ਮੋਹਾਲੀ ਸੜਕ ਹਾਦਸੇ ’ਚ ਜਾਨ ਗੁਆਉਣ ਵਾਲੀ ਮਹਿਲਾ ਦੇ ਪਰਿਵਾਰ ਨੂੰ ਮਿਲੇਗਾ 13.18 ਲੱਖ ਰੁਪਏ ਮੁਆਵਜ਼ਾ

ਮੋਹਾਲੀ ਵਿੱਚ ਸੜਕ ਹਾਦਸੇ ਦੌਰਾਨ ਜਾਨ ਗੁਆਉਣ ਵਾਲੀ 52 ਸਾਲਾ ਮਨਜੀਤ ਕੌਰ ਦੇ ਪਰਿਵਾਰ ਨੂੰ ਮੋਟਰ ਐਕਸੀਡੈਂਟ ਕਲੇਮਜ਼ ਟ੍ਰਿਬਿਊਨਲ (MACT) ਵੱਲੋਂ ਵੱਡੀ ਰਾਹਤ ਦਿੱਤੀ ਗਈ ਹੈ। ਟ੍ਰਿਬਿਊਨਲ ਨੇ ਬੀਮਾ ਕੰਪਨੀ ਨੂੰ ਪੀੜਤ ਪਰਿਵਾਰ ਦੇ ਹੱਕ ਵਿੱਚ 13 ਲੱਖ 18 ਹਜ਼ਾਰ 900 ਰੁਪਏ ਮੁਆਵਜ਼ਾ ਜਾਰੀ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਇਸ ਰਕਮ ’ਤੇ ਕੇਸ ਦਾਇਰ ਕਰਨ ਦੀ ਮਿਤੀ ਤੋਂ ਅਦਾਇਗੀ ਹੋਣ ਤੱਕ 7.5 ਫ਼ੀਸਦੀ ਸਾਲਾਨਾ ਵਿਆਜ ਵੀ ਦੇਣਾ ਪਵੇਗਾ। ਪਰਿਵਾਰ 

ਇਹ ਹਾਦਸਾ 25 ਅਪ੍ਰੈਲ 2025 ਨੂੰ ਵਾਪਰਿਆ ਸੀ। ਜਾਣਕਾਰੀ ਅਨੁਸਾਰ ਮਨਜੀਤ ਕੌਰ ਸਵੇਰੇ ਕਰੀਬ 7 ਵਜੇ ਮੋਹਾਲੀ ਦੇ ਟੀ.ਡੀ.ਆਈ. ਸਿਟੀ ਇਲਾਕੇ ਵਿੱਚ ਘਰਾਂ ਵਿੱਚ ਕੰਮ ਕਰਨ ਲਈ ਪੈਦਲ ਜਾ ਰਹੀ ਸੀ। ਇਸ ਦੌਰਾਨ ਇੱਕ ਕਾਰ ਨੇ ਪਿੱਛਿਓਂ ਉਸ ਨੂੰ ਟੱਕਰ ਮਾਰ ਦਿੱਤੀ, ਜਿਸ ਕਾਰਨ ਉਹ ਗੰਭੀਰ ਜ਼ਖ਼ਮੀ ਹੋ ਗਈ। ਉਸ ਨੂੰ ਤੁਰੰਤ ਸਿਵਲ ਹਸਪਤਾਲ ਮੋਹਾਲੀ ਲਿਜਾਇਆ ਗਿਆ, ਪਰ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ। ਇਸ ਮਾਮਲੇ ਵਿੱਚ ਥਾਣਾ ਸੋਹਾਣਾ ਦੀ ਪੁਲਿਸ ਨੇ ਕਾਰ ਚਾਲਕ ਖ਼ਿਲਾਫ਼ ਕੇਸ ਦਰਜ ਕੀਤਾ ਸੀ।

ਮੁਆਵਜ਼ੇ ਸਬੰਧੀ ਸੁਣਵਾਈ ਦੌਰਾਨ ਪਰਿਵਾਰ ਵੱਲੋਂ ਮਨਜੀਤ ਕੌਰ ਦੀ ਆਮਦਨ ਬਾਰੇ ਕੋਈ ਠੋਸ ਦਸਤਾਵੇਜ਼ ਪੇਸ਼ ਨਹੀਂ ਕੀਤਾ ਜਾ ਸਕਿਆ। ਇਸ ਦੇ ਬਾਵਜੂਦ ਟ੍ਰਿਬਿਊਨਲ ਨੇ ਉਸ ਵੱਲੋਂ ਘਰਾਂ ਵਿੱਚ ਕੀਤੇ ਜਾਂਦੇ ਕੰਮ ਅਤੇ ਪਰਿਵਾਰ ਲਈ ਨਿਭਾਈਆਂ ਜਾਂਦੀਆਂ ਜ਼ਿੰਮੇਵਾਰੀਆਂ ਨੂੰ ਧਿਆਨ ਵਿੱਚ ਰੱਖਦਿਆਂ ਉਸ ਦੀ ਮਹੀਨਾਵਾਰ ਆਮਦਨ 15,000 ਰੁਪਏ ਮੰਨੀ।

ਅਦਾਲਤ ਨੇ ਭਵਿੱਖੀ ਆਮਦਨ ਦੇ ਸੰਭਾਵੀ ਵਾਧੇ ਨੂੰ ਜੋੜਦਿਆਂ ਇਸ ਰਕਮ ਵਿੱਚ 10 ਫ਼ੀਸਦੀ ਵਾਧਾ ਕੀਤਾ, ਜਿਸ ਨਾਲ ਮਹੀਨਾਵਾਰ ਆਮਦਨ 16,500 ਰੁਪਏ ਬਣੀ। ਮਨਜੀਤ ਕੌਰ ਦੀ ਉਮਰ 52 ਸਾਲ ਹੋਣ ਕਰਕੇ 11 ਦਾ ਗੁਣਕ ਲਾਗੂ ਕੀਤਾ ਗਿਆ ਅਤੇ ਪਰਿਵਾਰ ਦੀ ਵਿੱਤੀ ਨਿਰਭਰਤਾ ਦੇ ਨੁਕਸਾਨ ਲਈ 10.89 ਲੱਖ ਰੁਪਏ ਤੈਅ ਕੀਤੇ ਗਏ।

ਟ੍ਰਿਬਿਊਨਲ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਘਰੇਲੂ ਕੰਮ ਅਤੇ ਪਰਿਵਾਰ ਦੀ ਦੇਖਭਾਲ ਵਿੱਚ ਮਹਿਲਾ ਦੇ ਯੋਗਦਾਨ ਨੂੰ ਘੱਟ ਨਹੀਂ ਸਮਝਿਆ ਜਾ ਸਕਦਾ। ਭਾਵੇਂ ਇਸ ਕੰਮ ਲਈ ਨਿਯਮਤ ਤਨਖ਼ਾਹ ਨਾ ਮਿਲਦੀ ਹੋਵੇ, ਪਰ ਪਰਿਵਾਰ ਲਈ ਇਸ ਦੀ ਮਹੱਤਤਾ ਬਹੁਤ ਜ਼ਿਆਦਾ ਹੁੰਦੀ ਹੈ।

ਟ੍ਰਿਬਿਊਨਲ ਵੱਲੋਂ ਮੁਆਵਜ਼ੇ ਦੀ ਗਣਨਾ ਵੱਖ-ਵੱਖ ਮੱਦਾਂ ਤਹਿਤ ਕੀਤੀ ਗਈ ਹੈ। ਇਸ ਵਿੱਚ ਪਰਿਵਾਰ ਦੀ ਵਿੱਤੀ ਨਿਰਭਰਤਾ ਦੇ ਨੁਕਸਾਨ ਲਈ 10,89,000 ਰੁਪਏ, ਪਤੀ ਅਤੇ ਬੱਚਿਆਂ ਨੂੰ ਸਾਥ ਅਤੇ ਪਿਆਰ ਦੇ ਨੁਕਸਾਨ ਲਈ 1,93,600 ਰੁਪਏ, ਅੰਤਿਮ ਸਸਕਾਰ ਦੇ ਖ਼ਰਚੇ ਲਈ 18,150 ਰੁਪਏ ਅਤੇ ਜਾਇਦਾਦ ਦੇ ਨੁਕਸਾਨ ਲਈ 18,150 ਰੁਪਏ ਸ਼ਾਮਲ ਹਨ। ਇਸ ਤਰ੍ਹਾਂ ਕੁੱਲ ਰਕਮ 13,18,900 ਰੁਪਏ ਬਣਦੀ ਹੈ।

ਅਦਾਲਤ ਨੇ ਹਾਦਸੇ ਲਈ ਕਾਰ ਚਾਲਕ ਅਨੀਤਾ ਅਤੇ ਵਾਹਨ ਦੇ ਮਾਲਕ ਸੋਨੂੰ ਸਿੰਘ ਨੂੰ ਜ਼ਿੰਮੇਵਾਰ ਠਹਿਰਾਇਆ। ਵਾਹਨ ਦਾ ਵੈਧ ਬੀਮਾ ਹੋਣ ਕਾਰਨ ਸਬੰਧਤ ਬੀਮਾ ਕੰਪਨੀ ਨੂੰ ਹੁਕਮ ਦਿੱਤਾ ਗਿਆ ਹੈ ਕਿ ਉਹ ਪੂਰੀ ਮੁਆਵਜ਼ਾ ਰਾਸ਼ੀ 7.5 ਫ਼ੀਸਦੀ ਸਾਲਾਨਾ ਵਿਆਜ ਸਮੇਤ ਪੀੜਤ ਪਰਿਵਾਰ ਨੂੰ ਅਦਾ ਕਰੇ।