ਤਾਜਾ ਖਬਰਾਂ
ਪੰਚਕੂਲਾ ਦੇ ਕਸਬਾ ਪਿੰਜੌਰ 'ਚੋਂ ਵਗਦੀ ਕੌਸ਼ਲਿਆ ਨਦੀ 'ਚ ਐਤਵਾਰ ਨੂੰ ਉਸ ਵੇਲੇ ਹੜਕੰਪ ਮਚ ਗਿਆ, ਜਦੋਂ ਚੰਡੀਗੜ੍ਹ ਤੋਂ ਆਈ ਇੱਕ ਟੈਂਪੋ ਟ੍ਰੈਵਲਰ ਅਚਾਨਕ ਪਾਣੀ ਦੇ ਤੇਜ਼ ਵਹਾਅ ਦੀ ਚਪੇਟ 'ਚ ਆ ਗਈ। ਗੱਡੀ 'ਚ ਮਾਸੂਮ ਬੱਚਿਆਂ ਸਮੇਤ ਕਰੀਬ 10 ਤੋਂ 12 ਲੋਕ ਸਵਾਰ ਸਨ, ਜਿਨ੍ਹਾਂ ਦੀ ਜਾਨ ਆਫ਼ਤ 'ਚ ਫਸ ਗਈ। ਹਾਲਾਂਕਿ, ਮੌਕੇ 'ਤੇ ਪਹੁੰਚੀ ਪੁਲਿਸ ਅਤੇ ਰਾਹਤ ਟੀਮਾਂ ਦੀ ਮੁਸਤੈਦੀ ਨਾਲ ਸਾਰੇ ਲੋਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ, ਜਿਸ ਨਾਲ ਇੱਕ ਵੱਡੀ ਤ੍ਰਾਸਦੀ ਹੋਣੋਂ ਬਚ ਗਈ।
ਗੁਆਂਢੀ ਰਾਜ ਹਿਮਾਚਲ ਪ੍ਰਦੇਸ਼ 'ਚ ਹੋ ਰਹੀ ਲਗਾਤਾਰ ਭਾਰੀ ਬਾਰਿਸ਼ ਕਾਰਨ ਪਹਾੜੀ ਨਦੀਆਂ 'ਚ ਪਾਣੀ ਦਾ ਪੱਧਰ ਅਚਾਨਕ ਵਧ ਗਿਆ ਹੈ। ਜਾਣਕਾਰੀ ਅਨੁਸਾਰ ਚੰਡੀਗੜ੍ਹ ਤੋਂ ਆਇਆ ਪਰਿਵਾਰ ਕੌਸ਼ਲਿਆ ਨਦੀ ਦੇ ਸ਼ਿਵਲੋਤਰੀ ਖੇਤਰ ਵੱਲ ਗਿਆ ਹੋਇਆ ਸੀ। ਇਸੇ ਦੌਰਾਨ ਪਹਾੜਾਂ ਵੱਲੋਂ ਆਏ ਪਾਣੀ ਦੇ ਤੇਜ਼ ਵਹਾਅ ਨੇ ਟੈਂਪੋ ਟ੍ਰੈਵਲਰ ਨੂੰ ਘੇਰ ਲਿਆ। ਫਿਲਹਾਲ ਇਹ ਸਪੱਸ਼ਟ ਨਹੀਂ ਹੋ ਸਕਿਆ ਕਿ ਪਰਿਵਾਰ ਧਾਰਮਿਕ ਯਾਤਰਾ 'ਤੇ ਸੀ ਜਾਂ ਸੈਰ-ਸਪਾਟੇ ਲਈ ਆਇਆ ਸੀ।
ਹਾਦਸੇ ਦੀ ਖ਼ਬਰ ਮਿਲਦਿਆਂ ਹੀ ਪਿੰਜੌਰ ਥਾਣਾ ਪੁਲਿਸ, ਈ.ਆਰ.ਵੀ. (ERV) ਵਾਹਨ ਅਤੇ ਐਂਬੂਲੈਂਸਾਂ ਮੌਕੇ 'ਤੇ ਪਹੁੰਚ ਗਈਆਂ। ਜਵਾਨਾਂ ਨੇ ਬਿਨਾਂ ਸਮਾਂ ਗਵਾਏ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤਾ। ਕੁਝ ਯਾਤਰੀਆਂ ਨੂੰ ਪਾਣੀ 'ਚੋਂ ਲੰਘਾ ਕੇ ਅਤੇ ਬਾਕੀਆਂ ਨੂੰ ਦਮਦਮਾ ਪਿੰਡ ਦੇ ਪਹਾੜੀ ਰਸਤੇ ਰਾਹੀਂ ਪੈਦਲ ਹੀ ਉੱਚੀ ਥਾਂ 'ਤੇ ਪਹੁੰਚਾਇਆ ਗਿਆ। ਸਮੇਂ ਸਿਰ ਮਿਲੀ ਮਦਦ ਨਾਲ ਸਾਰੇ ਸ਼ਰਧਾਲੂਆਂ ਨੇ ਸੁੱਖ ਦਾ ਸਾਹ ਲਿਆ।
Get all latest content delivered to your email a few times a month.
