ਤਾਜਾ ਖਬਰਾਂ
ਇੰਡਸਟ੍ਰੀਅਲ ਏਰੀਆ ਫੇਜ਼-2 ਵਿੱਚ ਬੀਤੀ ਸ਼ਾਮ ਇੱਕ ਰੂਹ ਕੰਬਾਊ ਹਾਦਸਾ ਵਾਪਰਿਆ, ਜਿੱਥੇ ਇੱਕ ਕੰਪਨੀ ਦੀ ਤੀਜੀ ਮੰਜ਼ਿਲ 'ਤੇ ਭਾਰੀ ਜਨਰੇਟਰ ਚੜ੍ਹਾ ਰਹੀ ਕ੍ਰੇਨ ਅਚਾਨਕ ਬੇਕਾਬੂ ਹੋ ਕੇ ਪਲਟ ਗਈ। ਇਸ ਹਾਦਸੇ ਵਿੱਚ ਜਨਰੇਟਰ 'ਤੇ ਬੈਠੇ ਦੋ ਹੈਲਪਰ ਉੱਚਾਈ ਤੋਂ ਸਿੱਧੇ ਫਰਸ਼ 'ਤੇ ਆ ਡਿੱਗੇ, ਜਿਸ ਕਾਰਨ ਦੋਵਾਂ ਦੀ ਮੌਕੇ 'ਤੇ ਹੀ ਦਰਦਨਾਕ ਮੌਤ ਹੋ ਗਈ। ਮ੍ਰਿਤਕਾਂ ਦੀ ਪਛਾਣ ਮਨੀਸ਼ ਅਤੇ ਨਵੀਨ ਵਜੋਂ ਹੋਈ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਜਿਵੇਂ ਹੀ ਕ੍ਰੇਨ ਨੇ ਜਨਰੇਟਰ ਨੂੰ ਤੀਜੀ ਮੰਜ਼ਿਲ ਤੱਕ ਚੁੱਕਿਆ, ਤਾਂ ਅਚਾਨਕ ਭਾਰ ਦਾ ਸੰਤੁਲਨ ਵਿਗੜ ਗਿਆ ਅਤੇ ਕ੍ਰੇਨ ਇੱਕ ਪਾਸੇ ਨੂੰ ਪਲਟ ਗਈ। ਜਨਰੇਟਰ 'ਤੇ ਸਵਾਰ ਦੋਵੇਂ ਹੈਲਪਰ ਕਈ ਫੁੱਟ ਦੀ ਉੱਚਾਈ ਤੋਂ ਜਨਰੇਟਰ ਸਮੇਤ ਹੇਠਾਂ ਆ ਡਿੱਗੇ। ਹਾਲਾਂਕਿ, ਕ੍ਰੇਨ ਚਾਲਕ ਨੇ ਸਮਾਂ ਰਹਿੰਦੇ ਛਾਲ ਮਾਰ ਕੇ ਆਪਣੀ ਜਾਨ ਬਚਾ ਲਈ।
ਹਾਦਸੇ ਤੋਂ ਬਾਅਦ ਇਲਾਕੇ 'ਚ ਹਫ਼ੜਾ-ਦਫ਼ੜੀ ਮਚ ਗਈ। ਕੰਪਨੀ ਦੇ ਕਰਮਚਾਰੀਆਂ ਵੱਲੋਂ ਦੋਵਾਂ ਜ਼ਖ਼ਮੀਆਂ ਨੂੰ ਤੁਰੰਤ ਹਸਪਤਾਲ ਪਹੁੰਚਾਇਆ ਗਿਆ, ਪਰ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਸੈਕਟਰ-19 ਪੁਲਿਸ ਚੌਕੀ ਦੀ ਟੀਮ ਨੇ ਮੌਕੇ 'ਤੇ ਪਹੁੰਚ ਕੇ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਅਗਲੇਰੀ ਕਾਨੂੰਨੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
Get all latest content delivered to your email a few times a month.
