ਤਾਜਾ ਖਬਰਾਂ
ਮੱਧ ਪੂਰਬ ਵਿੱਚ ਜਾਰੀ ਖ਼ੂਨੀ ਸੰਘਰਸ਼ ਦਰਮਿਆਨ ਹਾਲਾਤ ਉਸ ਸਮੇਂ ਹੋਰ ਨਾਜ਼ੁਕ ਹੋ ਗਏ ਜਦੋਂ ਈਰਾਨ ਦੀ ਸ਼ਕਤੀਸ਼ਾਲੀ ਫੌਜ 'ਇਸਲਾਮਿਕ ਰੈਵੋਲਿਊਸ਼ਨਰੀ ਗਾਰਡ ਕੋਰ' (IRGC) ਨੇ ਅਮਰੀਕੀ ਬਹੁ-ਰਾਸ਼ਟਰੀ ਕੰਪਨੀਆਂ ਨੂੰ ਤਬਾਹ ਕਰਨ ਦੀ ਖੁੱਲ੍ਹੀ ਧਮਕੀ ਦਿੱਤੀ। ਈਰਾਨ ਨੇ ਐਲਾਨ ਕੀਤਾ ਹੈ ਕਿ ਜੇਕਰ ਉਨ੍ਹਾਂ ਦੇ ਆਗੂਆਂ ਨੂੰ ਨਿਸ਼ਾਨਾ ਬਣਾਇਆ ਗਿਆ, ਤਾਂ 1 ਅਪ੍ਰੈਲ ਤੋਂ ਅਮਰੀਕੀ ਕਾਰੋਬਾਰੀ ਇਕਾਈਆਂ 'ਤੇ ਵੱਡੇ ਹਮਲੇ ਕੀਤੇ ਜਾਣਗੇ।
ਆਈਆਰਜੀਸੀ ਨੇ ਆਪਣੀ ਚਿਤਾਵਨੀ ਵਿੱਚ ਦੁਨੀਆ ਦੀਆਂ ਮੰਨੀਆਂ-ਪ੍ਰਮੰਨੀਆਂ ਕੰਪਨੀਆਂ ਦੇ ਨਾਮ ਲਏ ਹਨ। ਇਸ ਸੂਚੀ ਵਿੱਚ ਮਾਈਕ੍ਰੋਸਾਫਟ, ਗੂਗਲ, ਐਪਲ, ਇੰਟੇਲ, ਆਈਬੀਐਮ, ਟੇਸਲਾ ਅਤੇ ਬੋਇੰਗ ਵਰਗੇ ਵੱਡੇ ਨਾਮ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਮੈਟਾ, ਓਰੇਕਲ, ਸਿਸਕੋ ਅਤੇ ਜੇਪੀ ਮੋਰਗਨ ਚੇਜ਼ ਵਰਗੇ ਵਿੱਤੀ ਅਦਾਰਿਆਂ ਨੂੰ ਵੀ ਨਿਸ਼ਾਨੇ 'ਤੇ ਰੱਖਿਆ ਗਿਆ ਹੈ। ਈਰਾਨੀ ਫੌਜ ਨੇ ਇਨ੍ਹਾਂ ਕੰਪਨੀਆਂ ਦੇ ਕਰਮਚਾਰੀਆਂ ਨੂੰ ਤੁਰੰਤ ਆਪਣੇ ਦਫ਼ਤਰ ਛੱਡਣ ਲਈ ਕਿਹਾ ਹੈ।
ਇਸ ਵਾਰ ਈਰਾਨ ਨੇ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਖੇਤਰ ਦੀਆਂ ਕੰਪਨੀਆਂ 'ਤੇ ਵੀ ਤਿੱਖੇ ਹਮਲੇ ਕੀਤੇ ਹਨ। IRGC ਦਾ ਦੋਸ਼ ਹੈ ਕਿ OpenAI ਅਤੇ Anthropic ਵਰਗੀਆਂ ਕੰਪਨੀਆਂ ਡਰੋਨ ਹਮਲਿਆਂ ਅਤੇ ਨਿਸ਼ਾਨਿਆਂ ਦੀ ਚੋਣ ਕਰਨ ਵਿੱਚ ਫੌਜੀ ਸਹਾਇਤਾ ਕਰ ਰਹੀਆਂ ਹਨ। ਈਰਾਨ ਅਨੁਸਾਰ, ਕਿਸੇ ਵੀ ਅੱਤਵਾਦੀ ਕਾਰਵਾਈ ਦੇ ਜਵਾਬ ਵਿੱਚ ਇਨ੍ਹਾਂ ਤਕਨੀਕੀ ਇਕਾਈਆਂ ਨੂੰ ਮਿੱਟੀ ਵਿੱਚ ਮਿਲਾ ਦਿੱਤਾ ਜਾਵੇਗਾ।
ਇਹ ਤਾਜ਼ਾ ਧਮਕੀ ਬ੍ਰਿਗੇਡੀਅਰ ਜਨਰਲ ਜਮਸ਼ੀਦ ਈਸ਼ਾਗੀ ਦੀ ਮੌਤ ਤੋਂ ਬਾਅਦ ਸਾਹਮਣੇ ਆਈ ਹੈ। ਈਰਾਨੀ ਅਧਿਕਾਰੀਆਂ ਨੇ ਪੁਸ਼ਟੀ ਕੀਤੀ ਹੈ ਕਿ ਅਮਰੀਕਾ-ਇਜ਼ਰਾਈਲੀ ਹਮਲੇ ਵਿੱਚ ਜਨਰਲ ਈਸ਼ਾਗੀ ਮਾਰੇ ਗਏ ਹਨ, ਜੋ ਈਰਾਨ ਦੇ ਰੱਖਿਆ ਬਜਟ ਅਤੇ ਵਿੱਤੀ ਢਾਂਚੇ ਦੇ ਮੁਖੀ ਸਨ। ਦੱਸਣਯੋਗ ਹੈ ਕਿ 28 ਫਰਵਰੀ ਤੋਂ ਚੱਲ ਰਹੀ ਇਸ ਜੰਗ ਵਿੱਚ ਸੁਪਰੀਮ ਲੀਡਰ ਅਲੀ ਖਮੇਨੀ ਸਮੇਤ ਕਈ ਚੋਟੀ ਦੇ ਈਰਾਨੀ ਆਗੂ ਆਪਣੀ ਜਾਨ ਗੁਆ ਚੁੱਕੇ ਹਨ।
ਈਰਾਨੀ ਫੌਜ ਨੇ ਇਸ ਬਦਲਾ ਲਊ ਕਾਰਵਾਈ ਲਈ 1 ਅਪ੍ਰੈਲ ਨੂੰ ਤੇਹਰਾਨ ਦੇ ਸਮੇਂ ਅਨੁਸਾਰ ਰਾਤ 8 ਵਜੇ (ਭਾਰਤੀ ਸਮੇਂ ਅਨੁਸਾਰ ਰਾਤ 10:30 ਵਜੇ) ਦਾ ਸਮਾਂ ਨਿਰਧਾਰਿਤ ਕੀਤਾ ਹੈ। ਇਨ੍ਹਾਂ ਘਟਨਾਵਾਂ ਤੋਂ ਬਾਅਦ ਪੂਰੀ ਦੁਨੀਆ ਵਿੱਚ ਦਹਿਸ਼ਤ ਦਾ ਮਾਹੌਲ ਹੈ ਅਤੇ ਅਮਰੀਕੀ ਕੰਪਨੀਆਂ ਦੀ ਸੁਰੱਖਿਆ ਨੂੰ ਲੈ ਕੇ ਸਵਾਲ ਖੜ੍ਹੇ ਹੋ ਗਏ ਹਨ। ਈਰਾਨ ਦੇ ਇਸ ਹਮਲਾਵਰ ਰੁਖ਼ ਨੇ ਵਿਸ਼ਵ ਅਰਥਚਾਰੇ ਅਤੇ ਸ਼ਾਂਤੀ ਲਈ ਇੱਕ ਨਵਾਂ ਖ਼ਤਰਾ ਪੈਦਾ ਕਰ ਦਿੱਤਾ ਹੈ।
Get all latest content delivered to your email a few times a month.
