ਤਾਜਾ ਖਬਰਾਂ
ਸਨਰਾਈਜ਼ਰਜ਼ ਹੈਦਰਾਬਾਦ (SRH) ਨੇ ਇੰਡੀਅਨ ਪ੍ਰੀਮੀਅਰ ਲੀਗ 2026 ਦੇ ਛੇਵੇਂ ਮੁਕਾਬਲੇ ਵਿੱਚ ਸ਼ਾਨਦਾਰ ਵਾਪਸੀ ਕਰਦਿਆਂ ਮੇਜ਼ਬਾਨ ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਨੂੰ 65 ਦੌੜਾਂ ਦੇ ਵੱਡੇ ਫਰਕ ਨਾਲ ਹਰਾ ਦਿੱਤਾ ਹੈ। ਈਡਨ ਗਾਰਡਨ ਵਿਖੇ ਖੇਡੇ ਗਏ ਇਸ ਮੈਚ ਵਿੱਚ ਜਿੱਥੇ ਹੈਦਰਾਬਾਦ ਨੇ ਸੀਜ਼ਨ ਦੀ ਆਪਣੀ ਪਹਿਲੀ ਜਿੱਤ ਦਰਜ ਕੀਤੀ, ਉੱਥੇ ਹੀ ਕੇਕੇਆਰ ਨੂੰ ਲਗਾਤਾਰ ਦੂਜੀ ਹਾਰ ਦਾ ਸਾਹਮਣਾ ਕਰਨਾ ਪਿਆ।
ਹੈਦਰਾਬਾਦ ਦਾ ਪਹਾੜ ਵਰਗਾ ਸਕੋਰ
ਟਾਸ ਹਾਰ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਉਤਰੀ ਹੈਦਰਾਬਾਦ ਦੀ ਟੀਮ ਨੇ ਨਿਰਧਾਰਿਤ 20 ਓਵਰਾਂ ਵਿੱਚ 8 ਵਿਕਟਾਂ ਗੁਆ ਕੇ 226 ਦੌੜਾਂ ਦਾ ਵਿਸ਼ਾਲ ਸਕੋਰ ਖੜ੍ਹਾ ਕੀਤਾ। ਟੀਮ ਨੂੰ ਟ੍ਰੈਵਿਸ ਹੈੱਡ (46 ਦੌੜਾਂ) ਅਤੇ ਅਭਿਸ਼ੇਕ ਸ਼ਰਮਾ (48 ਦੌੜਾਂ) ਨੇ ਤੂਫ਼ਾਨੀ ਸ਼ੁਰੂਆਤ ਦਿੱਤੀ। ਦੋਵਾਂ ਨੇ ਮਹਿਜ਼ 5.4 ਓਵਰਾਂ ਵਿੱਚ 82 ਦੌੜਾਂ ਜੋੜ ਕੇ ਕੇਕੇਆਰ ਦੇ ਗੇਂਦਬਾਜ਼ਾਂ ਨੂੰ ਬੈਕਫੁੱਟ 'ਤੇ ਧੱਕ ਦਿੱਤਾ। ਮੱਧਕ੍ਰਮ ਵਿੱਚ ਹੇਨਰਿਕ ਕਲਾਸੇਨ (52) ਅਤੇ ਨਿਤੀਸ਼ ਰੈੱਡੀ (39) ਨੇ 82 ਦੌੜਾਂ ਦੀ ਅਹਿਮ ਸਾਂਝੇਦਾਰੀ ਕਰਕੇ ਸਕੋਰ 200 ਦੇ ਪਾਰ ਪਹੁੰਚਾਇਆ।
ਕੇਕੇਆਰ ਦੀ ਗੇਂਦਬਾਜ਼ੀ:
ਬਲੇਸਿੰਗ ਮੁਜ਼ਾਰਾਬਾਨੀ: 4 ਵਿਕਟਾਂ
ਵੈਭਵ ਅਰੋੜਾ: 2 ਵਿਕਟਾਂ
ਕੇਕੇਆਰ ਦੀ ਬੱਲੇਬਾਜ਼ੀ ਰਹੀ ਫਲਾਪ
227 ਦੌੜਾਂ ਦੇ ਵੱਡੇ ਟੀਚੇ ਦਾ ਪਿੱਛਾ ਕਰਨ ਉਤਰੀ ਕੋਲਕਾਤਾ ਦੀ ਟੀਮ ਦਬਾਅ ਹੇਠ ਨਜ਼ਰ ਆਈ ਅਤੇ 16 ਓਵਰਾਂ ਵਿੱਚ ਮਹਿਜ਼ 161 ਦੌੜਾਂ 'ਤੇ ਹੀ ਸਿਮਟ ਗਈ। ਸਲਾਮੀ ਬੱਲੇਬਾਜ਼ ਫਿਨ ਐਲਨ ਨੇ 7 ਗੇਂਦਾਂ ਵਿੱਚ 28 ਦੌੜਾਂ ਬਣਾ ਕੇ ਉਮੀਦ ਜਗਾਈ ਸੀ, ਪਰ ਕਪਤਾਨ ਅਜਿੰਕਿਆ ਰਹਾਣੇ (8 ਦੌੜਾਂ) ਅਤੇ ਹੋਰ ਬੱਲੇਬਾਜ਼ ਲੰਬੀ ਪਾਰੀ ਖੇਡਣ ਵਿੱਚ ਨਾਕਾਮ ਰਹੇ। ਅੰਗਕ੍ਰਿਸ਼ ਰਘੁਵੰਸ਼ੀ ਨੇ ਸਭ ਤੋਂ ਵੱਧ 52 ਦੌੜਾਂ ਬਣਾਈਆਂ ਅਤੇ ਰਿੰਕੂ ਸਿੰਘ ਨੇ 35 ਦੌੜਾਂ ਦਾ ਯੋਗਦਾਨ ਦਿੱਤਾ, ਪਰ ਇਹ ਜਿੱਤ ਲਈ ਕਾਫ਼ੀ ਨਹੀਂ ਸੀ।
ਹੈਦਰਾਬਾਦ ਦੀ ਗੇਂਦਬਾਜ਼ੀ:
ਜੈਦੇਵ ਉਨਾਦਕਟ: 3 ਵਿਕਟਾਂ
ਈਸ਼ਾਨ ਮਲਿੰਗਾ ਤੇ ਨਿਤੀਸ਼ ਰੈੱਡੀ: 2-2 ਵਿਕਟਾਂ
ਅਭਿਸ਼ੇਕ ਸ਼ਰਮਾ 'ਤੇ ਅਨੁਸ਼ਾਸਨੀ ਕਾਰਵਾਈ
ਮੈਚ ਜਿੱਤਣ ਦੇ ਬਾਵਜੂਦ ਹੈਦਰਾਬਾਦ ਦੇ ਸਟਾਰ ਆਲਰਾਊਂਡਰ ਅਭਿਸ਼ੇਕ ਸ਼ਰਮਾ ਲਈ ਇੱਕ ਬੁਰੀ ਖ਼ਬਰ ਆਈ। ਆਈਪੀਐਲ ਦੇ ਆਚਾਰ ਸੰਹਿਤਾ ਦੀ ਧਾਰਾ 2.3 (ਲੈਵਲ 1 ਅਪਰਾਧ) ਦੀ ਉਲੰਘਣਾ ਕਰਨ ਦੇ ਦੋਸ਼ ਵਿੱਚ ਉਨ੍ਹਾਂ 'ਤੇ ਮੈਚ ਫੀਸ ਦਾ 25 ਫੀਸਦੀ ਜੁਰਮਾਨਾ ਲਗਾਇਆ ਗਿਆ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਦੇ ਖਾਤੇ ਵਿੱਚ ਇੱਕ ਡੀਮੈਰਿਟ ਪੁਆਇੰਟ ਵੀ ਜੋੜਿਆ ਗਿਆ ਹੈ। ਅਭਿਸ਼ੇਕ ਨੇ ਆਪਣੀ ਗਲਤੀ ਸਵੀਕਾਰ ਕਰ ਲਈ ਹੈ, ਜਿਸ ਕਾਰਨ ਮੈਚ ਰੈਫਰੀ ਦਾ ਇਹ ਫੈਸਲਾ ਅੰਤਿਮ ਮੰਨਿਆ ਗਿਆ ਹੈ।
Get all latest content delivered to your email a few times a month.
