ਤਾਜਾ ਖਬਰਾਂ
ਭਾਰਤ ਵਾਂਗ ਇਸ ਸਮੇਂ ਪੂਰਾ ਯੂਰਪ ਵੀ ਭਿਆਨਕ ਗਰਮੀ ਅਤੇ ਲੂ (Heatwave) ਦੀ ਮਾਰ ਹੇਠ ਹੈ। ਕਈ ਯੂਰਪੀ ਮੁਲਕਾਂ ਵਿੱਚ ਪਾਰਾ ਇੰਨੀ ਤੇਜ਼ੀ ਨਾਲ ਉੱਪਰ ਚੜ੍ਹ ਰਿਹਾ ਹੈ ਕਿ ਆਮ ਜਨਜੀਵਨ ਪੂਰੀ ਤਰ੍ਹਾਂ ਅਸਤ-ਵਿਆਸਤ ਹੋ ਗਿਆ ਹੈ। ਫਰਾਂਸ ਵਿੱਚ ਇਸ ਕਹਿਰ ਕਾਰਨ ਹੁਣ ਤੱਕ ਘੱਟੋ-ਘੱਟ 7 ਲੋਕਾਂ ਦੀ ਜਾਨ ਜਾ ਚੁੱਕੀ ਹੈ, ਜਦਕਿ ਬ੍ਰਿਟੇਨ ਵਿੱਚ ਤਾਪਮਾਨ ਨੇ ਪਿਛਲੇ ਇੱਕ ਸਦੀ ਦੇ ਰਿਕਾਰਡ ਧਵਸਤ ਕਰ ਦਿੱਤੇ ਹਨ। ਮੌਸਮ ਵਿਗਿਆਨੀਆਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਜਲਵਾਯੂ ਪਰਿਵਰਤਨ (Climate Change) ਦੇ ਖ਼ਤਰਨਾਕ ਪ੍ਰਭਾਵਾਂ ਕਾਰਨ ਆਉਣ ਵਾਲੇ ਦਿਨਾਂ ਵਿੱਚ ਸਥਿਤੀ ਹੋਰ ਵੀ ਗੰਭੀਰ ਹੋ ਸਕਦੀ ਹੈ।
ਮੌਸਮ ਮਾਹਿਰਾਂ ਮੁਤਾਬਕ ਯੂਰਪ ਦੇ ਉੱਪਰ ਇਸ ਸਮੇਂ 'ਹੀਟ ਡੋਮ' (Heat Dome) ਯਾਨੀ ਇੱਕ ਸ਼ਕਤੀਸ਼ਾਲੀ ਹਾਈ-ਪ੍ਰੈਸ਼ਰ ਸਿਸਟਮ ਬਣ ਗਿਆ ਹੈ।
ਇਹ ਸਿਸਟਮ ਕਿਸੇ ਬਰਤਨ ਦੇ ਢੱਕਣ ਵਾਂਗ ਕੰਮ ਕਰਦਾ ਹੈ, ਜੋ ਗਰਮ ਹਵਾ ਨੂੰ ਉੱਪਰ ਉੱਠਣ ਨਹੀਂ ਦਿੰਦਾ ਅਤੇ ਉਸ ਨੂੰ ਜ਼ਮੀਨ ਦੇ ਨੇੜੇ ਹੀ ਦਬਾ ਕੇ ਰੱਖਦਾ ਹੈ। ਹਵਾ ਫਸ ਜਾਣ ਕਾਰਨ ਧਰਤੀ ਦਾ ਤਾਪਮਾਨ ਲਗਾਤਾਰ ਵਧਦਾ ਜਾਂਦਾ ਹੈ। ਮੌਸਮ ਵਿਭਾਗ ਅਨੁਸਾਰ ਇਹ ਖ਼ਤਰਨਾਕ ਸਥਿਤੀ ਕਈ ਹਫ਼ਤਿਆਂ ਤੱਕ ਬਣੀ ਰਹਿ ਸਕਦੀ ਹੈ।
ਫਰਾਂਸ ਦੇ ਜੂਨੀਅਰ ਊਰਜਾ ਮੰਤਰੀ ਮੌਡ ਬ੍ਰੇਗੇਓਨ ਨੇ ਅਧਿਕਾਰਤ ਤੌਰ 'ਤੇ ਪੁਸ਼ਟੀ ਕੀਤੀ ਹੈ ਕਿ ਦੇਸ਼ ਵਿੱਚ ਗਰਮੀ ਨਾਲ ਸਬੰਧਤ ਵੱਖ-ਵੱਖ ਹਾਦਸਿਆਂ ਵਿੱਚ 7 ਲੋਕ ਮਾਰੇ ਗਏ ਹਨ।
ਗਰਮੀ ਤੋਂ ਰਾਹਤ ਪਾਉਣ ਲਈ ਨਦੀਆਂ, ਝੀਲਾਂ ਅਤੇ ਸਮੁੰਦਰੀ ਤੱਟਾਂ 'ਤੇ ਗਏ 5 ਲੋਕਾਂ ਦੀ ਡੁੱਬਣ ਕਾਰਨ ਮੌਤ ਹੋ ਗਈ।
ਪੈਰਿਸ ਵਿਖੇ ਚੱਲ ਰਹੀ ਇੱਕ ਰੇਸ ਦੌਰਾਨ ਤੇਜ਼ ਧੁੱਪ ਕਾਰਨ 53 ਸਾਲਾ ਦੌੜਾਕ ਦੀ ਹਾਰਟ ਅਟੈਕ ਨਾਲ ਜਾਨ ਚਲੀ ਗਈ, ਜਦਕਿ ਲਿਓਨ ਸ਼ਹਿਰ ਵਿੱਚ ਇੱਕ ਔਰਤ ਹੀਟਸਟ੍ਰੋਕ (ਲੂ ਲੱਗਣ) ਦਾ ਸ਼ਿਕਾਰ ਹੋ ਗਈ।
ਫਰਾਂਸ ਦੀ ਖੇਡ ਮੰਤਰੀ ਮਰੀਨਾ ਫੇਰਾਰੀ ਨੇ ਦੱਸਿਆ ਕਿ ਖਿਡਾਰੀਆਂ ਦੀ ਸੁਰੱਖਿਆ ਨੂੰ ਦੇਖਦੇ ਹੋਏ ਕਈ ਵੱਡੇ ਖੇਡ ਮੁਕਾਬਲੇ ਰੱਦ ਕਰ ਦਿੱਤੇ ਗਏ ਹਨ। ਪੈਰਿਸ ਸਣੇ ਕਈ ਵੱਡੇ ਸੂਬਿਆਂ ਵਿੱਚ 'ਔਰੇਂਜ ਅਲਰਟ' ਜਾਰੀ ਕਰਕੇ ਤਾਪਮਾਨ 36 ਡਿਗਰੀ ਸੈਲਸੀਅਸ ਤੱਕ ਜਾਣ ਦੀ ਭਵਿੱਖਬਾਣੀ ਕੀਤੀ ਗਈ ਹੈ।
ਦੂਜੇ ਪਾਸੇ, ਬ੍ਰਿਟੇਨ ਵਿੱਚ ਵੀ ਮਈ ਮਹੀਨੇ ਦੀ ਗਰਮੀ ਨੇ ਇਤਿਹਾਸ ਰਚ ਦਿੱਤਾ ਹੈ। ਲੰਡਨ ਦੇ ਮਸ਼ਹੂਰ 'ਕੇਵ ਗਾਰਡਨ' ਵਿਖੇ ਪਾਰਾ 34.8 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ, ਜੋ ਪਿਛਲੇ ਸਾਲ ਦੇ ਰਿਕਾਰਡ ਨਾਲੋਂ 2 ਡਿਗਰੀ ਜ਼ਿਆਦਾ ਹੈ।
ਬ੍ਰਿਟੇਨ ਨੇ ਮਹਿਜ਼ 24 ਘੰਟਿਆਂ ਦੇ ਅੰਦਰ ਦੂਜੀ ਵਾਰ ਮਈ ਮਹੀਨੇ ਦਾ ਸਭ ਤੋਂ ਗਰਮ ਦਿਨ ਰਿਕਾਰਡ ਕੀਤਾ ਹੈ। ਇਸ ਤੋਂ ਇਲਾਵਾ ਲੰਡਨ ਵਿੱਚ 'ਟ੍ਰੋਪਿਕਲ ਨਾਈਟ' (Tropical Night) ਦਰਜ ਕੀਤੀ ਗਈ, ਜਿਸ ਦਾ ਮਤਲਬ ਹੈ ਕਿ ਸੂਰਜ ਡੁੱਬਣ ਤੋਂ ਬਾਅਦ ਵੀ ਰਾਤ ਦਾ ਤਾਪਮਾਨ 20 ਡਿਗਰੀ ਸੈਲਸੀਅਸ ਤੋਂ ਹੇਠਾਂ ਨਹੀਂ ਡਿੱਗਿਆ। ਆਮ ਤੌਰ 'ਤੇ ਯੂਰਪ ਵਿੱਚ ਰਾਤਾਂ ਠੰਢੀਆਂ ਹੁੰਦੀਆਂ ਹਨ, ਪਰ ਇਸ ਵਾਰ ਲੋਕਾਂ ਨੂੰ ਰਾਤ ਵੇਲੇ ਵੀ ਭਿਆਨਕ ਹੁੰਮਸ ਅਤੇ ਗਰਮੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਪਰਿਆਵਰਣ ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਹ ਸਾਰੀਆਂ ਘਟਨਾਵਾਂ ਮਨੁੱਖ ਦੁਆਰਾ ਕੁਦਰਤ ਨਾਲ ਕੀਤੀ ਜਾ ਰਹੀ ਛੇੜਛਾੜ ਦਾ ਨਤੀਜਾ ਹਨ। ਜਲਵਾਯੂ ਪਰਿਵਰਤਨ ਦੇ ਕਾਰਨ ਹੀਟਵੇਵ ਦੀਆਂ ਇਹ ਘਟਨਾਵਾਂ ਹੁਣ ਪਹਿਲਾਂ ਨਾਲੋਂ ਕਿਤੇ ਜ਼ਿਆਦਾ ਲੰਬੀਆਂ ਅਤੇ ਘਾਤਕ ਹੁੰਦੀਆਂ ਜਾ ਰਹੀਆਂ ਹਨ, ਜਿਸ ਕਾਰਨ ਹਰ ਸਾਲ ਯੂਰਪ ਵਿੱਚ ਗਰਮੀ ਦੇ ਨਵੇਂ ਰਿਕਾਰਡ ਬਣ ਰਹੇ ਹਨ।
Get all latest content delivered to your email a few times a month.
