ਤਾਜਾ ਖਬਰਾਂ
ਪੱਛਮੀ ਏਸ਼ੀਆ ਵਿੱਚ ਤੇਜ਼ੀ ਨਾਲ ਬਣ ਰਹੀ ਅਸਥਿਰ ਸਥਿਤੀ ਅਤੇ ਵਧਦੇ ਜੰਗੀ ਖ਼ਤਰੇ ਨੂੰ ਦੇਖਦੇ ਹੋਏ ਭਾਰਤ ਨੇ ਆਪਣੀ ਸੁਰੱਖਿਆ ਤਿਆਰੀਆਂ ਨੂੰ ਹੋਰ ਮਜ਼ਬੂਤ ਕਰਨ ਵੱਲ ਵੱਡਾ ਕਦਮ ਚੁੱਕਿਆ ਹੈ। ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਨਵੀਂ ਦਿੱਲੀ ਵਿੱਚ ਇੱਕ ਅਹਿਮ ਅਤੇ ਉੱਚ-ਪੱਧਰੀ ਸਮੀਖਿਆ ਬੈਠਕ ਬੁਲਾਈ, ਜਿਸ ਵਿੱਚ ਦੇਸ਼ ਦੀ ਰੱਖਿਆ ਤਿਆਰੀ ਅਤੇ ਭਵਿੱਖੀ ਰਣਨੀਤੀ ‘ਤੇ ਗੰਭੀਰ ਵਿਚਾਰ ਕੀਤਾ ਗਿਆ।
ਇਸ ਮੀਟਿੰਗ ਵਿੱਚ ਚੀਫ਼ ਆਫ਼ ਡਿਫੈਂਸ ਸਟਾਫ਼, ਤਿੰਨਾਂ ਸੈਨਾਵਾਂ ਦੇ ਮੁਖੀਆਂ, ਰੱਖਿਆ ਸਕੱਤਰ ਅਤੇ DRDO ਦੇ ਚੇਅਰਮੈਨ ਸਮੇਤ ਕਈ ਸੀਨੀਅਰ ਅਧਿਕਾਰੀ ਸ਼ਾਮਲ ਹੋਏ। ਬੈਠਕ ਦੌਰਾਨ ਪੱਛਮੀ ਏਸ਼ੀਆ ਵਿੱਚ ਵਧਦੇ ਸੰਘਰਸ਼ ਦੇ ਭਾਰਤ ‘ਤੇ ਸੰਭਾਵਿਤ ਪ੍ਰਭਾਵਾਂ ਦੀ ਵਿਸਥਾਰ ਨਾਲ ਸਮੀਖਿਆ ਕੀਤੀ ਗਈ, ਖ਼ਾਸ ਕਰਕੇ ਸਪਲਾਈ ਚੇਨ ਅਤੇ ਰੱਖਿਆ ਉਤਪਾਦਨ ‘ਤੇ ਪੈਣ ਵਾਲੇ ਅਸਰਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ।
ਰੱਖਿਆ ਮੰਤਰੀ ਨੇ ਫੌਜੀ ਅਧਿਕਾਰੀਆਂ ਨੂੰ ਹਦਾਇਤ ਦਿੱਤੀ ਕਿ ਮੌਜੂਦਾ ਗਲੋਬਲ ਟਕਰਾਅ ਤੋਂ ਮਿਲ ਰਹੇ ਤਜਰਬਿਆਂ ਅਤੇ ਤਕਨੀਕੀ ਸਬਕਾਂ ਨੂੰ ਤੁਰੰਤ ਅਪਣਾਇਆ ਜਾਵੇ, ਤਾਂ ਜੋ ਭਾਰਤੀ ਸੈਨਾਵਾਂ ਨੂੰ ਆਧੁਨਿਕ ਯੁੱਧ ਦੇ ਮਾਪਦੰਡਾਂ ਦੇ ਅਨੁਕੂਲ ਤਿਆਰ ਕੀਤਾ ਜਾ ਸਕੇ। ਉਨ੍ਹਾਂ ਨੇ ਰੱਖਿਆ ਖਰੀਦ ਅਤੇ ਦੇਸੀ ਉਤਪਾਦਨ ਪ੍ਰਣਾਲੀ ਵਿੱਚ ਤੇਜ਼ੀ ਲਿਆਉਣ ‘ਤੇ ਵੀ ਜ਼ੋਰ ਦਿੱਤਾ, ਤਾਂ ਜੋ ਕਿਸੇ ਵੀ ਅਚਾਨਕ ਸਥਿਤੀ ਵਿੱਚ ਦੇਸ਼ ਪੂਰੀ ਤਰ੍ਹਾਂ ਖੁਦਮੁਖ਼ਤਿਆਰ ਰਹੇ।
ਇਸ ਦੇ ਨਾਲ ਹੀ, ਰਾਜਨਾਥ ਸਿੰਘ ਨੇ ਅਗਲੇ ਦਹਾਕੇ ਲਈ ਲੰਬੇ ਸਮੇਂ ਦੀ ਰਣਨੀਤਕ ਯੋਜਨਾ ਬਣਾਉਣ ਦੀ ਲੋੜ ਉੱਭਾਰੀ, ਜਿਸ ਦਾ ਮੁੱਖ ਧਿਆਨ ਸਵੈ-ਨਿਰਭਰਤਾ ਅਤੇ ਲਗਾਤਾਰ ਤਿਆਰੀ ‘ਤੇ ਹੋਵੇਗਾ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਭਾਰਤ ਕਿਸੇ ਵੀ ਬਾਹਰੀ ਚੁਣੌਤੀ ਦਾ ਮੁਕਾਬਲਾ ਕਰਨ ਲਈ ਪੂਰੀ ਤਰ੍ਹਾਂ ਤਿਆਰ ਹੈ ਅਤੇ ਸੈਨਾਵਾਂ ਨੂੰ ਹਰ ਸਮੇਂ ‘ਬੈਟਲ ਰੈਡੀ’ ਰਹਿਣਾ ਚਾਹੀਦਾ ਹੈ।
ਇਸ ਮੀਟਿੰਗ ਤੋਂ ਬਾਅਦ ਇਹ ਸੰਕੇਤ ਸਾਫ਼ ਮਿਲਦੇ ਹਨ ਕਿ ਭਾਰਤ ਪੱਛਮੀ ਏਸ਼ੀਆ ਦੇ ਤਣਾਭਰੇ ਹਾਲਾਤਾਂ ‘ਤੇ ਨਜ਼ਦੀਕੀ ਨਿਗਰਾਨੀ ਕਰ ਰਿਹਾ ਹੈ ਅਤੇ ਆਪਣੀ ਰੱਖਿਆ ਪ੍ਰਣਾਲੀ ਨੂੰ ਹਰ ਸੰਭਾਵੀ ਸਥਿਤੀ ਦੇ ਮੁਤਾਬਕ ਮਜ਼ਬੂਤ ਬਣਾਉਣ ਵਿੱਚ ਲੱਗਾ ਹੋਇਆ ਹੈ।
Get all latest content delivered to your email a few times a month.
