ਯੂਪੀ ਦੀ ਰਾਜਧਾਨੀ 'ਚ ਟ੍ਰਿਪਲ ਮਰਡਰ, ਪੀੜਤ ਪਰਿਵਾਰ ਨੂੰ ਮਿਲੇ ‘‘ਆਪ’’ ਸੰਸਦ ਮੈਂਬਰ ਸੰਜੇ ਸਿੰਘ

ਨਵੀਂ ਦਿੱਲੀ, 26 ਅਕਤੂਬਰ-

ਉੱਤਰ ਪ੍ਰਦੇਸ਼ ਦੀ ਰਾਜਧਾਨੀ ਲਖਨਊ ਵਿੱਚ ਦਿਨ-ਦਿਹਾੜੇ ਤਿੰਨ ਲੋਕਾਂ ਦੇ ਬੇਰਹਿਮੀ ਨਾਲ ਕੀਤੇ ਗਏ ਕਤਲ ਨੇ ਯੋਗੀ ਸਰਕਾਰ ਦੀ ਤਬਾਹ ਹੋ ਚੁੱਕੀ ਕਾਨੂੰਨ-ਵਿਵਸਥਾ ਦੀ ਪੋਲ ਖੋਲ੍ਹ ਦਿੱਤੀ ਹੈ। ਆਮ ਆਦਮੀ ਪਾਰਟੀ ਦੇ ਸੰਸਦ ਮੈਂਬਰ ਅਤੇ ਯੂਪੀ ਇੰਚਾਰਜ ਸੰਜੇ ਸਿੰਘ ਨੇ ਸੋਮਵਾਰ ਨੂੰ ਪੀੜਤ ਪਰਿਵਾਰ ਨਾਲ ਮੁਲਾਕਾਤ ਕਰਕੇ ਉਨ੍ਹਾਂ ਦਾ ਦੁੱਖ ਸਾਂਝਾ ਕੀਤਾ ਅਤੇ ਯੂਪੀ ਦੀ ਬਦਹਾਲ ਕਾਨੂੰਨ-ਵਿਵਸਥਾ 'ਤੇ ਭਾਜਪਾ 'ਤੇ ਤਿੱਖੇ ਹਮਲੇ ਕੀਤੇ। ਉਨ੍ਹਾਂ ਭਾਜਪਾ ਅਤੇ ਸੀਐੱਮ ਯੋਗੀ ਆਦਿੱਤਿਆਨਾਥ ਨੂੰ ਕਿਹਾ ਕਿ ਲਖਨਊ ਵਿੱਚ ਦਿਨ-ਦਿਹਾੜੇ ਟ੍ਰਿਪਲ ਮਰਡਰ ਹੋ ਗਿਆ, ਤੁਹਾਡੀ ਕਾਨੂੰਨ-ਵਿਵਸਥਾ ਕਿੱਥੇ ਹੈ? ਦਿੱਲੀ ਵਾਂਗ ਹੀ ਹੁਣ ਉੱਤਰ ਪ੍ਰਦੇਸ਼ ਵਿੱਚ ਵੀ ਸਰੇਆਮ ਕਤਲ ਹੋ ਰਹੇ ਹਨ। ਭਾਜਪਾ ਸ਼ਾਸਤ ਸਾਰੇ ਸੂਬਿਆਂ ਵਿੱਚ ਕਾਨੂੰਨ-ਵਿਵਸਥਾ ਲੀਰ-ਲੀਰ ਹੈ ਅਤੇ ਆਏ ਦਿਨ ਕਤਲ ਦੀਆਂ ਘਟਨਾਵਾਂ ਵਾਪਰ ਰਹੀਆਂ ਹਨ। ਉਨ੍ਹਾਂ ਭਾਜਪਾ ਤੋਂ ਪੁੱਛਿਆ ਕਿ ਵਿਰੋਧੀ ਧਿਰ ਸ਼ਾਸਤ ਸੂਬਿਆਂ ਵਿੱਚ ਇੱਕ ਘਟਨਾ ਹੋਣ 'ਤੇ ਰੌਲਾ ਪਾਉਣ ਵਾਲੀ ਭਾਜਪਾ ਲਖਨਊ ਦੀ ਘਟਨਾ 'ਤੇ ਚੁੱਪ ਕਿਉਂ ਹੈ?

ਸੋਮਵਾਰ ਨੂੰ ਇੱਕ ਪ੍ਰੈੱਸ ਕਾਨਫਰੰਸ ਦੌਰਾਨ ਸੰਜੇ ਸਿੰਘ ਨੇ ਕਿਹਾ ਕਿ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਇੱਕ ਮਜ਼ਬੂਤ ਕਾਨੂੰਨ-ਵਿਵਸਥਾ ਦੀ ਗੱਲ ਕਰਦੇ ਹਨ ਅਤੇ ਕਹਿੰਦੇ ਹਨ ਕਿ ਯੂਪੀ ਵਿੱਚ ਅਪਰਾਧੀ ਉਨ੍ਹਾਂ ਤੋਂ ਥਰ-ਥਰ ਕੰਬਦੇ ਹਨ। ਕਿਸੇ ਵੀ ਅਪਰਾਧੀ ਦੀ ਸਿਰ ਚੁੱਕ ਕੇ ਚੱਲਣ ਦੀ ਹਿੰਮਤ ਨਹੀਂ ਹੈ। ਪਰ ਇਸੇ ਰਾਜਧਾਨੀ ਲਖਨਊ ਦੇ ਅੰਦਰ ਸ਼ਿਵਾ ਸ਼ਰਮਾ ਦਾ ਮਾਮਲਾ ਹੋਇਆ ਅਤੇ ਹੁਣ ਤਿੰਨ ਲੋਕਾਂ ਦਾ ਕਤਲ ਹੋ ਗਿਆ। ਸ਼ਰਧਾ ਦੁਬੇ ਦਾ ਮਾਮਲਾ ਤਾਂ ਚੱਲ ਹੀ ਰਿਹਾ ਸੀ। ਲਖਨਊ ਦੇ ਸਆਦਤਗੰਜ ਇਲਾਕੇ ਵਿੱਚ ਜ਼ਮੀਨੀ ਵਿਵਾਦ ਨੂੰ ਲੈ ਕੇ ਐਤਵਾਰ ਰਾਤ ਤੋਂ ਥਾਣੇ ਵਿੱਚ ਮਾਮਲਾ ਚੱਲ ਰਿਹਾ ਸੀ ਅਤੇ ਇਸ ਵਿੱਚ ਸ਼ਿਵਾ ਤਿਵਾੜੀ, ਸੂਰਿਆੰਸ਼ ਤਿਵਾੜੀ ਅਤੇ ਸ਼ਿਵੇਂਦਰ ਤਿਵਾੜੀ ਦਾ ਦਿਨ-ਦਿਹਾੜੇ ਕਤਲ ਕਰ ਦਿੱਤਾ ਗਿਆ। ਯੋਗੀ ਜੀ ਦੀ ਕਾਨੂੰਨ-ਵਿਵਸਥਾ ਕਿੱਥੇ ਹੈ?

ਸੰਜੇ ਸਿੰਘ ਨੇ ਕਿਹਾ ਕਿ ਦੇਸ਼ ਦੇ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਤਾਂ ਪੰਜਾਬ ਵਿੱਚ ਕਾਨੂੰਨ-ਵਿਵਸਥਾ ਠੀਕ ਕਰਨ ਜਾ ਰਹੇ ਹਨ। ਗੌਰਵ ਭਾਟੀਆ ਦਿੱਲੀ ਵਿੱਚ ਪ੍ਰੈੱਸ ਕਾਨਫਰੰਸ ਕਰਕੇ ਕਹਿੰਦੇ ਹਨ ਕਿ ਉਹ ਪੰਜਾਬ ਵਿੱਚ ਕਾਨੂੰਨ-ਵਿਵਸਥਾ ਠੀਕ ਕਰਨਗੇ। ਉੱਥੇ ਕੋਈ ਇੱਕ ਘਟਨਾ ਵਾਪਰ ਜਾਂਦੀ ਹੈ, ਤਾਂ ਉਸ ਨੂੰ ਲੈ ਕੇ ਇਹ ਲੋਕ ਰੌਲਾ ਪਾਉਂਦੇ ਹਨ। ਪਰ ਇਹਨਾਂ ਦੀ ਨੱਕ ਹੇਠ ਉੱਤਰ ਪ੍ਰਦੇਸ਼ ਦੀ ਰਾਜਧਾਨੀ ਲਖਨਊ ਵਿੱਚ ਦਿਨ-ਦਿਹਾੜੇ ਤਿੰਨ-ਤਿੰਨ ਕਤਲ ਹੋ ਗਏ, ਇਸ ਦਾ ਇਹਨਾਂ ਕੋਲ ਕੋਈ ਜਵਾਬ ਨਹੀਂ ਹੈ। ਇਹ ਕਿਹੜੀ ਕਾਨੂੰਨ-ਵਿਵਸਥਾ ਹੈ? ਉੱਤਰ ਪ੍ਰਦੇਸ਼ ਵਿੱਚ ਲਗਾਤਾਰ ਇੱਕ ਤੋਂ ਬਾਅਦ ਦੂਜੀ ਅਤੇ ਦੂਜੀ ਤੋਂ ਬਾਅਦ ਤੀਜੀ ਕਤਲ ਦੀ ਘਟਨਾ ਵਾਪਰ ਰਹੀ ਹੈ, ਪਰ ਭਾਜਪਾ ਦੇ ਲੋਕਾਂ ਦਾ ਦਿਮਾਗ ਸਿਰਫ਼ ਚੋਣਾਂ ਦੀ ਗੜਬੜੀ ਵਿੱਚ ਚੱਲਦਾ ਹੈ।

ਸੰਜੇ ਸਿੰਘ ਨੇ ਕਿਹਾ ਕਿ ਅਜੇ ਐੱਮਐੱਲਸੀ ਦੀਆਂ ਚੋਣਾਂ ਹੋਈਆਂ ਹਨ, ਜਿਨ੍ਹਾਂ ਵਿੱਚ ਐੱਮਐੱਲਸੀ ਉਮੀਦਵਾਰਾਂ ਨਾਲ ਬਦਤਮੀਜ਼ੀ ਅਤੇ ਬਦਸਲੂਕੀ ਹੋਈ ਹੈ। ਗੋਰਖਪੁਰ ਖੇਤਰ ਤੋਂ ਸੰਜੇ ਤ੍ਰਿਪਾਠੀ ਚੋਣ ਲੜ ਰਹੇ ਹਨ ਅਤੇ ਉੱਥੇ ਵੋਟਾਂ ਦੀ ਗਿਣਤੀ ਲਈ ਅਭੈ ਸਿੰਘ ਨੂੰ ਆਬਜ਼ਰਵਰ ਬਣਾਇਆ ਗਿਆ ਹੈ। ਅਭੈ ਸਿੰਘ ਮਾਈਨਿੰਗ ਮਾਫੀਆ ਤੋਂ ਰਿਸ਼ਵਤ ਲੈਣ ਦੇ ਮਾਮਲੇ ਵਿੱਚ ਖੁਦ ਸੀਬੀਆਈ ਜਾਂਚ ਦੇ ਘੇਰੇ ਵਿੱਚ ਹੈ ਅਤੇ ਮੁਲਜ਼ਮ ਹੈ। ਅਜਿਹੇ ਭ੍ਰਿਸ਼ਟਾਚਾਰ ਦੇ ਮੁਲਜ਼ਮ ਵਿਅਕਤੀ ਨੂੰ ਬਠਾ ਕੇ ਇਹ ਲੋਕ ਮੰਗਲਵਾਰ ਦੀ ਵੋਟਾਂ ਦੀ ਗਿਣਤੀ ਵਿੱਚ ਗੜਬੜੀ ਕਰਨਾ ਚਾਹੁੰਦੇ ਹਨ, ਅਜਿਹੀ ਸਾਨੂੰ ਜਾਣਕਾਰੀ ਮਿਲੀ ਹੈ।