ਰੋਪੜ ’ਚ 108 ਐਂਬੂਲੈਂਸ ਨੇ ਇੱਕ ਸਾਲ ’ਚ ਸੰਭਾਲੇ 6142 ਐਮਰਜੈਂਸੀ ਕੇਸ, ਮੈਡੀਕਲ ਮਾਮਲੇ ਸਭ ਤੋਂ ਵੱਧ

ਰੋਪੜ ਜ਼ਿਲ੍ਹੇ ਵਿੱਚ ਐਮਰਜੈਂਸੀ ਸੇਵਾਵਾਂ ਲਈ 108 ਐਂਬੂਲੈਂਸ ਨੇ ਪਿਛਲੇ ਇੱਕ ਸਾਲ ਦੌਰਾਨ ਅਹਿਮ ਭੂਮਿਕਾ ਨਿਭਾਈ ਹੈ। ਸਤੰਬਰ 2025 ਤੋਂ ਅਗਸਤ 2026 ਤੱਕ ਜ਼ਿਲ੍ਹੇ ਵਿੱਚ ਕੁੱਲ 6142 ਐਮਰਜੈਂਸੀ ਮਾਮਲਿਆਂ ਵਿੱਚ 108 ਐਂਬੂਲੈਂਸ ਰਾਹੀਂ ਤੁਰੰਤ ਸਹਾਇਤਾ ਪਹੁੰਚਾਈ ਗਈ। ਇਨ੍ਹਾਂ ਵਿੱਚ ਮੈਡੀਕਲ ਐਮਰਜੈਂਸੀ, ਗਰਭ ਅਵਸਥਾ ਨਾਲ ਜੁੜੇ ਮਾਮਲੇ, ਦਿਲ ਦੀਆਂ ਐਮਰਜੈਂਸੀਆਂ, ਸੜਕ ਹਾਦਸੇ ਅਤੇ ਹੋਰ ਕੇਸ ਸ਼ਾਮਲ ਹਨ।

ਅੰਕੜਿਆਂ ਮੁਤਾਬਕ ਸਭ ਤੋਂ ਵੱਧ 2449 ਮੈਡੀਕਲ ਐਮਰਜੈਂਸੀ ਦੇ ਮਾਮਲੇ ਸਾਹਮਣੇ ਆਏ। ਇਸ ਤੋਂ ਇਲਾਵਾ 1204 ਗਰਭ ਅਵਸਥਾ ਨਾਲ ਸਬੰਧਤ ਐਮਰਜੈਂਸੀ ਮਾਮਲਿਆਂ, 1013 ਦਿਲ ਦੀਆਂ ਐਮਰਜੈਂਸੀਆਂ ਅਤੇ 919 ਸੜਕ ਹਾਦਸਿਆਂ ਵਿੱਚ ਐਂਬੂਲੈਂਸ ਸੇਵਾ ਨੇ ਮਦਦ ਮੁਹੱਈਆ ਕਰਵਾਈ। ਹੋਰ ਕਿਸਮ ਦੇ 557 ਐਮਰਜੈਂਸੀ ਮਾਮਲਿਆਂ ਵਿੱਚ ਵੀ ਸੇਵਾ ਦਿੱਤੀ ਗਈ।

ਮਹੀਨਾਵਾਰ ਅੰਕੜਿਆਂ ’ਤੇ ਨਜ਼ਰ ਮਾਰੀਏ ਤਾਂ ਨਵੰਬਰ 2025 ਵਿੱਚ ਸਭ ਤੋਂ ਵੱਧ 595 ਮਾਮਲੇ ਦਰਜ ਹੋਏ। ਇਸ ਤੋਂ ਬਾਅਦ ਅਗਸਤ 2026 ਵਿੱਚ 587 ਅਤੇ ਸਤੰਬਰ 2025 ਵਿੱਚ 561 ਮਾਮਲਿਆਂ ਵਿੱਚ 108 ਐਂਬੂਲੈਂਸ ਨੇ ਸਹਾਇਤਾ ਕੀਤੀ। ਅਕਤੂਬਰ ਵਿੱਚ 528, ਦਸੰਬਰ ਵਿੱਚ 431, ਜਨਵਰੀ 2026 ਵਿੱਚ 462, ਫਰਵਰੀ ਵਿੱਚ 451, ਮਾਰਚ ਵਿੱਚ 451, ਅਪ੍ਰੈਲ ਵਿੱਚ 550, ਮਈ ਵਿੱਚ 498, ਜੂਨ ਵਿੱਚ 489 ਅਤੇ ਜੁਲਾਈ ਵਿੱਚ 539 ਮਾਮਲੇ ਦਰਜ ਕੀਤੇ ਗਏ।

ਗਰਭ ਅਵਸਥਾ ਨਾਲ ਸਬੰਧਤ ਐਮਰਜੈਂਸੀ ਦੌਰਾਨ ਵੀ 108 ਸੇਵਾ ਨੇ ਆਪਣੀ ਭੂਮਿਕਾ ਨਿਭਾਈ। ਇੱਕ ਸਾਲ ਦੇ ਸਮੇਂ ਵਿੱਚ 108 ਐਂਬੂਲੈਂਸਾਂ ਵਿੱਚ ਕੁੱਲ 3 ਜਣੇਪੇ ਵੀ ਹੋਏ। ਇਨ੍ਹਾਂ ਵਿੱਚ ਸਤੰਬਰ 2025, ਅਕਤੂਬਰ 2025 ਅਤੇ ਫਰਵਰੀ 2026 ਦਾ ਇੱਕ-ਇੱਕ ਮਾਮਲਾ ਸ਼ਾਮਲ ਹੈ।

108 ਐਂਬੂਲੈਂਸ ਪ੍ਰੋਜੈਕਟ ਦੇ ਮੁਖੀ ਮਨੀਸ਼ ਬੱਤਰਾ ਨੇ ਕਿਹਾ ਕਿ ਐਮਰਜੈਂਸੀ ਦੀ ਸਥਿਤੀ ਵਿੱਚ ਹਰ ਪਲ ਕੀਮਤੀ ਹੁੰਦਾ ਹੈ। ਉਨ੍ਹਾਂ ਕਿਹਾ ਕਿ ਰੋਪੜ ਵਿੱਚ 6142 ਮਾਮਲਿਆਂ ਤੱਕ ਸਮੇਂ ਸਿਰ ਸਹਾਇਤਾ ਪਹੁੰਚਾਉਣਾ ਲੋਕਾਂ ਨੂੰ ਲੋੜ ਦੀ ਘੜੀ ਵਿੱਚ ਤੇਜ਼ ਅਤੇ ਭਰੋਸੇਮੰਦ ਐਮਰਜੈਂਸੀ ਸੇਵਾ ਦੇਣ ਦੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ।

ਇੱਕ ਸਾਲ ਦੇ ਇਹ ਅੰਕੜੇ ਦਰਸਾਉਂਦੇ ਹਨ ਕਿ ਰੋਪੜ ਜ਼ਿਲ੍ਹੇ ਵਿੱਚ ਮੈਡੀਕਲ ਐਮਰਜੈਂਸੀ, ਦਿਲ ਨਾਲ ਸਬੰਧਤ ਸਮੱਸਿਆਵਾਂ, ਗਰਭ ਅਵਸਥਾ ਅਤੇ ਸੜਕ ਹਾਦਸਿਆਂ ਵਰਗੀਆਂ ਸਥਿਤੀਆਂ ਵਿੱਚ 108 ਐਂਬੂਲੈਂਸ ਸੇਵਾ ਦੀ ਲਗਾਤਾਰ ਲੋੜ ਬਣੀ ਹੋਈ ਹੈ।