ਤਾਜਾ ਖਬਰਾਂ
ਟੀਮ ਇੰਡੀਆ ਦੇ ਤੇਜ਼ ਗੇਂਦਬਾਜ਼ Arshdeep Singh ਨੂੰ International Cricket Council (ICC) ਨੇ ਟੀ-20 ਵਰਲਡ ਕੱਪ ਫਾਈਨਲ ਦੌਰਾਨ ਹੋਈ ਇਕ ਘਟਨਾ ਕਰਕੇ ਉਸਦੀ ਮੈਚ ਫੀਸ ਦਾ 15 ਫੀਸਦੀ ਜੁਰਮਾਨਾ ਲਗਾਇਆ ਹੈ। ਇਹ ਮਾਮਲਾ ਉਸ ਵੇਲੇ ਵਾਪਰਿਆ ਜਦੋਂ ਫਾਈਨਲ ਮੁਕਾਬਲੇ ਵਿੱਚ ਨਿਊਜ਼ੀਲੈਂਡ ਦੇ ਬੱਲੇਬਾਜ਼ Daryl Mitchell ਸਟ੍ਰਾਈਕ 'ਤੇ ਸਨ।
ਗੇਂਦਬਾਜ਼ੀ ਦੌਰਾਨ ਮਿਸ਼ੇਲ ਨੇ ਇੱਕ ਗੇਂਦ ਨੂੰ ਰੋਕਿਆ, ਜਿਸ ਤੋਂ ਬਾਅਦ ਗੇਂਦ ਅਰਸ਼ਦੀਪ ਦੇ ਕੋਲ ਆ ਗਈ। ਅਰਸ਼ਦੀਪ ਨੇ ਗੇਂਦ ਚੁੱਕ ਕੇ ਤੇਜ਼ੀ ਨਾਲ ਵਾਪਸ ਮਿਸ਼ੇਲ ਵੱਲ ਸੁੱਟ ਦਿੱਤੀ, ਜੋ ਸਿੱਧੀ ਉਸਦੇ ਪੈਡ ਨਾਲ ਟਕਰਾ ਗਈ। ਇਸ ਘਟਨਾ ਤੋਂ ਬਾਅਦ ਮੈਦਾਨ 'ਤੇ ਕੁਝ ਸਮੇਂ ਲਈ ਤਣਾਅ ਬਣ ਗਿਆ ਅਤੇ ਮਿਸ਼ੇਲ ਨਾਰਾਜ਼ ਵੀ ਨਜ਼ਰ ਆਏ।
ICC ਨੇ ਇਸ ਵਰਤਾਅ ਨੂੰ ਆਪਣੇ ਕੋਡ ਆਫ ਕੰਡਕਟ ਦੇ ਲੈਵਲ-1 ਦੀ ਉਲੰਘਣਾ ਕਰਾਰ ਦਿੰਦਿਆਂ ਅਰਸ਼ਦੀਪ ਨੂੰ ਦੋਸ਼ੀ ਮੰਨਿਆ। ਨਿਯਮਾਂ ਮੁਤਾਬਕ ਕਿਸੇ ਖਿਡਾਰੀ ਵੱਲੋਂ ਮੈਚ ਦੌਰਾਨ ਦੂਜੇ ਖਿਡਾਰੀ ਵੱਲ ਗੇਂਦ ਜਾਂ ਕੋਈ ਵਸਤੂ ਸੁੱਟਣਾ ਅਨੁਸ਼ਾਸਨਹੀਨਤਾ ਮੰਨੀ ਜਾਂਦੀ ਹੈ। ਇਸ ਕਾਰਨ ਉਸ 'ਤੇ 15% ਮੈਚ ਫੀਸ ਦਾ ਜੁਰਮਾਨਾ ਲਗਾਉਣ ਦੇ ਨਾਲ ਇੱਕ ਡੀ-ਮੈਰਿਟ ਪੁਆਇੰਟ ਵੀ ਉਸਦੇ ਰਿਕਾਰਡ ਵਿੱਚ ਜੋੜਿਆ ਗਿਆ ਹੈ।
ਘਟਨਾ ਤੋਂ ਬਾਅਦ ਮੈਦਾਨ 'ਤੇ ਮੌਜੂਦ ਅੰਪਾਇਰਾਂ ਨੇ ਅਰਸ਼ਦੀਪ ਨੂੰ ਸਮਝਾਇਆ, ਜਦਕਿ ਟੀਮ ਇੰਡੀਆ ਦੇ ਕਪਤਾਨ Suryakumar Yadav ਨੇ ਵੀ ਦਖਲ ਦੇ ਕੇ ਮਾਮਲੇ ਨੂੰ ਸ਼ਾਂਤ ਕੀਤਾ ਅਤੇ ਮਿਸ਼ੇਲ ਨਾਲ ਗੱਲਬਾਤ ਕੀਤੀ। ਮੈਚ ਖਤਮ ਹੋਣ ਤੋਂ ਬਾਅਦ ਅਰਸ਼ਦੀਪ ਨੇ ਵੀ ਮਿਸ਼ੇਲ ਕੋਲ ਜਾ ਕੇ ਮੁਆਫੀ ਮੰਗੀ, ਪਰ ਇਸ ਦੇ ਬਾਵਜੂਦ ICC ਨੇ ਨਿਯਮਾਂ ਮੁਤਾਬਕ ਉਸ 'ਤੇ ਕਾਰਵਾਈ ਕਰ ਦਿੱਤੀ।
Get all latest content delivered to your email a few times a month.
