ਤਾਜਾ ਖਬਰਾਂ
ਕੋਲਕਾਤਾ ਦੇ ਮਸ਼ਹੂਰ ਮੈਦਾਨ Eden Gardens ਵਿੱਚ ਬੁੱਧਵਾਰ ਨੂੰ ਖੇਡੇ ਗਏ ਆਈਸੀਸੀ ਪੁਰਸ਼ ਟੀ-20 ਵਿਸ਼ਵ ਕੱਪ 2026 ਦੇ ਪਹਿਲੇ ਸੈਮੀਫਾਈਨਲ ਮੁਕਾਬਲੇ ਵਿੱਚ ਦੱਖਣੀ ਅਫਰੀਕਾ ਨੇ ਨਿਊਜ਼ੀਲੈਂਡ ਸਾਹਮਣੇ ਜਿੱਤ ਲਈ 170 ਦੌੜਾਂ ਦਾ ਟੀਚਾ ਰੱਖਿਆ। ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਪ੍ਰੋਟੀਆਜ਼ ਟੀਮ ਨੇ ਨਿਰਧਾਰਤ 20 ਓਵਰਾਂ ਵਿੱਚ 8 ਵਿਕਟਾਂ ਦੇ ਨੁਕਸਾਨ 'ਤੇ 169 ਦੌੜਾਂ ਬਣਾਈਆਂ।
ਨਿਊਜ਼ੀਲੈਂਡ ਦੇ ਕਪਤਾਨ ਮਿਸ਼ੇਲ ਸੈਂਟਨਰ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਉਨ੍ਹਾਂ ਦਾ ਇਹ ਫੈਸਲਾ ਸ਼ੁਰੂਆਤੀ ਓਵਰਾਂ ਵਿੱਚ ਸਹੀ ਸਾਬਤ ਹੁੰਦਾ ਨਜ਼ਰ ਆਇਆ ਜਦੋਂ ਦੱਖਣੀ ਅਫਰੀਕਾ ਨੂੰ ਤੁਰੰਤ ਝਟਕੇ ਲੱਗੇ। ਕਪਤਾਨ ਏਡਨ ਮਾਰਕਰਾਮ 18 ਦੌੜਾਂ ਬਣਾ ਕੇ ਆਉਟ ਹੋਏ, ਜਦਕਿ ਕੁਇੰਟਨ ਡੀ ਕੌਕ ਸਿਰਫ 10 ਦੌੜਾਂ ਹੀ ਜੋੜ ਸਕੇ। ਰਿਆਨ ਰਿਕਲਟਨ ਵੀ ਬਿਨਾਂ ਖਾਤਾ ਖੋਲ੍ਹੇ ਪੈਵਿਲੀਅਨ ਵਾਪਸ ਮੁੜ ਗਿਆ, ਜਿਸ ਨਾਲ ਟੀਮ ਪਾਵਰਪਲੇ ਵਿੱਚ ਦਬਾਅ ਹੇਠ ਆ ਗਈ।
ਮੱਧ ਕ੍ਰਮ ਵਿੱਚ ਡੇਵਾਲਡ ਬ੍ਰੇਵਿਸ ਨੇ 27 ਗੇਂਦਾਂ ‘ਚ 34 ਦੌੜਾਂ ਦੀ ਉਪਯੋਗੀ ਪਾਰੀ ਖੇਡੀ, ਜਿਸ ਵਿੱਚ ਤਿੰਨ ਚੌਕੇ ਅਤੇ ਦੋ ਛੱਕੇ ਸ਼ਾਮਲ ਸਨ। ਹਾਲਾਂਕਿ ਜੇਮਸ ਨੀਸ਼ਮ ਨੇ ਉਸਦਾ ਵਿਕਟ ਲੈ ਕੇ ਰਨ ਰੇਟ ਨੂੰ ਰੋਕਿਆ। ਡੇਵਿਡ ਮਿਲਰ ਵੱਡਾ ਸਕੋਰ ਨਹੀਂ ਬਣਾ ਸਕੇ ਅਤੇ ਸਿਰਫ 6 ਦੌੜਾਂ ‘ਤੇ ਆਉਟ ਹੋ ਗਏ।
ਇਸ ਤੋਂ ਬਾਅਦ ਟ੍ਰਿਸਟਨ ਸਟੱਬਸ ਨੇ 24 ਗੇਂਦਾਂ ‘ਚ 29 ਦੌੜਾਂ ਜੋੜ ਕੇ ਪਾਰੀ ਨੂੰ ਸਥਿਰਤਾ ਦਿੱਤੀ, ਪਰ ਅਹਿਮ ਮੋੜ ਮਾਰਕੋ ਜੈਨਸਨ ਦੀ ਧਮਾਕੇਦਾਰ ਬੱਲੇਬਾਜ਼ੀ ਨਾਲ ਆਇਆ। ਜੈਨਸਨ ਨੇ ਸਿਰਫ 30 ਗੇਂਦਾਂ ‘ਤੇ ਅਜੇਤੂ 55 ਦੌੜਾਂ ਬਣਾਈਆਂ, ਜਿਸ ਵਿੱਚ ਪੰਜ ਛੱਕੇ ਅਤੇ ਦੋ ਚੌਕੇ ਸ਼ਾਮਲ ਸਨ। ਉਸਦੀ ਆਖਰੀ ਓਵਰਾਂ ਵਿੱਚ ਤੀਬਰ ਹਿੱਟਿੰਗ ਨੇ ਟੀਮ ਦਾ ਸਕੋਰ 169 ਤੱਕ ਪਹੁੰਚਾਇਆ। ਕੇਸ਼ਵ ਮਹਾਰਾਜ ਇਕ ਦੌੜ ਬਣਾ ਕੇ ਨਾਬਾਦ ਰਹੇ।
ਨਿਊਜ਼ੀਲੈਂਡ ਵੱਲੋਂ ਗੇਂਦਬਾਜ਼ੀ ਦੌਰਾਨ ਮੈਟ ਹੈਨਰੀ ਅਤੇ ਲੌਕੀ ਫਰਗੂਸਨ ਨੇ ਸੰਭਾਲੀ ਹੋਈ ਗੇਂਦਬਾਜ਼ੀ ਕੀਤੀ, ਜਦਕਿ ਜੇਮਸ ਨੀਸ਼ਮ ਨੂੰ ਵੀ ਮਹੱਤਵਪੂਰਨ ਸਫਲਤਾ ਮਿਲੀ। ਹਾਲਾਂਕਿ ਕੀਵੀਆਂ ਵੱਲੋਂ 12 ਵਾਈਡ ਸਮੇਤ ਕੁੱਲ 14 ਵਾਧੂ ਦੌੜਾਂ ਦਿੱਤੀਆਂ ਗਈਆਂ, ਜੋ ਅਖੀਰ ਵਿੱਚ ਮਹਿੰਗੀਆਂ ਸਾਬਤ ਹੋ ਸਕਦੀਆਂ ਹਨ।
ਇਸ ਮੁਕਾਬਲੇ ਤੋਂ ਪਹਿਲਾਂ ਦੋਵੇਂ ਟੀਮਾਂ ਦੇ ਹੈੱਡ-ਟੂ-ਹੈੱਡ ਅੰਕੜਿਆਂ ਵਿੱਚ ਦੱਖਣੀ ਅਫਰੀਕਾ ਹਾਵੀ ਰਿਹਾ ਹੈ। ਟੀ-20 ਅੰਤਰਰਾਸ਼ਟਰੀ ਮੈਚਾਂ ਵਿੱਚ ਪ੍ਰੋਟੀਆਜ਼ ਨੇ 19 ਵਿੱਚੋਂ 12 ਜਿੱਤਾਂ ਦਰਜ ਕੀਤੀਆਂ ਹਨ, ਜਦਕਿ ਨਿਊਜ਼ੀਲੈਂਡ ਨੇ 7 ਮੈਚ ਜਿੱਤੇ ਹਨ। ਟੀ-20 ਵਿਸ਼ਵ ਕੱਪ ਇਤਿਹਾਸ ਵਿੱਚ ਵੀ ਦੱਖਣੀ ਅਫਰੀਕਾ ਨੇ ਇਸ ਤੋਂ ਪਹਿਲਾਂ ਨਿਊਜ਼ੀਲੈਂਡ ਖ਼ਿਲਾਫ਼ 5-0 ਦੀ ਬੜ੍ਹਤ ਕਾਇਮ ਰੱਖੀ ਸੀ।
ਹੁਣ ਸਾਰੇ ਦੀਆਂ ਨਜ਼ਰਾਂ ਨਿਊਜ਼ੀਲੈਂਡ ਦੀ ਪਾਰੀ ‘ਤੇ ਟਿਕੀਆਂ ਹੋਈਆਂ ਹਨ ਕਿ ਕੀ ਬਲੈਕਕੈਪਸ 170 ਦੌੜਾਂ ਦਾ ਟੀਚਾ ਹਾਸਲ ਕਰਕੇ ਫਾਈਨਲ ਵਿੱਚ ਜਗ੍ਹਾ ਬਣਾਉਣਗੇ ਜਾਂ ਨਹੀਂ।
Get all latest content delivered to your email a few times a month.
