ਐਪਸਟੀਨ ਫਾਈਲਾਂ ਦੇ ਖੁਲਾਸੇ ਨਾਲ ਅਮਰੀਕਾ ਵਿੱਚ ਸਿਆਸੀ ਭੂਚਾਲ, ਟ੍ਰੰਪ ਅਤੇ ਕਈ ਦਿੱਗਜਾਂ ਦੇ ਨਾਮ ਆਏ ਸਾਹਮਣੇ

ਜਦੋਂ ਅਮਰੀਕੀ ਨਿਆਂ ਵਿਭਾਗ ਨੇ ਸ਼ੁੱਕਰਵਾਰ ਨੂੰ ਜੈਫਰੀ ਐਪਸਟੀਨ ਫਾਈਲਾਂ ਨਾਲ ਜੁੜੇ ਲੱਖਾਂ ਨਵੇਂ ਪੰਨੇ, ਫੋਟੋਆਂ ਅਤੇ ਵੀਡੀਓ ਜਾਰੀ ਕਰਨੇ ਸ਼ੁਰੂ ਕੀਤੇ, ਤਾਂ ਅਮਰੀਕਾ ਵਿੱਚ ਸਿਆਸੀ ਭੂਚਾਲ ਆ ਗਿਆ। ਇਸ ਧਮਾਕਾਖੇਜ਼ ਖੁਲਾਸੇ ਨੇ ਰਾਸ਼ਟਰਪਤੀ ਡੋਨਾਲਡ ਟ੍ਰੰਪ ਨੂੰ ਨਵੀਂ ਮੁਸੀਬਤ ਵਿੱਚ ਪਾ ਦਿੱਤਾ ਹੈ। ਐਪਸਟੀਨ ਫਾਈਲਾਂ ਵਿੱਚ ਇਜ਼ਰਾਈਲ, ਮੋਸਾਦ ਅਤੇ ਟ੍ਰੰਪ ਨਾਲ ਜੁੜੇ ਕਈ ਨਵੇਂ ਦਾਅਵੇ ਕੀਤੇ ਗਏ ਹਨ, ਜਿਸ ਵਿੱਚ ਕਿਹਾ ਜਾ ਰਿਹਾ ਹੈ ਕਿ ਇਸੇ ਕਾਰਨ ਟ੍ਰੰਪ ਇਜ਼ਰਾਈਲ ਦੇ ਪ੍ਰਭਾਵ ਹੇਠ ਹਨ। ਇਸ ਖੁਲਾਸੇ ਵਿੱਚ 1 ਲੱਖ 80 ਹਜ਼ਾਰ ਤਸਵੀਰਾਂ ਅਤੇ 2000 ਤੋਂ ਵੱਧ ਵੀਡੀਓ ਸ਼ਾਮਲ ਹਨ।

ਅਮਰੀਕਾ ਦੇ ਡਿਪਟੀ ਅਟਾਰਨੀ ਜਨਰਲ ਅਤੇ ਟ੍ਰੰਪ ਦੇ ਸਾਬਕਾ ਮਿੱਤਰ ਟੌਡ ਬਲਾਂਚੇ ਨੇ ਕਿਹਾ ਕਿ ਵ੍ਹਾਈਟ ਹਾਊਸ ਨੇ ਦੋਸ਼ੀ ਜਿਨਸੀ ਅਪਰਾਧੀ ਨਾਲ ਸਬੰਧਤ ਇਨ੍ਹਾਂ ਵਿਆਪਕ ਫਾਈਲਾਂ ਦੀ ਸਮੀਖਿਆ ਵਿੱਚ ਕੋਈ ਭੂਮਿਕਾ ਨਹੀਂ ਨਿਭਾਈ। ਅਮਰੀਕੀ ਨਿਆਂ ਵਿਭਾਗ ਅਨੁਸਾਰ ਜਾਰੀ ਕੀਤੇ ਜਾ ਰਹੇ ਕੁਝ ਦਸਤਾਵੇਜ਼ਾਂ ਵਿੱਚ 79 ਸਾਲਾ ਟ੍ਰੰਪ ਵਿਰੁੱਧ "ਗਲਤ ਅਤੇ ਸਨਸਨੀਖੇਜ਼ ਦਾਅਵੇ" ਸ਼ਾਮਲ ਹਨ, ਜੋ 2020 ਦੀਆਂ ਰਾਸ਼ਟਰਪਤੀ ਚੋਣਾਂ ਤੋਂ ਪਹਿਲਾਂ FBI ਨੂੰ ਸੌਂਪੇ ਗਏ ਸਨ। ਟ੍ਰੰਪ ਦੇ ਸਾਬਕਾ ਨਿੱਜੀ ਵਕੀਲ ਰਹੇ ਬਲਾਂਚੇ ਨੇ ਉਨ੍ਹਾਂ ਸੁਝਾਵਾਂ ਨੂੰ ਖਾਰਜ ਕਰ ਦਿੱਤਾ ਕਿ ਰਾਸ਼ਟਰਪਤੀ ਬਾਰੇ ਸ਼ਰਮਨਾਕ ਸਮੱਗਰੀ ਨੂੰ ਸੰਪਾਦਿਤ (Redact) ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਅਸੀਂ ਰਾਸ਼ਟਰਪਤੀ ਦਾ ਕੋਈ ਬਚਾਅ ਨਹੀਂ ਕੀਤਾ। ਬਲਾਂਚੇ ਨੇ ਇਹ ਵੀ ਦੱਸਿਆ ਕਿ ਨਾਬਾਲਗ ਕੁੜੀਆਂ ਦੀ ਤਸਕਰੀ ਦੀ ਦੋਸ਼ੀ ਘਿਸਲੇਨ ਮੈਕਸਵੈੱਲ ਦੀਆਂ ਤਸਵੀਰਾਂ ਨੂੰ ਛੱਡ ਕੇ ਬਾਕੀ ਸਾਰੀਆਂ ਔਰਤਾਂ ਦੀਆਂ ਤਸਵੀਰਾਂ ਨੂੰ ਨਿੱਜਤਾ ਦੇ ਕਾਰਨ ਸੰਪਾਦਿਤ ਕਰਕੇ ਵੈੱਬਸਾਈਟ 'ਤੇ ਅਪਲੋਡ ਕੀਤਾ ਜਾ ਰਿਹਾ ਹੈ।

 ਪ੍ਰਮੁੱਖ ਹਸਤੀਆਂ ਦੇ ਨਾਮ ਸ਼ਾਮਲ

ਐਪਸਟੀਨ ਫਾਈਲਾਂ ਵਿੱਚ ਟ੍ਰੰਪ ਤੋਂ ਇਲਾਵਾ ਮਾਈਕ੍ਰੋਸਾਫਟ ਦੇ ਬਿਲ ਗੇਟਸ, ਫਿਲਮ ਨਿਰਮਾਤਾ ਵੁਡੀ ਐਲਨ, ਸਾਬਕਾ ਰਾਸ਼ਟਰਪਤੀ ਬਿਲ ਕਲਿੰਟਨ ਅਤੇ ਕਈ ਵਿਦਵਾਨਾਂ ਤੇ ਸਿਆਸਤਦਾਨਾਂ ਦੇ ਨਾਮ ਸ਼ਾਮਲ ਹਨ। ਜਾਰੀ ਕੀਤੇ ਗਏ ਇੱਕ ਡਰਾਫਟ ਈਮੇਲ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਬਿਲ ਗੇਟਸ ਦੇ ਵਿਆਹ ਤੋਂ ਬਾਹਰ ਸਬੰਧ ਸਨ, ਜਿਸ ਨੂੰ ਗੇਟਸ ਫਾਊਂਡੇਸ਼ਨ ਨੇ 'ਪੂਰੀ ਤਰ੍ਹਾਂ ਬੇਬੁਨਿਆਦ ਅਤੇ ਗਲਤ' ਦੱਸ ਕੇ ਨਕਾਰ ਦਿੱਤਾ ਹੈ। ਇੱਕ ਹੋਰ ਈਮੇਲ ਵਿੱਚ ਐਪਸਟੀਨ ਨੇ 'ਫੋਰੈਸਟ ਗੰਪ' ਵਰਗੀਆਂ ਫਿਲਮਾਂ ਦੇ ਨਿਰਮਾਤਾ ਸਟਿਵ ਟਿਸ਼ ਨੂੰ ਕਈ ਔਰਤਾਂ ਨਾਲ ਜੋੜਿਆ ਹੈ। ਦੱਸਣਯੋਗ ਹੈ ਕਿ ਜੈਫਰੀ ਐਪਸਟੀਨ ਦੀ 2019 ਵਿੱਚ ਨਿਊਯਾਰਕ ਦੀ ਜੇਲ੍ਹ ਵਿੱਚ ਮੌਤ ਹੋ ਗਈ ਸੀ, ਜਿਸ ਨੂੰ ਖੁਦਕੁਸ਼ੀ ਮੰਨਿਆ ਗਿਆ ਸੀ।

 ਸੈਕਸ ਟ੍ਰੈਫਿਕਿੰਗ ਰਿੰਗ ਅਤੇ ਸਹਿ-ਅਪਰਾਧੀ

ਖੁਲਾਸਿਆਂ ਅਨੁਸਾਰ ਐਪਸਟੀਨ ਦੁਨੀਆ ਦੇ ਅਮੀਰ ਵਰਗ ਲਈ ਸੈਕਸ ਟ੍ਰੈਫਿਕਿੰਗ ਰਿੰਗ ਚਲਾ ਰਿਹਾ ਸੀ। ਜੁਲਾਈ 2019 ਦੇ ਦੋ FBI ਈਮੇਲਾਂ ਵਿੱਚ ਐਪਸਟੀਨ ਦੇ 10 "ਸਹਿ-ਅਪਰਾਧੀਆਂ" ਦਾ ਜ਼ਿਕਰ ਹੈ, ਪਰ ਹੁਣ ਤੱਕ ਸਿਰਫ ਮੈਕਸਵੈੱਲ 'ਤੇ ਹੀ ਦੋਸ਼ ਤੈਅ ਕੀਤੇ ਗਏ ਹਨ। ਬਾਕੀ ਕਥਿਤ ਸਹਿ-ਅਪਰਾਧੀਆਂ ਦੇ ਨਾਮ ਫਿਲਹਾਲ ਗੁਪਤ ਰੱਖੇ ਗਏ ਹਨ।

ਬਿਲ ਕਲਿੰਟਨ ਅਤੇ ਟ੍ਰੰਪ ਦੀ ਭੂਮਿਕਾ

ਬਿਲ ਕਲਿੰਟਨ ਅਤੇ ਡੋਨਾਲਡ ਟ੍ਰੰਪ ਦੋਵੇਂ ਹੀ ਇਨ੍ਹਾਂ ਰਿਕਾਰਡਾਂ ਵਿੱਚ ਪ੍ਰਮੁੱਖਤਾ ਨਾਲ ਨਜ਼ਰ ਆ ਰਹੇ ਹਨ। ਰਿਪਬਲਿਕਨ ਪਾਰਟੀ ਦੇ ਇੱਕ ਪੈਨਲ ਨੇ ਬਿਲ ਅਤੇ ਹਿਲੇਰੀ ਕਲਿੰਟਨ ਵਿਰੁੱਧ ਕਾਰਵਾਈ ਲਈ ਵੋਟ ਦਿੱਤੀ ਹੈ ਕਿਉਂਕਿ ਉਨ੍ਹਾਂ ਨੇ ਜਾਂਚ ਵਿੱਚ ਗਵਾਹੀ ਦੇਣ ਤੋਂ ਇਨਕਾਰ ਕਰ ਦਿੱਤਾ ਸੀ। ਟ੍ਰੰਪ ਨੇ ਕਈ ਮਹੀਨਿਆਂ ਤੱਕ ਇਨ੍ਹਾਂ ਦਸਤਾਵੇਜ਼ਾਂ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ, ਪਰ ਆਪਣੀ ਹੀ ਪਾਰਟੀ ਦੇ ਦਬਾਅ ਕਾਰਨ ਉਨ੍ਹਾਂ ਨੂੰ ਇਨ੍ਹਾਂ ਨੂੰ ਜਾਰੀ ਕਰਨ ਦੇ ਕਾਨੂੰਨ 'ਤੇ ਦਸਤਖਤ ਕਰਨੇ ਪਏ।

ਰਿਪੋਰਟ ਵਿੱਚ ਐਪਸਟੀਨ ਦੇ ਵਕੀਲ ਐਲਨ ਡਰਸ਼ੋਵਿਟਜ਼ ਅਤੇ ਟ੍ਰੰਪ ਦੇ ਜਵਾਈ ਜੇਰੇਡ ਕੁਸ਼ਨਰ ਦੇ ਪਰਿਵਾਰਕ ਇਤਿਹਾਸ ਦਾ ਵੀ ਜ਼ਿਕਰ ਹੈ। ਹਾਲਾਂਕਿ, ਇਹ ਸਾਰੇ ਦਾਅਵੇ ਗੁਪਤ ਸਰੋਤਾਂ 'ਤੇ ਅਧਾਰਤ ਹਨ ਅਤੇ ਅਜੇ ਤੱਕ ਸਾਬਤ ਨਹੀਂ ਹੋਏ ਹਨ।