ਚੰਡੀਗੜ੍ਹ ਪ੍ਰੈੱਸ ਕਲੱਬ ਚੋਣਾਂ: ਸੌਰਭ ਦੁੱਗਲ ਚੁਣੇ ਗਏ ਨਵੇਂ ਪ੍ਰਧਾਨ, ਉਮੇਸ਼ ਸ਼ਰਮਾ ਸੀਨੀਅਰ ਮੀਤ ਪ੍ਰਧਾਨ ਬਣੇ

ਸ਼ਹਿਰ ਦੀ ਵੱਕਾਰੀ ਸੰਸਥਾ 'ਚੰਡੀਗੜ੍ਹ ਪ੍ਰੈੱਸ ਕਲੱਬ' ਦੀਆਂ ਸਾਲ 2026-27 ਲਈ ਹੋਈਆਂ ਚੋਣਾਂ ਦੇ ਨਤੀਜੇ ਐਲਾਨ ਦਿੱਤੇ ਗਏ ਹਨ। ਬੇਹੱਦ ਉਤਸ਼ਾਹ ਅਤੇ ਸ਼ਾਂਤੀਪੂਰਨ ਮਾਹੌਲ ਵਿੱਚ ਹੋਈ ਇਸ ਚੋਣ ਪ੍ਰਕਿਰਿਆ ਦੌਰਾਨ ਸੌਰਭ ਦੁੱਗਲ ਨੇ ਸ਼ਾਨਦਾਰ ਜਿੱਤ ਦਰਜ ਕਰਦਿਆਂ ਪ੍ਰਧਾਨਗੀ ਦਾ ਅਹੁਦਾ ਸੰਭਾਲ ਲਿਆ ਹੈ। ਰਿਟਰਨਿੰਗ ਅਧਿਕਾਰੀ ਵਿਸ਼ਾਲ ਗੁਲਾਟੀ ਨੇ ਦੇਰ ਸ਼ਾਮ ਅਧਿਕਾਰਤ ਤੌਰ 'ਤੇ ਨਤੀਜਿਆਂ ਦਾ ਐਲਾਨ ਕੀਤਾ।

ਚੋਣ ਮੈਦਾਨ ਵਿੱਚ ਨਵੀਂ ਟੀਮ ਨੂੰ ਚੁਣਨ ਲਈ ਕਲੱਬ ਦੇ ਮੈਂਬਰਾਂ ਨੇ ਵੱਧ-ਚੜ੍ਹ ਕੇ ਹਿੱਸਾ ਲਿਆ। ਪ੍ਰਾਪਤ ਵੇਰਵਿਆਂ ਅਨੁਸਾਰ:

ਸੌਰਭ ਦੁੱਗਲ ਨੇ 330 ਵੋਟਾਂ ਹਾਸਲ ਕਰਕੇ ਪ੍ਰਧਾਨਗੀ ਦੀ ਕੁਰਸੀ ਜਿੱਤੀ।

ਉਮੇਸ਼ ਸ਼ਰਮਾ 335 ਵੋਟਾਂ ਨਾਲ ਸੀਨੀਅਰ ਮੀਤ ਪ੍ਰਧਾਨ ਚੁਣੇ ਗਏ।

ਮਹਿਲਾ ਰਾਖਵੇਂ ਅਹੁਦੇ (ਵਾਈਸ ਪ੍ਰਧਾਨ-I) 'ਤੇ ਆਰਤੀ ਅਗਨਿਹੋਤਰੀ ਨੇ 321 ਵੋਟਾਂ ਨਾਲ ਜਿੱਤ ਦਰਜ ਕੀਤੀ।

ਅਜੈ ਜਲੰਧਰੀ 319 ਵੋਟਾਂ ਪ੍ਰਾਪਤ ਕਰਕੇ ਵਾਈਸ ਪ੍ਰਧਾਨ-II ਚੁਣੇ ਗਏ ਹਨ।

ਕਲੱਬ ਦੇ ਸੰਚਾਲਨ ਲਈ ਚੁਣੀ ਗਈ ਨਵੀਂ ਕਾਰਜਕਾਰਨੀ ਵਿੱਚ ਰਾਜੇਸ਼ ਧੱਲ ਨੂੰ ਸਕੱਤਰ ਜਨਰਲ (311 ਵੋਟਾਂ) ਅਤੇ ਪ੍ਰਭਾਤ ਕਤਿਆਰ ਨੂੰ ਸਕੱਤਰ (326 ਵੋਟਾਂ) ਦੀ ਜ਼ਿੰਮੇਵਾਰੀ ਸੌਂਪੀ ਗਈ ਹੈ। ਇਸੇ ਤਰ੍ਹਾਂ ਸਾਂਝੇ ਸਕੱਤਰ ਦੇ ਅਹੁਦਿਆਂ 'ਤੇ ਪਵਨ ਤਿਵਾਤੀ (319 ਵੋਟਾਂ) ਅਤੇ ਬ੍ਰਿਜੇਂਦਰ ਗੌਰ (314 ਵੋਟਾਂ) ਨੇ ਜਿੱਤ ਹਾਸਲ ਕੀਤੀ। ਜਗਤਾਰ ਐਸ. ਭੁੱਲਰ 310 ਵੋਟਾਂ ਨਾਲ ਕਲੱਬ ਦੇ ਨਵੇਂ ਖਜ਼ਾਨਚੀ ਬਣੇ ਹਨ।

ਨਤੀਜਿਆਂ ਤੋਂ ਬਾਅਦ ਨਵੀਂ ਚੁਣੀ ਗਈ ਟੀਮ ਨੇ ਮੈਂਬਰਾਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਉਹ ਪੱਤਰਕਾਰ ਭਾਈਚਾਰੇ ਦੇ ਹਿੱਤਾਂ ਅਤੇ ਕਲੱਬ ਦੀ ਬਿਹਤਰੀ ਲਈ ਤਨਦੇਹੀ ਨਾਲ ਕੰਮ ਕਰਨਗੇ। ਚੋਣ ਪ੍ਰਕਿਰਿਆ ਸਫਲਤਾਪੂਰਵਕ ਨੇਪਰੇ ਚੜ੍ਹਨ 'ਤੇ ਸਮੁੱਚੇ ਮੈਂਬਰਾਂ ਵਿੱਚ ਖੁਸ਼ੀ ਦੀ ਲਹਿਰ ਦੇਖਣ ਨੂੰ ਮਿਲੀ।