ਤਾਜਾ ਖਬਰਾਂ
ਵੀਅਤਨਾਮ ਦੇ ਪ੍ਰਸਿੱਧ 'ਫੂ ਕਵੋਕ ਟਾਪੂ' ਦੇ ਸਮੁੰਦਰੀ ਖੇਤਰ ਵਿੱਚ ਸ਼ਨੀਵਾਰ ਨੂੰ ਇੱਕ ਬੇਹੱਦ ਮੰਦਭਾਗੀ ਘਟਨਾ ਸਾਹਮਣੇ ਆਈ ਹੈ। ਇੱਥੇ ਸੈਲਾਨੀਆਂ ਨੂੰ ਲੈ ਕੇ ਜਾ ਰਹੀ ਇਕ ਕਿਸ਼ਤੀ ਦੇ ਸਮੁੰਦਰ ਵਿੱਚ ਪਲਟ ਜਾਣ ਕਾਰਨ 15 ਭਾਰਤੀ ਨਾਗਰਿਕਾਂ ਦੀ ਅਚਾਨਕ ਮੌਤ ਹੋ ਗਈ। ਮਿਲੀ ਜਾਣਕਾਰੀ ਮੁਤਾਬਕ ਇਹ ਸਾਰੇ ਮ੍ਰਿਤਕ ਭਾਰਤ ਦੀ ਨਾਮਵਰ ਸਮਾਰਟਫ਼ੋਨ ਨਿਰਮਾਤਾ ਕੰਪਨੀ 'ਲਾਵਾ ਮੋਬਾਈਲਜ਼' ਨਾਲ ਜੁੜੇ ਹੋਏ ਸਨ, ਜਿਨ੍ਹਾਂ ਵਿੱਚ 14 ਡਿਸਟ੍ਰੀਬਿਊਟਰ-ਡੀਲਰ ਅਤੇ ਇੱਕ ਕੰਪਨੀ ਦਾ ਮੁਲਾਜ਼ਮ ਸ਼ਾਮਲ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਕੰਪਨੀ ਵੱਲੋਂ ਸ਼ਾਨਦਾਰ ਕੰਮ ਕਰਨ ਦੇ ਬਦਲੇ ਇਨ੍ਹਾਂ ਨੂੰ ਤੋਹਫ਼ੇ ਵਜੋਂ ਇਹ ਵਿਦੇਸ਼ੀ ਦੌਰਾ ਕਰਵਾਇਆ ਜਾ ਰਿਹਾ ਸੀ, ਪਰ ਕਿਸੇ ਨੂੰ ਨਹੀਂ ਸੀ ਪਤਾ ਕਿ ਇਹ ਸਫ਼ਰ ਇੰਨਾ ਦਰਦਨਾਕ ਸਾਬਤ ਹੋਵੇਗਾ।
ਹਨੋਈ ਸਥਿਤ ਭਾਰਤੀ ਸਫ਼ਾਰਤਖ਼ਾਨੇ (ਦੂਤਾਵਾਸ) ਵੱਲੋਂ ਹਾਦਸੇ ਦਾ ਸ਼ਿਕਾਰ ਹੋਏ ਲੋਕਾਂ ਦੀ ਪਛਾਣ ਜਨਤਕ ਕਰ ਦਿੱਤੀ ਗਈ ਹੈ। ਇਸ ਦੁਖਾਂਤ ਵਿੱਚ ਜਾਨ ਗਵਾਉਣ ਵਾਲੇ ਜ਼ਿਆਦਾਤਰ ਲੋਕ ਦੱਖਣੀ ਭਾਰਤ ਦੇ ਰਹਿਣ ਵਾਲੇ ਸਨ, ਜਿਨ੍ਹਾਂ ਵਿੱਚੋਂ 10 ਵਿਅਕਤੀ ਤਾਮਿਲਨਾਡੂ ਦੇ, 3 ਆਂਧਰਾ ਪ੍ਰਦੇਸ਼ ਦੇ ਅਤੇ 2 ਕੇਰਲ ਸੂਬੇ ਦੇ ਸਨ।
ਤਾਮਿਲਨਾਡੂ ਦੇ ਮ੍ਰਿਤਕ: ਸੇਂਥਿਲ ਕੁਮਾਰ, ਮੁਰੂਗਾ ਪ੍ਰਭੂ, ਸ੍ਰੀਧਰ, ਸ਼ੇਖ ਅਬਦੁੱਲਾ, ਬਾਲਾਜੀ, ਵਿਨੈ ਕੁਮਾਰ, ਰਵੀਸ਼ੰਕਰ, ਸੰਤੋਸ਼ ਕੁਮਾਰ, ਬਾਬੂ ਅਤੇ ਅਲਗੁਰਾਜਨ।
ਆਂਧਰਾ ਪ੍ਰਦੇਸ਼ ਦੇ ਮ੍ਰਿਤਕ: ਕਡੱਪਾ ਦੇ ਰਹਿਣ ਵਾਲੇ ਮੁਡੀਅਮ ਸ੍ਰੀਧਰ, ਮਛਲੀਪਟਨਮ ਦੀ ਗੇਲੀ ਜੈਸ਼੍ਰੀ ਅਤੇ ਸ੍ਰੀ ਸਤਿਆ ਸਾਈਂ ਜ਼ਿਲ੍ਹੇ ਦੇ ਰਵੀ ਤੇਜਾ। (ਇਸੇ ਇਲਾਕੇ ਦੇ ਇੱਕ ਹੋਰ ਯਾਤਰੀ, ਜੋ ਜੈਸ਼੍ਰੀ ਦੇ ਪਤੀ ਹਨ, ਦੀ ਹਾਲਤ ਨਾਜ਼ੁਕ ਹੈ ਅਤੇ ਉਹ ਹਸਪਤਾਲ ਵਿੱਚ ਭਰਤੀ ਹਨ)।
ਕੇਰਲ ਦੇ ਮ੍ਰਿਤਕ: ਕੋੱਟਾਰਾਕੱਰਾ ਖੇਤਰ ਦਾ ਇੱਕ ਬਜ਼ੁਰਗ ਜੋੜਾ—ਸੀ. ਥਾਮਸ ਅਤੇ ਉਨ੍ਹਾਂ ਦੀ ਪਤਨੀ ਲੋਵੇਨੀ।
ਇਸ ਭਿਆਨਕ ਹਾਦਸੇ ਵਿੱਚੋਂ ਕਿਸੇ ਤਰ੍ਹਾਂ ਜ਼ਿੰਦਾ ਬਚ ਕੇ ਨਿਕਲੇ ਤਾਮਿਲਨਾਡੂ ਦੇ ਮੁਰੂਗਰਾਜ ਨੇ ਸਮੁੰਦਰ ਦੇ ਉਸ ਖ਼ੌਫ਼ਨਾਕ ਮੰਜ਼ਰ ਦੀ ਦਾਸਤਾਨ ਬਿਆਨ ਕੀਤੀ। ਉਨ੍ਹਾਂ ਦੱਸਿਆ ਕਿ ਸ਼ਨੀਵਾਰ ਸਵੇਰੇ ਜਦੋਂ ਉਨ੍ਹਾਂ ਦੀ ਕਿਸ਼ਤੀ ਕਿਨਾਰੇ ਤੋਂ ਤਕੜੀ ਦੂਰੀ (ਲਗਭਗ ਦੋ ਕਿਲੋਮੀਟਰ) ਤੈਅ ਕਰ ਚੁੱਕੀ ਸੀ, ਤਾਂ ਅਚਾਨਕ ਪਾਣੀ ਵਿੱਚ ਇੱਕ ਬਹੁਤ ਹੀ ਉੱਚੀ ਅਤੇ ਤੇਜ਼ ਲਹਿਰ ਉੱਠੀ। ਲਹਿਰ ਦੇ ਜ਼ੋਰਦਾਰ ਥਪੇੜੇ ਕਾਰਨ ਕਿਸ਼ਤੀ ਇੱਕ ਪਾਸੇ ਨੂੰ ਬੁਰੀ ਤਰ੍ਹਾਂ ਝੁਕ ਗਈ, ਜਿਸ ਕਾਰਨ ਸਾਰੇ ਸਵਾਰ ਸੰਤੁਲਨ ਵਿਗੜਨ ਕਰਕੇ ਇੱਕ-ਦੂਜੇ ਦੇ ਉੱਪਰ ਜਾ ਡਿੱਗੇ। ਮੁਰੂਗਰਾਜ ਮੁਤਾਬਕ, ਉਹ ਕਿਸੇ ਤਰ੍ਹਾਂ ਖਿੜਕੀ ਵਾਲੇ ਪਾਸੇ ਤੋਂ ਬਾਹਰ ਨਿਕਲਣ ਅਤੇ ਰੇਲਿੰਗ ਨੂੰ ਮਜ਼ਬੂਤੀ ਨਾਲ ਫੜਨ ਵਿੱਚ ਕਾਮਯਾਬ ਰਹੇ, ਪਰ ਉਨ੍ਹਾਂ ਦੇ ਕਈ ਸਾਥੀ ਦੇਖਦਿਆਂ ਹੀ ਦੇਖਦਿਆਂ ਸਮੁੰਦਰ ਦੀਆਂ ਡੂੰਘੀਆਂ ਲਹਿਰਾਂ ਵਿੱਚ ਵਿਲੀਨ ਹੋ ਗਏ।
ਇਸ ਮੰਦਭਾਗੀ ਘਟਨਾ ਤੋਂ ਬਾਅਦ 'ਲਾਵਾ ਮੋਬਾਈਲਜ਼' ਕੰਪਨੀ ਨੇ ਅਧਿਕਾਰਤ ਤੌਰ 'ਤੇ ਕਿਹਾ ਹੈ ਕਿ ਉਹ ਵੀਅਤਨਾਮ ਦੇ ਸਥਾਨਕ ਪ੍ਰਸ਼ਾਸਨ ਅਤੇ ਭਾਰਤੀ ਦੂਤਾਵਾਸ ਦੇ ਨਿਰੰਤਰ ਸੰਪਰਕ ਵਿੱਚ ਹਨ। ਕੰਪਨੀ ਵੱਲੋਂ ਗਠਿਤ ਵਿਸ਼ੇਸ਼ ਟੀਮਾਂ ਪੀੜਤ ਪਰਿਵਾਰਾਂ ਨਾਲ ਤਾਲਮੇਲ ਬਣਾ ਰਹੀਆਂ ਹਨ ਤਾਂ ਜੋ ਮ੍ਰਿਤਕਾਂ ਦੀਆਂ ਦੇਹਾਂ ਨੂੰ ਬਿਨਾਂ ਕਿਸੇ ਦੇਰੀ ਦੇ ਅਤੇ ਪੂਰੇ ਸਨਮਾਨ ਨਾਲ ਜਲਦੀ ਤੋਂ ਜਲਦੀ ਭਾਰਤ ਲਿਆਂਦਾ ਜਾ ਸਕੇ।
ਵੀਅਤਨਾਮ ਦੀ ਇਸ ਸਮੁੰਦਰੀ ਤ੍ਰਾਸਦੀ 'ਤੇ ਪੂਰੇ ਦੇਸ਼ ਵਿੱਚ ਸ਼ੋਕ ਦੀ ਲਹਿਰ ਹੈ। ਰਾਸ਼ਟਰਪਤੀ ਦ੍ਰੌਪਦੀ ਮੁਰਮੂ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਇਸ ਘਟਨਾ 'ਤੇ ਡੂੰਘੇ ਅਫ਼ਸੋਸ ਦਾ ਪ੍ਰਗਟਾਵਾ ਕੀਤਾ ਹੈ। ਪੀਐਮ ਮੋਦੀ ਨੇ ਸੋਸ਼ਲ ਮੀਡੀਆ ਰਾਹੀਂ ਸੋਕ ਸੰਦੇਸ਼ ਦਿੰਦਿਆਂ ਕਿਹਾ ਕਿ ਇਸ ਹਾਦਸੇ ਨੇ ਉਨ੍ਹਾਂ ਦੇ ਹਿਰਦੇ ਨੂੰ ਵਲੂੰਧਰ ਦਿੱਤਾ ਹੈ ਅਤੇ ਸਰਕਾਰ ਪੀੜਤਾਂ ਦੀ ਹਰ ਸੰਭਵ ਮਦਦ ਕਰੇਗੀ। ਲੋਕ ਸਭਾ ਵਿੱਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਨੇ ਵੀ ਇਸ ਘਟਨਾ ਨੂੰ ਬੇਹੱਦ ਦੁਖਦਾਈ ਅਤੇ ਚਿੰਤਾਜਨਕ ਦੱਸਦਿਆਂ ਪਰਿਵਾਰਾਂ ਨਾਲ ਦਿਲੀ ਹਮਦਰਦੀ ਪ੍ਰਗਟ ਕੀਤੀ ਹੈ।
Get all latest content delivered to your email a few times a month.
