ਕ੍ਰਿਕਟ ਜਗਤ 'ਚ ਵੱਡਾ ਫੇਰਬਦਲ: MCC ਨੇ ਕੀਤੇ 73 ਨਿਯਮਾਂ 'ਚ ਬਦਲਾਅ, ਅਕਤੂਬਰ 2026 ਤੋਂ ਬਦਲ ਜਾਵੇਗਾ ਖੇਡ ਦਾ ਅੰਦਾਜ਼

ਕ੍ਰਿਕਟ ਦੀ ਖੇਡ ਨੂੰ ਹੋਰ ਵੀ ਰੋਮਾਂਚਕ ਅਤੇ ਆਧੁਨਿਕ ਬਣਾਉਣ ਲਈ ਮੈਰੀਲੇਬੋਨ ਕ੍ਰਿਕਟ ਕਲੱਬ (MCC) ਨੇ ਨਿਯਮਾਂ ਦੀ ਕਿਤਾਬ ਵਿੱਚ ਵੱਡੇ ਬਦਲਾਅ ਕਰਨ ਦਾ ਐਲਾਨ ਕੀਤਾ ਹੈ। ਸਾਲ 2022 ਤੋਂ ਬਾਅਦ ਇਹ ਪਹਿਲੀ ਵਾਰ ਹੈ ਜਦੋਂ MCC ਨੇ ਇਕੱਠੇ 73 ਬਦਲਾਅ ਪੇਸ਼ ਕੀਤੇ ਹਨ। ਇਹ ਨਵੇਂ ਨਿਯਮ ਅਕਤੂਬਰ 2026 ਤੋਂ ਵਿਸ਼ਵ ਪੱਧਰ 'ਤੇ ਲਾਗੂ ਹੋਣਗੇ, ਜਿਸ ਨਾਲ ਟੈਸਟ ਕ੍ਰਿਕਟ ਤੋਂ ਲੈ ਕੇ ਸੀਮਤ ਓਵਰਾਂ ਦੀ ਖੇਡ ਤੱਕ ਸਭ ਕੁਝ ਬਦਲਿਆ ਹੋਇਆ ਨਜ਼ਰ ਆਵੇਗਾ।

ਟੈਸਟ ਕ੍ਰਿਕਟ: ਹੁਣ ਅਧੂਰਾ ਨਹੀਂ ਰਹੇਗਾ ਆਖਰੀ ਓਵਰ

ਨਵੇਂ ਨਿਯਮਾਂ ਅਨੁਸਾਰ ਟੈਸਟ ਮੈਚਾਂ ਵਿੱਚ ਇੱਕ ਅਹਿਮ ਤਬਦੀਲੀ ਕੀਤੀ ਗਈ ਹੈ। ਹੁਣ ਤੱਕ ਦੇ ਨਿਯਮ ਮੁਤਾਬਕ ਜੇਕਰ ਦਿਨ ਦੇ ਆਖਰੀ ਓਵਰ ਦੌਰਾਨ ਕੋਈ ਵਿਕਟ ਡਿੱਗਦੀ ਸੀ, ਤਾਂ ਖੇਡ ਉੱਥੇ ਹੀ ਰੋਕ ਕੇ ਸਟੰਪਸ ਕਰ ਦਿੱਤੇ ਜਾਂਦੇ ਸਨ। ਪਰ ਹੁਣ ਅਜਿਹਾ ਨਹੀਂ ਹੋਵੇਗਾ; ਦਿਨ ਦੀ ਖੇਡ ਖ਼ਤਮ ਕਰਨ ਲਈ ਉਹ ਓਵਰ ਪੂਰਾ ਕਰਵਾਉਣਾ ਲਾਜ਼ਮੀ ਹੋਵੇਗਾ।

ਵਿਕਟਕੀਪਿੰਗ ਅਤੇ ਨੋ-ਬਾਲ ਦੇ ਨਿਯਮਾਂ 'ਚ ਰਾਹਤ

MCC ਨੇ ਵਿਕਟਕੀਪਰਾਂ ਲਈ ਵੀ ਨਿਯਮਾਂ ਵਿੱਚ ਸਪੱਸ਼ਟਤਾ ਲਿਆਂਦੀ ਹੈ। ਜੇਕਰ ਗੇਂਦ ਸੁੱਟਣ ਤੋਂ ਪਹਿਲਾਂ ਵਿਕਟਕੀਪਰ ਸਟੰਪਸ ਦੇ ਬਿਲਕੁਲ ਕਰੀਬ ਆ ਜਾਂਦਾ ਹੈ, ਤਾਂ ਹੁਣ ਹਰ ਹਾਲਤ ਵਿੱਚ ਇਸਨੂੰ 'ਨੋ-ਬਾਲ' ਨਹੀਂ ਕਰਾਰ ਦਿੱਤਾ ਜਾਵੇਗਾ। ਹਾਲਾਂਕਿ, ਕੀਪਰ ਨੂੰ ਗੇਂਦਬਾਜ਼ ਦੇ ਹੱਥੋਂ ਗੇਂਦ ਛੁੱਟਣ ਤੱਕ ਸਟੰਪਸ ਦੇ ਪਿੱਛੇ ਹੀ ਰਹਿਣਾ ਪਵੇਗਾ। ਉਹ ਗੇਂਦ ਦੇ ਵਿਕਟ ਨੂੰ ਪਾਰ ਕਰਨ ਜਾਂ ਬੱਲੇ ਨਾਲ ਸੰਪਰਕ ਹੋਣ ਤੋਂ ਬਾਅਦ ਹੀ ਅੱਗੇ ਵਧ ਸਕੇਗਾ।

ਗੇਂਦ ਦੇ ਸਾਈਜ਼ ਅਤੇ ਬਾਊਂਡਰੀ ਕੈਚ 'ਚ ਬਦਲਾਅ

ਖੇਡ ਦੇ ਉਪਕਰਨਾਂ ਅਤੇ ਫੀਲਡਿੰਗ ਵਿੱਚ ਵੀ ਦਿਲਚਸਪ ਬਦਲਾਅ ਕੀਤੇ ਗਏ ਹਨ:

ਗੇਂਦਾਂ ਦੇ ਤਿੰਨ ਸਾਈਜ਼: ਹੁਣ ਪੁਰਸ਼ਾਂ, ਮਹਿਲਾਵਾਂ ਅਤੇ ਜੂਨੀਅਰ ਕ੍ਰਿਕਟ ਲਈ ਤਿੰਨ ਵੱਖ-ਵੱਖ ਆਕਾਰ ਦੀਆਂ ਗੇਂਦਾਂ (Size 1, 2, 3) ਦੀ ਵਰਤੋਂ ਕੀਤੀ ਜਾਵੇਗੀ। ਪੁਰਸ਼ਾਂ ਲਈ ਸਾਈਜ਼ 1 ਦੀ ਗੇਂਦ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਗਿਆ ਹੈ।

ਬਾਊਂਡਰੀ 'ਤੇ ਹਵਾਈ ਕੈਚ: ਬਾਊਂਡਰੀ ਦੇ ਕਿਨਾਰੇ ਫੜੇ ਜਾਣ ਵਾਲੇ ਕੈਚਾਂ ਬਾਰੇ ਨਿਯਮ ਸਖ਼ਤ ਕਰ ਦਿੱਤਾ ਗਿਆ ਹੈ। ਹੁਣ ਕੋਈ ਖਿਡਾਰੀ ਹਵਾ ਵਿੱਚ ਉਛਲ ਕੇ ਬਾਊਂਡਰੀ ਤੋਂ ਬਾਹਰ ਰਹਿੰਦਿਆਂ ਗੇਂਦ ਨੂੰ ਸਿਰਫ਼ ਇੱਕ ਵਾਰ ਹੀ ਛੂਹ ਸਕਦਾ ਹੈ। ਜੇਕਰ ਉਹ ਦੁਬਾਰਾ ਹਵਾ ਵਿੱਚ ਹੀ ਗੇਂਦ ਨੂੰ ਛੂਹਣ ਦੀ ਕੋਸ਼ਿਸ਼ ਕਰਦਾ ਹੈ ਅਤੇ ਉਸਦਾ ਸੰਪਰਕ ਬਾਊਂਡਰੀ ਤੋਂ ਬਾਹਰ ਹੁੰਦਾ ਹੈ, ਤਾਂ ਇਸਨੂੰ 'ਛੱਕਾ' (ਬਾਊਂਡਰੀ) ਮੰਨਿਆ ਜਾਵੇਗਾ।

ਇਨ੍ਹਾਂ ਬਦਲਾਵਾਂ ਦਾ ਮੁੱਖ ਉਦੇਸ਼ ਖੇਡ ਨੂੰ ਤੇਜ਼ ਕਰਨਾ ਅਤੇ ਖਿਡਾਰੀਆਂ ਦੇ ਹੁਨਰ ਨੂੰ ਨਵੀਂ ਚੁਣੌਤੀ ਦੇਣਾ ਹੈ। ਕ੍ਰਿਕਟ ਪ੍ਰੇਮੀਆਂ ਲਈ 2026 ਦਾ ਸੀਜ਼ਨ ਕਾਫੀ ਰੋਮਾਂਚਕ ਹੋਣ ਵਾਲਾ ਹੈ ਕਿਉਂਕਿ ਇਨ੍ਹਾਂ ਨਿਯਮਾਂ ਨਾਲ ਰਣਨੀਤੀਆਂ ਵਿੱਚ ਵੱਡਾ ਫ਼ਰਕ ਦੇਖਣ ਨੂੰ ਮਿਲੇਗਾ।