ਤਾਜਾ ਖਬਰਾਂ
ਜਾਣਕਾਰੀ ਮੁਤਾਬਕ ਇਹ ਸਿਖਲਾਈ ਅਭਿਆਸ 30 ਅਗਸਤ ਤੋਂ ਹਥਨੀਕੁੰਡ ਬੈਰਾਜ ’ਤੇ ਚੱਲ ਰਿਹਾ ਸੀ ਅਤੇ ਮੰਗਲਵਾਰ ਨੂੰ ਇਸ ਦਾ ਆਖਰੀ ਦਿਨ ਸੀ। ਸ਼ਾਮ ਕਰੀਬ 5 ਵਜੇ ਜਵਾਨਾਂ ਨੇ ਹੈਲੀਕਾਪਟਰ ਤੋਂ ਇੱਕ-ਇੱਕ ਕਰਕੇ ਯਮੁਨਾ ਵਿੱਚ ਮੌਜੂਦ ਮੋਟਰਬੋਟ ’ਤੇ ਛਾਲ ਮਾਰੀ। ਜਵਾਨਾਂ ਦੇ ਬੋਟ ਵਿੱਚ ਪਹੁੰਚਣ ਤੋਂ ਬਾਅਦ ਕਿਸ਼ਤੀ ਸਟਾਰਟ ਨਹੀਂ ਹੋ ਸਕੀ ਅਤੇ ਕੁਝ ਹੀ ਸਮੇਂ ਵਿੱਚ ਪਾਣੀ ਵਿੱਚ ਡੁੱਬਣ ਲੱਗ ਪਈ।
ਕਿਸ਼ਤੀ ਦੇ ਡੁੱਬਣ ਮਗਰੋਂ ਜਵਾਨਾਂ ਨੇ ਆਪਣੀ ਜਾਨ ਬਚਾਉਣ ਲਈ ਨਦੀ ਵਿੱਚ ਛਾਲ ਮਾਰ ਦਿੱਤੀ। ਯਮੁਨਾ ਵਿੱਚ ਪਾਣੀ ਦਾ ਵਹਾਅ ਕਾਫ਼ੀ ਤੇਜ਼ ਹੋਣ ਕਾਰਨ ਤਿੰਨ ਜਵਾਨ ਤੈਰਦੇ ਹੋਏ ਪੱਛਮੀ ਯਮੁਨਾ ਨਹਿਰ (WJC) ਦੇ ਗੇਟਾਂ ਵੱਲ ਵਧੇ। ਦੱਸਿਆ ਜਾ ਰਿਹਾ ਹੈ ਕਿ ਉਨ੍ਹਾਂ ਨੇ ਕਰੀਬ 600 ਮੀਟਰ ਤੱਕ ਤੈਰ ਕੇ ਨਹਿਰ ਦੇ ਗੇਟਾਂ ਤੱਕ ਪਹੁੰਚਣ ਵਿੱਚ ਸਫਲਤਾ ਹਾਸਲ ਕੀਤੀ।
ਹਾਲਾਂਕਿ ਚੌਥਾ ਜਵਾਨ ਤੇਜ਼ ਪਾਣੀ ਦੇ ਵਹਾਅ ਵਿੱਚ ਲਾਪਤਾ ਹੋ ਗਿਆ। ਉਸ ਦੀ ਭਾਲ ਲਈ ਫੌਜ ਵੱਲੋਂ ਤੁਰੰਤ ਰਾਹਤ ਅਤੇ ਬਚਾਅ ਮੁਹਿੰਮ ਸ਼ੁਰੂ ਕਰ ਦਿੱਤੀ ਗਈ ਹੈ। ਪ੍ਰਸ਼ਾਸਨ ਵੱਲੋਂ NDRF ਦੀ ਟੀਮ ਨੂੰ ਵੀ ਮੌਕੇ ’ਤੇ ਬੁਲਾਇਆ ਗਿਆ ਹੈ।
ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਹਰਿਆਣਾ ਅਤੇ ਉੱਤਰ ਪ੍ਰਦੇਸ਼ ਪੁਲਿਸ ਦੇ ਅਧਿਕਾਰੀ ਵੀ ਮੌਕੇ ’ਤੇ ਪਹੁੰਚ ਗਏ। ਕਰੀਬ 10 ਫੌਜੀ ਜਵਾਨਾਂ ਨੇ ਰੱਸੀਆਂ ਦੀ ਮਦਦ ਨਾਲ ਡੁੱਬੀ ਹੋਈ ਮੋਟਰਬੋਟ ਨੂੰ ਪਾਣੀ ਵਿੱਚੋਂ ਬਾਹਰ ਕੱਢ ਲਿਆ।
ਪ੍ਰਤਾਪਨਗਰ ਦੇ ਐਸਐਚਓ ਰੋਹਤਾਸ਼ ਸਿੰਘ ਮੁਤਾਬਕ, ਇਹ ਸਪੈਸ਼ਲ ਫੋਰਸਿਜ਼ ਦਾ ਸਿਖਲਾਈ ਅਭਿਆਸ ਸੀ, ਜੋ ਪਿਛਲੇ ਤਿੰਨ ਦਿਨਾਂ ਤੋਂ ਚੱਲ ਰਿਹਾ ਸੀ। ਘਟਨਾ ਸਬੰਧੀ ਸੀਨੀਅਰ ਅਧਿਕਾਰੀਆਂ ਨੂੰ ਜਾਣਕਾਰੀ ਦੇ ਦਿੱਤੀ ਗਈ ਹੈ।
ਦੱਸਿਆ ਗਿਆ ਹੈ ਕਿ ਹਾਦਸੇ ਤੋਂ ਇੱਕ ਦਿਨ ਪਹਿਲਾਂ ਹਥਨੀਕੁੰਡ ਵਿਖੇ ਯਮੁਨਾ ਦਾ ਪਾਣੀ ਦਾ ਪੱਧਰ ਕਰੀਬ 26,000 ਕਿਊਸਿਕ ਦਰਜ ਕੀਤਾ ਗਿਆ ਸੀ, ਜਦਕਿ ਪੱਛਮੀ ਯਮੁਨਾ ਨਹਿਰ ਵਿੱਚ ਲਗਭਗ 14,500 ਕਿਊਸਿਕ ਪਾਣੀ ਛੱਡਿਆ ਜਾ ਰਿਹਾ ਸੀ। ਤੇਜ਼ ਵਹਾਅ ਨੂੰ ਦੇਖਦਿਆਂ ਲਾਪਤਾ ਜਵਾਨ ਦੀ ਭਾਲ ਲਈ ਬਚਾਅ ਟੀਮਾਂ ਵੱਲੋਂ ਤਲਾਸ਼ੀ ਮੁਹਿੰਮ ਜਾਰੀ ਹੈ।
Get all latest content delivered to your email a few times a month.
