ਅੰਤਵਾਦੀ ਵਿਰੁੱਧ ਵੱਡੀ ਕਾਰਵਾਈ: ਸੋਪੋਰ 'ਚ 'ਜਮਾਤ-ਏ-ਇਸਲਾਮੀ' ਨਾਲ ਜੁੜੇ 15 ਟਿਕਾਣਿਆਂ 'ਤੇ ਪੁਲਿਸ ਦੀ ਛਾਪੇਮਾਰੀ; ਦੇਸ਼ ਵਿਰੋਧੀ ਸਾਹਿਤ ਬਰਾਮਦ

ਜੰਮੂ-ਕਸ਼ਮੀਰ ਦੇ ਸੋਪੋਰ ਵਿੱਚ ਪੁਲਿਸ ਨੇ ਸ਼ੁੱਕਰਵਾਰ ਨੂੰ ਇੱਕ ਵੱਡੀ ਕਾਰਵਾਈ ਕਰਦਿਆਂ ਪਾਬੰਦੀਸ਼ੁਦਾ ਸੰਗਠਨ 'ਜਮਾਤ-ਏ-ਇਸਲਾਮੀ' (JeI) ਨਾਲ ਜੁੜੇ ਕਈ ਟਿਕਾਣਿਆਂ 'ਤੇ ਛਾਪੇਮਾਰੀ ਕੀਤੀ। ਇਹ ਕਾਰਵਾਈ ਗੈਰ-ਕਾਨੂੰਨੀ ਗਤੀਵਿਧੀਆਂ ਰੋਕੂ ਐਕਟ (UAPA) ਦੇ ਤਹਿਤ ਦਰਜ ਇੱਕ ਮਾਮਲੇ ਦੇ ਸਬੰਧ ਵਿੱਚ ਕੀਤੀ ਗਈ ਹੈ। ਪੁਲਿਸ ਮੁਤਾਬਕ, ਇਹ ਛਾਪੇਮਾਰੀ ਅੱਤਵਾਦ ਅਤੇ ਅਲਗਾਵਵਾਦੀ ਨੈੱਟਵਰਕ ਨੂੰ ਤੋੜਨ ਅਤੇ ਪਾਬੰਦੀਸ਼ੁਦਾ ਸੰਗਠਨਾਂ ਦੀਆਂ ਗਤੀਵਿਧੀਆਂ 'ਤੇ ਨੱਥ ਪਾਉਣ ਲਈ ਚਲਾਈ ਜਾ ਰਹੀ ਮੁਹਿੰਮ ਦਾ ਹਿੱਸਾ ਹੈ, ਜਿਸ ਤਹਿਤ ਸੋਪੋਰ ਪੁਲਿਸ ਜ਼ਿਲ੍ਹੇ ਦੇ 15 ਤੋਂ ਵੱਧ ਸਥਾਨਾਂ 'ਤੇ ਤਲਾਸ਼ੀ ਮੁਹਿੰਮ ਚਲਾਈ ਗਈ।

ਪੁਲਿਸ ਨੇ ਜਿਨ੍ਹਾਂ 15 ਥਾਵਾਂ 'ਤੇ ਛਾਪੇਮਾਰੀ ਕੀਤੀ ਹੈ, ਉਨ੍ਹਾਂ ਵਿੱਚ ਜਮੀਆ ਕਦੀਮ, ਨਸੀਮ ਬਾਗ, ਕ੍ਰੈਂਕਸ਼ਿਵਨ, ਤਰਜੂ, ਅਮਰਗੜ੍ਹ, ਵਰਪੋਰਾ, ਬੋਮਈ, ਬੋਇਟਿੰਗੂ ਅਤੇ ਆਲੇ-ਦੁਆਲੇ ਦੇ ਕਈ ਇਲਾਕੇ ਸ਼ਾਮਲ ਹਨ। ਇਹ ਕਾਰਵਾਈ ਸੋਪੋਰ ਥਾਣੇ ਵਿੱਚ ਯੂਏਪੀਏ ਦੀ ਧਾਰਾ 10 ਅਤੇ 13 ਦੇ ਤਹਿਤ ਦਰਜ ਐਫ.ਆਈ.ਆਰ. ਨੰਬਰ 42/2025 ਦੇ ਸਬੰਧ ਵਿੱਚ ਅਮਲ ਵਿੱਚ ਲਿਆਂਦੀ ਗਈ। ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਤਲਾਸ਼ੀ ਮੁਹਿੰਮ ਪੂਰੀ ਤਰ੍ਹਾਂ ਕਾਨੂੰਨੀ ਪ੍ਰਕਿਰਿਆ ਦੇ ਤਹਿਤ ਕੀਤੀ ਗਈ ਸੀ, ਜਿਸ ਲਈ ਪਹਿਲਾਂ ਹੀ 'UAPA ਕੋਰਟ' ਤੋਂ ਉਚਿਤ ਤਲਾਸ਼ੀ ਵਾਰੰਟ ਲਏ ਗਏ ਸਨ। ਇਸ ਕਾਰਵਾਈ ਨੂੰ ਪਾਰਦਰਸ਼ੀ ਬਣਾਉਣ ਲਈ ਮੌਕੇ 'ਤੇ ਐਗਜ਼ੀਕਿਊਟਿਵ ਮੈਜਿਸਟ੍ਰੇਟ ਅਤੇ ਆਜ਼ਾਦ ਗਵਾਹ ਵੀ ਮੌਜੂਦ ਸਨ।

ਪੁਲਿਸ ਨੇ ਖ਼ੁਲਾਸਾ ਕੀਤਾ ਕਿ ਤਲਾਸ਼ੀ ਦੌਰਾਨ ਕੁਝ ਇਤਰਾਜ਼ਯੋਗ ਸਮੱਗਰੀ ਵੀ ਬਰਾਮਦ ਹੋਈ ਹੈ, ਜਿਸ ਵਿੱਚ ਕਥਿਤ ਤੌਰ 'ਤੇ ਪਾਬੰਦੀਸ਼ੁਦਾ ਸੰਗਠਨ ਨਾਲ ਜੁੜਿਆ ਦੇਸ਼ ਵਿਰੋਧੀ ਸਾਹਿਤ (ਲਿਟਰੇਚਰ) ਸ਼ਾਮਲ ਹੈ। ਇਸ ਸਾਰੀ ਸਮੱਗਰੀ ਨੂੰ ਅਗਲੇਰੀ ਜਾਂਚ ਅਤੇ ਵਿਸ਼ਲੇਸ਼ਣ ਲਈ ਜ਼ਬਤ ਕਰ ਲਿਆ ਗਿਆ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਇਹ ਕਾਰਵਾਈ ਉਨ੍ਹਾਂ ਲੋਕਾਂ ਦੀ ਪਛਾਣ ਕਰਨ ਅਤੇ ਉਨ੍ਹਾਂ ਵਿਰੁੱਧ ਕਾਨੂੰਨੀ ਸ਼ਿਕੰਜਾ ਕੱਸਣ ਲਈ ਕੀਤੀ ਜਾ ਰਹੀ ਹੈ, ਜੋ ਪਾਬੰਦੀਸ਼ੁਦਾ ਸੰਗਠਨਾਂ ਨਾਲ ਜੁੜੇ ਹੋਏ ਹਨ ਜਾਂ ਕਿਸੇ ਵੀ ਤਰ੍ਹਾਂ ਦੀ ਦੇਸ਼ ਵਿਰੋਧੀ ਗਤੀਵਿਧੀ ਵਿੱਚ ਸ਼ਾਮਲ ਹਨ। ਮਾਮਲੇ ਦੀ ਜਾਂਚ ਅਜੇ ਜਾਰੀ ਹੈ।

ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਬੀਤੀ 10 ਮਈ ਨੂੰ ਵੀ ਸੋਪੋਰ ਪੁਲਿਸ ਨੇ ਇੱਕ ਵੱਡੀ ਕਾਰਵਾਈ ਕਰਦਿਆਂ ਇੱਕ ਮੁਲਜ਼ਮ ਦੀ ਲਗਭਗ 20 ਲੱਖ ਰੁਪਏ ਦੀ ਜਾਇਦਾਦ ਜ਼ਬਤ ਕੀਤੀ ਸੀ। ਇਹ ਜਾਇਦਾਦ ਬਾਂਦੀਪੋਰਾ ਜ਼ਿਲ੍ਹੇ ਦੇ ਕੇਹਨੂਸਾ ਖੇਤਰ ਵਿੱਚ 10 ਮਰਲੇ ਜ਼ਮੀਨ ਦੇ ਰੂਪ ਵਿੱਚ ਸੀ। ਪੁਲਿਸ ਅਨੁਸਾਰ, ਇਸ ਮੁਲਜ਼ਮ ਦੀ ਪਛਾਣ ਮਾਜਿਦ ਅਹਿਮਦ ਸੋਫੀ (ਉਰਫ਼ ਬਿਸਾਤੀ) ਵਜੋਂ ਹੋਈ ਹੈ, ਜੋ ਸੋਪੋਰ ਦੀ ਨਿਊ ਕਲੋਨੀ ਦਾ ਨਿਵਾਸੀ ਹੈ। ਜਾਂਚ ਵਿੱਚ ਸਾਹਮਣੇ ਆਇਆ ਸੀ ਕਿ ਉਹ ਫਿਲਹਾਲ ਪਾਕਿਸਤਾਨ ਅਤੇ ਪੀ.ਓ.ਕੇ. (PoK) ਵਿੱਚ ਬੈਠ ਕੇ ਉੱਥੋਂ ਅੱਤਵਾਦੀ ਗਤੀਵਿਧੀਆਂ ਦਾ ਸੰਚਾਲਨ ਕਰ ਰਿਹਾ ਹੈ ਅਤੇ ਪਾਬੰਦੀਸ਼ੁਦਾ ਅੱਤਵਾਦੀ ਸੰਗਠਨ 'ਹਿਜ਼ਬੁਲ ਮੁਜਾਹਿਦੀਨ' ਨਾਲ ਜੁੜਿਆ ਹੋਇਆ ਹੈ।