ਦਿੱਲੀ 'ਚ ਇਮਾਰਤ ਡਿੱਗਣ ਦੇ ਮਾਮਲੇ ਚ ਐਕਸ਼ਨ, ਪਤਨੀ ਤੇ ਬੇਟੇ ਨਾਲ ਬਿਲਡਿੰਗ ਦਾ ਮਾਲਕ ਗ੍ਰਿਫ਼ਤਾਰ

ਦਿੱਲੀ ਯੂਨੀਵਰਸਿਟੀ ਦੇ ਸਾਊਥ ਕੈਂਪਸ ਨੇੜੇ ਸਥਿਤ ਸਤਿਆ ਨਿਕੇਤਨ ਇਲਾਕੇ ਵਿੱਚ ਐਤਵਾਰ ਦੁਪਹਿਰ ਲਗਭਗ 1:30 ਵਜੇ ਇੱਕ 40 ਸਾਲ ਪੁਰਾਣੀ 5 ਮੰਜ਼ਿਲਾ PG ਬਿਲਡਿੰਗ ਅਚਾਨਕ ਤਾਸ ਦੇ ਪੱਤਿਆਂ ਵਾਂਗ ਢਹਿ-ਢੇਰੀ ਹੋ ਗਈ। ਇਸ ਭਿਆਨਕ ਹਾਦਸੇ ਵਿੱਚ ਹੁਣ ਤੱਕ 7 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ, ਜਦਕਿ 12 ਲੋਕਾਂ ਨੂੰ ਮਲਬੇ 'ਚੋਂ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ ਹੈ। ਹਾਦਸੇ 'ਚ ਗੰਭੀਰ ਰੂਪ 'ਚ ਜ਼ਖਮੀ ਹੋਏ 5 ਵਿਅਕਤੀਆਂ ਨੂੰ ਇਲਾਜ ਲਈ ਐਮਜ਼ (AIIMS) ਹਸਪਤਾਲ 'ਚ ਭਰਤੀ ਕਰਵਾਇਆ ਗਿਆ ਹੈ।

ਖੁਦਾਈ ਅਤੇ ਪਾਣੀ ਭਰਨ ਕਰਕੇ ਵਾਪਰਿਆ ਹਾਦਸਾ

ਸਥਾਨਕ ਲੋਕਾਂ ਮੁਤਾਬਕ ਇਮਾਰਤ ਦੇ ਬੇਸਮੈਂਟ ਵਿੱਚ ਪਿਛਲੇ 7 ਦਿਨਾਂ ਤੋਂ ਅਵੈਧ ਤੋੜ-ਫੋੜ ਅਤੇ ਖੁਦਾਈ ਦਾ ਕੰਮ ਚੱਲ ਰਿਹਾ ਸੀ। ਬੇਸਮੈਂਟ 'ਚ ਪਾਣੀ ਭਰੇ ਹੋਣ ਅਤੇ ਖੁਦਾਈ ਦੌਰਾਨ ਪਿਲਰ ਖਿਸਕਣ ਕਾਰਨ ਇਹ ਪੂਰੀ ਇਮਾਰਤ ਜ਼ਮੀਨਦੋਜ਼ ਹੋ ਗਈ। ਖ਼ਤਰੇ ਨੂੰ ਦੇਖਦਿਆਂ ਨਾਲ ਲੱਗਦੀ ਇੱਕ ਹੋਰ ਬਿਲਡਿੰਗ ਨੂੰ ਵੀ ਖਾਲੀ ਕਰਵਾ ਲਿਆ ਗਿਆ ਹੈ, ਕਿਉਂਕਿ ਹਾਦਸੇ ਦੇ ਝਟਕੇ ਨਾਲ ਉਸ ਵਿੱਚ ਵੀ ਵੱਡੀਆਂ ਦਰਾਰਾਂ ਆ ਗਈਆਂ ਹਨ।

ਬਿਲਡਿੰਗ ਮਾਲਕ ਸਮੇਤ ਪਰਿਵਾਰ ਗ੍ਰਿਫ਼ਤਾਰ

ਪੁਲਿਸ ਨੇ ਕਾਰਵਾਈ ਕਰਦੇ ਹੋਏ ਗੁਰੂਗ੍ਰਾਮ ਦੇ ਰਹਿਣ ਵਾਲੇ ਬਿਲਡਿੰਗ ਮਾਲਕ ਹਰੀਰਾਮ ਬੰਸਲ, ਉਸ ਦੀ ਪਤਨੀ ਅਤੇ ਬੇਟੇ ਖ਼ਿਲਾਫ਼ ਗੈਰ-ਇਰਾਦਤਨ ਹੱਤਿਆ ਅਤੇ ਲਾਪਰਵਾਹੀ ਦੀਆਂ ਧਾਰਾਵਾਂ ਤਹਿਤ ਕੇਸ ਦਰਜ ਕਰਕੇ ਤਿੰਨਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਅਦਾਲਤ ਨੇ ਮਾਲਕ ਹਰੀਰਾਮ ਅਤੇ ਉਸ ਦੀ ਪਤਨੀ ਨੂੰ 14 ਦਿਨਾਂ ਦੀ ਨਿਆਇਕ ਹਿਰਾਸਤ 'ਚ ਜੇਲ੍ਹ ਭੇਜ ਦਿੱਤਾ ਹੈ, ਜਦਕਿ ਉਸ ਦੇ ਬੇਟੇ ਨੂੰ 2 ਦਿਨ ਦੇ ਪੁਲਿਸ ਰਿਮਾਂਡ 'ਚ ਭੇਜਿਆ ਗਿਆ ਹੈ।

ਜ਼ਿੰਮੇਵਾਰ ਅਫ਼ਸਰਾਂ 'ਤੇ ਡਿੱਗੀ ਗਾਜ

ਘਟਨਾ ਤੋਂ ਬਾਅਦ ਪ੍ਰਸ਼ਾਸਨ ਪੂਰੀ ਤਰ੍ਹਾਂ ਹਰਕਤ ਵਿੱਚ ਆ ਗਿਆ ਹੈ। ਸਾਊਥ ਜ਼ੋਨ ਦੇ 5 ਵੱਡੇ ਅਧਿਕਾਰੀਆਂ ਨੂੰ ਤਰੁੰਤ ਪ੍ਰਭਾਵ ਨਾਲ ਸਸਪੈਂਡ ਕਰ ਦਿੱਤਾ ਗਿਆ ਹੈ:

ਡਿਪਟੀ ਕਮਿਸ਼ਨਰ (DC)

ਐਗਜ਼ਿਕਿਊਟਿਵ ਇੰਜੀਨੀਅਰ (XEN)

ਅਸਿਸਟੈਂਟ ਇੰਜੀਨੀਅਰ (AE)

ਜੂਨੀਅਰ ਇੰਜੀਨੀਅਰ (JE)

ਸਰਕਾਰ ਅਤੇ ਪ੍ਰਸ਼ਾਸਨ ਦੇ ਸਖ਼ਤ ਹੁਕਮ

ਦਿੱਲੀ ਦੀ ਮੁੱਖ ਮੰਤਰੀ ਰੇਖਾ ਗੁਪਤਾ ਨੇ ਘਟਨਾ ਦੀ ਮੈਜਿਸਟ੍ਰੇਟ ਜਾਂਚ ਦੇ ਹੁਕਮ ਦਿੱਤੇ ਹਨ। ਦੂਜੇ ਪਾਸੇ, ਮੇਅਰ ਪ੍ਰਵੇਸ਼ ਵਾਹੀ ਨੇ 4 ਮੰਜ਼ਿਲਾਂ ਤੋਂ ਵੱਧ ਬਣੀਆਂ ਸਾਰੀਆਂ ਅਵੈਧ ਇਮਾਰਤਾਂ ਨੂੰ ਸੀਲ ਕਰਨ ਅਤੇ ਦੋਸ਼ੀ ਅਧਿਕਾਰੀਆਂ ਨੂੰ ਨੌਕਰੀ ਤੋਂ ਬਰਖਾਸਤ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ।

ਦਿੱਲੀ 'ਚ ਚਿੰਤਾਜਨਕ ਅੰਕੜੇ

ਦਿੱਲੀ ਫਾਇਰ ਸਰਵਿਸ ਦੇ ਅੰਕੜਿਆਂ ਅਨੁਸਾਰ, ਪਿਛਲੇ 3 ਸਾਲਾਂ ਵਿੱਚ ਦਿੱਲੀ ਅੰਦਰ ਬਿਲਡਿੰਗ ਡਿੱਗਣ ਦੇ 1,133 ਮਾਮਲੇ ਸਾਹਮਣੇ ਆ ਚੁੱਕੇ ਹਨ, ਜਿਨ੍ਹਾਂ ਵਿੱਚ ਹੁਣ ਤੱਕ 98 ਲੋਕਾਂ ਦੀ ਜਾਨ ਜਾ ਚੁੱਕੀ ਹੈ। ਇਹ ਅੰਕੜਾ ਰਾਜਧਾਨੀ ਵਿੱਚ ਅਵੈਧ ਨਿਰਮਾਣਾਂ ਅਤੇ ਪ੍ਰਸ਼ਾਸਨਿਕ ਲਾਪਰਵਾਹੀ 'ਤੇ ਵੱਡੇ ਸਵਾਲ ਖੜ੍ਹੇ ਕਰਦਾ ਹੈ।