ਮਾਸਕੋ ‘ਚ ਯੂਕ੍ਰੇਨ ਦੇ ਹਮਲੇ ਮਗਰੋਂ ਪਈ ‘ਕਾਲੀ ਬਾਰਿਸ਼’, ਲੋਕ ਹੋਏ ਸੁੰਨ; ਰੂਸ ਸਰਕਾਰ ਵੱਲੋਂ ਨਕਾਰਨ ਦੀ ਕੋਸ਼ਿਸ਼

ਰੂਸ ਦੀ ਰਾਜਧਾਨੀ ਮਾਸਕੋ ‘ਚ ਸਥਿਤ ਇਕ ਵੱਡੀ ਤੇਲ ਰਿਫਾਈਨਰੀ ‘ਤੇ ਯੂਕ੍ਰੇਨ ਵੱਲੋਂ ਕੀਤੇ ਗਏ ਜ਼ਬਰਦਸਤ ਡਰੋਨ ਹਮਲੇ ਤੋਂ ਬਾਅਦ ਵੀਰਵਾਰ ਨੂੰ ਸ਼ਹਿਰ ਦੇ ਕਈ ਹਿੱਸਿਆਂ ਵਿੱਚ ਕਾਲੇ ਅਤੇ ਤੇਲਯੁਕਤ ਪਦਾਰਥ ਦੀ ਮੋਟੀ ਪਰਤ ਜੰਮ ਗਈ ਹੈ। ਬੀਬੀਸੀ (BBC) ਦੀ ਰਿਪੋਰਟ ਮੁਤਾਬਕ, ਇਸ ਹਮਲੇ ਕਾਰਨ ਇੱਕ ਬਹੁਤ ਹੀ ਅਜੀਬ ਘਟਨਾ ਦੇਖਣ ਨੂੰ ਮਿਲੀ, ਜਿੱਥੇ ਰਿਹਾਇਸ਼ੀ ਇਲਾਕਿਆਂ ਵਿੱਚ ਕਾਲੇ ਤੇਲ ਦੇ ਕਣ ਬਾਰਿਸ਼ ਦੀਆਂ ਬੂੰਦਾਂ ਵਾਂਗ ਅਸਮਾਨ ਤੋਂ ਡਿੱਗਣ ਲੱਗੇ। ਇਹ ਘਟਨਾ ਰਾਜਧਾਨੀ ਖੇਤਰ ‘ਤੇ ਯੂਕ੍ਰੇਨ ਵੱਲੋਂ ਹੁਣ ਤੱਕ ਦੇ ਸਭ ਤੋਂ ਵੱਡੇ ਹਵਾਈ ਹਮਲੇ ਤੋਂ ਬਾਅਦ ਵਾਪਰੀ ਹੈ, ਜਿਸ ਵਿੱਚ ਯੂਕ੍ਰੇਨ ਨੇ ਲਗਭਗ 200 ਡਰੋਨ ਦਾਗੇ ਸਨ। ਮਿਲੀ ਜਾਣਕਾਰੀ ਅਨੁਸਾਰ, ਇਨ੍ਹਾਂ ਹਮਲਿਆਂ ਕਾਰਨ ਅਸਮਾਨ ਵਿੱਚ ਸੰਘਣੇ ਧੂੰਏਂ ਦੇ ਗੁਬਾਰ ਉੱਠ ਖੜ੍ਹੇ ਹੋਏ ਅਤੇ ਹੋਈ ਇਸ 'ਕਾਲੀ ਬਾਰਿਸ਼' ਕਾਰਨ ਮਾਸਕੋ ਦੇ ਆਲੇ-ਦੁਆਲੇ ਦੇ ਇਲਾਕਿਆਂ ਵਿੱਚ ਘੱਟੋ-ਘੱਟ 17 ਲੋਕ ਜ਼ਖਮੀ ਹੋ ਗਏ।

ਯੂਕ੍ਰੇਨ ਦੇ ਇਸ ਹਮਲੇ ਅਤੇ ਧਮਾਕਿਆਂ ਤੋਂ ਬਾਅਦ, ਸੋਸ਼ਲ ਮੀਡੀਆ ‘ਤੇ ਕਈ ਵੀਡੀਓਜ਼ ਤੇਜ਼ੀ ਨਾਲ ਵਾਇਰਲ ਹੋ ਰਹੀਆਂ ਹਨ। ਇਨ੍ਹਾਂ ਵਾਇਰਲ ਵੀਡੀਓਜ਼ ਵਿੱਚ ਲੋਕਾਂ ਦੀਆਂ ਕਾਰਾਂ, ਘਰਾਂ ਦੀਆਂ ਖਿੜਕੀਆਂ ਅਤੇ ਸੜਕਾਂ ‘ਤੇ ਚਿਪਚਿਪੀ ਤੇ ਕਾਲੀ ਪਰਤ ਜੰਮੀ ਹੋਈ ਸਾਫ਼ ਦਿਖਾਈ ਦੇ ਰਹੀ ਹੈ। ਕਈ ਵੀਡੀਓਜ਼ ਵਿੱਚ ਲੋਕ ਇਸ ਤੇਲ ਵਰਗੇ ਤਰਲ ਪਦਾਰਥ ਨੂੰ ਹੱਥ ਲਗਾ ਕੇ ਦਿਖਾ ਰਹੇ ਹਨ, ਜਿਸ ਤੋਂ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ ਕਿ ਇਹ ਜ਼ਹਿਰੀਲਾ ਕੂੜਾ ਸਥਾਨਕ ਇਲਾਕਿਆਂ ਵਿੱਚ ਕਿਸ ਤਰ੍ਹਾਂ ਫੈਲ ਚੁੱਕਾ ਹੈ।

ਇੰਨੀਆਂ ਵੀਡੀਓਜ਼ ਅਤੇ ਤਸਵੀਰਾਂ ਸਾਹਮਣੇ ਆਉਣ ਦੇ ਬਾਵਜੂਦ, ਸ਼ੁਰੂਆਤ ਵਿੱਚ ਨਗਰ ਨਿਗਮ ਦੇ ਅਧਿਕਾਰੀਆਂ ਨੇ ਇਸ ਸੰਕਟ ਨੂੰ ਛੋਟਾ ਦਿਖਾਉਣ ਦੀ ਕੋਸ਼ਿਸ਼ ਕੀਤੀ। ਸਥਾਨਕ ਪ੍ਰਸ਼ਾਸਨ ਨੇ ਸਖ਼ਤੀ ਨਾਲ ਨਕਾਰਿਆ ਕਿ ਸ਼ਹਿਰ ਵਿੱਚ ਕਿਸੇ ਵੀ ਤਰ੍ਹਾਂ ਦੀ "ਤੇਲ ਦੀ ਬਾਰਿਸ਼" ਹੋਈ ਹੈ। ਹਾਲਾਂਕਿ, ਬਾਅਦ ਵਿੱਚ ਸ਼ਹਿਰ ਦੇ ਅਧਿਕਾਰਿਕ ਟੈਲੀਗ੍ਰਾਮ ਚੈਨਲਾਂ ਨੇ ਸਿਹਤ ਸਬੰਧੀ ਜ਼ਰੂਰੀ ਚੇਤਾਵਨੀਆਂ ਜਾਰੀ ਕਰਕੇ ਅਧਿਕਾਰੀਆਂ ਦੇ ਇਨ੍ਹਾਂ ਬਿਆਨਾਂ ਦੇ ਉਲਟ ਸੱਚਾਈ ਬਿਆਨ ਕਰ ਦਿੱਤੀ।

ਖੇਤਰੀ ਸਰਕਾਰ ਨੇ ਦੱਖਣ-ਪੂਰਬੀ ਜ਼ਿਲ੍ਹਿਆਂ ਦੇ ਵਸਨੀਕਾਂ ਨੂੰ ਵਿਸ਼ੇਸ਼ ਤੌਰ 'ਤੇ ਸਲਾਹ ਦਿੱਤੀ ਹੈ ਕਿ ਉਹ ਜ਼ਹਿਰੀਲੀਆਂ ਗੈਸਾਂ ਨੂੰ ਸਾਹ ਰਾਹੀਂ ਅੰਦਰ ਜਾਣ ਤੋਂ ਰੋਕਣ ਲਈ ਆਪਣੇ ਘਰਾਂ ਦੀਆਂ ਖਿੜਕੀਆਂ ਨੂੰ ਪੂਰੀ ਤਰ੍ਹਾਂ ਕੱਸ ਕੇ ਬੰਦ ਰੱਖਣ। ਇਸ ਤੋਂ ਇਲਾਵਾ, ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਛੋਟੇ ਬੱਚਿਆਂ ਵਾਲੇ ਪਰਿਵਾਰਾਂ, ਬਜ਼ੁਰਗ ਨਾਗਰਿਕਾਂ ਅਤੇ ਅਸਥਮਾ (ਸਾਹ ਦੀ ਬੀਮਾਰੀ) ਤੋਂ ਪੀੜਤ ਮਰੀਜ਼ਾਂ ਨੂੰ ਤੁਰੰਤ ਉਹ ਇਲਾਕਾ ਛੱਡ ਕੇ ਕਿਸੇ ਸੁਰੱਖਿਅਤ ਥਾਂ ਚਲੇ ਜਾਣਾ ਚਾਹੀਦਾ ਹੈ।

ਮਾਸਕੋ ਦੇ ਵਸਨੀਕਾਂ ਨੇ ਬੀਬੀਸੀ (BBC) ਨੂੰ ਹੱਡਬੀਤੀ ਦੱਸਦਿਆਂ ਕਿਹਾ ਕਿ ਇਸ ਹਲਕੀ ਤੇਲਯੁਕਤ ਬਾਰਿਸ਼ ਕਾਰਨ ਉਨ੍ਹਾਂ ਦੇ ਕੱਪੜਿਆਂ ‘ਤੇ ਬਹੁਤ ਖ਼ਰਾਬ ਕਾਲੇ ਧੱਬੇ ਪੈ ਗਏ ਹਨ। ਦੂਜੇ ਪਾਸੇ, ਇਸ ਹਮਲੇ ਨੇ ਰੂਸ ਦੇ ਵੱਡੇ ਹਵਾਈ ਸੁਰੱਖਿਆ ਨੈੱਟਵਰਕ ਦੀ ਵੀ ਕੜੀ ਪ੍ਰੀਖਿਆ ਲਈ ਹੈ।

ਰੂਸ ਦੇ ਰੱਖਿਆ ਮੰਤਰਾਲੇ ਨੇ ਦਾਅਵਾ ਕੀਤਾ ਹੈ ਕਿ ਉਸੇ 24 ਘੰਟਿਆਂ ਦੇ ਅੰਦਰ ਦੇਸ਼ ਭਰ ਵਿੱਚ ਲਗਭਗ 1,000 ਡਰੋਨ ਅਤੇ ਕਈ ਕਰੂਜ਼ ਮਿਜ਼ਾਈਲਾਂ ਨੂੰ ਹਵਾ ਵਿੱਚ ਹੀ ਨਸ਼ਟ ਕੀਤਾ ਗਿਆ ਹੈ। ਪਰ ਇਸ ਦੇ ਬਾਵਜੂਦ, ਸੜ ਰਹੀ ਰਿਫਾਈਨਰੀ ਤੋਂ ਨਿਕਲੇ ਮਲਬੇ ਅਤੇ ਜ਼ਹਿਰੀਲੇ ਧੂੰਏਂ ਨੇ ਇਸ ਜੰਗ ਦੇ ਵਾਤਾਵਰਣ 'ਤੇ ਪੈਣ ਵਾਲੇ ਮਾਰੂ ਪ੍ਰਭਾਵ ਨੂੰ ਸਿੱਧਾ ਮਾਸਕੋ ਦੇ ਆਮ ਨਾਗਰਿਕਾਂ ਦੇ ਘਰਾਂ ਤੱਕ ਪਹੁੰਚਾ ਦਿੱਤਾ ਹੈ।