ਤਾਜਾ ਖਬਰਾਂ
ਅਟਲ ਸੁਰੰਗ ਦੇ ਉੱਤਰੀ ਪੋਰਟਲ ਦੇ ਨਜ਼ਦੀਕ ਮੰਗਲਵਾਰ ਦੇਰ ਰਾਤ ਇੱਕ ਬੇਹੱਦ ਖ਼ੌਫ਼ਨਾਕ ਅਤੇ ਦਰਦਨਾਕ ਸੜਕ ਹਾਦਸਾ ਵਾਪਰਿਆ। ਇੱਕ ਬੇਕਾਬੂ ਤੇਜ਼ ਰਫ਼ਤਾਰ ਕਾਰ ਸੜਕ ਤੋਂ ਉਤਰ ਕੇ ਫਲਾਈਓਵਰ ਦੇ ਨਿਰਮਾਣ ਅਧੀਨ ਹਾਈਵੇਅ ਦੇ ਇੱਕ ਖੰਭੇ ਵਿੱਚ ਜਾ ਵਜੀ। ਟੱਕਰ ਐਨੀ ਜ਼ਬਰਦਸਤ ਸੀ ਕਿ ਕਾਰ ਖੰਭੇ ਦੇ ਬਾਹਰ ਨਿਕਲੇ ਸਟੀਲ ਦੇ ਸਰੀਆਂ (ਸਲਾਖਾਂ) ਵਿੱਚ ਬੁਰੀ ਤਰ੍ਹਾਂ ਫਸ ਗਈ ਅਤੇ ਹਵਾ ਵਿੱਚ ਲਟਕ ਗਈ। ਖ਼ੁਸ਼ਕਿਸਮਤੀ ਰਹੀ ਕਿ ਕਾਰ ਖੰਭੇ ਦੇ ਸਹਾਰੇ ਅਟਕ ਗਈ, ਨਹੀਂ ਤਾਂ ਉਹ ਸਿੱਧੀ ਹੇਠਾਂ ਵਹਿ ਰਹੀ ਖ਼ਤਰਨਾਕ ਚੰਦਰਭਾਗਾ ਨਦੀ ਵਿੱਚ ਡਿੱਗ ਸਕਦੀ ਸੀ, ਜਿਸ ਨਾਲ ਹੋਰ ਵੱਡਾ ਜਾਨੀ ਨੁਕਸਾਨ ਹੋ ਸਕਦਾ ਸੀ।
ਇਸ ਹਾਦਸੇ ਵਿੱਚ ਕਾਰ ਸਵਾਰ ਇੱਕ ਨੌਜਵਾਨ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ, ਜਿਸਦੀ ਪਛਾਣ ਕੈਲਾਸ਼ ਕੁਮਾਰ (32) ਪੁੱਤਰ ਗੋਵਿੰਦ ਰਾਮ, ਵਾਸੀ ਮੰਡੋਟਾ (ਸੀਕਰ, ਰਾਜਸਥਾਨ) ਵਜੋਂ ਹੋਈ ਹੈ। ਇਸ ਤੋਂ ਇਲਾਵਾ ਕਾਰ ਵਿੱਚ ਸਵਾਰ ਤਿੰਨ ਹੋਰ ਨੌਜਵਾਨ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਏ, ਜਿਨ੍ਹਾਂ ਵਿੱਚ:
ਰਾਜੇਂਦਰ (ਸੀਕਰ, ਰਾਜਸਥਾਨ)
ਆਦਿਤਿਆ (ਲਖੀਮਪੁਰ ਖੇੜੀ, ਉੱਤਰ ਪ੍ਰਦੇਸ਼)
ਸਿਧਾਰਥ ਸਿੰਘ ਸ਼ੇਖਾਵਤ (ਖਾਟੂ ਸ਼ਿਆਮ, ਸੀਕਰ, ਰਾਜਸਥਾਨ) ਸ਼ਾਮਲ ਹਨ।
ਸਥਾਨਕ ਲੋਕਾਂ ਅਤੇ ਪ੍ਰਸ਼ਾਸਨ ਦੀ ਮਦਦ ਨਾਲ ਜ਼ਖ਼ਮੀਆਂ ਨੂੰ ਤੁਰੰਤ ਨਜ਼ਦੀਕੀ ਹਸਪਤਾਲ ਪਹੁੰਚਾਇਆ ਗਿਆ, ਜਿੱਥੇ ਉਨ੍ਹਾਂ ਦਾ ਇਲਾਜ ਚੱਲ ਰਿਹਾ ਹੈ।
ਲਾਹੌਲ-ਸਪੀਤੀ ਦੀ ਪੁਲਿਸ ਸੁਪਰਡੈਂਟ (SP) ਸ਼ਿਵਾਨੀ ਮੇਹਲਾ ਨੇ ਦੱਸਿਆ ਕਿ ਸ਼ੁਰੂਆਤੀ ਜਾਂਚ ਤੋਂ ਸਾਫ਼ ਹੁੰਦਾ ਹੈ ਕਿ ਹਾਦਸਾ ਵਾਹਨ ਦੀ ਬਹੁਤ ਜ਼ਿਆਦਾ ਰਫ਼ਤਾਰ (Over-speeding) ਕਾਰਨ ਵਾਪਰਿਆ ਹੈ। ਪੁਲਿਸ ਨੇ ਮਾਮਲੇ ਸਬੰਧੀ ਐਫਆਈਆਰ (FIR) ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ ਅਤੇ ਮ੍ਰਿਤਕ ਦੇ ਪਰਿਵਾਰਕ ਮੈਂਬਰਾਂ ਨੂੰ ਸੂਚਿਤ ਕਰ ਦਿੱਤਾ ਗਿਆ ਹੈ।
ਇਸ ਦੌਰਾਨ, ਹਵਾ ਵਿੱਚ ਲਟਕੀ ਕਾਰ ਦਾ ਇੱਕ ਰੂਹ ਕੰਬਾਊ ਵੀਡੀਓ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ, ਜਿਸ ਨੇ ਪਹਾੜੀ ਖੇਤਰਾਂ ਵਿੱਚ ਵਾਹਨਾਂ ਦੀ ਰਫ਼ਤਾਰ 'ਤੇ ਮੁੜ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।
ਹਾਦਸੇ ਤੋਂ ਬਾਅਦ ਸਥਾਨਕ ਪ੍ਰਸ਼ਾਸਨ ਅਤੇ ਪੁਲਿਸ ਨੇ ਸੈਲਾਨੀਆਂ ਤੇ ਵਾਹਨ ਚਾਲਕਾਂ ਨੂੰ ਸਖ਼ਤ ਹਦਾਇਤ ਜਾਰੀ ਕੀਤੀ ਹੈ। ਪ੍ਰਸ਼ਾਸਨ ਨੇ ਅਪੀਲ ਕੀਤੀ ਹੈ ਕਿ ਅਟਲ ਸੁਰੰਗ ਅਤੇ ਹੋਰ ਪਹਾੜੀ ਅਤੇ ਘੁੰਮਾਵਦਾਰ ਰਸਤਿਆਂ 'ਤੇ ਤੈਅ ਕੀਤੀ ਗਈ ਗਤੀ ਸੀਮਾ ਦੇ ਅੰਦਰ ਹੀ ਗੱਡੀ ਚਲਾਉਣ ਅਤੇ ਲਾਪਰਵਾਹੀ ਤੋਂ ਬਚਣ, ਤਾਂ ਜੋ ਅਜਿਹੇ ਮੰਦਭਾਗੇ ਹਾਦਸਿਆਂ ਤੋਂ ਬਚਿਆ ਜਾ ਸਕੇ।
Get all latest content delivered to your email a few times a month.
