ਅੱਤਵਾਦ ਵਿਰੋਧੀ ਲੜਾਈ 'ਚ ਮੋਦੀ ਸਰਕਾਰ ਨੇ ਦਿਖਾਈ ਦਲੇਰੀ, ਸਰਹੱਦ 'ਤੇ ਸੁਰੱਖਿਆ ਹੋਈ ਮਜ਼ਬੂਤ: ਜੇਪੀ ਨੱਡਾ

ਨਵੀਂ ਦਿੱਲੀ, 9 ਜੂਨ: ਭਾਜਪਾ ਦੇ ਰਾਸ਼ਟਰੀ ਪ੍ਰਧਾਨ ਅਤੇ ਕੇਂਦਰੀ ਮੰਤਰੀ ਜੇਪੀ ਨੱਡਾ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਹੇਠ ਭਾਰਤ ਨੇ ਹਰ ਚੁਣੌਤੀ ਦਾ ਨਿਡਰਤਾ ਨਾਲ ਸਾਹਮਣਾ ਕੀਤਾ ਹੈ। ਉਨ੍ਹਾਂ ਯਾਦ ਕਰਵਾਇਆ ਕਿ ਉੜੀ ਹਮਲੇ ਤੋਂ ਬਾਅਦ ਮੋਦੀ ਨੇ ਸਪੱਸ਼ਟ ਕੀਤਾ ਸੀ ਕਿ ਸੈਨਿਕਾਂ ਦੀ ਕੁਰਬਾਨੀ ਵਿਅਰਥ ਨਹੀਂ ਜਾਵੇਗੀ, ਜਿਸ ਤੋਂ ਬਾਅਦ ਸਰਜੀਕਲ ਸਟ੍ਰਾਈਕ ਹੋਈ। ਪੁਲਵਾਮਾ ਹਮਲੇ ਮਗਰੋਂ ਵੀ ਉਨ੍ਹਾਂ ਨੇ ਕਿਹਾ ਕਿ ਅੱਤਵਾਦੀਆਂ ਨੂੰ ਭਾਰੀ ਸਜ਼ਾ ਮਿਲੇਗੀ, ਜੋ ਆਪ੍ਰੇਸ਼ਨ ਸਿੰਦੂਰ ਰਾਹੀਂ ਸਾਬਤ ਹੋਈ। ਨੱਡਾ ਨੇ ਦਾਅਵਾ ਕੀਤਾ ਕਿ ਮੋਦੀ ਸਰਕਾਰ ਦੇ ਦਲੇਰਾਨੇ ਫੈਸਲਿਆਂ ਕਾਰਨ ਅੱਤਵਾਦੀ ਕੈਂਪ ਨਸ਼ਟ ਹੋਏ ਅਤੇ ਦੇਸ਼ ਦੀ ਸੁਰੱਖਿਆ ਪੱਕੀ ਹੋਈ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਨਕਸਲੀ ਹਿੰਸਾ ਪ੍ਰਭਾਵਿਤ ਜ਼ਿਲ੍ਹਿਆਂ ਦੀ ਗਿਣਤੀ 126 ਤੋਂ ਘੱਟ ਹੋ ਕੇ ਸਿਰਫ 18 ਰਹਿ ਗਈ ਹੈ ਅਤੇ ਖੱਬੇ-ਪੱਖੀ ਅਤਿਵਾਦੀ ਨੇਤਾਵਾਂ ਨੂੰ ਖਤਮ ਕਰ ਦਿੱਤਾ ਗਿਆ ਹੈ। ਉਨ੍ਹਾਂ ਇਕ ਪੁਰਾਣੇ ਰੱਖਿਆ ਮੰਤਰੀ ਦੇ ਬਿਆਨ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਜਦੋਂ ਇੱਕ ਸਮੇਂ ਸਰਹੱਦੀ ਖੇਤਰਾਂ ਵਿੱਚ ਸੜਕਾਂ ਨਾ ਬਣਾਉਣ ਦੀ ਸੋਚ ਸੀ, ਉਥੇ ਅੱਜ ਮੋਦੀ ਸਰਕਾਰ ਨੇ 8,000 ਕਿਲੋਮੀਟਰ ਤੋਂ ਵੱਧ ਸਰਹੱਦੀ ਸੜਕਾਂ ਬਣਾ ਕੇ ਸੁਰੱਖਿਆ ਅਤੇ ਵਿਕਾਸ ਦੋਵੇਂ ਨੂੰ ਮਜ਼ਬੂਤ ਕੀਤਾ ਹੈ।