ਜਲੰਧਰ ਪੁਲਿਸ ਦੀ ਵੱਡੀ ਕਾਰਵਾਈ: ਨਸ਼ਾ ਤਸਕਰਾਂ ਦੀ 36 ਲੱਖ ਰੁਪਏ ਤੋਂ ਵੱਧ ਸੰਪਤੀ ਜ਼ਬਤ

ਜਲੰਧਰ ਕਮਿਸ਼ਨਰੇਟ ਪੁਲਿਸ ਵੱਲੋਂ ਨਸ਼ਾ ਤਸਕਰੀ ਦੇ ਖ਼ਿਲਾਫ਼ ਚਲਾਏ ਜਾ ਰਹੇ ਮੁਹਿੰਮ ਦੇ ਤਹਿਤ ਇੱਕ ਵੱਡੀ ਕਾਰਵਾਈ ਕੀਤੀ ਗਈ ਹੈ। ਪੁਲਿਸ ਕਮਿਸ਼ਨਰ ਸ਼੍ਰੀਮਤੀ ਧਨਪ੍ਰੀਤ ਕੌਰ ਦੀ ਅਗਵਾਈ ਹੇਠ ਤਿੰਨ ਨਸ਼ਾ ਤਸਕਰਾਂ ਦੀ ਚਲ ਅਤੇ ਅਚਲ ਸੰਪਤੀ ਨੂੰ ਕਾਨੂੰਨੀ ਤੌਰ ’ਤੇ ਜ਼ਬਤ ਕਰ ਲਿਆ ਗਿਆ ਹੈ। ਇਹ ਸੰਪਤੀ, ਜਿਸ ਦੀ ਕੁੱਲ ਕੀਮਤ ₹36,05,427 ਬਣਦੀ ਹੈ, ਨਸ਼ਿਆਂ ਦੀ ਕਮਾਈ ਨਾਲ ਖਰੀਦੀ ਗਈ ਸੀ ਅਤੇ ਪੁਲਿਸ ਨੇ ਪੂਰੀ ਜਾਂਚ ਤੋਂ ਬਾਅਦ ਕਾਰਵਾਈ ਅੰਜਾਮ ਦਿੱਤੀ।

ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਕਾਰਵਾਈ ਐਫ.ਆਈ.ਆਰ ਨੰਬਰ 180 ਮਿਤੀ 20 ਮਈ 2025 ਅਧੀਨ ਕੀਤੀ ਗਈ, ਜੋ ਧਾਰਾ 22/61 NDPS ਐਕਟ ਤਹਿਤ ਪੁਲਿਸ ਸਟੇਸ਼ਨ ਡਵਿਜ਼ਨ ਨੰਬਰ 1 ਜਲੰਧਰ ਵਿੱਚ ਦਰਜ ਹੋਈ ਸੀ। ਇਸ ਮਾਮਲੇ ਵਿੱਚ ਪੁਲਿਸ ਨੇ 2,23,000 ਨਸ਼ੀਲੀ ਗੋਲੀਆਂ Tramadol Hydrochloride USP 100mg (Panadole) ਬਰਾਮਦ ਕੀਤੀਆਂ ਸਨ। ਜਾਂਚ ਦੌਰਾਨ ਮੁਲਜ਼ਮ ਨਿਤਿਨ ਸ਼ਰਮਾ, ਅਜੇ ਕੁਮਾਰ ਅਤੇ ਅਮਿਤ ਵਰਮਾ ਦੁਆਰਾ ਨਸ਼ੇ ਦੀ ਕਮਾਈ ਨਾਲ ਕੀਤੀ ਗਈ ਸੰਪਤੀ ਖਰੀਦਦਾਰੀ ਦੇ ਸਬੂਤ ਮਿਲੇ।

ਪੁਲਿਸ ਕਮਿਸ਼ਨਰ ਨੇ ਜਾਣਕਾਰੀ ਦਿੱਤੀ ਕਿ ਸਮਰੱਥ ਅਥਾਰਟੀ ਤੋਂ ਮਿਲੇ ਹੁਕਮਾਂ ਅਨੁਸਾਰ ਸੰਪਤੀ ਜ਼ਬਤੀ ਦੀ ਪ੍ਰਕ੍ਰਿਆ ਪੂਰੀ ਕੀਤੀ ਗਈ। ਜ਼ਬਤ ਕੀਤੀ ਗਈ ਸੰਪਤੀ ਵਿੱਚ ₹23,25,000 ਦਾ ਰਿਹਾਇਸ਼ੀ ਘਰ (ਜਮੀਨ ਅਤੇ ਨਿਰਮਾਣ ਸਮੇਤ), ₹5,38,919 ਮੁੱਲ ਦੀ Maruti Suzuki Swift VXI, ₹6,80,392 ਦੀ Maruti Suzuki Fronx ਅਤੇ ₹61,116 ਮੁੱਲ ਦਾ Activa ਸਕੂਟਰ ਸ਼ਾਮਲ ਹੈ। ਇਹ ਸਾਰੀਆਂ ਸੰਪਤੀਆਂ ਉਹ ਹਨ ਜੋ ਨਸ਼ੇ ਦੇ ਕਾਰੋਬਾਰ ਤੋਂ ਕਮਾਈ ਗਈ ਰਕਮ ਨਾਲ ਖਰੀਦੀਆਂ ਗਈਆਂ ਸਨ।

ਜਲੰਧਰ ਪੁਲਿਸ ਨੇ ਸਾਫ਼ ਕੀਤਾ ਕਿ ਨਸ਼ੇ ਦੇ ਕਾਰੋਬਾਰ ਨਾਲ ਜੁੜੇ ਕਿਸੇ ਵੀ ਵਿਅਕਤੀ ਨੂੰ ਛੱਡਿਆ ਨਹੀਂ ਜਾਵੇਗਾ। ਪੁਲਿਸ ਨੇ ਦੁਹਰਾਇਆ ਕਿ ਨਸ਼ਾ ਤਸਕਰੀ ਨੂੰ ਜੜ੍ਹੋਂ ਖਤਮ ਕਰਨ ਲਈ ਸਖ਼ਤੀ ਨਾਲ ਕਾਨੂੰਨੀ ਕਾਰਵਾਈ ਜਾਰੀ ਰਹੇਗੀ। ਇਸ ਦੇ ਨਾਲ, ਨਸ਼ਿਆਂ ਤੋਂ ਕਮਾਈ ਗਈ ਹਰ ਗੈਰਕਾਨੂੰਨੀ ਸੰਪਤੀ ਜਾਂ ਵਾਹਨ ਨੂੰ ਨਿਯਮਾਂ ਅਨੁਸਾਰ ਜ਼ਬਤ ਕੀਤਾ ਜਾਵੇਗਾ, ਤਾਂ ਜੋ ਨਸ਼ਾ ਮਾਫੀਆ ਦੀਆਂ ਆਰਥਿਕ ਜੜ੍ਹਾਂ ਕਮਜ਼ੋਰ ਹੋਣ ਅਤੇ ਸ਼ਹਿਰ ਵਿੱਚ ਨਸ਼ੇ ਨੂੰ ਪੂਰੀ ਤਰ੍ਹਾਂ ਖਤਮ ਕੀਤਾ ਜਾ ਸਕੇ।