ਤੇਲ ਤੇ ਗੈਸ ਸੰਕਟ ਦੀਆਂ ਅਫ਼ਵਾਹਾਂ 'ਤੇ ਕੇਂਦਰ ਦੀ ਰੋਕ: ਹਰਦੀਪ ਪੁਰੀ ਬੋਲੇ- 'ਘਬਰਾਉਣ ਦੀ ਲੋੜ ਨਹੀਂ, ਭਾਰਤ ਕੋਲ ਹੈ ਭਰਪੂਰ ਭੰਡਾਰ'

ਪੱਛਮੀ ਏਸ਼ੀਆ ਵਿੱਚ ਈਰਾਨ, ਇਜ਼ਰਾਈਲ ਅਤੇ ਅਮਰੀਕਾ ਦਰਮਿਆਨ ਭਖੀ ਜੰਗ ਦੇ ਦਰਮਿਆਨ ਭਾਰਤ ਵਿੱਚ ਐਲ.ਪੀ.ਜੀ. (LPG) ਸਿਲੰਡਰਾਂ ਨੂੰ ਲੈ ਕੇ ਮਚੀ ਹਾਹਾਕਾਰ 'ਤੇ ਕੇਂਦਰ ਸਰਕਾਰ ਨੇ ਵੱਡਾ ਬਿਆਨ ਦਿੱਤਾ ਹੈ। ਪੈਟਰੋਲੀਅਮ ਮੰਤਰੀ ਹਰਦੀਪ ਸਿੰਘ ਪੁਰੀ ਨੇ ਸਾਫ਼ ਕਰ ਦਿੱਤਾ ਹੈ ਕਿ ਦੇਸ਼ ਵਿੱਚ ਤੇਲ ਜਾਂ ਗੈਸ ਦਾ ਕੋਈ ਕਾਲ ਨਹੀਂ ਪੈਣ ਵਾਲਾ। ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਘਬਰਾਹਟ ਵਿੱਚ ਆ ਕੇ ਗੈਸ ਏਜੰਸੀਆਂ 'ਤੇ ਭੀੜ ਨਾ ਕਰਨ, ਕਿਉਂਕਿ ਭਾਰਤ ਕੋਲ ਆਪਣੀ ਲੋੜ ਪੂਰੀ ਕਰਨ ਲਈ ਕੱਚੇ ਤੇਲ ਦਾ ਕਾਫ਼ੀ ਸਟਾਕ ਮੌਜੂਦ ਹੈ।

ਸਦਨ 'ਚ ਗੂੰਜਿਆ 'ਊਰਜਾ ਸੰਕਟ' ਦਾ ਮੁੱਦਾ

ਵੀਰਵਾਰ ਨੂੰ ਲੋਕ ਸਭਾ ਦੀ ਕਾਰਵਾਈ ਦੌਰਾਨ ਵਿਰੋਧੀ ਧਿਰ ਦੇ ਰੌਲੇ-ਰੱਪੇ ਦੇ ਵਿਚਾਲੇ ਪੁਰੀ ਨੇ ਕਿਹਾ ਕਿ ਭਾਰਤ ਨੇ ਆਪਣੀ ਖਰੀਦ ਪ੍ਰਣਾਲੀ ਵਿੱਚ ਵੱਡੀ ਤਬਦੀਲੀ ਕੀਤੀ ਹੈ। ਭਾਰਤ ਹੁਣ ਸਿਰਫ਼ ਇੱਕ ਖੇਤਰ 'ਤੇ ਨਿਰਭਰ ਨਹੀਂ, ਸਗੋਂ ਅਮਰੀਕਾ, ਨਾਰਵੇ, ਕੈਨੇਡਾ ਅਤੇ ਰੂਸ ਵਰਗੇ 40 ਵੱਖ-ਵੱਖ ਦੇਸ਼ਾਂ ਤੋਂ ਤੇਲ ਮੰਗਵਾ ਰਿਹਾ ਹੈ।

ਦੇਸ਼ ਅੰਦਰ LPG ਦਾ ਉਤਪਾਦਨ 28 ਫੀਸਦੀ ਤੱਕ ਵਧਾਇਆ ਗਿਆ ਹੈ।

ਸਮੁੰਦਰੀ ਰਸਤਿਆਂ 'ਤੇ ਜੰਗੀ ਤਣਾਅ ਦੇ ਬਾਵਜੂਦ, ਬਦਲਵੇਂ ਰੂਟਾਂ ਰਾਹੀਂ ਹਰ ਰੋਜ਼ ਗੈਸ ਕਾਰਗੋ ਭਾਰਤ ਪਹੁੰਚ ਰਹੇ ਹਨ।

ਮੰਤਰੀ ਨੇ ਭਰੋਸਾ ਦਿੱਤਾ ਕਿ ਜੇਕਰ ਜੰਗ ਲੰਬੀ ਵੀ ਖਿੱਚੀ ਜਾਂਦੀ ਹੈ, ਤਾਂ ਵੀ ਘਰਾਂ ਅਤੇ ਉਦਯੋਗਾਂ ਦੀ ਬਿਜਲੀ ਤੇ ਗੈਸ ਸਪਲਾਈ 'ਤੇ ਕੋਈ ਅਸਰ ਨਹੀਂ ਪਵੇਗਾ।

ਹੁਣ  OTP ਤੋਂ ਬਿਨਾਂ ਨਹੀਂ ਮਿਲੇਗਾ ਸਿਲੰਡਰ

ਗੈਸ ਸਿਲੰਡਰਾਂ ਦੀ ਕਾਲਾਬਾਜ਼ਾਰੀ ਅਤੇ ਧੋਖਾਧੜੀ ਰੋਕਣ ਲਈ ਸਰਕਾਰ ਨੇ ਸੁਰੱਖਿਆ ਘੇਰਾ ਹੋਰ ਸਖ਼ਤ ਕਰ ਦਿੱਤਾ ਹੈ। ਹੁਣ ਡਿਲੀਵਰੀ ਆਥੈਂਟੀਕੇਸ਼ਨ ਕੋਡ (DAC) ਦੀ ਵਰਤੋਂ 50% ਤੋਂ ਵਧਾ ਕੇ 90% ਕਰ ਦਿੱਤੀ ਗਈ ਹੈ। ਯਾਨੀ ਜਦੋਂ ਤੱਕ ਗਾਹਕ ਆਪਣੇ ਫੋਨ 'ਤੇ ਆਇਆ OTP ਡਿਲੀਵਰੀ ਬੁਆਏ ਨੂੰ ਨਹੀਂ ਦੱਸੇਗਾ, ਉਦੋਂ ਤੱਕ ਸਿਲੰਡਰ ਦੀ ਡਿਲੀਵਰੀ ਨਹੀਂ ਮੰਨੀ ਜਾਵੇਗੀ।

ਬੁਕਿੰਗ ਲਈ ਨਵੇਂ ਨਿਯਮ:

ਸਪਲਾਈ ਨੂੰ ਸੁਚਾਰੂ ਬਣਾਉਣ ਲਈ ਮੰਗ ਪ੍ਰਬੰਧਨ ਦੇ ਨਵੇਂ ਨਿਯਮ ਲਾਗੂ ਕੀਤੇ ਗਏ ਹਨ:

ਸ਼ਹਿਰੀ ਖੇਤਰ: ਦੋ ਬੁਕਿੰਗਾਂ ਦੇ ਵਿਚਕਾਰ ਘੱਟੋ-ਘੱਟ 25 ਦਿਨਾਂ ਦਾ ਅੰਤਰ।

ਪੇਂਡੂ ਖੇਤਰ: ਦੂਰ-ਦੁਰਾਡੇ ਇਲਾਕਿਆਂ ਲਈ ਇਹ ਅੰਤਰ 45 ਦਿਨ ਤੈਅ ਕੀਤਾ ਗਿਆ ਹੈ।

ਹਸਪਤਾਲਾਂ ਅਤੇ ਸਕੂਲਾਂ-ਕਾਲਜਾਂ ਨੂੰ ਬਿਨਾਂ ਕਿਸੇ ਦੇਰੀ ਦੇ ਸਪਲਾਈ ਮਿਲਦੀ ਰਹੇਗੀ।