ਤਾਜਾ ਖਬਰਾਂ
ਕੇਂਦਰੀ ਜਾਂਚ ਏਜੰਸੀ ਇਨਫੋਰਸਮੈਂਟ ਡਾਇਰੈਕਟੋਰੇਟ (ED) ਨੇ ਸਰਹੱਦੀ ਜ਼ਿਲ੍ਹੇ ਪਠਾਨਕੋਟ ਵਿੱਚ ਇੱਕ ਵੱਡੀ ਕਾਰਵਾਈ ਕਰਦਿਆਂ ਨਾਜਾਇਜ਼ ਮਾਈਨਿੰਗ, ਵਿੱਤੀ ਹੇਰਾਫੇਰੀ ਅਤੇ ਬੇਨਾਮੀ ਜਾਇਦਾਦਾਂ ਦੇ ਸ਼ੱਕ ਹੇਠ ਪੰਜ ਵੱਖ-ਵੱਖ ਥਾਵਾਂ 'ਤੇ ਇੱਕੋ ਸਮੇਂ ਛਾਪੇਮਾਰੀ ਕੀਤੀ। ਲਗਭਗ 16 ਘੰਟੇ ਚੱਲੀ ਇਸ ਮੈਰਾਥਨ ਤਲਾਸ਼ੀ ਮੁਹਿੰਮ ਦੌਰਾਨ ਈਡੀ ਦੀਆਂ ਟੀਮਾਂ ਨੇ ਦੋ ਵੱਡੇ ਪੱਥਰ ਕਰੱਸ਼ਰ ਕਾਰੋਬਾਰੀਆਂ ਦੇ ਟਿਕਾਣਿਆਂ, ਇੱਕ ਪ੍ਰਾਪਰਟੀ ਡੀਲਰ ਅਤੇ ਸਾਬਕਾ ਸਰਪੰਚ ਦੇ ਘਰ ਸਮੇਤ ਪੰਜਾਬ ਦੇ ਕੈਬਨਿਟ ਮੰਤਰੀ ਲਾਲ ਚੰਦ ਕਟਾਰੂਚੱਕ ਦੇ ਗ੍ਰਹਿ ਪਿੰਡ ਵਿੱਚ ਉਨ੍ਹਾਂ ਦੇ ਇੱਕ ਬੇਹੱਦ ਨਜ਼ਦੀਕੀ ਸਹਿਯੋਗੀ ਦੇ ਘਰ ਦਸਤਕ ਦੇ ਕੇ ਰਿਕਾਰਡ ਖੰਗਾਲੇ।
ਈਡੀ ਵੱਲੋਂ ਇਹ ਪੂਰਾ ਅਪ੍ਰੇਸ਼ਨ ਬੇਹੱਦ ਗੁਪਤ ਅਤੇ ਸਖ਼ਤੀ ਨਾਲ ਚਲਾਇਆ ਗਿਆ। ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਲਈ ਕੇਂਦਰੀ ਰਿਜ਼ਰਵ ਪੁਲਿਸ ਬਲ (CRPF) ਦੇ ਹਥਿਆਰਬੰਦ ਜਵਾਨਾਂ ਨੇ ਸਾਰੇ ਟਿਕਾਣਿਆਂ ਨੂੰ ਆਪਣੇ ਘੇਰੇ ਵਿੱਚ ਲੈ ਲਿਆ ਸੀ।
ਘਰਾਂ 'ਚ ਨਜ਼ਰਬੰਦੀ: ਜਾਂਚ ਦੌਰਾਨ ਕਰੱਸ਼ਰ ਮਾਲਕਾਂ ਅਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਨੂੰ ਨਾ ਤਾਂ ਘਰੋਂ ਬਾਹਰ ਜਾਣ ਦੀ ਇਜਾਜ਼ਤ ਦਿੱਤੀ ਗਈ ਅਤੇ ਨਾ ਹੀ ਕਿਸੇ ਬਾਹਰੀ ਵਿਅਕਤੀ ਨੂੰ ਅੰਦਰ ਜਾਣ ਦਿੱਤਾ ਗਿਆ।
ਜਾਂਚ ਦੀ ਗੰਭੀਰਤਾ: ਕਾਰਵਾਈ ਦੀ ਗੰਭੀਰਤਾ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਈਡੀ ਦੇ ਅਧਿਕਾਰੀ ਦੁਪਹਿਰ ਅਤੇ ਰਾਤ ਦਾ ਖਾਣਾ ਵੀ ਜਾਂਚ ਵਾਲੀ ਥਾਂ 'ਤੇ ਹੀ ਮੰਗਵਾ ਕੇ ਬਿਨਾਂ ਰੁਕੇ ਤਲਾਸ਼ੀ ਵਿੱਚ ਜੁਟੇ ਰਹੇ।
ਮੀਡੀਆ ਤੋਂ ਦੂਰੀ: ਸਿਆਲੀ ਰੋਡ 'ਤੇ ਜ਼ੋਨ ਹੋਟਲ ਨੇੜੇ ਸਥਿਤ ਇੱਕ ਕਾਰੋਬਾਰੀ ਦੇ ਦਫ਼ਤਰ ਦੀ ਜਾਂਚ ਦੌਰਾਨ ਜਦੋਂ ਮੀਡੀਆ ਨੇ ਜਾਣਕਾਰੀ ਲੈਣੀ ਚਾਹੀ, ਤਾਂ ਅਧਿਕਾਰੀਆਂ ਨੇ ਦਫ਼ਤਰ ਦੇ ਦਰਵਾਜ਼ੇ ਬੰਦ ਕਰਕੇ ਕੁਝ ਵੀ ਕਹਿਣ ਤੋਂ ਇਨਕਾਰ ਕਰ ਦਿੱਤਾ. ਜਾਂਚ ਟੀਮ ਵਿੱਚ ਮਹਿਲਾ ਅਧਿਕਾਰੀ ਵੀ ਵਿਸ਼ੇਸ਼ ਤੌਰ 'ਤੇ ਸ਼ਾਮਲ ਸਨ।
ਈਡੀ ਦੀ ਕਾਰਵਾਈ ਦਾ ਮੁੱਖ ਕੇਂਦਰ ਸਿਆਲੀ ਰੋਡ ਅਤੇ ਸ਼ਾਹ ਕਲੋਨੀ ਵਿੱਚ ਸਥਿਤ ਦੋ ਪ੍ਰਮੁੱਖ ਕਰੱਸ਼ਰ ਮਾਲਕਾਂ ਦੇ ਨਿਵਾਸ ਅਤੇ ਦਫ਼ਤਰ ਸਨ. ਇਸ ਤੋਂ ਇਲਾਵਾ ਨਰੋਟ ਜੈਮਲ ਸਿੰਘ ਅਤੇ ਦਤਿਆਲ ਵਿੱਚ ਸਥਿਤ ਪੱਥਰ ਕਰੱਸ਼ਰ ਯੂਨਿਟਾਂ 'ਤੇ ਵੀ ਦਸਤਾਵੇਜ਼ਾਂ ਦੀ ਪੜਤਾਲ ਕੀਤੀ ਗਈ|
ਜਾਂਚ ਟੀਮ ਨੇ ਤਾਰਾਗੜ੍ਹ ਵਿੱਚ ਇੱਕ ਅਜਿਹੇ ਪ੍ਰਾਪਰਟੀ ਡੀਲਰ ਦੇ ਘਰ ਦੀ ਵੀ ਤਲਾਸ਼ੀ ਲਈ, ਜੋ ਪਹਿਲਾਂ ਕਾਂਗਰਸ ਵਿੱਚ ਸੀ ਪਰ 'ਆਪ' ਦੀ ਸਰਕਾਰ ਬਣਨ ਤੋਂ ਬਾਅਦ ਆਮ ਆਦਮੀ ਪਾਰਟੀ ਵਿੱਚ ਸ਼ਾਮਲ ਹੋ ਗਿਆ ਸੀ।
ਤਾਰਾਗੜ੍ਹ ਵਿੱਚ ਰਿਕਾਰਡ ਦੀ ਜਾਂਚ ਅਤੇ ਸਾਬਕਾ 'ਆਪ' ਸਰਪੰਚ ਤੋਂ ਪੁੱਛਗਿੱਛ ਕਰਨ ਤੋਂ ਬਾਅਦ, ਈਡੀ ਦੀ ਇੱਕ ਟੀਮ ਸੁਰੱਖਿਆ ਬਲਾਂ ਸਮੇਤ ਦੇਰ ਸ਼ਾਮ ਪੰਜਾਬ ਦੇ ਕੈਬਨਿਟ ਮੰਤਰੀ ਲਾਲ ਚੰਦ ਕਟਾਰੂਚੱਕ ਦੇ ਜੱਦੀ ਪਿੰਡ ਕਟਾਰੂਚੱਕ ਪਹੁੰਚੀ। ਉੱਥੇ ਟੀਮ ਨੇ ਮੰਤਰੀ ਦੇ ਇੱਕ ਬੇਹੱਦ ਨਜ਼ਦੀਕੀ ਸਹਿਯੋਗੀ ਅਤੇ ਰਿਸ਼ਤੇਦਾਰ (ਜੋ 'ਆਪ' ਨਾਲ ਜੁੜੇ ਹੋਏ ਹਨ) ਦੇ ਘਰ ਕਰੀਬ ਇੱਕ ਘੰਟਾ ਬਿਤਾਇਆ ਅਤੇ ਵਿੱਤੀ ਲੈਣ-ਦੇਣ ਤੇ ਜ਼ਮੀਨੀ ਸੌਦਿਆਂ ਦੇ ਰਿਕਾਰਡਾਂ ਦੀ ਗੰਭੀਰਤਾ ਨਾਲ ਜਾਂਚ ਕੀਤੀ।
ਇਸ ਸਾਰੇ ਮਾਮਲੇ ਵਿੱਚ ਦਿਲਚਸਪ ਗੱਲ ਇਹ ਰਹੀ ਕਿ ਸਥਾਨਕ ਪੁਲਿਸ ਪ੍ਰਸ਼ਾਸਨ ਨੂੰ ਇਸ ਵੱਡੀ ਕਾਰਵਾਈ ਦੀ ਭਿਣਕ ਤੱਕ ਨਹੀਂ ਲੱਗਣ ਦਿੱਤੀ ਗਈ। ਪਠਾਨਕੋਟ ਦੇ ਐਸ.ਐਸ.ਪੀ. (SSP) ਦਲਜਿੰਦਰ ਸਿੰਘ ਢਿੱਲੋਂ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸਪੱਸ਼ਟ ਕੀਤਾ ਕਿ ਈਡੀ ਇੱਕ ਕੇਂਦਰੀ ਏਜੰਸੀ ਹੈ, ਜਿਸ ਕਾਰਨ ਸਥਾਨਕ ਪੁਲਿਸ ਨੂੰ ਇਸ ਕਾਰਵਾਈ ਸਬੰਧੀ ਕੋਈ ਅਧਿਕਾਰਤ ਸੂਚਨਾ ਨਹੀਂ ਦਿੱਤੀ ਗਈ ਸੀ।
ਫਿਲਹਾਲ ਈਡੀ ਦੇ ਉੱਚ ਅਧਿਕਾਰੀਆਂ ਨੇ ਅਧਿਕਾਰਤ ਤੌਰ 'ਤੇ ਇਹ ਸਾਂਝਾ ਨਹੀਂ ਕੀਤਾ ਹੈ ਕਿ ਇਹ ਕਾਰਵਾਈ ਕਿਸ ਖ਼ਾਸ ਮਾਮਲੇ ਜਾਂ ਐਫ.ਆਈ.ਆਰ. ਦੇ ਤਹਿਤ ਕੀਤੀ ਗਈ ਹੈ। ਪਰ ਸੂਤਰਾਂ ਮੁਤਾਬਕ ਜ਼ਬਤ ਕੀਤੇ ਗਏ ਵਿੱਤੀ ਦਸਤਾਵੇਜ਼ਾਂ ਅਤੇ ਡਿਜੀਟਲ ਡਾਟੇ ਦੀ ਜਾਂਚ ਤੋਂ ਬਾਅਦ ਆਉਣ ਵਾਲੇ ਦਿਨਾਂ ਵਿੱਚ ਕਈ ਵੱਡੇ ਖੁਲਾਸੇ ਹੋਣ ਦੀ ਸੰਭਾਵਨਾ ਹੈ, ਜਿਸ ਨਾਲ ਪੰਜਾਬ ਦੀ ਸਿਆਸਤ ਵਿੱਚ ਨਵਾਂ ਭੂਚਾਲ ਆ ਸਕਦਾ ਹੈ।
Get all latest content delivered to your email a few times a month.
