ਆਸਟ੍ਰੇਲੀਆ 'ਚ ਨਸਲਭੇਦ ਦਾ ਸ਼ਿਕਾਰ ਹੋਏ ਦਿਲਜੀਤ ਦੋਸਾਂਝ ਦਾ ਠੋਕਵਾਂ ਜਵਾਬ: "ਉਬਰ ਤੇ ਟਰੱਕ ਡਰਾਈਵਰ ਨਾ ਹੋਣ ਤਾਂ ਤੁਹਾਡੀ ਜ਼ਿੰਦਗੀ ਠੱਪ

ਪੰਜਾਬੀ ਗਾਇਕ ਅਤੇ ਅਦਾਕਾਰ ਦਿਲਜੀਤ ਦੋਸਾਂਝ ਨੂੰ ਆਪਣੇ ਚੱਲ ਰਹੇ ਆਸਟ੍ਰੇਲੀਆ ਦੌਰੇ ਦੌਰਾਨ ਕੁਝ ਲੋਕਾਂ ਦੀਆਂ ਨਸਲੀ ਟਿੱਪਣੀਆਂ ਦਾ ਸਾਹਮਣਾ ਕਰਨਾ ਪਿਆ ਹੈ। ਦਿਲਜੀਤ ਦੇ ਪਹੁੰਚਣ ਦੀ ਖ਼ਬਰ ਮਿਲਣ 'ਤੇ ਸੋਸ਼ਲ ਮੀਡੀਆ 'ਤੇ ਕੁਝ ਲੋਕਾਂ ਨੇ ਟਿੱਪਣੀਆਂ ਕੀਤੀਆਂ ਕਿ "ਇੱਕ ਨਵਾਂ ਉਬਰ ਡਰਾਈਵਰ ਆਇਆ ਹੈ" ਜਾਂ "7-11 'ਤੇ ਕੰਮ ਕਰਨ ਵਾਲਾ ਆ ਗਿਆ" ਹੈ।

ਦਿਲਜੀਤ ਦੋਸਾਂਝ ਨੇ ਹੁਣ ਆਪਣੇ ਯੂਟਿਊਬ ਚੈਨਲ 'ਤੇ ਇੱਕ ਵੀਡੀਓ ਸਾਂਝੀ ਕਰਦਿਆਂ ਇਨ੍ਹਾਂ ਨਸਲੀ ਟ੍ਰੋਲਰਸ ਨੂੰ ਬੇਬਾਕ ਜਵਾਬ ਦਿੱਤਾ ਹੈ।

'ਜੇਕਰ ਉਬਰ ਨਾ ਮਿਲੇ ਤਾਂ ਮੁਸ਼ਕਲ ਖੜ੍ਹੀ ਹੋ ਜਾਵੇਗੀ'

ਦਿਲਜੀਤ ਨੇ ਭਾਵੁਕ ਹੁੰਦਿਆਂ ਕਿਹਾ ਕਿ ਉਨ੍ਹਾਂ ਨੇ ਵਿਦੇਸ਼ਾਂ ਵਿੱਚ ਲੋਕਾਂ ਨੂੰ ਆਪਣੀ ਪਛਾਣ ਅਤੇ ਜ਼ਿੰਦਗੀ ਲਈ ਸੰਘਰਸ਼ ਕਰਦਿਆਂ ਦੇਖਿਆ ਹੈ। ਨਸਲੀ ਟਿੱਪਣੀਆਂ ਦਾ ਜਵਾਬ ਦਿੰਦਿਆਂ ਉਨ੍ਹਾਂ ਕਿਹਾ:

"ਉਹ ਭਰਾ ਜੇਕਰ ਤੈਨੂੰ ਉਬਰ ਵਾਲਾ ਸਹੀ ਸਮੇਂ 'ਤੇ ਮਿਲ ਜਾਵੇ ਤਾਂ ਉਹੀ ਸਭ ਤੋਂ ਵੱਡੀ ਰਾਹਤ ਹੈ। ਜੇਕਰ ਕਦੇ ਉਬਰ ਵਾਲਾ ਟਾਈਮ 'ਤੇ ਨਾ ਮਿਲੇ ਤਾਂ ਮੁਸ਼ਕਲ ਖੜ੍ਹੀ ਹੋ ਜਾਵੇਗੀ। ਜੇਕਰ ਟਰੱਕ ਚਲਾਉਣ ਵਾਲਾ ਨਾ ਹੋਵੇ ਤਾਂ ਤੁਹਾਡੇ ਘਰ ਤੱਕ ਬ੍ਰੈੱਡ ਵੀ ਨਹੀਂ ਪਹੁੰਚ ਸਕੇਗੀ।"

ਉਨ੍ਹਾਂ ਕਿਹਾ ਕਿ ਉਹ ਇਨ੍ਹਾਂ ਨਕਾਰਾਤਮਕ ਟਿੱਪਣੀਆਂ 'ਤੇ ਗੁੱਸਾ ਨਹੀਂ ਕਰਦੇ, ਪਰ ਇਹ ਦੇਖ ਕੇ ਦੁੱਖ ਹੁੰਦਾ ਹੈ ਕਿ ਅੱਜ ਵੀ ਲੋਕ ਇਸ ਤਰ੍ਹਾਂ ਦੀ ਨਸਲੀ ਸੋਚ 'ਤੇ ਹੀ ਖੜ੍ਹੇ ਹਨ। ਦਿਲਜੀਤ ਨੇ ਵਿਸ਼ਵ ਦੀਆਂ ਸਰਹੱਦਾਂ 'ਤੇ ਸਵਾਲ ਉਠਾਉਂਦਿਆਂ ਕਿਹਾ ਕਿ ਜਿਨ੍ਹਾਂ ਲੋਕਾਂ ਨੇ ਬਾਹਰ ਆ ਕੇ ਮਿਹਨਤ ਕੀਤੀ, ਉਨ੍ਹਾਂ 'ਤੇ ਉਨ੍ਹਾਂ ਨੂੰ ਕੋਈ ਗੁੱਸਾ ਨਹੀਂ ਹੈ।

ਵੀਡੀਓ ਦੇ ਅੰਤ ਵਿੱਚ ਦਿਲਜੀਤ ਨੇ ਕਿਹਾ, "ਮੈਨੂੰ ਗੁੱਸਾ ਨਹੀਂ ਆਉਂਦਾ, ਪਰ ਲੋਕ ਅੱਜ ਵੀ ਉੱਥੇ ਹੀ ਖੜ੍ਹੇ ਹਨ। ਚਲੋ ਪਰਮਾਤਮਾ ਖ਼ੁਦ ਹੀ ਸਭ ਕੁਝ ਸਹੀ ਕਰੇ। ਸਭ ਨੂੰ ਮੇਰੇ ਵੱਲੋਂ ਪਿਆਰ ਅਤੇ ਸਤਿਕਾਰ। ਜੋ ਵੀ ਬੁਰਾ ਬੋਲ ਦੇਵੇ, ਉਸ ਨੂੰ ਵੀ ਪਿਆਰ।"

ਦੱਸ ਦੇਈਏ ਕਿ ਦਿਲਜੀਤ ਦੋਸਾਂਝ 26 ਅਕਤੂਬਰ ਨੂੰ ਸਿਡਨੀ ਦੇ ਕੂਮਬਸ ਸਟੇਡੀਅਮ ਅਤੇ ਥੀਏਟਰ ਅਰੇਨਾ ਨਾਓ ਸਟੇਡੀਅਮ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰ ਚੁੱਕੇ ਹਨ। ਉਹ ਹੁਣ 1 ਨਵੰਬਰ ਨੂੰ ਬ੍ਰਿਸਬੇਨ ਵਿੱਚ ਆਪਣਾ ਲਾਈਵ ਸ਼ੋਅ ਕਰਨਗੇ।