ਤਾਜਾ ਖਬਰਾਂ
USA ਲਈ ਖੇਡਣ ਵਾਲੇ ਭਾਰਤੀ ਮੂਲ ਦੇ ਕ੍ਰਿਕਟਰ ਅਖਿਲੇਸ਼ ਰੈੱਡੀ 'ਤੇ ਫਿਕਸਿੰਗ ਦੀ ਕੋਸ਼ਿਸ਼ ਕਰਨ ਦੇ ਦੋਸ਼ ਲੱਗੇ ਹਨ। ICC (ਇੰਟਰਨੈਸ਼ਨਲ ਕ੍ਰਿਕਟ ਕਾਉਂਸਿਲ) ਨੇ ਉਨ੍ਹਾਂ ਨੂੰ ਐਂਟੀ-ਕਰੱਪਸ਼ਨ ਕੋਡ ਦੀਆਂ ਤਿੰਨ ਉਲੰਘਣਾਵਾਂ ਲਈ ਮੁਅੱਤਲ (ਸਸਪੈਂਡ) ਕਰ ਦਿੱਤਾ ਹੈ। ਹੁਣ ਉਹ ਕ੍ਰਿਕਟ ਦੇ ਮੈਦਾਨ ਤੋਂ ਦੂਰ ਰਹਿਣਗੇ।
ਅਬੂ ਧਾਬੀ ਟੀ10 ਲੀਗ ਵਿੱਚ ਧੋਖਾਧੜੀ ਕਰਨ ਦੀ ਕੋਸ਼ਿਸ਼ ਉਨ੍ਹਾਂ ਨੂੰ ਭਾਰੀ ਪਈ ਹੈ ਅਤੇ ICC ਨੇ ਉਨ੍ਹਾਂ ਨੂੰ ਸਖ਼ਤ ਸਜ਼ਾ ਸੁਣਾਈ ਹੈ। ਇਸ ਕਾਰਨ ਉਨ੍ਹਾਂ ਦਾ ਕ੍ਰਿਕਟ ਕਰੀਅਰ ਮੁਸ਼ਕਿਲ ਵਿੱਚ ਆ ਗਿਆ ਹੈ। ਜਦੋਂ ਤੱਕ ਉਨ੍ਹਾਂ 'ਤੇ ਲੱਗੇ ਦੋਸ਼ ਗਲਤ ਸਾਬਤ ਨਹੀਂ ਹੁੰਦੇ, ਉਦੋਂ ਤੱਕ ਸ਼ਾਇਦ ਉਨ੍ਹਾਂ ਦੀ ਕ੍ਰਿਕਟ ਦੇ ਮੈਦਾਨ 'ਤੇ ਵਾਪਸੀ ਨਹੀਂ ਹੋਵੇਗੀ।
ਦੋਸ਼ਾਂ ਦੀ ਵਿਸਤ੍ਰਿਤ ਜਾਣਕਾਰੀ
ਅਖਿਲੇਸ਼ ਰੈੱਡੀ ਅਬੂ ਧਾਬੀ ਟੀ10 ਟੂਰਨਾਮੈਂਟ ਵਿੱਚ ਐਸਪੀਨ ਸਟੈਲੀਅਨਜ਼ ਟੀਮ ਦਾ ਹਿੱਸਾ ਹਨ ਅਤੇ ਹੁਣ ਤੱਕ ਦੋ ਮੈਚਾਂ ਵਿੱਚ ਖੇਡ ਚੁੱਕੇ ਹਨ।
ICC ਨੇ ਐਂਟੀ-ਕਰੱਪਸ਼ਨ ਕੋਡ ਤਹਿਤ ਉਨ੍ਹਾਂ ਨੂੰ ਮੁਅੱਤਲ ਕੀਤਾ ਹੈ।
ਆਰਟੀਕਲ 2.1.1 ਦੇ ਤਹਿਤ: ਜੇ ਕੋਈ ਮੈਚ ਫਿਕਸ ਕਰਨ ਜਾਂ ਜਾਣਬੁੱਝ ਕੇ ਨਤੀਜੇ ਵਿੱਚ ਛੇੜਛਾੜ ਕਰਨ ਦੀ ਕੋਸ਼ਿਸ਼ ਕਰਦਾ ਹੈ, ਤਾਂ ਉਸ ਖਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਂਦੀ ਹੈ।
ਆਰਟੀਕਲ 2.1.4 ਦੇ ਤਹਿਤ: ਉਨ੍ਹਾਂ 'ਤੇ ਇੱਕ ਹੋਰ ਟੀਮਮੇਟ ਨੂੰ ਵੀ ਧੋਖਾਧੜੀ ਕਰਨ ਲਈ ਮਨਾਉਣ ਦੀ ਕੋਸ਼ਿਸ਼ ਕਰਨ ਦਾ ਦੋਸ਼ ਹੈ।
ਆਰਟੀਕਲ 2.4.7 ਦੇ ਅਨੁਸਾਰ: ਉਨ੍ਹਾਂ ਨੇ ਡਾਟਾ ਅਤੇ ਮੈਸੇਜ ਡਿਲੀਟ ਕਰਨ ਦੀ ਕੋਸ਼ਿਸ਼ ਕਰਕੇ ਜਾਂਚ ਵਿੱਚ ਰੁਕਾਵਟ ਪਾਈ ਹੈ।
ਇਨ੍ਹਾਂ ਦੋਸ਼ਾਂ ਦੇ ਚਲਦਿਆਂ ਉਨ੍ਹਾਂ ਨੂੰ ਸਸਪੈਂਡ ਕੀਤਾ ਗਿਆ ਹੈ। ਖ਼ੁਦ 'ਤੇ ਲੱਗੇ ਦੋਸ਼ਾਂ ਦਾ ਜਵਾਬ ਦੇਣ ਲਈ ਉਨ੍ਹਾਂ ਕੋਲ 14 ਦਿਨ ਦਾ ਸਮਾਂ ਹੈ।
ਅਖਿਲੇਸ਼ ਰੈੱਡੀ ਦਾ ਕ੍ਰਿਕਟ ਕਰੀਅਰ
ਅਖਿਲੇਸ਼ ਰੈੱਡੀ ਨੇ ਪਹਿਲਾਂ ਹੈਦਰਾਬਾਦ ਲਈ ਘਰੇਲੂ ਕ੍ਰਿਕਟ ਖੇਡਿਆ ਸੀ, ਪਰ ਬਾਅਦ ਵਿੱਚ ਉਹ ਯੂਨਾਈਟਿਡ ਸਟੇਟਸ (USA) ਚਲੇ ਗਏ।
25 ਸਾਲਾ ਇਸ ਖਿਡਾਰੀ ਨੇ 2025 ਵਿੱਚ ਹੀ USA ਲਈ ਅੰਤਰਰਾਸ਼ਟਰੀ ਡੈਬਿਊ ਕੀਤਾ ਸੀ।
ਇਸ ਆਫ-ਬ੍ਰੇਕ ਗੇਂਦਬਾਜ਼ ਨੇ USA ਲਈ ਚਾਰ ਅੰਤਰਰਾਸ਼ਟਰੀ ਮੈਚ ਖੇਡੇ ਹਨ ਅਤੇ ਸਿਰਫ ਇੱਕ ਹੀ ਵਿਕਟ ਹਾਸਲ ਕਰ ਸਕੇ।
ਉਨ੍ਹਾਂ ਨੇ ਮੇਜਰ ਕ੍ਰਿਕਟ ਲੀਗ ਅਤੇ ਅਬੂ ਧਾਬੀ ਟੀ10 ਲੀਗ ਵਰਗੇ ਵੱਡੇ ਟੂਰਨਾਮੈਂਟਾਂ ਵਿੱਚ ਹਿੱਸਾ ਲਿਆ| ਹਾਲਾਂਕਿ, ਹੁਣ ਮੁਅੱਤਲੀ (ਸਸਪੈਂਸ਼ਨ) ਦੇ ਕਾਰਨ ਉਨ੍ਹਾਂ ਦੇ ਕਰੀਅਰ 'ਤੇ ਵੱਡਾ ਸੰਕਟ ਖੜ੍ਹਾ ਹੋ ਗਿਆ ਹੈ।
Get all latest content delivered to your email a few times a month.
