ਦੀਪਿਕਾ ਪਾਦੂਕੋਣ ਬਣੀ ਭਾਰਤ ਦੀ ਪਹਿਲੀ 'ਮੈਂਟਲ ਹੈਲਥ ਅੰਬੈਸਡਰ', ਸਿਹਤ ਮੰਤਰਾਲੇ ਨੇ ਸੌਂਪੀ ਅਹਿਮ ਜ਼ਿੰਮੇਵਾਰੀ

ਬਾਲੀਵੁੱਡ ਦੀ ਸੁਪਰਸਟਾਰ ਦੀਪਿਕਾ ਪਾਦੂਕੋਣ ਨੂੰ ਦੇਸ਼ ਦੇ ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਦੁਆਰਾ ਭਾਰਤ ਦੀ ਪਹਿਲੀ 'ਮੈਂਟਲ ਹੈਲਥ ਅੰਬੈਸਡਰ' ਚੁਣਿਆ ਗਿਆ ਹੈ। ਇਹ ਇੱਕ ਵੱਡਾ ਕਦਮ ਹੈ, ਜੋ ਸਮਾਜ ਵਿੱਚ ਮਾਨਸਿਕ ਸਿਹਤ ਪ੍ਰਤੀ ਜਾਗਰੂਕਤਾ ਫੈਲਾਉਣ ਅਤੇ ਇਸ ਮੁੱਦੇ ਨੂੰ ਜਨਤਕ ਸਿਹਤ ਦਾ ਇੱਕ ਅਹਿਮ ਹਿੱਸਾ ਬਣਾਉਣ ਦੀ ਦਿਸ਼ਾ ਵਿੱਚ ਮਹੱਤਵਪੂਰਨ ਮੰਨਿਆ ਜਾ ਰਿਹਾ ਹੈ।

ਐਕਟਰ ਅਤੇ 'ਦ ਲੀਵ ਲਵ ਲਾਫ' (LLL) ਫਾਊਂਡੇਸ਼ਨ ਦੀ ਸੰਸਥਾਪਕ ਦੀਪਿਕਾ ਪਾਦੂਕੋਣ ਨੂੰ ਕੇਂਦਰ ਸਰਕਾਰ ਦੇ ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ (MoHFW) ਦੁਆਰਾ ਦੇਸ਼ ਦੀ ਪਹਿਲੀ 'ਮਾਨਸਿਕ ਸਿਹਤ ਅੰਬੈਸਡਰ' ਚੁਣਿਆ ਗਿਆ ਹੈ। ਇਹ ਕਦਮ ਮੰਤਰਾਲੇ ਦੁਆਰਾ ਦੇਸ਼ ਵਿੱਚ ਮੈਂਟਲ ਹੈਲਥ ਲਈ ਹੋਰ ਜ਼ਿਆਦਾ ਸਹੀ ਮਾਹੌਲ ਬਣਾਉਣ ਦੀ ਦਿਸ਼ਾ ਵਿੱਚ ਇੱਕ ਮਹੱਤਵਪੂਰਨ ਕਦਮ ਹੈ।

ਇਸ ਮੌਕੇ 'ਤੇ ਜੇਪੀ ਨੱਡਾ, ਕੇਂਦਰੀ ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰੀ, ਨੇ ਕਿਹਾ, 'ਦੀਪਿਕਾ ਪਾਦੂਕੋਣ ਨਾਲ ਇਹ ਸਾਂਝੇਦਾਰੀ ਭਾਰਤ ਵਿੱਚ ਮੈਂਟਲ ਹੈਲਥ ਦੇ ਮੁੱਦਿਆਂ ਬਾਰੇ ਜਾਗਰੂਕਤਾ ਫੈਲਾਉਣ, ਇਹਨਾਂ ਵਿਸ਼ਿਆਂ 'ਤੇ ਆਮ ਚਰਚਾ ਨੂੰ ਉਤਸ਼ਾਹਿਤ ਕਰਨ ਅਤੇ ਮੈਂਟਲ ਹੈਲਥ ਨੂੰ ਪਬਲਿਕ ਹੈਲਥ ਦਾ ਇੱਕ ਅਹਿਮ ਹਿੱਸਾ ਦੱਸਣ ਵਿੱਚ ਮਦਦ ਕਰੇਗੀ।'

ਦੀਪਿਕਾ ਪਾਦੂਕੋਣ ਨੇ ਇਸ ਬਾਰੇ ਗੱਲ ਕਰਦੇ ਹੋਏ ਕਿਹਾ, 'ਮੈਨੂੰ ਕੇਂਦਰੀ ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਲਈ ਪਹਿਲੀ ਵਾਰ ਮਾਨਸਿਕ ਸਿਹਤ ਅੰਬੈਸਡਰ ਬਣਨ ਦਾ ਬਹੁਤ ਵੱਡਾ ਮਾਣ ਮਿਲਿਆ ਹੈ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਵਿੱਚ, ਭਾਰਤ ਨੇ ਮੈਂਟਲ ਹੈਲਥ ਦੀ ਦੇਖਭਾਲ ਨੂੰ ਤਰਜੀਹ ਦਿੱਤੀ ਹੈ। ਮੈਂ ਮੰਤਰਾਲੇ ਦੇ ਨਾਲ ਮਿਲ ਕੇ ਇਸ ਕੰਮ ਨੂੰ ਅੱਗੇ ਵਧਾਉਣ ਅਤੇ ਸਾਡੇ ਦੇਸ਼ ਦੀ ਮੈਂਟਲ ਹੈਲਥ ਨੂੰ ਮਜ਼ਬੂਤ ਕਰਨ ਲਈ ਤਿਆਰ ਹਾਂ।'

ਆਪਣੇ ਨਵੇਂ ਰੋਲ ਵਿੱਚ, ਦੀਪਿਕਾ ਪਾਦੂਕੋਣ ਮੰਤਰਾਲੇ ਦੇ ਨਾਲ ਮਿਲ ਕੇ ਇਹ ਕੰਮ ਕਰੇਗੀ:

•  ਮੈਂਟਲ ਹੈਲਥ ਬਾਰੇ ਜਾਗਰੂਕਤਾ ਵਧਾਉਣਾ ਅਤੇ ਇਸ ਨਾਲ ਜੁੜੀਆਂ ਗਲਤ ਧਾਰਨਾਵਾਂ ਨੂੰ ਦੂਰ ਕਰਨਾ।
• ਲੋਕਾਂ ਨੂੰ ਮਦਦ ਲੈਣ ਅਤੇ ਰੋਕਥਾਮ ਦੇ ਉਪਾਅ ਅਪਨਾਉਣ ਲਈ ਉਤਸ਼ਾਹਿਤ ਕਰਨਾ।
•  ਟੈਲੀ-MANAS (Tele-Mental Health Assistance and Networking Across States) ਅਤੇ ਦੂਸਰੇ ਸਰਕਾਰ ਦੁਆਰਾ ਲਾਗੂ ਕੀਤੇ ਗਏ ਮੈਂਟਲ ਹੈਲਥ ਸਰੋਤਾਂ ਨੂੰ ਉਤਸ਼ਾਹਿਤ ਕਰਨਾ।

ਇਸ ਦੇ ਨਾਲ ਹੀ ਉਹ ਕੇਂਦਰੀ ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਦੇ ਨਾਲ ਮਿਲ ਕੇ ਇਹ ਕੰਮ ਕਰੇਗੀ ਕਿ ਹਰ ਕਿਸੇ ਨੂੰ ਮੈਂਟਲ ਹੈਲਥ ਦੀ ਮਦਦ ਅਤੇ ਸਹੂਲਤ ਆਸਾਨੀ ਨਾਲ ਮਿਲ ਸਕੇ। ਇਹ ਨਿਯੁਕਤੀ ਅਜਿਹੇ ਸਮੇਂ ਹੋਈ ਹੈ ਜਦੋਂ ਦੀਪਿਕਾ ਪਾਦੂਕੋਣ ਦੀ ਮਦਦ ਕਰਨ ਵਾਲੀ ਸੰਸਥਾ, 'ਦ ਲੀਵ ਲਵ ਲਾਫ' ਫਾਊਂਡੇਸ਼ਨ, 10 ਸਾਲ ਦਾ ਸਫ਼ਰ ਪੂਰਾ ਕਰ ਚੁੱਕੀ ਹੈ ਅਤੇ ਇਸ ਦੌਰਾਨ ਉਸ ਨੇ ਲੋਕਾਂ ਦੀ ਮਦਦ ਕੀਤੀ ਹੈ।

ਲਿਵ ਲਵ ਲਾਫ' ਨੇ ਕੀਤੇ ਹਨ ਕਿੰਨੇ ਕੰਮ

ਪਿਛਲੇ ਦਸ ਸਾਲਾਂ ਵਿੱਚ, 'ਲਿਵ ਲਵ ਲਾਫ' ਨੇ ਆਪਣੇ ਮੁੱਖ ਰੂਰਲ ਕਮਿਊਨਿਟੀ ਮੈਂਟਲ ਹੈਲਥ ਪ੍ਰੋਗਰਾਮ ਰਾਹੀਂ 8 ਰਾਜਾਂ ਦੇ 15 ਜ਼ਿਲ੍ਹਿਆਂ ਵਿੱਚ 21,931 ਤੋਂ ਵੱਧ ਮਾਨਸਿਕ ਰੋਗੀਆਂ ਅਤੇ ਉਹਨਾਂ ਦੀ ਦੇਖਭਾਲ ਕਰਨ ਵਾਲਿਆਂ ਦੀ ਮਦਦ ਕੀਤੀ ਹੈ। LLL ਨੇ ਦੇਸ਼ ਭਰ ਵਿੱਚ ਨਵੀਆਂ ਅਤੇ ਅਹਿਮ ਜਾਗਰੂਕਤਾ ਮੁਹਿੰਮਾਂ ਵੀ ਚਲਾਈਆਂ ਹਨ, ਜਿਵੇਂ 'ਦੁਬਾਰਾ ਪੁੱਛੋ' ਅਤੇ #NotAshamed ਦੇ ਨਾਲ ਹੀ ਟੀਨੇਜ ਵਿਦਿਆਰਥੀਆਂ ਲਈ You Are Not Alone ਅਤੇ ਆਮ ਡਾਕਟਰਾਂ ਲਈ 'ਡਾਕਟਰਸ ਪ੍ਰੋਗਰਾਮ' ਵੀ ਚਲਾਏ ਹਨ। ਹਾਲ ਹੀ ਵਿੱਚ LLL ਨੇ ਕੰਪਨੀਆਂ ਲਈ ਮੈਂਟਲ ਹੈਲਥ ਅਤੇ ਵੈੱਲ ਬੀਇੰਗ ਪ੍ਰੋਗਰਾਮ ਵੀ ਸ਼ੁਰੂ ਕੀਤਾ ਹੈ।