ਤਾਜਾ ਖਬਰਾਂ
ਤਰਨਤਾਰਨ ਜ਼ਿਲ੍ਹੇ ਦੇ ਝਬਾਲ ਥਾਣਾ ਖੇਤਰ ਅਧੀਨ ਆਉਂਦੇ ਜਗਤਪੁਰਾ ਪਿੰਡ ਵਿੱਚ ਇੱਕ ਬਹੁਤ ਹੀ ਦੁਖਦਾਈ ਘਟਨਾ ਵਾਪਰੀ ਹੈ। ਬੁੱਧਵਾਰ ਦੁਪਹਿਰ ਤੋਂ ਲਾਪਤਾ ਹੋਏ ਸੱਤ ਸਾਲਾ ਬੱਚੇ ਮਨਰਾਜ ਸਿੰਘ ਦੀ ਲਾਸ਼ ਦੇਰ ਸ਼ਾਮ ਇੱਕ ਬੰਦ ਪਏ ਮਕਾਨ ਦੇ ਕਮਰੇ ਵਿੱਚੋਂ ਮਿਲੀ ਹੈ। ਇਸ ਘਟਨਾ ਨਾਲ ਪੂਰੇ ਪਿੰਡ ਵਿੱਚ ਡਰ ਅਤੇ ਸੋਗ ਦਾ ਮਾਹੌਲ ਬਣ ਗਿਆ ਹੈ।
ਲਾਪਤਾ ਹੋਣ ਦੀ ਘਟਨਾ
ਮ੍ਰਿਤਕ ਬੱਚਾ ਮਨਰਾਜ (7), ਜੋ ਕਿ ਨਰਸਰੀ ਦਾ ਵਿਦਿਆਰਥੀ ਸੀ, ਮਜ਼ਦੂਰ ਸਤਨਾਮ ਸਿੰਘ ਦਾ ਪੁੱਤਰ ਸੀ। ਮਨਰਾਜ ਦੀ ਮਾਸੀ, ਰਮਨਦੀਪ ਕੌਰ ਨੇ ਦੱਸਿਆ ਕਿ ਮਨਰਾਜ ਨੂੰ ਕੱਲ੍ਹ ਦੁਪਹਿਰ ਕਰੀਬ 3 ਵਜੇ ਉਸਦਾ ਚਾਚੇ ਦਾ ਪੁੱਤਰ ਪਤੰਗ ਉਡਾਉਣ ਲਈ ਘਰੋਂ ਲੈ ਗਿਆ ਸੀ।
ਜਦੋਂ ਮਨਰਾਜ ਸ਼ਾਮ ਤੱਕ ਘਰ ਨਹੀਂ ਪਰਤਿਆ, ਤਾਂ ਪਰਿਵਾਰ ਨੇ ਉਸਨੂੰ ਪੂਰੇ ਪਿੰਡ ਵਿੱਚ ਲੱਭਣਾ ਸ਼ੁਰੂ ਕਰ ਦਿੱਤਾ। ਲੰਬੀ ਭਾਲ ਤੋਂ ਬਾਅਦ, ਮਨਰਾਜ ਦੀ ਲਾਸ਼ ਇੱਕ ਖਾਲੀ ਪਏ ਮਕਾਨ ਦੇ ਇੱਕ ਕਮਰੇ ਵਿਚ ਪਈ ਮਿਲੀ।
ਕਤਲ ਦਾ ਸ਼ੱਕ, ਪੁਲਿਸ ਕਰ ਰਹੀ ਜਾਂਚ
ਪਰਿਵਾਰ ਨੇ ਜਦੋਂ ਲਾਸ਼ ਦੇਖੀ ਤਾਂ ਪਾਇਆ ਕਿ ਬੱਚੇ ਦੇ ਮੂੰਹ ਵਿੱਚੋਂ ਝੱਗ ਨਿਕਲ ਰਹੀ ਸੀ। ਕਮਰੇ ਵਿੱਚ ਤੂੜੀ ਖਿੱਲਰੀ ਹੋਈ ਸੀ ਅਤੇ ਮਨਰਾਜ ਦੀਆਂ ਚੱਪਲਾਂ ਕਮਰੇ ਵਿੱਚ ਚਿਮਨੀ ਦੇ ਕੋਲ ਪਈਆਂ ਸਨ।
ਮਨਰਾਜ ਦੀ ਮਾਸੀ ਰਮਨਦੀਪ ਕੌਰ ਨੇ ਸਿੱਧਾ ਸ਼ੱਕ ਪ੍ਰਗਟ ਕੀਤਾ ਕਿ ਕਿਸੇ ਨੇ ਉਨ੍ਹਾਂ ਦੇ ਬੱਚੇ ਨੂੰ ਕਤਲ ਕਰਕੇ ਲਾਸ਼ ਕਮਰੇ ਵਿੱਚ ਸੁੱਟ ਦਿੱਤੀ ਹੈ।
ਘਟਨਾ ਦੀ ਸੂਚਨਾ ਤੁਰੰਤ ਝਬਾਲ ਪੁਲਿਸ ਸਟੇਸ਼ਨ ਨੂੰ ਦਿੱਤੀ ਗਈ। ਥਾਣਾ ਮੁਖੀ ਇੰਸਪੈਕਟਰ ਹਰਪ੍ਰੀਤ ਸਿੰਘ ਪੁਲਿਸ ਫੋਰਸ ਸਮੇਤ ਮੌਕੇ 'ਤੇ ਪਹੁੰਚੇ ਅਤੇ ਲਾਸ਼ ਨੂੰ ਕਬਜ਼ੇ ਵਿੱਚ ਲੈ ਲਿਆ।
ਇੰਸਪੈਕਟਰ ਹਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਸਥਿਤੀ ਦੀ ਗੰਭੀਰਤਾ ਨਾਲ ਜਾਂਚ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਬੱਚੇ ਦਾ ਪੋਸਟਮਾਰਟਮ ਕਰਵਾਉਣ ਤੋਂ ਬਾਅਦ, ਪਰਿਵਾਰ ਦੇ ਬਿਆਨਾਂ ਦੇ ਆਧਾਰ 'ਤੇ ਅਗਲੇਰੀ ਕਾਨੂੰਨੀ ਕਾਰਵਾਈ ਸ਼ੁਰੂ ਕੀਤੀ ਜਾਵੇਗੀ। ਪੁਲਿਸ ਵੱਲੋਂ ਮਾਮਲੇ ਦੀ ਹਰ ਪਹਿਲੂ ਤੋਂ ਡੂੰਘਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।
Get all latest content delivered to your email a few times a month.
