ਪਾਕਿਸਤਾਨ 'ਚ ਅੱਜ ਲੋਕਤੰਤਰ ਦਾ ਟੈਸਟ: ਆਮ ਚੋਣਾਂ ਲਈ ਵੋਟਿੰਗ ਵਿਚਕਾਰ, ਮੋਬਾਈਲ ਸੇਵਾਵਾਂ ਬੰਦ

...

ਪਾਕਿਸਤਾਨ ਵਿੱਚ ਅੱਜ ਆਮ ਚੋਣਾਂ ਹਨ। ਵੋਟਿੰਗ ਸਵੇਰੇ 8 ਵਜੇ (ਭਾਰਤੀ ਸਮੇਂ ਅਨੁਸਾਰ 8.30 ਵਜੇ) ਸ਼ੁਰੂ ਹੋ ਚੁੱਕੀ ਹੈ। ਵੋਟਿੰਗ ਸ਼ਾਮ 5:30 ਵਜੇ ਖਤਮ ਹੋਵੇਗੀ। ਇਸ ਚੋਣ ਵਿੱਚ 5121 ਉਮੀਦਵਾਰ ਆਪਣੀ ਕਿਸਮਤ ਅਜ਼ਮਾ ਰਹੇ ਹਨ। ਇਨ੍ਹਾਂ ਵਿੱਚੋਂ 4,806 ਪੁਰਸ਼, 312 ਔਰਤਾਂ ਅਤੇ ਦੋ ਟਰਾਂਸਜੈਂਡਰ ਉਮੀਦਵਾਰ ਹਨ। ਪਾਕਿਸਤਾਨ ਵਿੱਚ 12.85 ਕਰੋੜ ਵੋਟਰ ਨਵੀਂ ਸਰਕਾਰ ਦੀ ਚੋਣ ਕਰਨਗੇ। ਇਸ ਦੇ ਲਈ ਤਿੰਨ ਪਾਰਟੀਆਂ ਪੀਟੀਆਈ, ਪੀਐਮਐਨ-ਐਲ ਅਤੇ ਪਾਕਿਸਤਾਨ ਪੀਪਲਜ਼ ਪਾਰਟੀ ਵਿਚਾਲੇ ਜ਼ਬਰਦਸਤ ਮੁਕਾਬਲਾ ਹੈ।
ਆਮ ਚੋਣਾਂ ਲਈ 9,07,675 ਪੋਲਿੰਗ ਸਟੇਸ਼ਨ ਬਣਾਏ ਗਏ ਹਨ। ਪਾਕਿਸਤਾਨ ਵਿੱਚ ਆਮ ਚੋਣਾਂ ਲਈ ਸਖ਼ਤ ਸੁਰੱਖਿਆ ਪ੍ਰਬੰਧ ਕੀਤੇ ਗਏ ਹਨ। ਸਾਢੇ ਛੇ ਲੱਖ ਸੁਰੱਖਿਆ ਮੁਲਾਜ਼ਮ ਤਾਇਨਾਤ ਕੀਤੇ ਗਏ ਹਨ। ਇਸ ਚੋਣ 'ਚ ਨਵਾਜ਼ ਸ਼ਰੀਫ ਦੀ ਨਜ਼ਰ ਰਿਕਾਰਡ ਚੌਥੀ ਵਾਰ ਪ੍ਰਧਾਨ ਮੰਤਰੀ ਬਣਨ 'ਤੇ ਹੋਵੇਗੀ। ਇਸ ਦੇ ਨਾਲ ਹੀ ਪੀਪੀਪੀ ਤੋਂ ਬਿਲਾਵਲ ਭੁੱਟੋ-ਜ਼ਰਦਾਰੀ ਪ੍ਰਧਾਨ ਮੰਤਰੀ ਅਹੁਦੇ ਦਾ ਚਿਹਰਾ ਹਨ। ਤੁਹਾਨੂੰ ਦੱਸ ਦੇਈਏ ਕਿ ਪਾਕਿਸਤਾਨ ਨੈਸ਼ਨਲ ਅਸੈਂਬਲੀ ਵਿੱਚ ਕੁੱਲ 336 ਸੀਟਾਂ ਹਨ, ਜਿਨ੍ਹਾਂ ਵਿੱਚੋਂ ਸਿਰਫ਼ 266 ਸੀਟਾਂ 'ਤੇ ਹੀ ਵੋਟਿੰਗ ਹੁੰਦੀ ਹੈ। ਬਹੁਮਤ ਦਾ ਅੰਕੜਾ 169 ਹੈ। 60 ਸੀਟਾਂ ਔਰਤਾਂ ਲਈ ਅਤੇ 10 ਸੀਟਾਂ ਗੈਰ-ਮੁਸਲਿਮ ਲਈ ਰਾਖਵੀਆਂ ਹਨ। ਪੰਜਾਬ ਸੂਬੇ ਵਿੱਚ ਸਭ ਤੋਂ ਵੱਧ 141 ਸੀਟਾਂ, ਸਿੰਧ ਵਿੱਚ 61, ਖੈਬਰ ਪਖਤੂਨਖਵਾ ਵਿੱਚ 45, ਬਲੋਚਿਸਤਾਨ ਵਿੱਚ 16 ਅਤੇ ਇਸਲਾਮਾਬਾਦ ਵਿੱਚ ਤਿੰਨ ਸੀਟਾਂ ਹਨ।
ਇਸ ਚੋਣ ਵਿੱਚ 12.85 ਕਰੋੜ ਤੋਂ ਵੱਧ ਰਜਿਸਟਰਡ ਵੋਟਰ ਵੋਟ ਪਾਉਣਗੇ। ਇਸ ਦੇ ਲਈ ਪਾਕਿਸਤਾਨ ਦੇ ਚੋਣ ਕਮਿਸ਼ਨ ਨੇ ਦੇਸ਼ ਭਰ ਵਿੱਚ 9,07,675 ਪੋਲਿੰਗ ਸਟੇਸ਼ਨ ਸਥਾਪਿਤ ਕੀਤੇ ਹਨ। ਇਸ ਦੇ ਨਾਲ ਹੀ 44,000 ਪੋਲਿੰਗ ਸਟੇਸ਼ਨ ਆਮ ਹਨ ਜਦਕਿ 29,985 ਸੰਵੇਦਨਸ਼ੀਲ ਅਤੇ 16,766 ਅਤਿ ਸੰਵੇਦਨਸ਼ੀਲ ਐਲਾਨੇ ਗਏ ਹਨ।
ਇਮਰਾਨ ਖਾਨ ਇਸ ਸਮੇਂ ਜੇਲ੍ਹ ਵਿੱਚ ਹਨ। ਉਹ ਜੇਲ੍ਹ ਤੋਂ ਹੀ ਚੋਣ ਲੜ ਰਹੇ ਹਨ। ਅਪ੍ਰੈਲ 2022 ਤੋਂ ਬਾਅਦ ਉਹ ਲਗਾਤਾਰ ਪਾਕਿਸਤਾਨ 'ਚ ਫੌਜ ਖਿਲਾਫ ਮੁਹਿੰਮ ਚਲਾ ਰਹੇ ਹਨ। ਉਹ ਪਿਛਲੇ ਸਾਲ ਸਤੰਬਰ ਤੋਂ ਲਗਾਤਾਰ ਜੇਲ੍ਹ ਵਿੱਚ ਹਨ। ਇਮਰਾਨ ਖਾਨ ਖਿਲਾਫ ਕਈ ਮਾਮਲੇ ਦਰਜ ਹਨ। ਦੂਜੇ ਪਾਸੇ ਨਵਾਜ਼ ਸ਼ਰੀਫ਼ ਹਨ ਜੋ ਤਿੰਨ ਵਾਰ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਰਹਿ ਚੁੱਕੇ ਹਨ। ਉਨ੍ਹਾਂ 'ਤੇ ਵੀ ਕਈ ਕੇਸ ਦਰਜ ਹਨ। ਪਿਛਲੀ ਸਰਕਾਰ ਉਨ੍ਹਾਂ ਦੇ ਛੋਟੇ ਭਰਾ ਸ਼ਾਹਬਾਜ਼ ਸ਼ਰੀਫ ਦੁਆਰਾ ਚਲਾਈ ਗਈ ਸੀ।
ਓਥੇ ਹੀ, ਚੋਣਾਂ ਵਿਚਕਾਰ, ਹਿੰਸਾ ਦੇ ਖਦਸੇ ਦੇ ਚਲਦਿਆਂ, ਮੋਬਾਈਲ ਸੇਵਾਵਾਂ ਅਸਥਾਈ ਤੌਰ ਤੇ ਬੰਦ ਕਰ ਦਿੱਤੀਆਂ ਗਈਆਂ ਹਨ।