ਤਾਜਾ ਖਬਰਾਂ
ਭਾਰਤੀ ਕ੍ਰਿਕਟ ਦੇ 15 ਸਾਲਾ ਉੱਭਰਦੇ ਸਿਤਾਰੇ ਵੈਭਵ ਸੂਰਿਆਵੰਸ਼ੀ ਨੇ ਟ੍ਰਾਈ-ਨੇਸ਼ਨ ਸੀਰੀਜ਼ ਦੇ ਫਾਈਨਲ ਮੁਕਾਬਲੇ ਵਿੱਚ ਆਪਣੀ ਵਿਸਫੋਟਕ ਬੱਲੇਬਾਜ਼ੀ ਨਾਲ ਸਨਸਨੀ ਮਚਾ ਦਿੱਤੀ ਹੈ। ਸ੍ਰੀਲੰਕਾ 'ਏ' ਵਿਰੁੱਧ ਖੇਡੇ ਗਏ ਇਸ ਖ਼ਿਤਾਬੀ ਮੈਚ ਵਿੱਚ ਵੈਭਵ ਨੇ ਮੈਦਾਨ ਦੇ ਚਾਰੇ ਪਾਸੇ ਚੌਕਿਆਂ ਅਤੇ ਛੱਕਿਆਂ ਦੀ ਅਜਿਹੀ ਬਾਰਿਸ਼ ਕੀਤੀ ਕਿ ਵਿਰੋਧੀ ਗੇਂਦਬਾਜ਼ ਤਰਾਹ-ਤਰਾਹ ਕਰ ਉੱਠੇ। ਇਸ ਖੱਬੇ ਹੱਥ ਦੇ ਨੌਜਵਾਨ ਬੱਲੇਬਾਜ਼ ਨੇ ਮਹਿਜ਼ 11 ਗੇਂਦਾਂ ਵਿੱਚ ਆਪਣਾ ਅਰਧ ਸੈਂਕੜਾ (50 ਦੌੜਾਂ) ਪੂਰਾ ਕਰਕੇ ਇਤਿਹਾਸ ਦੇ ਪੰਨਿਆਂ ਵਿੱਚ ਆਪਣਾ ਨਾਂ ਸੁਨਹਿਰੀ ਅੱਖਰਾਂ ਵਿੱਚ ਦਰਜ ਕਰਵਾ ਲਿਆ ਹੈ।
ਵੈਭਵ ਨੇ ਆਪਣੀ ਇਸ ਪਾਰੀ ਦੀ ਪਹਿਲੀ ਹੀ ਗੇਂਦ ਤੋਂ ਹਮਲਾਵਰ ਰੁਖ਼ ਅਪਣਾਇਆ। 11 ਗੇਂਦਾਂ ਵਿੱਚ ਫਿਫਟੀ ਪੂਰੀ ਕਰਨ ਦੌਰਾਨ ਉਨ੍ਹਾਂ ਨੇ 5 ਸ਼ਾਨਦਾਰ ਚੌਕੇ ਅਤੇ 5 ਗਗਨਚੁੰਬੀ ਛੱਕੇ ਜੜੇ। ਇਸ ਬੇਮਿਸਾਲ ਕਾਰਨਾਮੇ ਨਾਲ ਵੈਭਵ ਨੇ ਭਾਰਤ ਦੇ ਦਿੱਗਜ ਬੱਲੇਬਾਜ਼ ਯੁਵਰਾਜ ਸਿੰਘ ਦੇ ਰਿਕਾਰਡ ਨੂੰ ਪਿੱਛੇ ਛੱਡ ਦਿੱਤਾ ਹੈ ਅਤੇ ਉਹ ਕ੍ਰਿਕਟ ਦੇ ਕਿਸੇ ਵੀ ਫਾਰਮੈਟ ਵਿੱਚ ਸਭ ਤੋਂ ਤੇਜ਼ ਅਰਧ ਸੈਂਕੜਾ ਲਗਾਉਣ ਵਾਲੇ ਪਹਿਲੇ ਭਾਰਤੀ ਖਿਡਾਰੀ ਬਣ ਗਏ ਹਨ।
ਇਸ ਧਮਾਕੇਦਾਰ ਪਾਰੀ ਦੇ ਨਾਲ ਹੀ ਵੈਭਵ ਸੂਰਿਆਵੰਸ਼ੀ ਨੇ ਲਿਸਟ 'ਏ' (50-ਓਵਰ ਫਾਰਮੈਟ) ਕ੍ਰਿਕਟ ਵਿੱਚ 20 ਸਾਲ ਪੁਰਾਣਾ ਅੰਤਰਰਾਸ਼ਟਰੀ ਰਿਕਾਰਡ ਵੀ ਧੂੜ ਚੱਟਾ ਦਿੱਤਾ।
ਇਸ ਤੋਂ ਪਹਿਲਾਂ ਲਿਸਟ 'ਏ' ਵਿੱਚ ਸਭ ਤੋਂ ਤੇਜ਼ ਅਰਧ ਸੈਂਕੜੇ ਦਾ ਰਿਕਾਰਡ ਸ੍ਰੀਲੰਕਾ ਦੇ ਸਾਬਕਾ ਕ੍ਰਿਕਟਰ ਕੌਸ਼ਲਿਆ ਵੀਰਰਤਨੇ ਦੇ ਨਾਂ ਸੀ, ਜਿਨ੍ਹਾਂ ਨੇ ਨਵੰਬਰ 2005 ਵਿੱਚ ਰਾਗਾਮਾ ਕ੍ਰਿਕਟ ਕਲੱਬ ਵੱਲੋਂ ਖੇਡਦਿਆਂ ਕੁਰੁਨੇਗਲਾ ਯੂਥ ਕਲੱਬ ਖ਼ਿਲਾਫ਼ 12 ਗੇਂਦਾਂ ਵਿੱਚ ਫਿਫਟੀ ਬਣਾਈ ਸੀ। ਵੈਭਵ ਨੇ 11 ਗੇਂਦਾਂ ਵਿੱਚ ਇਹ ਕਾਰਨਾਮਾ ਕਰਕੇ ਦੋ ਦਹਾਕੇ ਪੁਰਾਣੇ ਵਰਲਡ ਰਿਕਾਰਡ ਨੂੰ ਆਪਣੇ ਨਾਂ ਕਰ ਲਿਆ ਹੈ।
ਵੈਭਵ ਕੋਲ ਇਸ ਮੈਚ ਵਿੱਚ ਸਭ ਤੋਂ ਤੇਜ਼ ਸੈਂਕੜਾ ਬਣਾ ਕੇ ਇੱਕ ਹੋਰ ਇਤਿਹਾਸ ਰਚਣ ਦਾ ਸੁਨਹਿਰੀ ਮੌਕਾ ਸੀ, ਪਰ ਉਹ ਬਦਕਿਸਮਤੀ ਨਾਲ ਆਪਣੇ ਸੈਂਕੜੇ ਤੋਂ ਮਹਿਜ਼ 6 ਦੌੜਾਂ ਦੂਰ ਰਹਿ ਗਏ। ਉਹ 29 ਗੇਂਦਾਂ ਵਿੱਚ 94 ਦੌੜਾਂ ਦੀ ਤੂਫ਼ਾਨੀ ਪਾਰੀ ਖੇਡ ਕੇ ਆਊਟ ਹੋ ਗਏ। 324.14 ਦੇ ਹੈਰਾਨੀਜਨਕ ਸਟ੍ਰਾਈਕ ਰੇਟ ਨਾਲ ਖੇਡਦਿਆਂ ਵੈਭਵ ਨੇ ਆਪਣੀ ਪਾਰੀ ਵਿੱਚ ਕੁੱਲ 10 ਚੌਕੇ ਅਤੇ 8 ਛੱਕੇ ਲਗਾਏ।
ਜੇਕਰ ਵੈਭਵ 6 ਦੌੜਾਂ ਹੋਰ ਬਣਾ ਲੈਂਦੇ ਤਾਂ ਸਾਊਥ ਅਫ਼ਰੀਕਾ ਦੇ ਮਹਾਨ ਬੱਲੇਬਾਜ਼ ਏਬੀ ਡਿਵਿਲੀਅਰਜ਼ ਦਾ ਸਭ ਤੋਂ ਤੇਜ਼ ਵਨਡੇ ਸੈਂਕੜੇ (31 ਗੇਂਦਾਂ ਵਿੱਚ ਬਨਾਮ ਵੈਸਟਇੰਡੀਜ਼, 2015) ਦਾ ਵਿਸ਼ਵ ਰਿਕਾਰਡ ਵੀ ਖ਼ਤਰੇ ਵਿੱਚ ਪੈ ਜਾਣਾ ਸੀ। ਭਾਵੇਂ ਸੈਂਕੜਾ ਖੁੰਝ ਗਿਆ, ਪਰ ਇਸ 15 ਸਾਲਾ ਨੌਜਵਾਨ ਨੇ ਆਪਣੀ ਬੱਲੇਬਾਜ਼ੀ ਨਾਲ ਇਹ ਸਾਬਤ ਕਰ ਦਿੱਤਾ ਹੈ ਕਿ ਉਹ ਵਿਸ਼ਵ ਕ੍ਰਿਕਟ ਦਾ ਅਗਲਾ ਵੱਡਾ ਸੁਪਰਸਟਾਰ ਹੈ।
Get all latest content delivered to your email a few times a month.
