ਤਾਜਾ ਖਬਰਾਂ
ਮੰਡੀ ਤੋਂ ਭਾਜਪਾ ਸੰਸਦ ਮੈਂਬਰ ਅਤੇ ਅਦਾਕਾਰਾ ਕੰਗਨਾ ਰਣੌਤ ਨੇ ਲੋਕ ਸਭਾ ਵਿੱਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ 'ਤੇ ਤਿੱਖਾ ਹਮਲਾ ਬੋਲਦਿਆਂ ਉਨ੍ਹਾਂ ਦੇ ਸੰਸਦੀ ਵਿਵਹਾਰ ਨੂੰ 'ਅਣਉਚਿਤ' ਦੱਸਿਆ ਹੈ। ਕੰਗਨਾ ਨੇ ਰਾਹੁਲ ਗਾਂਧੀ ਦੀ ਤੁਲਨਾ 'ਟਪੋਰੀ' ਨਾਲ ਕਰਦਿਆਂ ਦੋਸ਼ ਲਾਇਆ ਕਿ ਸਦਨ ਵਿੱਚ ਉਨ੍ਹਾਂ ਦਾ ਤੂ-ਤੜਾਕ ਵਾਲਾ ਲਹਿਜਾ ਮਹਿਲਾ ਸੰਸਦ ਮੈਂਬਰਾਂ ਲਈ ਕਾਫ਼ੀ ਅਸਹਿਜਤਾ ਪੈਦਾ ਕਰਦਾ ਹੈ।
"ਔਰਤਾਂ ਨੂੰ ਹੁੰਦੀ ਹੈ ਸ਼ਰਮਿੰਦਗੀ"
ਕੰਗਨਾ ਰਣੌਤ ਨੇ ਇੱਕ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਰਾਹੁਲ ਗਾਂਧੀ ਦਾ ਸਦਨ ਵਿੱਚ ਵਿਚਰਨ ਦਾ ਤਰੀਕਾ ਬਹੁਤ ਹੀ ਗੈਰ-ਸੰਜੀਦਾ ਹੈ। ਉਨ੍ਹਾਂ ਕਿਹਾ, "ਰਾਹੁਲ ਗਾਂਧੀ ਕਿਸੇ ਨਾਲ ਵੀ 'ਏ, ਤੂ...' ਕਰਕੇ ਗੱਲ ਕਰਦੇ ਹਨ ਅਤੇ ਇੰਟਰਵਿਊ ਦੌਰਾਨ ਹੂਟਿੰਗ ਕਰਨਾ ਉਨ੍ਹਾਂ ਦੀ ਆਦਤ ਬਣ ਚੁੱਕੀ ਹੈ।" ਕੰਗਨਾ ਨੇ ਅੱਗੇ ਸਲਾਹ ਦਿੰਦਿਆਂ ਕਿਹਾ ਕਿ ਰਾਹੁਲ ਨੂੰ ਆਪਣੀ ਭੈਣ ਪ੍ਰਿਯੰਕਾ ਗਾਂਧੀ ਤੋਂ ਸ਼ਿਸ਼ਟਾਚਾਰ ਸਿੱਖਣਾ ਚਾਹੀਦਾ ਹੈ, ਕਿਉਂਕਿ ਉਨ੍ਹਾਂ ਦਾ ਵਿਵਹਾਰ ਬਹੁਤ ਵਧੀਆ ਹੈ।
200 ਸੇਵਾਮੁਕਤ ਅਧਿਕਾਰੀਆਂ ਨੇ ਲਿਖਿਆ ਸਾਂਝਾ ਪੱਤਰ
ਸਿਰਫ਼ ਸਿਆਸੀ ਵਿਰੋਧੀ ਹੀ ਨਹੀਂ, ਸਗੋਂ ਦੇਸ਼ ਦੇ 200 ਤੋਂ ਵੱਧ ਸੇਵਾਮੁਕਤ ਨੌਕਰਸ਼ਾਹਾਂ ਅਤੇ ਸਾਬਕਾ ਫ਼ੌਜੀ ਅਧਿਕਾਰੀਆਂ ਨੇ ਵੀ ਰਾਹੁਲ ਗਾਂਧੀ ਦੇ ਵਿਵਹਾਰ 'ਤੇ ਚਿੰਤਾ ਪ੍ਰਗਟਾਈ ਹੈ। ਇਨ੍ਹਾਂ ਅਧਿਕਾਰੀਆਂ ਨੇ ਇੱਕ ਸਾਂਝਾ ਪੱਤਰ ਜਾਰੀ ਕਰਕੇ ਦਾਅਵਾ ਕੀਤਾ ਹੈ ਕਿ ਰਾਹੁਲ ਗਾਂਧੀ ਸੰਸਦ ਦੀ ਮਰਿਆਦਾ ਨੂੰ ਢਾਹ ਲਾ ਰਹੇ ਹਨ। ਪੱਤਰ ਵਿੱਚ ਕਿਹਾ ਗਿਆ ਹੈ ਕਿ ਚਾਹੇ ਸਦਨ ਦੀ ਕਾਰਵਾਈ ਹੋਵੇ ਜਾਂ ਸੰਸਦ ਕੰਪਲੈਕਸ ਦੀਆਂ ਪੌੜੀਆਂ ਤੇ ਲਾਬੀ, ਹਰ ਜਗ੍ਹਾ ਅਨੁਸ਼ਾਸਨ ਬਣਾਈ ਰੱਖਣਾ ਜ਼ਰੂਰੀ ਹੈ।
ਮੁਆਫ਼ੀ ਦੀ ਮੰਗ ਅਤੇ ਲੋਕਤੰਤਰੀ ਮਰਿਆਦਾ
ਸਾਬਕਾ ਅਧਿਕਾਰੀਆਂ ਨੇ ਰਾਹੁਲ ਗਾਂਧੀ ਤੋਂ ਜਨਤਕ ਤੌਰ 'ਤੇ ਮੁਆਫ਼ੀ ਮੰਗਣ ਦੀ ਮੰਗ ਕੀਤੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਵਿਰੋਧੀ ਧਿਰ ਦੇ ਨੇਤਾ ਵਰਗੇ ਸੰਵਿਧਾਨਕ ਅਹੁਦੇ 'ਤੇ ਬੈਠੇ ਵਿਅਕਤੀ ਵੱਲੋਂ ਅਜਿਹਾ ਵਿਵਹਾਰ ਜਨਤਕ ਭਾਸ਼ਣ ਦੇ ਪੱਧਰ ਨੂੰ ਗਿਰਾਉਂਦਾ ਹੈ। ਪੱਤਰ ਮੁਤਾਬਕ, "ਸਰਕਾਰ ਨੂੰ ਸਵਾਲ ਪੁੱਛਣਾ ਲੋਕਤੰਤਰੀ ਅਧਿਕਾਰ ਹੈ, ਪਰ ਅਜਿਹਾ ਕਰਦੇ ਹੋਏ ਦੇਸ਼ ਦੀਆਂ ਲੋਕਤੰਤਰੀ ਸੰਸਥਾਵਾਂ ਦੀ ਭਰੋਸੇਯੋਗਤਾ ਨੂੰ ਨੁਕਸਾਨ ਪਹੁੰਚਾਉਣਾ ਨਿੰਦਣਯੋਗ ਹੈ।"
ਇਸ ਸ਼ਿਕਾਇਤ ਤੋਂ ਬਾਅਦ ਹੁਣ ਦੇਸ਼ ਦੇ ਸਿਆਸੀ ਗਲਿਆਰਿਆਂ ਵਿੱਚ ਸੰਸਦ ਦੀ ਮਰਿਆਦਾ ਅਤੇ ਨੇਤਾਵਾਂ ਦੇ ਆਚਰਣ ਨੂੰ ਲੈ ਕੇ ਨਵੀਂ ਬਹਿਸ ਛਿੜ ਗਈ ਹੈ।
Get all latest content delivered to your email a few times a month.
