ਦਿੱਲੀ 'ਚ ਫੜਿਆ ਗਿਆ ਬੰਗਲਾਦੇਸ਼ ਦਾ ਵਾਂਟੇਡ ਅਪਰਾਧੀ, ਫਿਨਲੈਂਡ ਭੱਜਣ ਦੀ ਫਿਰਾਕ 'ਚ ਸੀ 'ਮਹਦੀ'

ਦਿੱਲੀ ਦੇ ਇਮੀਗ੍ਰੇਸ਼ਨ ਵਿਭਾਗ ਨੇ ਇੱਕ ਵੱਡੀ ਕਾਰਵਾਈ ਕਰਦਿਆਂ ਬੰਗਲਾਦੇਸ਼ ਦੇ ਵਾਂਟੇਡ ਅਪਰਾਧੀ ਮਹਦੀ ਅਹਿਮਦ ਰਜ਼ਾ ਹਸਨ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਮੁਲਜ਼ਮ 'ਤੇ ਬੰਗਲਾਦੇਸ਼ ਵਿੱਚ ਹਿੰਸਾ ਦੌਰਾਨ ਇੱਕ ਹਿੰਦੂ ਪੁਲਿਸ ਅਫ਼ਸਰ ਦੀ ਬੇਰਹਿਮੀ ਨਾਲ ਹੱਤਿਆ ਕਰਨ ਦਾ ਦੋਸ਼ ਹੈ। ਗ੍ਰਿਫ਼ਤਾਰੀ ਤੋਂ ਬਾਅਦ ਭਾਰਤੀ ਅਧਿਕਾਰੀਆਂ ਨੇ ਕਾਨੂੰਨੀ ਪ੍ਰਕਿਰਿਆ ਪੂਰੀ ਕਰਕੇ ਉਸ ਨੂੰ ਵਾਪਸ ਬੰਗਲਾਦੇਸ਼ ਡਿਪੋਰਟ ਕਰ ਦਿੱਤਾ ਹੈ।

ਮਹਦੀ ਅਹਿਮਦ ਰਜ਼ਾ ਹਸਨ 'ਤੇ ਦੋਸ਼ ਹੈ ਕਿ ਉਸ ਨੇ ਬੰਗਲਾਦੇਸ਼ ਵਿੱਚ ਹੋਈ ਭਾਰੀ ਹਿੰਸਾ ਦੌਰਾਨ ਹਿੰਦੂ ਪੁਲਿਸ ਅਫ਼ਸਰ ਸੰਤੋਸ਼ ਚੌਧਰੀ ਦਾ ਕਤਲ ਕੀਤਾ ਸੀ। ਹਿੰਸਾ ਦੌਰਾਨ ਮਹਦੀ ਦਾ ਇੱਕ ਵੀਡੀਓ ਵੀ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋਇਆ ਸੀ, ਜਿਸ ਵਿੱਚ ਉਹ ਥਾਣੇ ਅੰਦਰ ਬੈਠ ਕੇ ਪੁਲਿਸ ਅਫ਼ਸਰਾਂ ਨੂੰ ਸ਼ਰੇਆਮ ਧਮਕਾਉਂਦਾ ਨਜ਼ਰ ਆ ਰਿਹਾ ਸੀ। ਉਹ ਭਾਰਤ ਦੇ ਰਸਤੇ ਫਿਨਲੈਂਡ ਭੱਜਣ ਦੀ ਯੋਜਨਾ ਬਣਾ ਰਿਹਾ ਸੀ, ਪਰ ਹਵਾਈ ਅੱਡੇ 'ਤੇ ਇਮੀਗ੍ਰੇਸ਼ਨ ਵਿਭਾਗ ਦੀ ਮੁਸਤੈਦੀ ਕਾਰਨ ਫੜਿਆ ਗਿਆ।

5 ਅਗਸਤ ਦੀ ਉਹ ਖ਼ੂਨੀ ਵਾਰਦਾਤ

ਰਿਪੋਰਟਾਂ ਅਨੁਸਾਰ, ਇਹ ਘਟਨਾ 5 ਅਗਸਤ 2024 ਨੂੰ ਵਾਪਰੀ ਸੀ, ਜਿਸ ਦਿਨ ਬੰਗਲਾਦੇਸ਼ ਦੀ ਤਤਕਾਲੀ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਨੂੰ ਦੇਸ਼ ਛੱਡਣਾ ਪਿਆ ਸੀ। ਉਤੇਜਿਤ ਭੀੜ ਨੇ ਬਾਨੀਆਚੰਗ ਪੁਲਿਸ ਸਟੇਸ਼ਨ 'ਤੇ ਹਮਲਾ ਕਰਕੇ ਉਸ ਨੂੰ ਅੱਗ ਲਗਾ ਦਿੱਤੀ ਸੀ। ਇਸੇ ਦੌਰਾਨ ਹਿੰਦੂ ਪੁਲਿਸ ਅਫ਼ਸਰ ਸੰਤੋਸ਼ ਚੌਧਰੀ ਨੂੰ ਭੀੜ ਨੇ ਬੁਰੀ ਤਰ੍ਹਾਂ ਪਿੱਟਿਆ ਅਤੇ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਉਨ੍ਹਾਂ ਨੂੰ ਜਿਉਂਦਾ ਸਾੜ ਦਿੱਤਾ ਗਿਆ ਸੀ। ਬਾਅਦ ਵਿੱਚ ਸੰਤੋਸ਼ ਦੀ ਲਾਸ਼ ਇੱਕ ਦਰੱਖਤ ਨਾਲ ਲਟਕਦੀ ਮਿਲੀ ਸੀ।

ਪਰਿਵਾਰ 'ਤੇ ਟੁੱਟਿਆ ਦੁੱਖਾਂ ਦਾ ਪਹਾੜ

ਮਰਹੂਮ ਅਫ਼ਸਰ ਸੰਤੋਸ਼ ਚੌਧਰੀ ਦੀ ਕਹਾਣੀ ਬੇਹੱਦ ਦਰਦਨਾਕ ਹੈ। ਜਦੋਂ ਦੰਗਿਆਂ ਵਿੱਚ ਉਨ੍ਹਾਂ ਦੀ ਜਾਨ ਲਈ ਗਈ, ਉਸ ਸਮੇਂ ਉਨ੍ਹਾਂ ਦੇ ਵਿਆਹ ਨੂੰ ਮਹਿਜ਼ ਕੁਝ ਮਹੀਨੇ ਹੀ ਹੋਏ ਸਨ। ਇੱਕ ਰਿਪੋਰਟ ਮੁਤਾਬਕ, ਸੰਤੋਸ਼ ਦੀ ਮੌਤ ਤੋਂ ਤਿੰਨ ਮਹੀਨੇ ਬਾਅਦ ਉਨ੍ਹਾਂ ਦੀ ਪਤਨੀ ਨੇ ਇੱਕ ਪੁੱਤਰ ਨੂੰ ਜਨਮ ਦਿੱਤਾ। ਬਦਕਿਸਮਤੀ ਨਾਲ, ਉਸ ਬੱਚੇ ਦੇ ਦੁਨੀਆ ਵਿੱਚ ਆਉਣ ਤੋਂ ਪਹਿਲਾਂ ਹੀ ਦੰਗਿਆਂ ਨੇ ਉਸ ਦੇ ਪਿਤਾ ਦਾ ਸਾਇਆ ਸਿਰ ਤੋਂ ਉਠਾ ਦਿੱਤਾ।