ਤਾਜਾ ਖਬਰਾਂ
ਜਲਵਾਯੂ ਪਰਿਵਰਤਨ (ਕਲਾਈਮੇਟ ਚੇਂਜ) ਕਾਰਨ ਪੂਰਾ ਯੂਰਪ ਇਸ ਸਮੇਂ ਅੱਗ ਦੇ ਗੋਲੇ ਵਿੱਚ ਤਬਦੀਲ ਹੋ ਚੁੱਕਾ ਹੈ। ਮਹਾਂਦੀਪ ਦੇ ਕਈ ਦੇਸ਼ ਭਿਆਨਕ ਲੂ (ਹੀਟਵੇਵ) ਦੀ ਮਾਰ ਝੱਲ ਰਹੇ ਹਨ, ਜਿਸ ਕਾਰਨ ਆਮ ਜਨਜੀਵਨ ਪੂਰੀ ਤਰ੍ਹਾਂ ਅਸਤ-ਵਿਅਸਤ ਹੋ ਗਿਆ ਹੈ। ਸਭ ਤੋਂ ਗੰਭੀਰ ਹਾਲਾਤ ਫਰਾਂਸ ਵਿੱਚ ਬਣੇ ਹੋਏ ਹਨ, ਜਿੱਥੇ ਗਰਮੀ ਨਾਲ ਸਬੰਧਿਤ ਵੱਖ-ਵੱਖ ਹਾਦਸਿਆਂ ਵਿੱਚ ਦੋ ਮਾਸੂਮ ਬੱਚਿਆਂ ਸਮੇਂਤ 18 ਲੋਕਾਂ ਦੀ ਮੌਤ ਹੋਣ ਦੀ ਦੁਖਦ ਖ਼ਬਰ ਹੈ।
ਦੱਖਣ-ਪੂਰਬੀ ਫਰਾਂਸ ਦੇ ਕਾਰਪੈਂਟਰਾਸ ਸ਼ਹਿਰ ਵਿੱਚ ਇੱਕ ਦਿਲ ਕੰਬਾਊ ਘਟਨਾ ਸਾਹਮਣੇ ਆਈ, ਜਿੱਥੇ ਖੜ੍ਹੀ ਕਾਰ ਵਿੱਚੋਂ ਦੋ ਅਤੇ ਚਾਰ ਸਾਲ ਦੇ ਦੋ ਬੱਚੇ ਬੇਹੋਸ਼ੀ ਦੀ ਹਾਲਤ ਵਿੱਚ ਮਿਲੇ, ਜਿਨ੍ਹਾਂ ਦੀ ਬਾਅਦ ਵਿੱਚ ਮੌਤ ਹੋ ਗਈ। ਇਸੇ ਤਰ੍ਹਾਂ ਬੋਰਡੋ (Bordeaux) ਖੇਤਰ ਵਿੱਚ 80 ਤੋਂ 95 ਸਾਲ ਦੀ ਉਮਰ ਦੇ ਤਿੰਨ ਬਜ਼ੁਰਗ ਗਰਮੀ ਦੇ ਪ੍ਰਕੋਪ ਨੂੰ ਬਰਦਾਸ਼ਤ ਨਾ ਕਰਦੇ ਹੋਏ ਦਮ ਤੋੜ ਗਏ। ਇਸ ਤੋਂ ਇਲਾਵਾ, ਹਫਤੇ ਦੇ ਅਖੀਰ ਵਿੱਚ ਤੈਰਾਕੀ ਦੌਰਾਨ ਡੁੱਬਣ ਕਾਰਨ 13 ਹੋਰ ਲੋਕਾਂ ਦੀ ਜਾਨ ਚਲੀ ਗਈ, ਜਿਸ ਦਾ ਮੁੱਖ ਕਾਰਨ ਗਰਮੀ ਤੋਂ ਰਾਹਤ ਪਾਉਣ ਲਈ ਵੱਡੀ ਗਿਣਤੀ ਵਿੱਚ ਲੋਕਾਂ ਦਾ ਜਲ ਸਰੋਤਾਂ ਵੱਲ ਰੁਖ਼ ਕਰਨਾ ਦੱਸਿਆ ਜਾ ਰਿਹਾ ਹੈ।
ਮੌਸਮ ਵਿਭਾਗ ਦੇ ਅੰਕੜਿਆਂ ਮੁਤਾਬਕ ਫਰਾਂਸ ਦੇ ਬੋਰਡੋ ਸ਼ਹਿਰ ਵਿੱਚ ਪਾਰਾ 41.9 ਡਿਗਰੀ ਸੈਲਸੀਅਸ ਤੱਕ ਪਹੁੰਚ ਕੇ ਇੱਕ ਨਵਾਂ ਇਤਿਹਾਸਕ ਰਿਕਾਰਡ ਬਣਾ ਚੁੱਕਾ ਹੈ। ਉੱਥੇ ਹੀ ਪੋਇਟਿਏਰ ਵਿੱਚ ਤਾਪਮਾਨ 41.2 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ, ਜਿਸ ਨੇ ਸਾਲ 1947 ਦਾ ਰਿਕਾਰਡ ਤੋੜ ਦਿੱਤਾ ਹੈ। ਗੁਆਂਢੀ ਦੇਸ਼ ਸਪੇਨ ਦੇ ਸਾਨ ਸੇਬਾਸਤਿਆਨ ਵਿੱਚ ਵੀ ਪਾਰਾ 40 ਡਿਗਰੀ ਨੂੰ ਪਾਰ ਕਰਨ ਦੀ ਸੰਭਾਵਨਾ ਜਤਾਈ ਗਈ ਹੈ।
ਬ੍ਰਿਟੇਨ: ਮੌਸਮ ਵਿਭਾਗ ਨੇ ਚਾਰ ਦਿਨਾਂ ਦੀ ਗੰਭੀਰ ਹੀਟਵੇਵ ਦੀ ਚੇਤਾਵਨੀ ਜਾਰੀ ਕਰਦਿਆਂ ਕਿਹਾ ਹੈ ਕਿ ਤਾਪਮਾਨ 39 ਡਿਗਰੀ ਸੈਲਸੀਅਸ ਤੋਂ ਪਾਰ ਜਾ ਸਕਦਾ ਹੈ। ਜੇਕਰ ਅਜਿਹਾ ਹੁੰਦਾ ਹੈ, ਤਾਂ 1957 ਅਤੇ 1976 ਵਿੱਚ ਜੂਨ ਮਹੀਨੇ ਦੌਰਾਨ ਬਣੇ ਸਾਰੇ ਪੁਰਾਣੇ ਰਿਕਾਰਡ ਧਰਾਂ-ਧਰਤੀ ਹੋ ਜਾਣਗੇ।
ਇਟਲੀ: ਸਰਕਾਰ ਨੇ ਮੁਲਕ ਦੇ 12 ਮੁੱਖ ਸ਼ਹਿਰਾਂ ਵਿੱਚ 'ਰੈੱਡ ਅਲਰਟ' ਐਲਾਨ ਦਿੱਤਾ ਹੈ। ਟਿਊਰਿਨ ਸ਼ਹਿਰ ਵਿੱਚ ਏਅਰ ਕੰਡੀਸ਼ਨਰਾਂ ਦੀ ਅੰਨ੍ਹੇਵਾਹ ਵਰਤੋਂ ਕਾਰਨ ਬਿਜਲੀ ਦੇ ਗਰਿੱਡ ਫੇਲ੍ਹ ਹੋਣ ਦੀ ਨੌਬਤ ਆ ਗਈ ਹੈ, ਜਿਸ ਕਾਰਨ ਹੰਗਾਮੀ ਸਥਿਤੀ ਵਜੋਂ ਵਾਧੂ ਜਨਰੇਟਰ ਤਾਇਨਾਤ ਕੀਤੇ ਗਏ ਹਨ।
ਇਸ ਅਸਹਿ ਗਰਮੀ ਦਾ ਖ਼ਮਿਆਜ਼ਾ ਜੰਗਲੀ ਜੀਵਾਂ ਨੂੰ ਵੀ ਭੁਗਤਣਾ ਪੈ ਰਿਹਾ ਹੈ। ਬੈਲਜੀਅਮ ਦੇ ਟੈਂਪਲੂਕਸ ਸਥਿਤ ਜੰਗਲੀ ਜਾਨਵਰ ਪੁਨਰਵਾਸ ਕੇਂਦਰ ਵਿਖੇ ਮਹਿਜ਼ ਤਿੰਨ ਦਿਨਾਂ ਅੰਦਰ 150 ਤੋਂ ਵੱਧ ਝੁਲਸੇ ਹੋਏ ਪੰਛੀ ਅਤੇ ਜਾਨਵਰ ਇਲਾਜ ਲਈ ਲਿਆਂਦੇ ਗਏ ਹਨ।
"ਇਮਾਰਤਾਂ ਦੀਆਂ ਛੱਤਾਂ ਦਾ ਤਾਪਮਾਨ 50 ਤੋਂ 60 ਡਿਗਰੀ ਸੈਲਸੀਅਸ ਤੱਕ ਪਹੁੰਚ ਰਿਹਾ ਹੈ। ਇਸ ਅਸਹਿ ਤਪਸ਼ ਕਾਰਨ ਪੰਛੀ ਬੇਚੈਨ ਹੋ ਕੇ ਆਪਣੇ ਆਲ੍ਹਣਿਆਂ ਤੋਂ ਹੇਠਾਂ ਛਾਲਾਂ ਮਾਰ ਰਹੇ ਹਨ।"
पर्यावरण ਮਾਹਿਰਾਂ ਦਾ ਸਾਫ਼ ਕਹਿਣਾ ਹੈ ਕਿ ਇਹ ਸਭ ਕੁਝ ਜਲਵਾਯੂ ਪਰਿਵਰਤਨ (Climate Change) ਦਾ ਸਿੱਧਾ ਨਤੀਜਾ ਹੈ। ਜੇਕਰ ਗਲੋਬਲ ਤਾਪਮਾਨ ਨੂੰ ਕਾਬੂ ਨਾ ਕੀਤਾ ਗਿਆ, ਤਾਂ ਆਉਣ ਵਾਲੇ ਸਮੇਂ ਵਿੱਚ ਅਜਿਹੀਆਂ ਖ਼ਤਰਨਾਕ ਹੀਟਵੇਵ ਅਤੇ ਮੌਸਮੀ ਤੂਫ਼ਾਨਾਂ ਦੀ ਤੀਬਰਤਾ ਹੋਰ ਜ਼ਿਆਦਾ ਵਧੇਗੀ, ਜੋ ਮਨੁੱਖਤਾ ਦੇ ਨਾਲ-ਨਾਲ ਪੂਰੇ ਜੀਵ-ਜਗਤ ਲਈ ਵੱਡਾ ਖ਼ਤਰਾ ਸਾਬਤ ਹੋਵੇਗੀ।
Get all latest content delivered to your email a few times a month.
