ਤਾਜਾ ਖਬਰਾਂ
ਚੰਡੀਗੜ੍ਹ: ਸ਼ਹਿਰ ਦੀ ਅਮਨ-ਕਾਨੂੰਨ ਦੀ ਵਿਵਸਥਾ ਨੂੰ ਹੋਰ ਮਜ਼ਬੂਤ ਕਰਨ ਅਤੇ ਪ੍ਰਸ਼ਾਸਨਿਕ ਕੰਮਕਾਜ ਵਿੱਚ ਚੁਸਤੀ ਲਿਆਉਣ ਦੇ ਮਕਸਦ ਨਾਲ ਚੰਡੀਗੜ੍ਹ ਪੁਲਿਸ ਵਿਭਾਗ ਵੱਲੋਂ ਇੱਕ ਵੱਡਾ ਫੇਰਬਦਲ ਕੀਤਾ ਗਿਆ ਹੈ। ਐਸ.ਪੀ. (ਪੀ.ਐਸ.ਯੂ.) ਦਫ਼ਤਰ ਵੱਲੋਂ ਜਾਰੀ ਤਾਜ਼ਾ ਹੁਕਮਾਂ ਅਨੁਸਾਰ 21 ਪੁਲਿਸ ਇੰਸਪੈਕਟਰਾਂ ਦੀਆਂ ਤਾਇਨਾਤੀਆਂ ਵਿੱਚ ਬਦਲਾਅ ਕੀਤਾ ਗਿਆ ਹੈ, ਜਿਸ ਵਿੱਚ ਕਈ ਮਹੱਤਵਪੂਰਨ ਥਾਣਿਆਂ ਦੇ ਐਸ.ਐਚ.ਓ. (SHO) ਵੀ ਸ਼ਾਮਲ ਹਨ।
ਇਸ ਫੇਰਬਦਲ ਵਿੱਚ ਇੰਸਪੈਕਟਰ ਜਸਕਰਨ ਸਿੰਘ ਨੂੰ ਅਹਿਮ ਜ਼ਿੰਮੇਵਾਰੀ ਸੌਂਪੀ ਗਈ ਹੈ। ਆਈ.ਐਸ.ਬੀ.ਟੀ.-17 ਪੁਲਿਸ ਪੋਸਟ 'ਤੇ ਸੇਵਾਵਾਂ ਨਿਭਾਉਣ ਤੋਂ ਬਾਅਦ, ਤਰੱਕੀ ਪਾ ਕੇ ਹੁਣ ਉਹ ਮਨੀਮਾਜਰਾ ਥਾਣੇ ਦੇ ਨਵੇਂ ਮੁਖੀ ਵਜੋਂ ਚਾਰਜ ਸੰਭਾਲਣਗੇ। ਵਿਭਾਗ ਵਿੱਚ ਇਸ ਤਾਇਨਾਤੀ ਨੂੰ ਉਹਨਾਂ ਦੀ ਕਾਰਗੁਜ਼ਾਰੀ ਦੇ ਇਨਾਮ ਵਜੋਂ ਦੇਖਿਆ ਜਾ ਰਿਹਾ ਹੈ।
ਪੁਲਿਸ ਵਿਭਾਗ ਵੱਲੋਂ ਜਾਰੀ ਸੂਚੀ ਅਨੁਸਾਰ ਹੋਰ ਵੀ ਕਈ ਸੀਨੀਅਰ ਅਧਿਕਾਰੀਆਂ ਨੂੰ ਨਵੇਂ ਸਟੇਸ਼ਨਾਂ 'ਤੇ ਤਾਇਨਾਤ ਕੀਤਾ ਗਿਆ ਹੈ:
ਰਾਜੀਵ ਕੁਮਾਰ: ਥਾਣਾ 31 ਤੋਂ ਬਦਲ ਕੇ ਹੁਣ ਥਾਣਾ 39 ਦੇ ਐਸ.ਐਚ.ਓ. ਹੋਣਗੇ।
ਰਾਮ ਦਿਆਲ: ਥਾਣਾ 39 ਤੋਂ ਹੁਣ ਆਈ.ਆਰ.ਬੀ. (IRB) ਵਿੱਚ ਇੰਸਪੈਕਟਰ ਐਡਮਿਨ ਵਜੋਂ ਸੇਵਾਵਾਂ ਦੇਣਗੇ।
ਆਸ਼ਾ ਸ਼ਰਮਾ: ਥਾਣਾ 17 ਤੋਂ ਬਦਲ ਕੇ ਹੁਣ ਪੀ.ਸੀ.ਆਰ. ਯੂਨਿਟ ਦੇ ਨਾਲ-ਨਾਲ ਹਾਈ ਕੋਰਟ ਮੋਨੀਟਰਿੰਗ ਸੈੱਲ ਦਾ ਵਾਧੂ ਚਾਰਜ ਸੰਭਾਲਣਗੇ।
ਸ਼ਾਦੀ ਲਾਲ: ਵਿਜੀਲੈਂਸ ਵਿਭਾਗ ਤੋਂ ਹੁਣ ਥਾਣਾ 34 ਵਿੱਚ ਤਬਦੀਲ ਕੀਤੇ ਗਏ ਹਨ।
ਹਰੀ ਓਮ ਸ਼ਰਮਾ: ਮੌਲੀ ਜਗਰਾ ਤੋਂ ਹੁਣ ਥਾਣਾ 31 ਦੀ ਕਮਾਨ ਸੰਭਾਲਣਗੇ।
ਇਰਮ ਰਿਜ਼ਵੀ: ਪੁਲਿਸ ਹੈੱਡਕੁਆਰਟਰ (PHQ) ਤੋਂ ਹੁਣ ਥਾਣਾ 17 ਵਿੱਚ ਤਾਇਨਾਤ ਕੀਤੇ ਗਏ ਹਨ।
ਇਸ ਤੋਂ ਇਲਾਵਾ, ਇੰਸਪੈਕਟਰ ਕੁਲਵਿੰਦਰ ਕੌਰ ਨੂੰ AHTU, ਮਿੰਨੀ ਨੂੰ ਸਾਰੰਗਪੁਰ ਤੋਂ ਆਈ.ਟੀ. ਪਾਰਕ, ਅਤੇ ਰੋਹਿਤ ਕੁਮਾਰ ਨੂੰ ਟ੍ਰੈਫਿਕ ਵਿੰਗ ਵਿੱਚ ਭੇਜਿਆ ਗਿਆ ਹੈ। ਇੰਸਪੈਕਟਰ ਊਸ਼ਾ ਰਾਣੀ ਨੂੰ ਪੁਲਿਸ ਲਾਈਨ ਅਤੇ ਗਿਆਨ ਸਿੰਘ ਨੂੰ ਸੀ.ਆਈ.ਡੀ. (CID) ਵਿੱਚ ਨਵੀਂ ਤਾਇਨਾਤੀ ਮਿਲੀ ਹੈ।
ਵਿਭਾਗ ਅਨੁਸਾਰ ਇਹ ਸਾਰੇ ਤਬਾਦਲੇ "ਜਨਤਕ ਹਿੱਤ" ਅਤੇ ਕੰਮ ਦੀ ਕੁਸ਼ਲਤਾ ਨੂੰ ਮੁੱਖ ਰੱਖਦਿਆਂ ਕੀਤੇ ਗਏ ਹਨ। ਸਮਰੱਥ ਅਧਿਕਾਰੀਆਂ ਦੀ ਪ੍ਰਵਾਨਗੀ ਮਿਲਣ ਤੋਂ ਬਾਅਦ ਇਹ ਹੁਕਮ ਤੁਰੰਤ ਪ੍ਰਭਾਵ ਨਾਲ ਲਾਗੂ ਹੋ ਗਏ ਹਨ। ਸਾਰੇ ਅਧਿਕਾਰੀਆਂ ਨੂੰ ਨਿਰਦੇਸ਼ ਦਿੱਤੇ ਗਏ ਹਨ ਕਿ ਉਹ ਬਿਨਾਂ ਕਿਸੇ ਦੇਰੀ ਦੇ ਆਪਣੀਆਂ ਨਵੀਆਂ ਨਿਯੁਕਤੀਆਂ 'ਤੇ ਚਾਰਜ ਸੰਭਾਲਣ।
ਇਸ ਫੇਰਬਦਲ ਨਾਲ ਸ਼ਹਿਰ ਦੇ ਪੁਲਿਸ ਪ੍ਰਸ਼ਾਸਨ ਵਿੱਚ ਨਵੀਂ ਊਰਜਾ ਆਉਣ ਦੀ ਉਮੀਦ ਜਤਾਈ ਜਾ ਰਹੀ ਹੈ, ਖਾਸ ਕਰਕੇ ਉਨ੍ਹਾਂ ਇਲਾਕਿਆਂ ਵਿੱਚ ਜਿੱਥੇ ਨਵੇਂ ਥਾਣਾ ਮੁਖੀ ਨਿਯੁਕਤ ਕੀਤੇ ਗਏ ਹਨ।
Get all latest content delivered to your email a few times a month.
