ਗੁਰਭਜਨ ਗਿੱਲ: ਜਿਨ੍ਹਾਂ ਘਰਾਂ ਵਿਚ ਦੀਵੇ ਨਹੀਂ ਜਗਦੇ

ਆਓ ਓਥੇ ਚੱਲੀਏ, 

ਜਿੰਨ੍ਹਾਂ ਘਰਾਂ ਵਿਚ ਦੀਵੇ ਨਹੀਂ ਜਗਦੇ ।

ਜਿੱਥੇ ਸੁੰਨੇ ਬਨੇਰਿਆਂ ਤੋਂ, 

ਦੀਵਿਆਂ ਦੀ ਪਾਲ ਬੁਝ ਗਈ ਹੈ ।

ਜਿਹੜੇ ਘਰਾਂ ਦੇ ਦੀਵਿਆਂ ਦੀ ਬੱਤੀ, 

ਕਾਵਾਂ ਨੇ ਚੂੰਡ ਲਈ ਹੈ । 

ਜਿਨ੍ਹਾਂ ਦਾ ਤੇਲ ਦੀਵੇ ਪੀ ਗਏ ਨੇ ।

ਜਿੰਨ੍ਹਾਂ ਘਰਾਂ ਵਿਚ ਹਨੇਰਾ ਹੈ, 

ਓਥੇ ਵੱਸਦੇ ਲੋਕਾਂ ਕੋਲ 

ਜਾਈਏ ਤੇ ਪੁੱਛੀਏ ?

ਤੁਹਾਡੇ ਘਰਾਂ ਦਾ ਚਾਨਣਾ 

ਕਿੱਧਰ ਗਿਆ ? 

ਦੀਵਿਆਂ ਦੀ ਰੌਸ਼ਨੀ 

ਕੌਣ ਖੁੱਗ ਕੇ ਲੈ ਗਿਆ ?

ਹਨੇਰੇ ਘਰਾਂ ਨੂੰ ਕਹੀਏ ? 

ਆਪਣੇ ਬਨੇਰਿਆਂ ਮੁਹਾਠਾਂ ਤੇ 

ਹਨੇਰੇ ਖੂੰਜਿਆਂ ਤੋਂ ਪੁੱਛੋ, 

ਦੀਵੇ ਜਗਣ ਵੇਲੇ, 

ਤੁਸੀਂ ਕਿਉਂ ਸੌਂ ਗਏ ?

ਤੁਹਾਡੀ ਗ਼ੈਰਹਾਜ਼ਰੀ ਵਿਚ, 

ਦੀਵਿਆਂ ਦੀ ਜੋਤ 

ਕੌਣ ਚੁਰਾ ਕੇ ਲੈ ਗਿਆ ਹੈ ?

ਹਨੇਰੇ ਪਹਿਰ ਵਿਚ, 

ਆਪੋ ਆਪਣੇ ਚਿਰਾਗਾਂ ਦੀ ਰਾਖੀ ਵੀ ਓਨੀ ਹੀ ਜ਼ਰੂਰੀ ਹੈ 

ਜਿੰਨਾ ਜ਼ਰੂਰੀ ਹੈ ਚਿਰਾਗ ਬਾਲਣਾ। 

ਆਓ ਓਥੇ ਚੱਲੀਏ 

ਜਿਥੇ ਚਿਰਾਗ ਬੁਝ ਗਏ ਨੇ 

ਇਨ੍ਹਾਂ ਚਿਰਾਗਾਂ ਦੇ 

ਬੁਝਣ ਦਾ ਇਲਜ਼ਾਮ

ਜਿੱਥੇ ਹਨ੍ਹੇਰੀ ਸਿਰ ਲੱਗਦਾ ਹੈ । 

ਆਓ ਓਥੇ ਚੱਲੀਏ ਤੇ ਕਹੀਏ। 

ਜਿਹੜੇ ਲੋਕ ਹਨੇਰੀ ਵਿਚ, 

ਆਪਣੇ ਚਿਰਾਗਾਂ ਕੋਲ ਜਾਗਦੇ ਨੇ । 

ਉਨ੍ਹਾਂ ਦੇ ਚਿਰਾਗ ਹੀ ਜਗਦੇ ਨੇ । 

ਸੁੱਤੇ ਲੋਕਾਂ ਦੇ 

ਬਲ਼ਦੇ ਚਿਰਾਗ਼ ਕੀ ਲੱਗਦੇ ਨੇ ?

ਲੇਖਕ :ਗੁਰਭਜਨ ਗਿੱਲ