ਜਥੇਦਾਰ ਗੜਗੱਜ ਨੇ ਸਿੱਖ ਆਬਾਦੀ ਘਟਣ ’ਤੇ ਵਿਅਕਤ ਕੀਤੀ ਚਿੰਤਾ.....ਪੜ੍ਹੋ ਕੀ ਕਿਹਾ..

ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਗਿਆਨੀ ਕੁਲਦੀਪ ਸਿੰਘ ਗੜਗੱਜ ਨੇ ਗੁਰਦੁਆਰਾ ਚਰਨ ਕਮਲ ਵਿਖੇ ਸੰਗਤ ਨੂੰ ਸੰਬੋਧਨ ਕਰਦੇ ਹੋਏ ਸਿੱਖ ਭਾਈਚਾਰੇ ਦੀ ਘਟ ਰਹੀ ਗਿਣਤੀ 'ਤੇ ਗੰਭੀਰ ਚਿੰਤਾ ਜਤਾਈ। ਉਨ੍ਹਾਂ ਸਿੱਖ ਪਰਿਵਾਰਾਂ ਨੂੰ ਘੱਟੋ-ਘੱਟ ਤਿੰਨ ਬੱਚੇ ਪੈਦਾ ਕਰਨ ਦੀ ਸਲਾਹ ਦਿੱਤੀ, ਤਾਂ ਜੋ ਆਉਣ ਵਾਲੀ ਪੀੜੀ ਵਿੱਚ ਸਿੱਖ ਵਿਰਸਾ ਅਤੇ ਸੰਸਕਾਰ ਕਾਇਮ ਰਹਿ ਸਕਣ। ਸਿੱਖ ਪਰਿਵਾਰ ਵਧਣੇ ਲਾਜ਼ਮੀ ਹਨ। 

ਉਨ੍ਹਾਂ ਮਾਪਿਆਂ ਨੂੰ ਆਪਣੇ ਬੱਚਿਆਂ ਨੂੰ ਗੁਰੂ ਸਾਹਿਬਾਨ ਦੀਆਂ ਸਾਖੀਆਂ ਅਤੇ ਗੁਰਬਾਣੀ ਨਾਲ ਜੋੜਨ ਦੀ ਅਪੀਲ ਕੀਤੀ, ਤਾਂ ਜੋ ਨੌਜਵਾਨ ਪੀੜੀ ਧਾਰਮਿਕ ਅਤੇ ਸਾਂਸਕ੍ਰਿਤਕ ਰੂਪ ਵਿੱਚ ਮਜ਼ਬੂਤ ਬਣ ਸਕੇ।

ਜਥੇਦਾਰ ਨੇ ਪੰਜਾਬ ਅਤੇ ਹਰਿਆਣਾ ਵਿਚਾਲੇ ਪਾਣੀ ਵਿਵਾਦ 'ਤੇ ਵੀ ਤਿੱਖੀ ਪ੍ਰਤਿਕ੍ਰਿਆ ਦਿੱਤੀ। ਉਨ੍ਹਾਂ ਕਿਹਾ ਕਿ ਪੰਜਾਬ, ਜੋ ਪੰਜ ਦਰਿਆਵਾਂ ਦੀ ਧਰਤੀ ਸੀ, ਰਾਜਨੀਤਿਕ ਅਣਸੁਝਾਵੇ ਕਾਰਨਾਂ ਕਰਕੇ ਆਪਣਾ ਪਾਣੀ ਖੋ ਰਿਹਾ ਹੈ। ਉਨ੍ਹਾਂ ਵਾਅਦਾ ਕੀਤਾ ਕਿ ਪੰਜਾਬ ਦੇ ਹੱਕਾਂ ਦੀ ਰਾਖੀ ਲਈ ਹਮੇਸ਼ਾ ਅੱਗੇ ਆਉਣਗੇ।

ਜਥੇਦਾਰ ਨੇ ਸਿੱਖ ਪਰੰਪਰਾਵਾਂ ਦੀ ਮਿਸਾਲ ਦਿੰਦਿਆਂ ਕਿਹਾ ਕਿ ਜਿਵੇਂ ਭਾਈ ਘਨੱਈਆ ਜੀ ਨੇ ਸਾਰਿਆਂ ਨੂੰ ਪਾਣੀ ਪਿਲਾਇਆ, ਅਜੇ ਵੀ ਸਿੱਖ ਸਾਧ ਸੰਗਤ ਭਾਵਨਾ ਨਾਲ ਸਭ ਲਈ ਖੜੀ ਹੈ। ਪਰ ਜੇਕਰ ਕੋਈ ਧੱਕੇ ਨਾਲ ਹੱਕ ਖੋਹਣ ਦੀ ਕੋਸ਼ਿਸ਼ ਕਰੇ, ਤਾਂ ਭਾਈ ਬਚਿੱਤਰ ਸਿੰਘ ਵਾਲੀ ਨਿਸ਼ਚੇ ਭਰੀ ਸੋਚ ਅਪਣਾਈ ਜਾਵੇਗੀ।