਾਲੋਅਰਜ਼ ਜੁੜੇ ਹਨ, ਜਿਸ ਨਾਲ ਇਹ ਅੰਕੜਾ 10.1 ਕਰੋੜ ਤੋਂ ਉਛਲ ਕੇ 10.5 ਕਰੋੜ ਤੱਕ ਪਹੁੰਚ ਗਿਆ ਹੈ।

ਪ੍ਰਧਾਨ ਮੰਤਰੀ ਦੇ ਅਕਾਊਂਟ ਦੀ ਇਸ ਅਚਾਨਕ ਵਧੀ ਪਹੁੰਚ (Reach) ਪਿੱਛੇ ਹਾਲ ਹੀ ਵਿੱਚ ਜੰਤਰ-ਮੰਤਰ 'ਤੇ CJP ਅਤੇ GenZ ਵਿਰੋਧ ਪ੍ਰਦਰਸ਼ਨਾਂ ਦੌਰਾਨ ਪੋਸਟ ਕੀਤੀਆਂ ਗਈਆਂ ਵੀਡੀਓਜ਼ ਦਾ ਵੱਡਾ ਯੋਗਦਾਨ ਮੰਨਿਆ ਜਾ ਰਿਹਾ ਹੈ। ਪੀਐੱਮ ਮੋਦੀ ਵੱਲੋਂ ਵਿਸ਼ੇਸ਼ ਤੌਰ 'ਤੇ ਨੌਜਵਾਨਾਂ (GenZ) ਨੂੰ ਸੰਬੋਧਨ ਕਰਦਿਆਂ ਬਣਾਈਆਂ ਗਈਆਂ ਵਰਟੀਕਲ ਰੀਲਾਂ (Reels) ਰਾਤੋ-ਰਾਤ ਵਾਇਰਲ ਹੋ ਗਈਆਂ, ਜਿਨ੍ਹਾਂ ਵਿੱਚੋਂ ਇੱਕ ਰੀਲ ਉਨ੍ਹਾਂ ਦੇ ਇੰਸਟਾਗ੍ਰਾਮ ਹੈਂਡਲ 'ਤੇ ਦੂਜੀ ਸਭ ਤੋਂ ਵੱਧ ਦੇਖੀ ਜਾਣ ਵਾਲੀ ਰੀਲ ਬਣ ਗਈ। ਇੰਸਟਾਗ੍ਰਾਮ ਐਲਗੋਰਿਦਮ ਦੇ ਬੂਸਟ ਕਾਰਨ ਇਹਨਾਂ ਵੀਡੀਓਜ਼ ਨੇ ਲੱਖਾਂ ਲੋਕਾਂ ਦਾ ਧਿਆਨ ਖਿੱਚਿਆ।

ਉਕਤ ਵੀਡੀਓਜ਼ ਵਿੱਚ ਪ੍ਰਧਾਨ ਮੰਤਰੀ ਨੇ ਪ੍ਰੀਖਿਆਰਥੀਆਂ ਅਤੇ ਵਿਦਿਆਰਥੀਆਂ ਨੂੰ ਭਰੋਸਾ ਦਵਾਇਆ ਸੀ ਕਿ ਸਰਕਾਰ ਪੇਪਰ ਲੀਕ ਵਰਗੇ ਗੰਭੀਰ ਮੁੱਦੇ ਨੂੰ ਲੈ ਕੇ ਬੇਹੱਦ ਗੰਭੀਰ ਹੈ ਅਤੇ ਇਸ ਵਿਰੁੱਧ ਜਲਦ ਹੀ ਇੱਕ ਬੇਹੱਦ ਸਖ਼ਤ ਕਾਨੂੰਨ ਲਿਆਂਦਾ ਜਾ ਰਿਹਾ ਹੈ। ਜ਼ਿਕਰਯੋਗ ਹੈ ਕਿ CJP ਵਿਰੋਧ ਪ੍ਰਦਰਸ਼ਨਾਂ ਦੇ ਚਲਦਿਆਂ ਕੇਂਦਰੀ ਮੰਤਰੀ ਧਰਮਿੰਦਰ ਪ੍ਰਧਾਨ ਨੂੰ ਸਿੱਖਿਆ ਮੰਤਰੀ ਦੇ ਅਹੁਦੇ ਤੋਂ ਅਸਤੀਫ਼ਾ ਵੀ ਦੇਣਾ ਪਿਆ ਸੀ।

ਦਿਲਚਸਪ ਤੱਥ ਇਹ ਹੈ ਕਿ ਪ੍ਰਧਾਨ ਮੰਤਰੀ ਮੋਦੀ ਨੇ ਆਪਣੇ ਇੰਸਟਾਗ੍ਰਾਮ ਹੈਂਡਲ 'ਤੇ ਹੁਣ ਤੱਕ ਕੁੱਲ 1,452 ਪੋਸਟਾਂ ਕੀਤੀਆਂ ਹਨ। ਇਸ ਤੋਂ ਵੀ ਖ਼ਾਸ ਗੱਲ ਇਹ ਹੈ ਕਿ 10.5 ਕਰੋੜ ਤੋਂ ਵੱਧ ਲੋਕਾਂ ਵੱਲੋਂ ਫਾਲੋ ਕੀਤੇ ਜਾਣ ਦੇ ਬਾਵਜੂਦ, ਪੀਐੱਮ ਮੋਦੀ ਇੰਸਟਾਗ੍ਰਾਮ 'ਤੇ ਖ਼ੁਦ ਕਿਸੇ ਵੀ ਹੋਰ ਯੂਜ਼ਰ ਜਾਂ ਅਕਾਊਂਟ ਨੂੰ ਫਾਲੋ ਨਹੀਂ ਕਰਦੇ।