ਪੰਜਾਬ ਆਏ ਪੰਡਿਤ ਧੀਰੇਂਦਰ ਕ੍ਰਿਸ਼ਨ ਸ਼ਾਸਤਰੀ: ਗਲਾਡਾ ਗਰਾਊਂਡ 'ਚ ਸਜਿਆ 1 ਲੱਖ ਵਰਗ ਫੁੱਟ ਦਾ ਪੰਡਾਲ, ਰਾਜਪਾਲ ਤੇ ਸੀਐੱਮ ਸੈਣੀ ਵੀ ਭਰਨਗੇ ਹਾਜ਼ਰੀ

ਉਦਯੋਗਿਕ ਨਗਰੀ ਲੁਧਿਆਣਾ ਵਿੱਚ ਅਧਿਆਤਮਿਕਤਾ ਦਾ ਵੱਡਾ ਸਮਾਗਮ ਸ਼ੁਰੂ ਹੋਣ ਜਾ ਰਿਹਾ ਹੈ। ਬਾਗੇਸ਼ਵਰ ਧਾਮ ਸਰਕਾਰ ਦੇ ਮੁੱਖ ਸੰਚਾਲਕ ਪੰਡਿਤ ਧੀਰੇਂਦਰ ਕ੍ਰਿਸ਼ਨ ਸ਼ਾਸਤਰੀ ਸ਼ੁੱਕਰਵਾਰ ਦੇਰ ਰਾਤ ਲੁਧਿਆਣਾ ਪਹੁੰਚ ਗਏ, ਜਿੱਥੇ ਸ਼ਰਧਾਲੂਆਂ ਨੇ ਉਨ੍ਹਾਂ ਉੱਤੇ ਫੁੱਲਾਂ ਦੀ ਵਰਖਾ ਕਰ ਕੇ ਨਿੱਘਾ ਸਵਾਗਤ ਕੀਤਾ। 'ਮੰਗਲਮ ਵੈਲਫੇਅਰ ਐਂਡ ਚੈਰੀਟੇਬਲ ਸੋਸਾਇਟੀ' ਵੱਲੋਂ ਆਯੋਜਿਤ ਇਸ ਪੰਜ ਦਿਨਾਂ ਧਾਰਮਿਕ ਸਮਾਗਮ ਦੌਰਾਨ ਪੰਡਿਤ ਧੀਰੇਂਦਰ ਸ਼ਾਸਤਰੀ ਲੁਧਿਆਣਾ ਵਾਸੀਆਂ ਨੂੰ ਪਹਿਲੀ ਵਾਰ 'ਹਨੂੰਮਾਨ ਕਥਾ' ਸੁਣਾਉਣਗੇ। ਇਹ ਆਯੋਜਨ ਸ਼ਨੀਵਾਰ ਤੋਂ ਸ਼ੁਰੂ ਹੋ ਕੇ 30 ਸਤੰਬਰ ਤੱਕ ਚੱਲੇਗਾ।

ਇਸ ਅਧਿਆਤਮਿਕ ਆਯੋਜਨ ਵਿੱਚ ਕਈ ਵੱਡੀਆਂ ਸ਼ਖ਼ਸੀਅਤਾਂ ਵੀ ਸ਼ਿਰਕਤ ਕਰ ਰਹੀਆਂ ਹਨ। ਪੰਜਾਬ ਦੇ ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਅਤੇ ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਅੱਜ ਵਿਸ਼ੇਸ਼ ਤੌਰ 'ਤੇ ਕਥਾ ਵਿੱਚ ਹਾਜ਼ਰੀ ਲਗਵਾਉਣਗੇ। ਤੈਅ ਪ੍ਰੋਗਰਾਮ ਮੁਤਾਬਕ ਹਰਿਆਣਾ ਦੇ ਸੀਐੱਮ ਸੈਣੀ ਸ਼ਾਮ 5:15 ਵਜੇ ਲੁਧਿਆਣਾ ਪਹੁੰਚਣਗੇ ਅਤੇ ਕਥਾ 'ਚ ਸ਼ਾਮਲ ਹੋਣ ਉਪਰੰਤ ਸ਼ਾਮ 7 ਵਜੇ ਹਲਵਾਰਾ ਹਵਾਈ ਅੱਡੇ ਤੋਂ ਰਵਾਨਾ ਹੋਣਗੇ।

ਚੰਡੀਗੜ੍ਹ ਰੋਡ 'ਤੇ ਵਰਧਮਾਨ ਮਿੱਲ ਦੇ ਸਾਹਮਣੇ ਸਥਿਤ ਗਲਾਡਾ ਗਰਾਊਂਡ ਵਿਖੇ 1,00,000 ਵਰਗ ਫੁੱਟ ਦਾ ਇੱਕ ਬਹੁਤ ਵੱਡਾ ਪੰਡਾਲ ਤਿਆਰ ਕੀਤਾ ਗਿਆ ਹੈ, ਜਿਸ ਵਿੱਚ ਇੱਕ ਸਮੇਂ ਲਗਭਗ 70,000 ਲੋਕਾਂ ਦੇ ਬੈਠਣ ਦੀ ਸਮਰੱਥਾ ਹੈ। ਆਯੋਜਕ ਕਮੇਟੀ ਦੇ ਪ੍ਰਧਾਨ ਵਰਿੰਦਰ ਸਹਿਗਲ ਨੇ ਦੱਸਿਆ ਕਿ ਸ਼ਹਿਰ 'ਚ ਪਹਿਲੀ ਵਾਰ ਹੋ ਰਹੀ ਇਸ ਕਥਾ ਦੌਰਾਨ ਸ਼ਰਧਾਲੂਆਂ ਨੂੰ ਪ੍ਰਭੂ ਸ਼੍ਰੀ ਰਾਮ ਅਤੇ ਭਗਵਾਨ ਹਨੂੰਮਾਨ ਜੀ ਦੀ ਮਹਿਮਾ ਨਾਲ ਜੁੜਨ ਦਾ ਸੁਭਾਗ ਪ੍ਰਾਪਤ ਹੋਵੇਗਾ। 5 ਦਿਨਾਂ ਤੱਕ ਚੱਲਣ ਵਾਲੇ ਇਸ ਸਮਾਗਮ ਵਿੱਚ ਵਿਸ਼ੇਸ਼ ਪੂਜਾ, ਸ਼੍ਰੀ ਰਾਮ ਕਥਾ ਦੇ ਪ੍ਰਸੰਗ, ਧਾਰਮਿਕ ਅਨੁਸ਼ਠਾਨ ਅਤੇ ਇੱਕ ਵਿਸ਼ਾਲ 'ਦਿਵਿਆ ਦਰਬਾਰ' ਵੀ ਲਗਾਇਆ ਜਾਵੇਗਾ।

ਸਮਾਗਮ ਦੌਰਾਨ ਸੰਗਤ ਦੀ ਭਾਰੀ ਭੀੜ ਨੂੰ ਵੇਖਦਿਆਂ ਟ੍ਰੈਫਿਕ ਪੁਲਿਸ ਨੇ 26 ਸਤੰਬਰ ਤੋਂ 30 ਸਤੰਬਰ ਤੱਕ ਲਈ ਰੂਟ ਡਾਇਵਰਸ਼ਨ ਪਲਾਨ ਲਾਗੂ ਕੀਤਾ ਹੈ:

ਵਾਹਨਾਂ ਦਾ ਬਦਲਵਾਂ ਰੂਟ: ਸਮਰਾਲਾ ਚੌਂਕ ਤੋਂ ਆਮ ਟ੍ਰੈਫਿਕ ਨੂੰ ਟਰਾਂਸਪੋਰਟ ਨਗਰ ਕੱਟ ਅਤੇ ਹੀਰਾ ਨਗਰ ਵੱਲ ਮੋੜਿਆ ਗਿਆ ਹੈ। ਹੀਰਾ ਨਗਰ ਤੋਂ ਅੱਗੇ ਵਾਹਨ ਓਸਵਾਲ ਚੌਂਕ, ਸ਼ੇਰਪੁਰ ਚੌਂਕ ਅਤੇ ਗਿਆਸਪੁਰਾ ਚੌਂਕ ਰਾਹੀਂ ਜਾ ਸਕਣਗੇ।

ਜਮਾਲਪੁਰ ਤੇ ਕੋਹਾੜਾ: ਜਮਾਲਪੁਰ ਲਾਈਟਾਂ ਤੋਂ ਆਮ ਵਾਹਨਾਂ ਨੂੰ ਗਿਆਸਪੁਰਾ ਚੌਂਕ ਵੱਲ ਅਤੇ ਕੋਹਾੜਾ ਚੌਂਕ ਤੋਂ ਆਉਣ ਵਾਲੀ ਟ੍ਰੈਫਿਕ ਨੂੰ ਸਾਹਨੇਵਾਲ ਵੱਲ ਡਾਇਵਰਟ ਕੀਤਾ ਗਿਆ ਹੈ।

ਸਾਧਾਰਨ ਆਵਾਜਾਈ: ਸੰਜੇ ਗਾਂਧੀ ਕੱਟ, ਅੰਮ੍ਰਿਤ ਕੱਟ, ਕਾਂਡਾ ਕੱਟ, ਸੈਂਟਰਲ ਜੇਲ੍ਹ, ਕੀਰਤੀ ਚੌਂਕ, ਚੀਮਾ ਚੌਂਕ, ਢੋਲੇਵਾਲ ਚੌਂਕ, ਮੰਜੂ ਕੱਟ ਅਤੇ ਯਾਰਡ ਚੌਂਕ ਦੇ ਰਸਤਿਆਂ 'ਤੇ ਦੋਵੇਂ ਪਾਸੇ ਆਮ ਆਵਾਜਾਈ ਚੱਲਦੀ ਰਹੇਗੀ।

ਪਾਰਕਿੰਗ ਵਿਵਸਥਾ: ਸ਼ਰਧਾਲੂਆਂ ਲਈ 4 ਥਾਵਾਂ 'ਤੇ ਪਾਰਕਿੰਗ ਬਣਾਈ ਗਈ ਹੈ—ਜਿਸ ਵਿੱਚ ਗਲਾਡਾ ਗਰਾਊਂਡ, ਮੋਹਿਨੀ ਰਿਜ਼ੋਰਟ ਅਤੇ ਐਵਰੇਸਟ ਸਕੂਲ ਆਮ ਪਾਰਕਿੰਗ ਲਈ ਹੋਣਗੇ, ਜਦਕਿ 'ਸ਼੍ਰੀ ਰਾਮ ਦਰਬਾਰ' ਨੂੰ ਵੀਆਈਪੀ ਪਾਰਕਿੰਗ ਵਜੋਂ ਰਾਖਵਾਂ ਰੱਖਿਆ ਗਿਆ ਹੈ।