ਏਸ਼ੀਅਨ ਕੁਸ਼ਤੀ ਚੈਂਪੀਅਨਸ਼ਿਪ: ਸੁਜੀਤ ਅਤੇ ਅਭਿਮਨਿਊ ਨੇ ਸੋਨੇ ਦੇ ਤਗਮੇ ਜਿੱਤ ਕੇ ਰਚਿਆ ਇਤਿਹਾਸ

ਕਿਰਗਿਜ਼ਸਤਾਨ ਦੀ ਰਾਜਧਾਨੀ ਬਿਸ਼ਕੇਕ ਵਿੱਚ ਚੱਲ ਰਹੀ ਸੀਨੀਅਰ ਏਸ਼ੀਅਨ ਕੁਸ਼ਤੀ ਚੈਂਪੀਅਨਸ਼ਿਪ 2026 ਵਿੱਚ ਭਾਰਤੀ ਪਹਿਲਵਾਨਾਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਦੇਸ਼ ਦਾ ਨਾਂ ਵਿਸ਼ਵ ਪੱਧਰ 'ਤੇ ਰੌਸ਼ਨ ਕੀਤਾ ਹੈ। ਸ਼ਨੀਵਾਰ ਦਾ ਦਿਨ ਭਾਰਤੀ ਖੇਮੇ ਲਈ ਇਤਿਹਾਸਕ ਰਿਹਾ, ਜਿੱਥੇ ਫ੍ਰੀਸਟਾਈਲ ਵਰਗ ਵਿੱਚ ਸੁਜੀਤ ਅਤੇ ਅਭਿਮਨਿਊ ਨੇ ਆਪਣੀ ਤਾਕਤ ਦਾ ਲੋਹਾ ਮਨਵਾਉਂਦਿਆਂ ਦੋ ਸੋਨ ਤਗਮੇ ਭਾਰਤ ਦੀ ਝੋਲੀ ਪਾਏ।

ਸੁਜੀਤ ਨੇ ਤੋੜਿਆ 7 ਸਾਲਾਂ ਦਾ ਸੋਕਾ

ਪੁਰਸ਼ਾਂ ਦੇ 65 ਕਿਲੋਗ੍ਰਾਮ ਫ੍ਰੀਸਟਾਈਲ ਫਾਈਨਲ ਵਿੱਚ ਸੁਜੀਤ ਨੇ ਉਜ਼ਬੇਕਿਸਤਾਨ ਦੇ ਉਮਿਦਜੋਨ ਜਾਲੋਲੋਵ ਨੂੰ 8-1 ਦੇ ਵੱਡੇ ਫਰਕ ਨਾਲ ਹਰਾ ਕੇ ਸੋਨ ਤਗਮਾ ਜਿੱਤਿਆ। ਜ਼ਿਕਰਯੋਗ ਹੈ ਕਿ 2019 ਵਿੱਚ ਬਜਰੰਗ ਪੂਨੀਆ ਤੋਂ ਬਾਅਦ ਇਸ ਭਾਰ ਵਰਗ ਵਿੱਚ ਏਸ਼ੀਆਈ ਖ਼ਿਤਾਬ ਜਿੱਤਣ ਵਾਲਾ ਸੁਜੀਤ ਪਹਿਲਾ ਭਾਰਤੀ ਪਹਿਲਵਾਨ ਬਣ ਗਿਆ ਹੈ। ਹਾਲਾਂਕਿ ਸੁਜੀਤ ਨੇ ਸ਼ੁਰੂਆਤ ਧੀਮੀ ਕੀਤੀ ਸੀ, ਪਰ ਦੂਜੇ ਦੌਰ ਵਿੱਚ ਰਫ਼ਤਾਰ ਫੜਦਿਆਂ ਉਸਨੇ ਉਜ਼ਬੇਕ ਪਹਿਲਵਾਨ ਨੂੰ ਹਮਲਾ ਕਰਨ ਦਾ ਕੋਈ ਮੌਕਾ ਨਹੀਂ ਦਿੱਤਾ।

ਅਭਿਮਨਿਊ ਦੀ ਸ਼ਾਨਦਾਰ ਵਾਪਸੀ

70 ਕਿਲੋਗ੍ਰਾਮ ਵਰਗ ਵਿੱਚ ਸੀ.ਆਈ.ਐਸ.ਐਫ. (CISF) ਦੇ ਹੈੱਡ ਕਾਂਸਟੇਬਲ ਅਭਿਮਨਿਊ ਨੇ ਆਪਣੇ ਜਜ਼ਬੇ ਦੀ ਮਿਸਾਲ ਪੇਸ਼ ਕੀਤੀ। ਮੰਗੋਲੀਆ ਦੇ ਤੁਲਗਾ ਤੁਮੂਰ ਓਚਿਰ ਵਿਰੁੱਧ ਫਾਈਨਲ ਮੁਕਾਬਲੇ ਵਿੱਚ ਅਭਿਮਨਿਊ ਇੱਕ ਸਮੇਂ 0-2 ਨਾਲ ਪਿੱਛੇ ਚੱਲ ਰਿਹਾ ਸੀ, ਪਰ ਉਸਨੇ ਜ਼ਬਰਦਸਤ ਵਾਪਸੀ ਕਰਦਿਆਂ ਸਕੋਰ 5-3 ਕਰਕੇ ਸੋਨੇ 'ਤੇ ਕਬਜ਼ਾ ਕੀਤਾ। ਇਸ ਜਿੱਤ ਨਾਲ ਉਨ੍ਹਾਂ ਨੇ ਆਪਣੀ ਫੋਰਸ ਅਤੇ ਦੇਸ਼ ਦਾ ਮਾਣ ਵਧਾਇਆ ਹੈ।

ਤਗਮਿਆਂ ਦੀ ਸੂਚੀ ਅਤੇ ਹੋਰ ਪ੍ਰਾਪਤੀਆਂ

ਸੰਦੀਪ ਮਾਨ: 79 ਕਿਲੋਗ੍ਰਾਮ ਵਰਗ ਦੇ ਫਾਈਨਲ ਵਿੱਚ ਸੰਦੀਪ ਨੂੰ ਕਰੀਬੀ ਮੁਕਾਬਲੇ ਵਿੱਚ 1-2 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ ਅਤੇ ਉਨ੍ਹਾਂ ਨੂੰ ਚਾਂਦੀ ਦੇ ਤਗਮੇ ਨਾਲ ਸੰਤੁਸ਼ਟ ਹੋਣਾ ਪਿਆ।

ਅੰਕੁਸ਼: 57 ਕਿਲੋਗ੍ਰਾਮ ਵਰਗ ਵਿੱਚ ਅੰਕੁਸ਼ ਨੇ ਜਾਪਾਨੀ ਪਹਿਲਵਾਨ ਨੂੰ 8-2 ਨਾਲ ਹਰਾ ਕੇ ਕਾਂਸੀ ਦਾ ਤਗਮਾ ਜਿੱਤਿਆ।

ਮੌਜੂਦਾ ਸਥਿਤੀ: ਭਾਰਤ ਕੋਲ ਹੁਣ ਤੱਕ ਕੁੱਲ 14 ਤਗਮੇ (2 ਸੋਨ, 4 ਚਾਂਦੀ ਅਤੇ 8 ਕਾਂਸੀ) ਹੋ ਗਏ ਹਨ।

ਮੁਕਾਬਲੇ ਦੇ ਆਖਰੀ ਦਿਨ ਵੀ ਭਾਰਤ ਲਈ ਖੁਸ਼ਖਬਰੀ ਆ ਸਕਦੀ ਹੈ। ਪੈਰਿਸ ਓਲੰਪਿਕ ਦੇ ਕਾਂਸੀ ਤਗਮਾ ਜੇਤੂ ਅਮਨ (61 ਕਿਲੋ) ਅਤੇ ਮੁਕੁਲ ਦਹੀਆ (86 ਕਿਲੋ) ਨੇ ਆਪਣੇ-ਆਪਣੇ ਫਾਈਨਲ ਵਿੱਚ ਜਗ੍ਹਾ ਪੱਕੀ ਕਰ ਲਈ ਹੈ। ਮੁਕੁਲ ਦਹੀਆ ਨੇ ਸੈਮੀਫਾਈਨਲ ਵਿੱਚ 12-6 ਦੀ ਸ਼ਾਨਦਾਰ ਜਿੱਤ ਦਰਜ ਕੀਤੀ ਹੈ ਅਤੇ ਹੁਣ ਸੋਨੇ ਦੇ ਤਗਮੇ ਲਈ ਉਨ੍ਹਾਂ ਦਾ ਸਾਹਮਣਾ ਈਰਾਨ ਦੇ ਮਜ਼ਬੂਤ ਪਹਿਲਵਾਨ ਕਾਮਰਾਨ ਘਸੇਮਪੁਰ ਨਾਲ ਹੋਵੇਗਾ। ਇਸ ਦੇ ਨਾਲ ਹੀ ਦਿਨੇਸ਼ 125 ਕਿਲੋਗ੍ਰਾਮ ਵਰਗ ਵਿੱਚ ਕਾਂਸੀ ਦੇ ਤਗਮੇ ਲਈ ਮੈਦਾਨ ਵਿੱਚ ਨਿੱਤਰੇਗਾ।