ਤਾਜਾ ਖਬਰਾਂ
ਕਰਨਾਟਕ ਦੀ ਰਾਜਧਾਨੀ ਬੇਂਗਲੁਰੂ ਵਿੱਚ ਬੁੱਧਵਾਰ ਸ਼ਾਮ ਨੂੰ ਆਈ ਭਿਆਨਕ ਆਂਧੀ ਅਤੇ ਮੀਂਹ ਨੇ ਭਾਰੀ ਤਬਾਹੀ ਮਚਾਈ ਹੈ। ਮੌਸਮ ਦੇ ਇਸ ਅਚਾਨਕ ਹਮਲੇ ਵਿੱਚ ਵੱਖ-ਵੱਖ ਹਾਦਸਿਆਂ ਦੌਰਾਨ ਕੁੱਲ 10 ਲੋਕਾਂ ਦੀ ਮੌਤ ਹੋ ਗਈ। ਸਭ ਤੋਂ ਦਰਦਨਾਕ ਘਟਨਾ ਸ਼ਿਵਾਜੀਨਗਰ ਇਲਾਕੇ ਵਿੱਚ ਵਾਪਰੀ, ਜਿੱਥੇ ਮੀਂਹ ਤੋਂ ਬਚਣ ਲਈ ਹਸਪਤਾਲ ਦੀ ਕੰਧ ਦਾ ਸਹਾਰਾ ਲੈ ਕੇ ਖੜ੍ਹੇ ਲੋਕਾਂ 'ਤੇ ਕੰਧ ਹੀ ਕਹਿਰ ਬਣ ਕੇ ਟੁੱਟ ਪਈ।
ਸ਼ਿਵਾਜੀਨਗਰ ਸਥਿਤ 'ਬੋਰਿੰਗ ਅਤੇ ਲੇਡੀ ਕਰਜ਼ਨ ਹਸਪਤਾਲ' ਦੀ ਅੱਠ ਫੁੱਟ ਉੱਚੀ ਕੰਪਾਊਂਡ ਦੀਵਾਰ ਅਚਾਨਕ ਡਿੱਗਣ ਕਾਰਨ ਇਸ ਦੇ ਹੇਠਾਂ ਦੱਬ ਕੇ 7 ਲੋਕਾਂ ਦੀ ਮੌਤ ਹੋ ਗਈ ਅਤੇ 9 ਹੋਰ ਜ਼ਖ਼ਮੀ ਹੋ ਗਏ। ਮਰਨ ਵਾਲਿਆਂ ਵਿੱਚ 6 ਸਾਲਾ ਮਾਸੂਮ ਬੱਚੀ ਮੁਸਫ਼ਿਰਾ ਵੀ ਸ਼ਾਮਲ ਸੀ, ਜੋ ਆਪਣੇ ਜਨਮ ਦਿਨ ਦੀ ਸ਼ਾਪਿੰਗ ਕਰਨ ਆਈ ਸੀ। ਮ੍ਰਿਤਕਾਂ ਵਿੱਚ ਜ਼ਿਆਦਾਤਰ ਰੇਹੜੀ-ਫੜੀ ਵਾਲੇ ਅਤੇ ਰਾਹਗੀਰ ਸਨ। ਕੇਰਲ ਦੀਆਂ ਦੋ ਮਹਿਲਾਵਾਂ, ਜੋ ਸ਼ਹਿਰ ਘੁੰਮਣ ਆਈਆਂ ਸਨ, ਵੀ ਇਸ ਹਾਦਸੇ ਦਾ ਸ਼ਿਕਾਰ ਹੋ ਗਈਆਂ।
ਸ਼ਹਿਰ ਵਿੱਚ ਵਾਪਰੀਆਂ ਹੋਰ ਘਟਨਾਵਾਂ ਵਿੱਚ 3 ਹੋਰ ਕੀਮਤੀ ਜਾਨਾਂ ਚਲੀਆਂ ਗਈਆਂ:
ਕਰੰਟ ਲੱਗਣ ਨਾਲ ਮੌਤ: 17 ਸਾਲਾ ਸਈਅਦ ਸੁਫ਼ਿਆਨ ਅਤੇ 30 ਸਾਲਾ ਮੋਚੀ ਰਘੂ ਦੀ ਪਾਣੀ ਨਾਲ ਭਰੇ ਟੋਇਆਂ ਵਿੱਚ ਨੰਗੀਆਂ ਤਾਰਾਂ ਤੋਂ ਕਰੰਟ ਲੱਗਣ ਕਾਰਨ ਮੌਤ ਹੋ ਗਈ।
ਛੱਤ ਡਿੱਗੀ: ਚਾਮਰਾਜਪੇਟ ਵਿੱਚ 35 ਸਾਲਾ ਮੰਜੂਨਾਥ ਦੇ ਘਰ ਦੀ ਛੱਤ ਅਤੇ ਕੰਧ ਡਿੱਗਣ ਕਾਰਨ ਉਸ ਦੀ ਜਾਨ ਚਲੀ ਗਈ।
ਮੁੱਖ ਮੰਤਰੀ ਸਿੱਧਾਰਮਈਆ ਨੇ ਘਟਨਾ ਸਥਾਨ ਦਾ ਦੌਰਾ ਕੀਤਾ ਅਤੇ ਹਰੇਕ ਮ੍ਰਿਤਕ ਦੇ ਪਰਿਵਾਰ ਨੂੰ 5 ਲੱਖ ਰੁਪਏ ਦੀ ਸਹਾਇਤਾ ਰਾਸ਼ੀ ਦੇਣ ਦਾ ਐਲਾਨ ਕੀਤਾ। ਸੀਐਮ ਨੇ ਇੰਜੀਨੀਅਰਾਂ ਦੀ ਲਾਪਰਵਾਹੀ 'ਤੇ ਸਵਾਲ ਚੁੱਕਦਿਆਂ ਜਾਂਚ ਦੇ ਹੁਕਮ ਦਿੱਤੇ ਹਨ। ਉਨ੍ਹਾਂ ਕਿਹਾ ਕਿ ਜੇਕਰ ਕੰਧ ਜਰਜਰ ਸੀ ਤਾਂ ਇਸ ਨੂੰ ਨਜ਼ਰਅੰਦਾਜ਼ ਕਿਉਂ ਕੀਤਾ ਗਿਆ? ਦੂਜੇ ਪਾਸੇ ਉਪ-ਮੁੱਖ ਮੰਤਰੀ ਡੀ.ਕੇ. ਸ਼ਿਵਕੁਮਾਰ ਨੇ ਇਸ ਨੂੰ ਕੁਦਰਤੀ ਆਫ਼ਤ ਕਰਾਰ ਦਿੱਤਾ ਹੈ।
ਮੌਸਮ ਵਿਭਾਗ (IMD) ਨੇ ਸ਼ਹਿਰ ਲਈ ਆਰੇਂਜ ਅਲਰਟ ਜਾਰੀ ਕੀਤਾ ਸੀ। 50 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਚੱਲੀਆਂ ਹਵਾਵਾਂ ਨੇ 170 ਤੋਂ ਵੱਧ ਦਰੱਖਤ ਉਖਾੜ ਦਿੱਤੇ। ਸ਼ਹਿਰ ਦੇ ਕੇਂਦਰੀ ਇਲਾਕਿਆਂ ਵਿੱਚ 78 ਮਿਲੀਮੀਟਰ ਬਾਰਿਸ਼ ਦਰਜ ਕੀਤੀ ਗਈ, ਜਿਸ ਕਾਰਨ ਐਮਜੀ ਰੋਡ, ਇੰਦਿਰਾਨਗਰ ਅਤੇ ਕੋਰਮੰਗਲਾ ਵਰਗੇ ਵੀਆਈਪੀ ਇਲਾਕਿਆਂ ਦੀਆਂ ਸੜਕਾਂ ਦਰਿਆਵਾਂ ਵਿੱਚ ਤਬਦੀਲ ਹੋ ਗਈਆਂ।
ਜਲ-ਥਲ ਹੋਣ ਕਾਰਨ ਆਵਾਜਾਈ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਈ ਅਤੇ ਕਈ ਥਾਵਾਂ 'ਤੇ ਇੰਟਰਨੈੱਟ ਸੇਵਾਵਾਂ ਠੱਪ ਹੋ ਗਈਆਂ। ਚਰਚ ਸਟ੍ਰੀਟ ਦੀ ਪ੍ਰਸਿੱਧ ਕਿਤਾਬਾਂ ਦੀ ਦੁਕਾਨ ‘ਬੁੱਕਵਰਮ’ ਵਿੱਚ ਪਾਣੀ ਵੜਨ ਕਾਰਨ ਲਗਭਗ 5,000 ਕਿਤਾਬਾਂ ਬਰਬਾਦ ਹੋ ਗਈਆਂ। ਪ੍ਰਸ਼ਾਸਨ ਨੇ ਅਗਲੇ 48 ਘੰਟਿਆਂ ਲਈ ਹੋਰ ਮੀਂਹ ਅਤੇ ਤੇਜ਼ ਹਵਾਵਾਂ ਦੀ ਚੇਤਾਵਨੀ ਦਿੱਤੀ ਹੈ।
Get all latest content delivered to your email a few times a month.
