ਤਾਜਾ ਖਬਰਾਂ
ਵਾਸ਼ਿੰਗਟਨ: ਅਮਰੀਕਾ ਦੀ ਅੰਦਰੂਨੀ ਸੁਰੱਖਿਆ ਅਤੇ ਸਾਈਬਰ ਪ੍ਰਣਾਲੀ ਨੂੰ ਇੱਕ ਵਾਰ ਫਿਰ ਵੱਡੀ ਚੁਣੌਤੀ ਦਾ ਸਾਹਮਣਾ ਕਰਨਾ ਪਿਆ ਹੈ। ਹੈਕਰਾਂ ਨੇ ਫੈਡਰਲ ਬਿਊਰੋ ਆਫ਼ ਇਨਵੈਸਟੀਗੇਸ਼ਨ (FBI) ਦੇ ਸਭ ਤੋਂ ਅਹਿਮ 'ਨੈਸ਼ਨਲ ਕ੍ਰਾਈਮ ਇਨਫਰਮੇਸ਼ਨ ਸੈਂਟਰ' (NCIC) ਡੇਟਾਬੇਸ ਵਿੱਚ ਸੰਨ੍ਹ ਲਗਾ ਕੇ ਸੰਵੇਦਨਸ਼ੀਲ ਜਾਣਕਾਰੀ ਨੂੰ ਨਿਸ਼ਾਨਾ ਬਣਾਇਆ ਹੈ। ਬੀਤੇ ਕੁਝ ਮਹੀਨਿਆਂ ਦੌਰਾਨ ਅਮਰੀਕੀ ਅਪਰਾਧਿਕ ਰਿਕਾਰਡਾਂ 'ਤੇ ਹੋਇਆ ਇਹ ਦੂਜਾ ਵੱਡਾ ਸਾਈਬਰ ਹਮਲਾ ਹੈ। ਇਹ ਘਟਨਾ ਅਜਿਹੇ ਨਾਜ਼ੁਕ ਦੌਰ ਵਿੱਚ ਵਾਪਰੀ ਹੈ ਜਦੋਂ ਅਮਰੀਕੀ ਸਰਕਾਰ ਬੈਂਕਿੰਗ ਅਤੇ ਬੁਨਿਆਦੀ ਢਾਂਚੇ ਵਿੱਚ ਆਈਆਂ ਤਕਨੀਕੀ ਖ਼ਰਾਬੀਆਂ ਤੋਂ ਬਾਅਦ ਲੋਕਾਂ ਦਾ ਭਰੋਸਾ ਮੁੜ ਜਿੱਤਣ ਦੀ ਕੋਸ਼ਿਸ਼ ਕਰ ਰਹੀ ਹੈ।
NCIC ਡੇਟਾਬੇਸ ਨੂੰ ਅਮਰੀਕੀ ਕਾਨੂੰਨ ਵਿਵਸਥਾ ਦੀ ਰੀੜ੍ਹ ਦੀ ਹੱਡੀ ਮੰਨਿਆ ਜਾਂਦਾ ਹੈ। ਦੇਸ਼ ਭਰ ਦੀਆਂ ਕੇਂਦਰੀ, ਸੂਬਾਈ ਅਤੇ ਸਥਾਨਕ ਪੁਲਿਸ ਏਜੰਸੀਆਂ ਰੋਜ਼ਾਨਾ ਇਸੇ ਡੇਟਾਬੇਸ 'ਤੇ ਨਿਰਭਰ ਕਰਦੀਆਂ ਹਨ। ਇਸ ਵਿੱਚ ਭਗੌੜੇ ਅਪਰਾਧੀਆਂ, ਚੋਰੀ ਹੋਏ ਸਾਮਾਨ, ਅਦਾਲਤੀ ਵਾਰੰਟਾਂ ਅਤੇ ਪਿਛੋਕੜ ਦੀ ਜਾਂਚ ਨਾਲ ਜੁੜਿਆ ਬੇਹੱਦ ਗੁਪਤ ਰਿਕਾਰਡ ਦਰਜ ਹੁੰਦਾ ਹੈ। ਜਾਂਚ ਨਾਲ ਜੁੜੇ ਸੂਤਰਾਂ ਦਾ ਮੰਨਣਾ ਹੈ ਕਿ ਇਸ ਸਾਈਬਰ ਉਲੰਘਣਾ ਕਾਰਨ ਵੱਖ-ਵੱਖ ਸੁਰੱਖਿਆ ਏਜੰਸੀਆਂ ਵਿਚਾਲੇ ਹੁੰਦੇ ਅਹਿਮ ਜਾਣਕਾਰੀ ਦੇ ਲੈਣ-ਦੇਣ ਵਿੱਚ ਵੱਡੀ ਰੁਕਾਵਟ ਪੈਦਾ ਹੋ ਸਕਦੀ ਹੈ।
ਮਾਮਲਾ ਸਾਹਮਣੇ ਆਉਣ ਤੋਂ ਬਾਅਦ FBI ਡਾਇਰੈਕਟਰ ਕਸ਼ ਪਟੇਲ ਨੇ ਮੀਡੀਆ ਸਾਹਮਣੇ ਏਜੰਸੀ ਦੀ ਸਾਈਬਰ ਸੁਰੱਖਿਆ ਕਾਰਗੁਜ਼ਾਰੀ ਦਾ ਬਚਾਅ ਕੀਤਾ। ਉਨ੍ਹਾਂ ਨੇ 'ਆਪ੍ਰੇਸ਼ਨ ਵਿੰਟਰ ਸ਼ੀਲਡ' ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਇਸ ਤਹਿਤ ਕੰਪਨੀਆਂ ਦੇ ਸਿਸਟਮ ਅਪਡੇਟ ਕਰਕੇ ਹੈਕਰਾਂ ਨੂੰ ਰੋਕਣ ਦਾ ਕੰਮ ਕੀਤਾ ਗਿਆ ਹੈ, ਹਾਲਾਂਕਿ ਇਹ ਮੁਹਿੰਮ ਮਹੀਨੇ ਪਹਿਲਾਂ ਹੀ ਖ਼ਤਮ ਹੋ ਚੁੱਕੀ ਸੀ। ਪਟੇਲ ਨੇ ਮੌਜੂਦਾ ਪ੍ਰਸ਼ਾਸਨ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਬੁਨਿਆਦੀ ਢਾਂਚੇ ਨੂੰ ਸੁਰੱਖਿਅਤ ਕਰਨ ਲਈ ਸਿਸਟਮ ਅਪਗ੍ਰੇਡ ਕੀਤੇ ਜਾ ਰਹੇ ਹਨ, ਜਦਕਿ ਪਿਛਲੀਆਂ ਸਰਕਾਰਾਂ ਨੇ ਇਸ ਪਾਸੇ ਕੋਈ ਧਿਆਨ ਨਹੀਂ ਦਿੱਤਾ।
FBI ਦੇ ਸਾਈਬਰ ਘੇਰੇ ਟੁੱਟਣ ਦਾ ਇਹ ਕੋਈ ਪਹਿਲਾ ਮਾਮਲਾ ਨਹੀਂ ਹੈ:
ਸਤੰਬਰ ਦੀ ਘਟਨਾ: ਇਸੇ ਸਾਲ ਸਤੰਬਰ ਵਿੱਚ 'ਸ਼ਾਈਨੀਹੰਟਰਸ' ਨਾਮਕ ਹੈਕਰ ਗਰੁੱਪ ਨੇ FBI ਦੀ ਭਰਤੀ ਵੈੱਬਸਾਈਟ ਹੈਕ ਕਰਕੇ ਮੁਲਾਜ਼ਮਾਂ ਦਾ ਨਿੱਜੀ ਡੇਟਾ ਚੋਰੀ ਕਰ ਲਿਆ ਸੀ। ਇਸ ਮਾਮਲੇ ਵਿੱਚ ਇੱਕ ਕੈਨੇਡੀਅਨ ਸਾਈਬਰ ਖੋਜਕਰਤਾ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਸਮੇਂ ਸਿਰ ਜਾਣਕਾਰੀ ਨਾ ਮਿਲਣ ਕਾਰਨ ਏਜੰਸੀ ਦੇ ਮੁਲਾਜ਼ਮਾਂ ਵਿੱਚ ਕਾਫ਼ੀ ਰੋਸ ਪਾਇਆ ਗਿਆ ਸੀ।
2023 ਦਾ ਹਮਲਾ: ਸਾਲ 2023 ਦੇ ਸ਼ੁਰੂ ਵਿੱਚ ਵੀ ਹੈਕਰਾਂ ਨੇ FBI ਦੇ ਨਿਊਯਾਰਕ ਦਫ਼ਤਰ ਦੇ ਕੰਪਿਊਟਰ ਸਿਸਟਮ ਵਿੱਚ ਘੁਸਪੈਠ ਕੀਤੀ ਸੀ, ਜਿੱਥੇ ਬਾਲ ਸ਼ੋਸ਼ਣ ਅਤੇ ਜੈਫਰੀ ਐਪਸਟਾਈਨ ਕੇਸ ਨਾਲ ਸਬੰਧਤ ਅਹਿਮ ਫਾਈਲਾਂ ਮੌਜੂਦ ਸਨ।
ਅਮਰੀਕੀ ਅਦਾਰੇ ਇਸ ਵੇਲੇ ਲਗਾਤਾਰ ਤਕਨੀਕੀ ਚੁਣੌਤੀਆਂ ਦਾ ਸਾਹਮਣਾ ਕਰ ਰਹੇ ਹਨ। ਹਾਲ ਹੀ ਵਿੱਚ ਪ੍ਰਮੁੱਖ ਬੈਂਕਾਂ, ਨੈਸ਼ਨਲ ਸਕਿਓਰਿਟੀ ਏਜੰਸੀ (NSA) ਅਤੇ ਫੈਡਰਲ ਐਵੀਏਸ਼ਨ ਐਡਮਿਨਿਸਟ੍ਰੇਸ਼ਨ (FAA) ਦੇ ਹਵਾਈ ਆਵਾਜਾਈ ਕੰਟਰੋਲ ਸਿਸਟਮ ਵਿੱਚ ਵੀ ਵੱਡੀਆਂ ਤਕਨੀਕੀ ਰੁਕਾਵਟਾਂ ਦੇਖਣ ਨੂੰ ਮਿਲੀਆਂ ਸਨ। ਦੇਸ਼ ਦੇ ਕੇਂਦਰੀ ਡੇਟਾਬੇਸ ਵਿੱਚ ਵਾਰ-ਵਾਰ ਲੱਗ ਰਹੀ ਸੰਨ੍ਹ ਨੇ ਅਮਰੀਕੀ ਸਰਕਾਰ ਅਤੇ ਨਿੱਜੀ ਖੇਤਰ ਦੀ ਸਾਈਬਰ ਸੁਰੱਖਿਆ ਸਮਰੱਥਾ 'ਤੇ ਵੱਡੇ ਸਵਾਲੀਆ ਨਿਸ਼ਾਨ ਲਗਾ ਦਿੱਤੇ ਹਨ।
Get all latest content delivered to your email a few times a month.