ਤਾਜਾ ਖਬਰਾਂ
ਜਲੰਧਰ ਦੇ ਰਾਮਾ ਮੰਡੀ ਥਾਣਾ ਖੇਤਰ ਵਿੱਚ ਇੱਕ ਦਹਿਲਾ ਦੇਣ ਵਾਲੀ ਘਟਨਾ ਵਾਪਰੀ ਹੈ, ਜਿਸ ਵਿੱਚ ਤਿੰਨ ਨੌਜਵਾਨਾਂ ਵੱਲੋਂ ਇੱਕ 24 ਸਾਲਾ ਲੜਕੀ ਨਾਲ ਮੈਰੀਟੋਨ ਹੋਟਲ ਵਿੱਚ ਸਮੂਹਿਕ ਬਲਾਤਕਾਰ ਕਰਨ ਦਾ ਦੋਸ਼ ਲਗਾਇਆ ਗਿਆ ਹੈ। ਪੁਲਿਸ ਨੇ ਮੁੱਖ ਦੋਸ਼ੀ ਅਮਨਦੀਪ ਸਿੰਘ ਲਾਲੀ ਵਿਰੁੱਧ ਐਫਆਈਆਰ ਨੰਬਰ 309 ਤਹਿਤ ਧਾਰਾ 69, ਕ੍ਰਿਮੀਨਲ ਪ੍ਰੋਸੀਜ਼ਰ ਕੋਡ (ਸੀਆਰਪੀਸੀ) ਅਧੀਨ ਮਾਮਲਾ ਦਰਜ ਕੀਤਾ ਹੈ। ਹਾਲਾਂਕਿ, ਮਾਮਲਾ ਦਰਜ ਹੋਣ ਦੇ ਬਾਵਜੂਦ ਅਜੇ ਤੱਕ ਦੋਸ਼ੀ ਦੀ ਗ੍ਰਿਫ਼ਤਾਰੀ ਨਹੀਂ ਹੋ ਸਕੀ ਹੈ।
ਪੀੜਤਾ, ਜੋ ਕਿ ਫਿਲੌਰ ਤਹਿਸੀਲ ਦੇ ਨੂਰਮਹਿਲ ਖੇਤਰ ਦੇ ਇੱਕ ਪਿੰਡ ਦੀ ਰਹਿਣ ਵਾਲੀ ਹੈ, ਵੱਖ-ਵੱਖ ਸਮਾਗਮਾਂ ਵਿੱਚ ਮੇਜ਼ਬਾਨ ਵਜੋਂ ਕੰਮ ਕਰਦੀ ਹੈ। ਉਸਨੇ ਪੁਲਿਸ ਨੂੰ ਦਿੱਤੇ ਬਿਆਨ ਵਿੱਚ ਕਿਹਾ ਕਿ ਉਸਦੀ ਮੁਲਾਕਾਤ ਅਮਨਦੀਪ ਸਿੰਘ ਲਾਲੀ ਨਾਲ ਕਰੀਬ ਚਾਰ ਮਹੀਨੇ ਪਹਿਲਾਂ ਹੋਈ ਸੀ ਅਤੇ ਦੋਵੇਂ ਕੁਝ ਵਾਰ ਜਲੰਧਰ ਵਿੱਚ ਮਿਲ ਚੁੱਕੇ ਸਨ। 25 ਅਕਤੂਬਰ ਦੀ ਰਾਤ, ਲਾਲੀ ਨੇ ਉਸਨੂੰ ਫੋਨ ਕਰਕੇ ਕਿਹਾ ਕਿ ਉਸਦਾ ਵਿਆਹ ਸਵੇਰੇ ਹੈ ਅਤੇ ਇਸ ਲਈ ਉਹ ਉਸਦੇ ਨਾਲ ਹੋਟਲ ਵਿੱਚ ਰੁਕੇ।
ਅਗਲੇ ਦਿਨ ਦੁਪਹਿਰ 12 ਵਜੇ ਦੇ ਕਰੀਬ ਪੀੜਤਾ ਜਲੰਧਰ ਪਹੁੰਚੀ, ਜਿੱਥੇ ਕੁਝ ਸਮੇਂ ਬਾਅਦ ਲਾਲੀ ਉਸਨੂੰ ਮੈਰੀਟੋਨ ਹੋਟਲ ਲੈ ਗਿਆ। ਉੱਥੇ ਉਸਦੇ ਦੋ ਦੋਸਤ ਹਰਮਨ ਅਤੇ ਜੱਸੀ ਪਹਿਲਾਂ ਹੀ ਮੌਜੂਦ ਸਨ। ਜਦੋਂ ਪੀੜਤਾ ਨੇ ਦੋਵੇਂ ਬਾਰੇ ਪੁੱਛਿਆ, ਤਾਂ ਲਾਲੀ ਨੇ ਕਿਹਾ ਕਿ ਉਹ ਵਿਆਹ ਵਿੱਚ ਗਾਇਕ ਹਨ। ਫਿਰ ਉਹ ਸਭ ਹੋਟਲ ਦੇ ਵੱਖ-ਵੱਖ ਕਮਰਿਆਂ ਵਿੱਚ ਚਲੇ ਗਏ।
ਪੀੜਤਾ ਦੇ ਬਿਆਨ ਮੁਤਾਬਕ, ਤੀਜੀ ਮੰਜ਼ਿਲ ਦੇ ਇੱਕ ਕਮਰੇ ਵਿੱਚ ਲਾਲੀ ਨੇ ਉਸਨੂੰ ਰੈੱਡ ਬੁੱਲ ਪੀਣ ਲਈ ਦਿੱਤਾ ਜਿਸ ਵਿੱਚ ਨਸ਼ੀਲਾ ਪਦਾਰਥ ਮਿਲਾਇਆ ਗਿਆ ਸੀ। ਜਿਵੇਂ ਹੀ ਉਸਨੇ ਪੀਣ ਤੋਂ ਬਾਅਦ ਬੇਹੋਸ਼ੀ ਮਹਿਸੂਸ ਕੀਤੀ, ਤਿੰਨੋਂ ਦੋਸ਼ੀਆਂ ਨੇ ਜ਼ਬਰਦਸਤੀ ਉਸ ਨਾਲ ਸਰੀਰਕ ਸੰਬੰਧ ਬਣਾਏ। ਸਵੇਰੇ ਹੋਸ਼ ਆਉਣ 'ਤੇ, ਔਰਤ ਨੇ ਆਪਣੇ ਸਰੀਰ 'ਤੇ ਕਈ ਸੱਟਾਂ ਦੇ ਨਿਸ਼ਾਨ ਵੇਖੇ ਅਤੇ ਸਮਝ ਆਇਆ ਕਿ ਉਸ ਨਾਲ ਬਲਾਤਕਾਰ ਕੀਤਾ ਗਿਆ ਹੈ।
ਪੀੜਤਾ ਨੇ ਤੁਰੰਤ ਪੁਲਿਸ ਨੂੰ ਸਾਰੀ ਘਟਨਾ ਦੱਸੀ ਅਤੇ ਡਕੋਹਾ ਥਾਣੇ ਦੇ ਏਐਸਆਈ ਵਿਪਿਨ ਕੁਮਾਰ ਨੂੰ ਬਿਆਨ ਦਿੱਤਾ। ਉਸਨੇ ਦੋਸ਼ੀਆਂ ਵਿਰੁੱਧ ਸਖ਼ਤ ਕਾਨੂੰਨੀ ਕਾਰਵਾਈ ਅਤੇ ਡਾਕਟਰੀ ਜਾਂਚ ਦੀ ਮੰਗ ਕੀਤੀ ਹੈ। ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਜਾਰੀ ਹੈ, ਜਦਕਿ ਮੁੱਖ ਦੋਸ਼ੀ ਅਮਨਦੀਪ ਸਿੰਘ ਲਾਲੀ ਦੀ ਗ੍ਰਿਫ਼ਤਾਰੀ ਲਈ ਛਾਪੇ ਮਾਰੇ ਜਾ ਰਹੇ ਹਨ।
Get all latest content delivered to your email a few times a month.
