ਬਾਲੀਵੁੱਡ ਸਟਾਰ ਟਾਈਗਰ ਸ਼੍ਰੌਫ 'ਤੇ ਹਮਲਾ: ਦਿੱਲੀ ਤੋਂ ਫੜੀਆਂ ਗਈਆਂ ਦੋਵੇਂ ਕੁੜੀਆਂ, ਲਾਰੈਂਸ ਗੈਂਗ ਦਾ ਖ਼ਤਰਨਾਕ ਨੈੱਟਵਰਕ ਬੇਨਕਾਬ

ਬਾਲੀਵੁੱਡ ਦੇ ਮਸ਼ਹੂਰ ਐਕਸ਼ਨ ਹੀਰੋ ਟਾਈਗਰ ਸ਼੍ਰੌਫ ਨੂੰ ਜਾਨੋਂ ਮਾਰਨ ਦੀ ਸਾਜ਼ਿਸ਼ ਦੇ ਮਾਮਲੇ ਵਿੱਚ ਜਾਂਚ ਏਜੰਸੀਆਂ ਨੇ ਵੱਡਾ ਐਕਸ਼ਨ ਲਿਆ ਹੈ। ਦਿੱਲੀ ਪੁਲਿਸ ਦੀ ਸਪੈਸ਼ਲ ਸੈੱਲ ਨੇ ਇਸ ਮਾਮਲੇ ਦੀ ਤਾਰ ਫਰੋਲਦਿਆਂ ਚਾਰ ਮੁੱਖ ਮੁਲਜ਼ਮਾਂ ਨੂੰ ਦਬੋਚ ਲਿਆ ਹੈ, ਜਿਨ੍ਹਾਂ ਵਿੱਚ ਦੋ ਨੌਜਵਾਨ ਔਰਤਾਂ ਵੀ ਸ਼ਾਮਲ ਹਨ। ਪੁਲਿਸ ਸੂਤਰਾਂ ਅਨੁਸਾਰ ਫੜੇ ਗਏ ਲੋਕਾਂ ਦੀ ਪਛਾਣ ਕੁਨਾਲ, ਸੁਮਿਤ, ਰਾਧਾ ਅਤੇ ਬਬੀਤਾ ਵਜੋਂ ਹੋਈ ਹੈ, ਜਿਨ੍ਹਾਂ ਨੂੰ ਹੁਣ ਮੁੰਬਈ ਪੁਲਿਸ ਦੇ ਹਵਾਲੇ ਕਰ ਦਿੱਤਾ ਗਿਆ ਹੈ।

ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਉੱਤਰ ਪ੍ਰਦੇਸ਼ ਦੀਆਂ ਰਹਿਣ ਵਾਲੀਆਂ ਰਾਧਾ ਅਤੇ ਬਬੀਤਾ ਦਾ ਨਾਂ ਕੁਖਿਆਤ ਲਾਰੈਂਸ ਬਿਸ਼ਨੋਈ ਗੈਂਗ ਦੀ ਗਨ-ਸਮਗਲਿੰਗ ਨਾਲ ਜੁੜਿਆ ਹੋਇਆ ਹੈ। ਇਹ ਦੋਵੇਂ ਗਿਰੋਹ ਲਈ ਹਥਿਆਰ ਇੱਧਰ-ਉੱਧਰ ਪਹੁੰਚਾਉਣ ਦਾ ਕੰਮ ਕਰਦੀਆਂ ਸਨ। ਇਨ੍ਹਾਂ ਦੋਵਾਂ ਨੇ ਹੀ ਮੁੰਬਈ ਦੇ ਭੀੜ-ਭੜੱਕੇ ਵਾਲੇ ਇਲਾਕੇ ਦਾਦਰ ਵਿਖੇ ਜਾ ਕੇ ਗੈਂਗ ਦੇ ਸ਼ੂਟਰਾਂ ਤੱਕ ਅਸਲੇ ਦੀ ਵੱਡੀ ਖੇਪ ਪਹੁੰਚਾਈ ਸੀ। ਦੂਜੇ ਪਾਸੇ, ਕੁਨਾਲ ਅਤੇ ਸੁਮਿਤ ਨੇ ਇਨ੍ਹਾਂ ਹਥਿਆਰਾਂ ਦਾ ਪ੍ਰਬੰਧ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਈ ਸੀ। ਦਿੱਲੀ ਪੁਲਿਸ ਨੇ ਇਨ੍ਹਾਂ ਚਾਰਾਂ ਨੂੰ ਗ੍ਰਿਫ਼ਤਾਰ ਕਰਨ ਤੋਂ ਬਾਅਦ ਅਦਾਲਤ ਵਿੱਚ ਪੇਸ਼ ਕੀਤਾ, ਜਿੱਥੋਂ ਮੁੰਬਈ ਪੁਲਿਸ ਨੂੰ ਇਨ੍ਹਾਂ ਦਾ ਤਿੰਨ ਦਿਨਾਂ ਦਾ ਟਰਾਂਜ਼ਿਟ ਰਿਮਾਂਡ ਮਿਲ ਗਿਆ ਹੈ।

ਜ਼ਿਕਰਯੋਗ ਹੈ ਕਿ ਪਿਛਲੇ ਐਤਵਾਰ ਸ਼ਾਮ ਜਦੋਂ ਅਦਾਕਾਰ ਜੈਕੀ ਸ਼੍ਰੌਫ ਦੇ ਪੁੱਤਰ ਟਾਈਗਰ ਸ਼੍ਰੌਫ ਮੁੰਬਈ ਦੇ ਜੁਹੂ ਵਿੱਚ ਫੁੱਟਬਾਲ ਖੇਡ ਕੇ ਆਪਣੀ ਬੀ.ਐੱਮ.ਡਬਲਯੂ. ਕਾਰ ਵਿੱਚ ਵਾਪਸ ਜਾ ਰਹੇ ਸਨ, ਤਾਂ ਗੇਟ ਬਾਹਰ ਖੜ੍ਹੇ ਪ੍ਰਸ਼ੰਸਕਾਂ ਦੀ ਭੀੜ ਵਿੱਚ ਘਾਤ ਲਾ ਕੇ ਬੈਠੇ ਹਮਲਾਵਰਾਂ ਨੇ ਗੱਡੀ 'ਤੇ ਅੰਨ੍ਹੇਵਾਹ ਫਾਇਰਿੰਗ ਕਰ ਦਿੱਤੀ। ਬਦਮਾਸ਼ਾਂ ਨੇ 6-7 ਗੋਲੀਆਂ ਚਲਾਈਆਂ। ਮੁੱਖ ਹਮਲਾਵਰ ਬਿਲਕੁਲ ਨੇੜਿਓਂ ਟਾਈਗਰ ਨੂੰ ਨਿਸ਼ਾਨਾ ਬਣਾ ਰਿਹਾ ਸੀ, ਪਰ ਐਨ ਮੌਕੇ 'ਤੇ ਉਸਦੀ ਬੰਦੂਕ ਜਾਮ ਹੋ ਗਈ, ਜਿਸ ਕਾਰਨ ਅਦਾਕਾਰ ਦੀ ਜਾਨ ਵਾਲ-ਵਾਲ ਬਚ ਗਈ। ਇਸ ਹਮਲੇ ਵਿੱਚ ਉਨ੍ਹਾਂ ਦਾ ਡਰਾਈਵਰ ਅਤੇ ਇੱਕ ਹੋਰ ਵਿਅਕਤੀ ਜ਼ਖ਼ਮੀ ਹੋ ਗਏ ਸਨ।

ਇਸ ਤੋਂ ਪਹਿਲਾਂ ਇਸ ਕੇਸ ਵਿੱਚ ਪੁਲਿਸ ਨੇ ਬਿਹਾਰ ਦੇ ਰਿਤਿਕ ਉਰਫ਼ ਰੋਸ਼ਨ (22) ਦੇ ਨਾਲ-ਨਾਲ ਹਰਿਆਣਾ ਦੇ ਰਿਹਾਨ (18) ਅਤੇ ਫੂਲ ਸਿੰਘ (18) ਨੂੰ ਰਾਜਸਥਾਨ ਦੇ ਕੋਟਾ ਤੋਂ ਉਸ ਸਮੇਂ ਦਬੋਚ ਲਿਆ ਸੀ ਜਦੋਂ ਉਹ ਨੇਪਾਲ ਸਰਹੱਦ ਵੱਲ ਭੱਜਣ ਦੀ ਤਾਕ ਵਿੱਚ ਸਨ। ਇਨ੍ਹਾਂ ਤਿੰਨਾਂ ਦਾ ਸਬੰਧ ਵੀ ਲਾਰੈਂਸ ਗੈਂਗ ਨਾਲ ਹੈ। ਇਸ ਗੈਂਗ ਨੇ ਹੀ ਇਸ ਜਾਨਲੇਵਾ ਹਮਲੇ ਦੀ ਜ਼ਿੰਮੇਵਾਰੀ ਲਈ ਹੈ। ਫਿਲਹਾਲ ਪੁਲਿਸ ਇਸ ਗੱਲ ਦੀ ਡੂੰਘਾਈ ਨਾਲ ਪੜਤਾਲ ਕਰ ਰਹੀ ਹੈ ਕਿ ਇਸ ਸਾਜ਼ਿਸ਼ ਦੇ ਪਿੱਛੇ ਅਸਲ ਮਕਸਦ ਕੀ ਸੀ।