ਅਮਰੀਕਾ 'ਚ ਹਿੰਦੂ ਸ਼ਰਧਾਲੂਆਂ 'ਤੇ ਅੱਤਵਾਦੀ ਹਮਲੇ ਦੀ ਕੋਸ਼ਿਸ਼ ਫੇਲ੍ਹ: ਗੋਲੀ ਨਾ ਚੱਲਣ ਕਾਰਨ ਬਚੀ ਸੈਂਕੜੇ ਲੋਕਾਂ ਦੀ ਜਾਨ

ਅਮਰੀਕਾ ਦੇ ਇਲੀਨੋਇਸ ਸੂਬੇ ਵਿੱਚ ਇੱਕ ਵੱਡਾ ਅੱਤਵਾਦੀ ਹਮਲਾ ਹੁੰਦੇ-ਹੁੰਦੇ ਬਚ ਗਿਆ। ਨਵਰਾਤਰੀ ਦੇ ਪਹਿਲੇ ਦਿਨ (11 ਅਕਤੂਬਰ 2026) ਔਰੋਰਾ ਇਲਾਕੇ ਦੇ ਸਭ ਤੋਂ ਵੱਡੇ ਹਿੰਦੂ ਮੰਦਰ ਵਿੱਚ ਵੱਡੇ ਪੱਧਰ 'ਤੇ ਕਤਲੇਆਮ ਕਰਨ ਦੀ ਸਾਜ਼ਿਸ਼ ਰਚੀ ਗਈ ਸੀ। 19 ਸਾਲਾ ਨੌਜਵਾਨ ਐਲੇਕਜ਼ੈਂਡਰੋਸ ਪੈਪੋਰਾਕਿਸ ਭਾਰੀ ਹਥਿਆਰਾਂ ਨਾਲ ਲੈਸ ਹੋ ਕੇ ਮੰਦਰ ਪਹੁੰਚਿਆ ਸੀ, ਪਰ ਐਨ ਮੌਕੇ 'ਤੇ ਉਸ ਦੀ ਬੰਦੂਕ ਜਾਮ ਹੋਣ ਕਾਰਨ ਹਜ਼ਾਰਾਂ ਸ਼ਰਧਾਲੂਆਂ ਦੀ ਜਾਨ ਬਚ ਗਈ।

ਘਟਨਾ ਵਾਲੇ ਦਿਨ ਮੰਦਰ ਦੇ ਅੰਦਰ ਨਵਰਾਤਰੀ ਦੇ ਪਹਿਲੇ ਦਿਨ ਦਾ ਭਾਰੀ ਇਕੱਠ ਸੀ ਅਤੇ ਸ਼ਰਧਾਲੂ ਪੂਜਾ ਵਿੱਚ ਲੀਨ ਸਨ। ਮੁਲਜ਼ਮ ਐਲੇਕਜ਼ੈਂਡਰੋਸ ਪੈਪੋਰਾਕਿਸ, ਜੋ ਕਿ ਪੈਲੇਟਾਈਨ ਦਾ ਰਹਿਣ ਵਾਲਾ ਹੈ ਅਤੇ ਇੱਕ ਫਾਸਟ-ਫੂਡ ਰੈਸਟੋਰੈਂਟ (ਟਾਕੋ ਬੈੱਲ) ਵਿੱਚ ਕੈਸ਼ੀਅਰ ਵਜੋਂ ਕੰਮ ਕਰਦਾ ਹੈ, ਆਪਣੀ ਮਾਂ ਦੇ ਘਰੋਂ ਗੱਡੀ ਚਲਾ ਕੇ ਔਰੋਰਾ ਮੰਦਰ ਪਹੁੰਚਿਆ ਸੀ। ਉਸ ਕੋਲ ਇੱਕ ਮੋਡੀਫਾਈਡ AR-ਸਟਾਈਲ ਰਾਈਫਲ, 300 ਰਾਊਂਡ ਗੋਲੀਆਂ (ਜਿਨ੍ਹਾਂ ਨਾਲ ਦਸ ਮੈਗਜ਼ੀਨਾਂ ਭਰੀਆਂ ਜਾ ਸਕਦੀਆਂ ਸਨ), ਬਾਡੀ ਆਰਮਰ (ਸੁਰੱਖਿਆ ਕਵਚ) ਅਤੇ ਗੈਸੋਲੀਨ ਦੇ ਕੈਨ ਮੌਜੂਦ ਸਨ।

ਪੁਲਿਸ ਮੁਤਾਬਕ ਜਦੋਂ ਉਸ ਨੇ ਮੰਦਰ ਵਿੱਚ ਦਾਖ਼ਲ ਹੋ ਕੇ ਟ੍ਰਿਗਰ ਦਬਾਇਆ, ਤਾਂ ਹਥਿਆਰ ਤਕਨੀਕੀ ਤੌਰ 'ਤੇ ਜਾਮ ਹੋ ਗਿਆ। ਗੋਲੀ ਨਾ ਚੱਲਣ ਕਾਰਨ ਨਿਰਾਸ਼ ਹੋ ਕੇ ਉਹ ਵਾਪਸ ਆਪਣੇ ਘਰ ਪਰਤ ਗਿਆ।

ਮੈਨੀਫੈਸਟੋ ਤੋਂ ਹੋਇਆ ਹੈਰਾਨ ਕਰਨ ਵਾਲਾ ਖੁਲਾਸਾ

ਘਟਨਾ ਤੋਂ ਬਾਅਦ ਜਦੋਂ ਪੈਲੇਟਾਈਨ ਪੁਲਿਸ ਦੇ ਜਾਸੂਸਾਂ ਨੇ ਜਾਂਚ ਕੀਤੀ, ਤਾਂ ਉਨ੍ਹਾਂ ਨੂੰ ਮੁਲਜ਼ਮ ਦੇ ਇਲੈਕਟ੍ਰਾਨਿਕ ਸੁਨੇਹੇ ਅਤੇ ਇੱਕ ਦਸਤਾਵੇਜ਼ ਮਿਲਿਆ ਜਿਸ ਦਾ ਸਿਰਲੇਖ "Why I Fought: A.K.A. (Aurora shooters manifesto)" ਸੀ। ਇਸ ਮੈਨੀਫੈਸਟੋ ਵਿੱਚ ਅਸ਼ਵੈਤ ਲੋਕਾਂ ਪ੍ਰਤੀ ਨਫ਼ਰਤ ਅਤੇ ਦੱਖਣੀ ਏਸ਼ੀਆਈ ਖ਼ਾਸ ਕਰਕੇ ਭਾਰਤੀ ਮੂਲ ਦੇ ਲੋਕਾਂ ਵਿਰੁੱਧ ਹਿੰਸਾ ਫੈਲਾਉਣ ਦੀ ਕੱਟੜਪੰਥੀ ਸੋਚ ਸਾਫ਼ ਜ਼ਾਹਰ ਹੁੰਦੀ ਹੈ। ਘਰ ਪਰਤਣ ਤੋਂ ਬਾਅਦ ਉਸ ਨੇ ਇੰਟਰਨੈੱਟ 'ਤੇ ਬੰਦੂਕ ਠੀਕ ਕਰਨ ਦੇ ਤਰੀਕੇ ਵੀ ਖੋਜੇ ਸਨ ਅਤੇ ਆਪਣੇ ਇੱਕ ਸਹਿਕਰਮੀ ਨੂੰ ਫ਼ੋਨ ਕਰਕੇ ਆਪਣੀ ਸਾਜ਼ਿਸ਼ ਬਾਰੇ ਦੱਸਿਆ ਸੀ।

ਪੈਲੇਟਾਈਨ ਅਤੇ ਮਾਊਂਟ ਪ੍ਰਾਸਪੈਕਟ ਪੁਲਿਸ ਵਿਭਾਗਾਂ ਦੀ ਤੁਰੰਤ ਸੂਚਨਾ ਸਾਂਝੀ ਕਰਨ ਅਤੇ ਮੁਲਜ਼ਮ ਦੀ ਪਛਾਣ ਕਰਨ ਦੀ ਤੇਜ਼ ਕਾਰਵਾਈ ਕਾਰਨ ਉਸ ਨੂੰ ਤੁਰੰਤ ਹਿਰਾਸਤ ਵਿੱਚ ਲੈ ਲਿਆ ਗਿਆ। ਪੁਲਿਸ ਮੁਖੀ ਵਿਲੀਅਮ ਨੌਰਡ ਨੇ ਕਿਹਾ ਕਿ ਇਸ ਖ਼ਤਰੇ ਦੀ ਗੰਭੀਰਤਾ ਨੂੰ ਨਜ਼ਰਅੰਦਾਜ਼ ਨਹੀਂ ਕੀਤਾ ਜਾ ਸਕਦਾ। ਇਸ ਦੇ ਨਾਲ ਹੀ, FBI ਸ਼ਿਕਾਗੋ ਦੇ ਇੰਚਾਰਜ ਵਿਸ਼ੇਸ਼ ਏਜੰਟ ਰਿਆਨ ਵ੍ਹੇਲਨ ਨੇ ਦੱਸਿਆ ਕਿ ਏਜੰਸੀ ਕੱਟੜਪੰਥੀ ਵਿਚਾਰਧਾਰਾਵਾਂ ਨੂੰ ਖ਼ਤਮ ਕਰਨ ਲਈ ਸਥਾਨਕ ਪ੍ਰਸ਼ਾਸਨ ਨਾਲ ਮਿਲ ਕੇ ਕੰਮ ਕਰ ਰਹੀ ਹੈ।

ਹਿੰਦੂ ਅਮਰੀਕਨ ਫਾਊਂਡੇਸ਼ਨ ਨੇ ਇਸ ਮਾਮਲੇ 'ਤੇ ਸਖ਼ਤ ਪ੍ਰਤੀਕਿਰਿਆ ਦਿੰਦਿਆਂ ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਦੀ ਤੁਰੰਤ ਕਾਰਵਾਈ ਦੀ ਸ਼ਲਾਘਾ ਕੀਤੀ ਹੈ ਅਤੇ ਭਾਈਚਾਰੇ ਨੂੰ ਸੁਚੇਤ ਰਹਿਣ ਦੀ ਅਪੀਲ ਕੀਤੀ ਹੈ।