ਤਾਜਾ ਖਬਰਾਂ
ਜੰਮੂ-ਕਸ਼ਮੀਰ ਦੇ ਬਾਰਾਮੁੱਲਾ ਤੋਂ ਉਰੀ ਨੂੰ ਜੋੜਦੇ ਰਾਸ਼ਟਰੀ ਹਾਈਵੇਅ ‘ਤੇ ਈਕੋ ਪਾਰਕ ਦੇ ਨੇੜੇ ਭਾਰੀ ਭੂਸਖਲਨ ਹੋਣ ਕਾਰਨ ਆਵਾਜਾਈ ਪੂਰੀ ਤਰ੍ਹਾਂ ਠੱਪ ਹੋ ਗਈ। ਸੜਕ ਚੌੜੀ ਕਰਨ ਦੇ ਕੰਮ ਦੌਰਾਨ ਪਹਾੜੀ ਹਿੱਸੇ ਤੋਂ ਅਚਾਨਕ ਵੱਡੀ ਮਾਤਰਾ ਵਿੱਚ ਮਲਬਾ ਅਤੇ ਚੱਟਾਨਾਂ ਡਿੱਗ ਪਈਆਂ, ਜਿਸ ਨਾਲ ਹਾਈਵੇਅ ਪੂਰੀ ਤਰ੍ਹਾਂ ਬੰਦ ਹੋ ਗਿਆ ਅਤੇ ਯਾਤਰੀਆਂ ਨੂੰ ਘੰਟਿਆਂ ਤੱਕ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ।
ਭੂਸਖਲਨ ਕਾਰਨ ਵੱਡੇ-ਵੱਡੇ ਪੱਥਰ ਸੜਕ ਉੱਤੇ ਆ ਡਿੱਗੇ ਅਤੇ ਕਈ ਥਾਵਾਂ ‘ਤੇ ਪਹਾੜ ਤੋਂ ਮਲਬਾ ਲਗਾਤਾਰ ਖਿਸਕਦਾ ਰਿਹਾ। ਇਸ ਸਥਿਤੀ ਨੇ ਡਰਾਈਵਰਾਂ ਅਤੇ ਪੈਦਲ ਯਾਤਰੀਆਂ ਲਈ ਗੰਭੀਰ ਖ਼ਤਰਾ ਪੈਦਾ ਕਰ ਦਿੱਤਾ। ਹਾਈਵੇਅ ਦੇ ਦੋਵੇਂ ਪਾਸਿਆਂ ਵਾਹਨਾਂ ਦੀ ਲੰਬੀ ਕਤਾਰ ਲੱਗ ਗਈ ਅਤੇ ਕਈ ਯਾਤਰੀ ਰਸਤੇ ‘ਚ ਹੀ ਫਸ ਗਏ।
ਘਟਨਾ ਦੀ ਜਾਣਕਾਰੀ ਮਿਲਦੇ ਹੀ ਪ੍ਰਸ਼ਾਸਨ, ਪੁਲਿਸ ਅਤੇ ਆਫ਼ਤ ਪ੍ਰਬੰਧਨ ਟੀਮਾਂ ਤੁਰੰਤ ਮੌਕੇ ‘ਤੇ ਪਹੁੰਚ ਗਈਆਂ। ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਹਾਈਵੇਅ ‘ਤੇ ਵਾਹਨਾਂ ਦੀ ਆਵਾਜਾਈ ਨੂੰ ਅਗਲੇ ਹੁਕਮਾਂ ਤੱਕ ਪੂਰੀ ਤਰ੍ਹਾਂ ਰੋਕ ਦਿੱਤਾ ਗਿਆ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪਹਾੜੀ ਹਿੱਸਾ ਅਜੇ ਵੀ ਅਸਥਿਰ ਹੈ ਅਤੇ ਹੋਰ ਚੱਟਾਨਾਂ ਡਿੱਗਣ ਦਾ ਖ਼ਤਰਾ ਬਣਿਆ ਹੋਇਆ ਹੈ।
ਪ੍ਰਾਰੰਭਿਕ ਜਾਂਚ ਮੁਤਾਬਕ, ਸੜਕ ਚੌੜੀ ਕਰਨ ਲਈ ਕੀਤੇ ਜਾ ਰਹੇ ਕੱਟਣ ਦੇ ਕੰਮ ਕਾਰਨ ਮਿੱਟੀ ਢਿੱਲੀ ਹੋ ਗਈ ਸੀ, ਜੋ ਇਸ ਭੂਸਖਲਨ ਦਾ ਮੁੱਖ ਕਾਰਨ ਮੰਨੀ ਜਾ ਰਹੀ ਹੈ। ਹਾਲਾਂਕਿ ਮਲਬਾ ਹਟਾਉਣ ਲਈ ਭਾਰੀ ਮਸ਼ੀਨਾਂ ਤਾਇਨਾਤ ਕੀਤੀਆਂ ਗਈਆਂ ਹਨ, ਪਰ ਸੁਰੱਖਿਆ ਕਾਰਨਾਂ ਕਰਕੇ ਫਿਲਹਾਲ ਕੰਮ ਰੋਕ ਦਿੱਤਾ ਗਿਆ ਹੈ।
ਟ੍ਰੈਫਿਕ ਠੱਪ ਹੋਣ ਨਾਲ ਬਾਰਾਮੁੱਲਾ ਅਤੇ ਉਰੀ ਦਰਮਿਆਨ ਆਵਾਜਾਈ ਅਤੇ ਸੰਚਾਰ ‘ਤੇ ਭਾਰੀ ਅਸਰ ਪਿਆ ਹੈ। ਪ੍ਰਸ਼ਾਸਨ ਨੇ ਲੋਕਾਂ ਨੂੰ ਇਸ ਰਸਤੇ ਤੋਂ ਬਚਣ ਅਤੇ ਵਕਲਪੀ ਰਸਤਿਆਂ ਦੀ ਵਰਤੋਂ ਕਰਨ ਦੀ ਅਪੀਲ ਕੀਤੀ ਹੈ। ਪਹਾੜੀ ਇਲਾਕੇ ਦੇ ਪੂਰੀ ਤਰ੍ਹਾਂ ਸਥਿਰ ਹੋਣ ਤੋਂ ਬਾਅਦ ਹੀ ਸੜਕ ਖੋਲ੍ਹਣ ਅਤੇ ਮਲਬਾ ਹਟਾਉਣ ਦਾ ਕੰਮ ਮੁੜ ਸ਼ੁਰੂ ਕੀਤਾ ਜਾਵੇਗਾ।
Get all latest content delivered to your email a few times a month.
