ਜਲੰਧਰ ‘ਚ ਦਿਨ ਦਿਹਾੜੇ PNB ਬੈਂਕ ਲੁੱਟ, ਪਿਸਤੌਲ ਦੀ ਨੋਕ ‘ਤੇ ਕੈਸ਼ੀਅਰ ਤੋਂ ਨਕਦੀ ਲੈ ਕੇ ਸਕੂਟੀ ਸਵਾਰ ਫਰਾਰ

ਜਲੰਧਰ ਵਿੱਚ ਸੋਮਵਾਰ (6 ਅਪ੍ਰੈਲ) ਨੂੰ ਕਾਨੂੰਨ-ਵਿਵਸਥਾ ‘ਤੇ ਸਵਾਲ ਖੜ੍ਹੇ ਕਰਨ ਵਾਲੀ ਵੱਡੀ ਘਟਨਾ ਸਾਹਮਣੇ ਆਈ, ਜਿੱਥੇ ਦਿਨ ਦਿਹਾੜੇ ਪੰਜਾਬ ਨੈਸ਼ਨਲ ਬੈਂਕ ਵਿੱਚ ਦੋ ਅਣਪਛਾਤੇ ਲੁਟੇਰਿਆਂ ਵੱਲੋਂ ਹਥਿਆਰਾਂ ਦੇ ਜ਼ੋਰ ‘ਤੇ ਲੁੱਟ ਕੀਤੀ ਗਈ। ਜਾਣਕਾਰੀ ਅਨੁਸਾਰ, ਦੋਵੇਂ ਮੁਲਜ਼ਮ ਸਕੂਟੀ ‘ਤੇ ਆਏ ਅਤੇ ਆਪਣੇ ਚਿਹਰੇ ਢੱਕੇ ਹੋਏ ਸਨ। ਇਕ ਮੁਲਜ਼ਮ ਬੈਂਕ ਦੇ ਬਾਹਰ ਨਿਗਰਾਨੀ ਕਰਦਾ ਰਿਹਾ, ਜਦਕਿ ਦੂਜਾ ਅੰਦਰ ਦਾਖਲ ਹੋ ਕੇ ਸਿੱਧਾ ਕੈਸ਼ ਕਾਊਂਟਰ ‘ਤੇ ਪਹੁੰਚ ਗਿਆ। ਉਸ ਨੇ ਕੈਸ਼ੀਅਰ ਨੂੰ ਪੈਸੇ ਦੇਣ ਲਈ ਕਿਹਾ, ਪਰ ਇਨਕਾਰ ਹੋਣ ‘ਤੇ ਉਸ ਨੇ ਪਿਸਤੌਲ ਤਾਣ ਕੇ ਗੋਲੀ ਮਾਰਣ ਦੀ ਧਮਕੀ ਦਿੱਤੀ। ਡਰੇ ਹੋਏ ਮਾਹੌਲ ਵਿੱਚ, ਮੁਲਜ਼ਮ ਕਾਊਂਟਰ ‘ਤੇ ਰੱਖਿਆ ਕੈਸ਼ ਭਰਿਆ ਬੈਗ ਲੈ ਕੇ ਤੁਰੰਤ ਬਾਹਰ ਨਿਕਲਿਆ ਅਤੇ ਆਪਣੇ ਸਾਥੀ ਨਾਲ ਸਕੂਟੀ ‘ਤੇ ਫਰਾਰ ਹੋ ਗਿਆ। ਇਸ ਸਮੇਂ ਬੈਂਕ ਵਿੱਚ ਕਈ ਗਾਹਕ ਵੀ ਮੌਜੂਦ ਸਨ, ਜਿਸ ਨਾਲ ਹੜਕੰਪ ਮਚ ਗਿਆ। ਪੂਰੀ ਵਾਰਦਾਤ ਬੈਂਕ ਦੇ ਸੀਸੀਟੀਵੀ ਕੈਮਰਿਆਂ ਵਿੱਚ ਕੈਦ ਹੋ ਗਈ ਹੈ ਅਤੇ ਪੁਲਿਸ ਵੱਲੋਂ ਫੁਟੇਜ ਦੇ ਆਧਾਰ ‘ਤੇ ਮੁਲਜ਼ਮਾਂ ਦੀ ਪਹਿਚਾਣ ਲਈ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।