ਤਾਜਾ ਖਬਰਾਂ
ਪੰਜਾਬ ਦੇ ਬਾਜ਼ਾਰਾਂ ਵਿੱਚ ਨਕਲੀ ਅਤੇ ਮਿਲਾਵਟੀ ਪਨੀਰ ਦਾ ਧੰਦਾ ਜ਼ੋਰਾਂ 'ਤੇ ਹੈ। ਖੁਲਾਸਾ ਹੋਇਆ ਹੈ ਕਿ ਦੁੱਧ ਤੋਂ ਪਨੀਰ ਬਣਾਉਣ ਲਈ ਨਿੰਬੂ ਜਾਂ ਸਿਰਕੇ ਦੀ ਵਰਤੋਂ ਕਰਨ ਦੀ ਬਜਾਏ, ਜਾਨਲੇਵਾ ਕੈਮੀਕਲ ਵਰਤੇ ਜਾ ਰਹੇ ਹਨ। ਇਹ ਕੈਮੀਕਲ ਨਾ ਸਿਰਫ਼ 5 ਮਿੰਟਾਂ ਵਿੱਚ ਪਨੀਰ ਤਿਆਰ ਕਰ ਦਿੰਦਾ ਹੈ, ਸਗੋਂ ਇਸ ਨਾਲ ਪਨੀਰ ਦੀ ਮਾਤਰਾ (ਕੁਆਂਟਿਟੀ) ਵੀ 15 ਤੋਂ 20 ਫ਼ੀਸਦੀ ਵੱਧ ਜਾਂਦੀ ਹੈ। ਇਕ ਰਿਪੋਰਟ ਅਨੁਸਾਰ ਲੁਧਿਆਣਾ ਅਤੇ ਮੋਗਾ ਵਰਗੇ ਸ਼ਹਿਰਾਂ ਵਿੱਚ ਇਹ ਕੈਮੀਕਲ 'ਪਨੀਰ ਤੋੜਨ ਵਾਲਾ ਪਾਣੀ' ਕਹਿ ਕੇ ਖੁੱਲ੍ਹੇਆਮ ਵੇਚਿਆ ਜਾ ਰਿਹਾ ਹੈ।
ਸਿਹਤ ਮਾਹਿਰਾਂ ਦੀ ਗੰਭੀਰ ਚੇਤਾਵਨੀ
ਮਾਹਿਰਾਂ ਅਨੁਸਾਰ ਇਸ ਕੈਮੀਕਲ ਯੁਕਤ ਪਨੀਰ ਦਾ ਸੇਵਨ ਇਨਸਾਨੀ ਸਰੀਰ ਲਈ ਬੇਹੱਦ ਖ਼ਤਰਨਾਕ ਹੈ। ਇਸ ਨਾਲ:
ਪੇਟ ਅਤੇ ਆਂਦਰਾਂ ਦੇ ਰੋਗ: ਪੇਟ ਵਿੱਚ ਜ਼ਖਮ ਜਾਂ ਅਲਸਰ ਹੋਣ ਦਾ ਖ਼ਤਰਾ ਵਧ ਜਾਂਦਾ ਹੈ।
ਲਿਵਰ ਅਤੇ ਕਿਡਨੀ ਫੇਲ੍ਹ: ਲਿਵਰ ਵਿੱਚ ਸੋਜ (ਹੈਪੇਟਾਈਟਸ) ਅਤੇ ਕਿਡਨੀ ਫੇਲ੍ਹ ਹੋਣ ਦੀ ਸੰਭਾਵਨਾ ਰਹਿੰਦੀ ਹੈ।
ਹੱਡੀਆਂ 'ਤੇ ਅਸਰ: ਇਹ ਹੱਡੀਆਂ ਦੀ ਘਣਤਾ (ਡੈਨਸਿਟੀ) ਨੂੰ ਘਟਾਉਂਦਾ ਹੈ।
ਬੱਚਿਆਂ 'ਤੇ ਮਾਰੂ ਪ੍ਰਭਾਵ: ਬੱਚਿਆਂ ਦੇ ਸਰੀਰਕ ਅਤੇ ਮਾਨਸਿਕ ਵਿਕਾਸ ਵਿੱਚ ਰੁਕਾਵਟ ਪੈਦਾ ਕਰਦਾ ਹੈ।
ਫੂਡ ਸੇਫ਼ਟੀ ਨਿਯਮਾਂ ਦੀਆਂ ਉੱਡ ਰਹੀਆਂ ਧੱਜੀਆਂ
ਫੂਡ ਸੇਫ਼ਟੀ ਐਂਡ ਸਟੈਂਡਰਡਜ਼ ਰੈਗੂਲੇਸ਼ਨ 2011 ਦੇ ਮੁਤਾਬਕ, ਪਨੀਰ ਬਣਾਉਣ ਲਈ ਸਿਰਫ਼ ਸਿਟਰਿਕ ਐਸਿਡ, ਲੈਕਟਿਕ ਐਸਿਡ ਜਾਂ ਖਾਣ ਵਾਲੇ ਸਿਰਕੇ ਦੀ ਵਰਤੋਂ ਦੀ ਇਜਾਜ਼ਤ ਹੈ। ਹਾਲਾਂਕਿ, 'ਪੰਜਾਬ ਹਾਰਟੀਕਲਚਰ ਪੋਸਟ ਹਾਰਵੈਸਟ ਟੈਕਨਾਲੋਜੀ ਸੈਂਟਰ' ਦੀ ਜਾਂਚ ਵਿੱਚ ਪਾਇਆ ਗਿਆ ਹੈ ਕਿ ਬਾਜ਼ਾਰ ਵਿੱਚ ਵਿਕ ਰਹੇ ਇਸ ਘੋਲ ਵਿੱਚ ਅਜਿਹਾ ਕੁਝ ਵੀ ਨਹੀਂ ਸੀ। ਇਹ ਪੂਰੀ ਤਰ੍ਹਾਂ ਇੱਕ ਗੈਰ-ਖਾਣਯੋਗ (Non-food grade) ਐਸਿਡ ਹੈ, ਜੋ ਮਨੁੱਖੀ ਵਰਤੋਂ ਲਈ ਬਿਲਕੁਲ ਸਹੀ ਨਹੀਂ ਹੈ।
ਪ੍ਰਸ਼ਾਸਨ ਅਤੇ ਸਿਹਤ ਵਿਭਾਗ ਨੂੰ ਅਪੀਲ ਕੀਤੀ ਜਾ ਰਹੀ ਹੈ ਕਿ ਅਜਿਹੇ ਗੈਰ-ਕਾਨੂੰਨੀ ਧੰਦਿਆਂ 'ਤੇ ਨਕੇਲ ਕੱਸੀ ਜਾਵੇ ਤਾਂ ਜੋ ਲੋਕਾਂ ਦੀਆਂ ਜਾਨਾਂ ਬਚਾਈਆਂ ਜਾ ਸਕਣ।
Get all latest content delivered to your email a few times a month.
