ਤਾਜਾ ਖਬਰਾਂ
ਨੈਸ਼ਨਲ ਟੈਸਟਿੰਗ ਏਜੰਸੀ (NTA) ਵੱਲੋਂ ਐਤਵਾਰ, 21 ਜੂਨ 2026 ਨੂੰ ਲਈ ਜਾ ਰਹੀ ‘ਨੀਟ ਯੂ.ਜੀ.’ (NEET UG-2026) ਦੀ ਮੁੜ ਪ੍ਰੀਖਿਆ ਲਈ ਪ੍ਰਸ਼ਾਸਨ ਨੇ ਤਿਆਰੀਆਂ ਮੁਕੰਮਲ ਕਰ ਲਈਆਂ ਹਨ। ਪ੍ਰੀਖਿਆ ਨੂੰ ਪਾਰਦਰਸ਼ੀ ਤਰੀਕੇ ਨਾਲ ਨੇਪਰੇ ਚਾੜ੍ਹਨ ਲਈ ਜ਼ਿਲ੍ਹੇ ਵਿੱਚ ਸ਼ਹਿਰੀ ਅਤੇ ਪੇਂਡੂ ਖੇਤਰਾਂ ਦੇ ਸਕੂਲਾਂ-ਕਾਲਜਾਂ ਨੂੰ ਮਿਲਾ ਕੇ ਕੁੱਲ 12 ਪ੍ਰੀਖਿਆ ਕੇਂਦਰ ਸਥਾਪਤ ਕੀਤੇ ਗਏ ਹਨ, ਜਿੱਥੇ 3,937 ਉਮੀਦਵਾਰ ਆਪਣੀ ਕਿਸਮਤ ਅਜ਼ਮਾਉਣਗੇ। ਦੂਜੇ ਪਾਸੇ, ਹਰਿਆਣਾ ਸਰਕਾਰ ਨੇ ਉਮੀਦਵਾਰਾਂ ਨੂੰ ਵੱਡੀ ਰਾਹਤ ਦਿੰਦਿਆਂ 20 ਅਤੇ 21 ਜੂਨ ਨੂੰ ਸਰਕਾਰੀ ਬੱਸਾਂ ਵਿੱਚ ਮੁਫ਼ਤ ਸਫ਼ਰ ਕਰਨ ਦੀ ਸਹੂਲਤ ਦਿੱਤੀ ਹੈ।
ਟਰਾਂਸਪੋਰਟ ਵਿਭਾਗ ਵੱਲੋਂ ਜਾਰੀ ਹਦਾਇਤਾਂ ਅਨੁਸਾਰ ਇਹ ਮੁਫ਼ਤ ਸਫ਼ਰ ਸਹੂਲਤ ਸਿਰਫ਼ ਆਮ ਹਰਿਆਣਾ ਰੋਡਵੇਜ਼ ਬੱਸਾਂ ਵਿੱਚ ਹੀ ਲਾਗੂ ਹੋਵੇਗੀ।
ਪ੍ਰੀਖਿਆਰਥੀਆਂ ਨੂੰ ਬੱਸ ਵਿੱਚ ਚੜ੍ਹਨ ਸਮੇਂ ਕੰਡਕਟਰ ਨੂੰ ਆਪਣਾ 'ਐਡਮਿਟ ਕਾਰਡ' (Admit Card) ਦਿਖਾਉਣਾ ਪਵੇਗਾ, ਜਿਸ ਦੇ ਆਧਾਰ 'ਤੇ ਕੰਡਕਟਰ ਮੁਫ਼ਤ ਵਾਲੀ 'ਜ਼ੀਰੋ-ਵੈਲਯੂ' ਟਿਕਟ ਕੱਟ ਕੇ ਦੇਵੇਗਾ।
ਜੀਂਦ ਦੇ ਡਿਊਟੀ ਇੰਸਪੈਕਟਰ ਨੇ ਦੱਸਿਆ ਕਿ ਹੈੱਡ ਆਫ਼ਿਸ ਦੇ ਹੁਕਮਾਂ ਤਹਿਤ ਜੀਂਦ ਬੱਸ ਸਟੈਂਡ ਦੇ ਕਾਊਂਟਰ ਨੰਬਰ 1 ਅਤੇ 2 ਤੋਂ ਖ਼ਾਸ ਤੌਰ 'ਤੇ ਨੀਟ ਉਮੀਦਵਾਰਾਂ ਲਈ ਦੋ ਵਿਸ਼ੇਸ਼ ਬੱਸਾਂ ਚਲਾਈਆਂ ਜਾਣਗੀਆਂ। ਜੀਂਦ ਸ਼ਹਿਰ ਦੇ 6 ਪ੍ਰੀਖਿਆ ਕੇਂਦਰਾਂ ਤੱਕ ਬੱਚਿਆਂ ਨੂੰ ਛੱਡਣ ਅਤੇ ਵਾਪਸ ਲਿਆਉਣ ਦੀ ਜ਼ਿੰਮੇਵਾਰੀ ਇਨ੍ਹਾਂ ਬੱਸਾਂ ਦੀ ਹੋਵੇਗੀ।
ਨਕਲ ਰਹਿਤ ਪ੍ਰੀਖਿਆ ਲਈ ਐਨ.ਟੀ.ਏ. ਨੇ ਸੁਰੱਖਿਆ ਘੇਰਾ ਬੇਹੱਦ ਸਖ਼ਤ ਕਰ ਦਿੱਤਾ ਹੈ। ਪ੍ਰੀਖਿਆ ਹਾਲ ਦੇ ਅੰਦਰ ਮੋਬਾਈਲ, ਬਲੂਟੁੱਥ, ਈਅਰਫੋਨ, ਸਮਾਰਟਵਾਚ, ਕੈਲਕੂਲੇਟਰ ਅਤੇ ਪੈੱਨ ਡਰਾਈਵ ਵਰਗੇ ਸਾਰੇ ਇਲੈਕਟ੍ਰਾਨਿਕ ਯੰਤਰਾਂ 'ਤੇ ਮੁਕੰਮਲ ਪਾਬੰਦੀ ਰਹੇਗੀ।
ਇਸ ਤੋਂ ਇਲਾਵਾ ਸਟੇਸ਼ਨਰੀ ਦਾ ਸਾਮਾਨ ਜਿਵੇਂ ਜਿਓਮੈਟਰੀ ਬਾਕਸ, ਪਲਾਸਟਿਕ ਪਾਊਚ, ਰਾਈਟਿੰਗ ਪੈਡ, ਸਕੇਲ ਅਤੇ ਇਰੇਜ਼ਰ ਲਿਜਾਣ ਦੀ ਵੀ ਇਜਾਜ਼ਤ ਨਹੀਂ ਹੋਵੇਗੀ। ਪ੍ਰੀਖਿਆ ਦੇਣ ਆਉਣ ਵਾਲੇ ਬੱਚਿਆਂ ਨੂੰ ਬਟੂਏ, ਹੈਂਡਬੈਗ, ਬੈਲਟ, ਟੋਪੀ ਜਾਂ ਧਾਤ ਦੇ ਬਣੇ ਕੋਈ ਵੀ ਗਹਿਣੇ ਪਾ ਕੇ ਅੰਦਰ ਜਾਣ ਨਹੀਂ ਦਿੱਤਾ ਜਾਵੇਗਾ, ਇਸ ਲਈ ਉਮੀਦਵਾਰਾਂ ਨੂੰ ਨਿਯਮਾਂ ਦਾ ਪਾਲਣ ਕਰਦੇ ਹੋਏ ਹੀ ਕੇਂਦਰਾਂ 'ਤੇ ਪਹੁੰਚਣ ਦੀ ਅਪੀਲ ਕੀਤੀ ਗਈ ਹੈ।
Get all latest content delivered to your email a few times a month.
