ਨੇਪਾਲ ਹੜ੍ਹ 'ਚ ਵਧੀ ਚਿੰਤਾ: ਈਸ਼ਾ ਫ਼ਾਊਂਡੇਸ਼ਨ ਦੇ 77 ਸ਼ਰਧਾਲੂ ਅਤੇ ਕੋਲਕਾਤਾ ਦਾ 32 ਮੈਂਬਰੀ ਜੱਥਾ ਲਾਪਤਾ, ਸਦਗੁਰੂ ਨੇ ਬਚਾਅ ਕਾਰਜਾਂ ਲਈ ਜਤਾਈ ਤਿਆਰੀ

ਉੱਤਰੀ ਨੇਪਾਲ ਅਤੇ ਤਿੱਬਤ ਸਰਹੱਦ 'ਤੇ ਆਏ ਭਿਆਨਕ ਹੜ੍ਹ ਤੋਂ ਬਾਅਦ ਹਾਲਾਤ ਬੇਹੱਦ ਚਿੰਤਾਜਨਕ ਬਣ ਗਏ ਹਨ। ਕੈਲਾਸ਼-ਮਾਨਸਰੋਵਰ ਯਾਤਰਾ ਤੋਂ ਪਰਤ ਰਹੇ ਅਧਿਆਤਮਿਕ ਆਗੂ ਸਦਗੁਰੂ ਦੀ 'ਈਸ਼ਾ ਫ਼ਾਊਂਡੇਸ਼ਨ' ਦੇ ਘੱਟੋ-ਘੱਟ 77 ਸ਼ਰਧਾਲੂ ਅਤੇ ਕੋਲਕਾਤਾ ਤੋਂ ਗਿਆ 32 ਮੈਂਬਰੀ ਸੈਲਾਨੀ ਜੱਥਾ ਇਸ ਆਫ਼ਤ ਤੋਂ ਬਾਅਦ ਤੋਂ ਹੀ ਲਾਪਤਾ ਹਨ। ਘਟਨਾ ਤੋਂ ਬਾਅਦ ਸਦਗੁਰੂ ਨੇ ਖ਼ੁਦ ਬਚਾਅ ਕਾਰਜਾਂ ਵਿੱਚ ਸ਼ਾਮਲ ਹੋਣ ਅਤੇ ਅਧਿਕਾਰੀਆਂ ਨਾਲ ਮਿਲ ਕੇ ਮੌਕੇ 'ਤੇ ਪਹੁੰਚਣ ਦੀ ਇੱਛਾ ਜ਼ਾਹਿਰ ਕੀਤੀ ਹੈ।

ਸਦਗੁਰੂ ਨੇ ਸੋਸ਼ਲ ਮੀਡੀਆ 'ਤੇ ਜਾਣਕਾਰੀ ਅਤੇ ਵੀਡੀਓ ਸਾਂਝੀ ਕਰਦਿਆਂ ਦੱਸਿਆ ਕਿ ਉਨ੍ਹਾਂ ਦੀ ਯਾਤਰਾ ਦਾ ਇੱਕ ਹਿੱਸਾ ਤਿੱਬਤ ਦੇ ਗਿਰੋਂਗ (ਗਾਈਰੋਂਗ) ਬੰਦਰਗਾਹ ਖੇਤਰ ਸਥਿਤ ਇਮੀਗ੍ਰੇਸ਼ਨ ਦਫ਼ਤਰ 'ਚ ਮੌਜੂਦ ਸੀ, ਜਦੋਂ ਪਾਣੀ ਦੀ ਇੱਕ ਵਿਸ਼ਾਲ ਲਹਿਰ ਦਫ਼ਤਰ ਨਾਲ ਟਕਰਾਈ। ਇਸ ਤੋਂ ਬਾਅਦ ਹੜ੍ਹ ਦਾ ਪਾਣੀ ਰਸੁਵਾ ਵੱਲ ਵਧਿਆ ਅਤੇ ਭੋਟੇ ਕੋਸ਼ੀ ਨਦੀ ਦੇ ਕੰਢੇ ਭਾਰੀ ਤਬਾਹੀ ਮਚਾਈ। ਫਿਲਹਾਲ ਉੱਥੇ ਫਸੇ ਲੋਕਾਂ ਬਾਰੇ ਕੋਈ ਅਧਿਕਾਰਤ ਜਾਣਕਾਰੀ ਨਹੀਂ ਮਿਲ ਸਕੀ ਹੈ। ਸਦਗੁਰੂ ਅਨੁਸਾਰ ਉਨ੍ਹਾਂ ਦੇ 21 ਸਮੂਹਾਂ 'ਚੋਂ 495 ਲੋਕ ਸੁਰੱਖਿਅਤ ਪਰਤ ਆਏ ਹਨ, ਜਦਕਿ 743 ਤਿੱਬਤ ਅਤੇ 148 ਨੇਪਾਲ 'ਚ ਹਨ।

ਦੂਜੇ ਪਾਸੇ, 21 ਅਗਸਤ ਨੂੰ ਕੋਲਕਾਤਾ ਤੋਂ ਰਵਾਨਾ ਹੋਇਆ 30 ਸੈਲਾਨੀਆਂ ਅਤੇ 2 ਟੂਰ ਮੈਨੇਜਰਾਂ ਦਾ ਸਮੂਹ ਵੀ ਰਸੁਵਾਗੜ੍ਹੀ ਇਮੀਗ੍ਰੇਸ਼ਨ ਦਫ਼ਤਰ ਕੋਲੋਂ ਲਾਪਤਾ ਦੱਸਿਆ ਜਾ ਰਿਹਾ ਹੈ। ਪੱਛਮੀ ਬੰਗਾਲ ਦੇ ਮੁੱਖ ਮੰਤਰੀ ਸੁਵੇਂਦੂ ਅਧਿਕਾਰੀ ਨੇ ਇਸ ਦੁਖਦਾਈ ਘਟਨਾ 'ਤੇ ਅਫ਼ਸੋਸ ਪ੍ਰਗਟਾਉਂਦਿਆਂ ਦੱਸਿਆ ਕਿ ਰਾਜ ਸਰਕਾਰ ਭਾਰਤੀ ਦੂਤਾਵਾਸ ਅਤੇ ਨੇਪਾਲੀ ਪ੍ਰਸ਼ਾਸਨ ਦੇ ਲਗਾਤਾਰ ਸੰਪਰਕ 'ਚ ਹੈ। ਪਰਿਵਾਰਾਂ ਦੀ ਸਹਾਇਤਾ ਲਈ ਰਾਜ ਪੁਲਿਸ ਹੈੱਡਕੁਆਰਟਰ ਵਿਖੇ ਹੈਲਪਲਾਈਨ ਨੰਬਰ ((033) 24793311 ਅਤੇ 9147890181) ਵੀ ਚਾਲੂ ਕਰ ਦਿੱਤੇ ਗਏ ਹਨ।