ਤਾਜਾ ਖਬਰਾਂ
ਆਸਟ੍ਰੇਲੀਆ ਵਿੱਚ ਅੱਜ, 10 ਦਸੰਬਰ 2025 ਤੋਂ, 16 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਲਈ ਸਾਰੇ ਸੋਸ਼ਲ ਮੀਡੀਆ ਪਲੇਟਫਾਰਮਾਂ 'ਤੇ ਪੂਰਨ ਪਾਬੰਦੀ ਲਾਗੂ ਹੋ ਗਈ ਹੈ।
ਇਸ ਪਾਬੰਦੀ ਵਿੱਚ ਟਿਕਟੌਕ, ਯੂਟਿਊਬ, ਅਤੇ ਮੈਟਾ ਦੀਆਂ ਵੱਡੀਆਂ ਐਪਸ ਜਿਵੇਂ ਕਿ ਇੰਸਟਾਗ੍ਰਾਮ ਅਤੇ ਫੇਸਬੁੱਕ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਥ੍ਰੈਡਜ਼, ਐਕਸ (X), ਸਨੈਪਚੈਟ, ਕਿੱਕ, ਟਵਿੱਚ ਅਤੇ ਰੈਡਿਟ ਵਰਗੇ ਪਲੇਟਫਾਰਮਾਂ ਲਈ ਵੀ ਇਸ ਨਵੇਂ ਕਾਨੂੰਨ ਨੂੰ ਲਾਗੂ ਕਰਨਾ ਲਾਜ਼ਮੀ ਹੈ। ਆਸਟ੍ਰੇਲੀਆਈ ਸਰਕਾਰ ਦਾ ਕਹਿਣਾ ਹੈ ਕਿ ਸੋਸ਼ਲ ਮੀਡੀਆ 'ਤੇ ਪਾਬੰਦੀ ਦਾ ਮਕਸਦ ਨੌਜਵਾਨਾਂ ਨੂੰ ਨੁਕਸਾਨਦੇਹ ਸਮੱਗਰੀ ਤੋਂ ਬਚਾਉਣਾ ਹੈ।
ਵੱਡੀਆਂ ਕੰਪਨੀਆਂ ਸਹਿਮਤ
ਐਲਨ ਮਸਕ ਦੀ ਕੰਪਨੀ X ਨੇ ਐਲਾਨ ਕੀਤਾ ਹੈ ਕਿ ਉਹ ਆਸਟ੍ਰੇਲੀਆ ਦੇ ਸੋਸ਼ਲ ਮੀਡੀਆ ਪਾਬੰਦੀ ਦਾ ਪਾਲਣ ਕਰੇਗੀ। ਫੇਸਬੁੱਕ, ਯੂਟਿਊਬ ਅਤੇ ਟਿਕਟੌਕ ਸਮੇਤ ਸਾਰੇ ਪਲੇਟਫਾਰਮ ਹੁਣ ਨਾਬਾਲਗ ਉਪਭੋਗਤਾਵਾਂ (Teenage Users) ਨੂੰ ਹਟਾਉਣ ਲਈ ਕਦਮ ਚੁੱਕਣ ਲਈ ਸਹਿਮਤ ਹੋ ਗਏ ਹਨ।
ਇਨ੍ਹਾਂ ਪਲੇਟਫਾਰਮਾਂ 'ਤੇ ਪਾਬੰਦੀ ਲਾਗੂ ਨਹੀਂ
ਡਿਸਕੌਰਡ, ਗੂਗਲ ਕਲਾਸਰੂਮ, ਮੈਸੇਂਜਰ, ਗਿਟਹਬ, ਵਟਸਐਪ, ਲੇਗੋ ਪਲੇ, ਸਟੀਮ, ਰੋਬਲੌਕਸ ਅਤੇ ਯੂਟਿਊਬ ਕਿਡਜ਼ ਵਰਗੇ ਪਲੇਟਫਾਰਮਾਂ ਨੂੰ ਫਿਲਹਾਲ ਇਸ ਪਾਬੰਦੀ ਵਿੱਚ ਸ਼ਾਮਲ ਨਹੀਂ ਕੀਤਾ ਗਿਆ ਹੈ। ਹਾਲਾਂਕਿ, ਆਸਟ੍ਰੇਲੀਆ ਸਰਕਾਰ ਦੇ ਈ-ਸੇਫਟੀ ਅਧਿਕਾਰੀ ਨੇ ਕਿਹਾ ਹੈ ਕਿ ਕੁਝ ਪਲੇਟਫਾਰਮਾਂ 'ਤੇ ਅਜੇ ਵੀ ਵਿਚਾਰ ਚੱਲ ਰਿਹਾ ਹੈ ਅਤੇ ਪਾਬੰਦੀ ਸੂਚੀ ਅੰਤਿਮ ਨਹੀਂ ਹੈ, ਇਸ ਵਿੱਚ ਕੁਝ ਬਦਲਾਅ ਦੇਖਣ ਨੂੰ ਮਿਲ ਸਕਦੇ ਹਨ।
ਉਮਰ ਦੀ ਜਾਂਚ ਕਿਵੇਂ ਹੋਵੇਗੀ?
ਸੋਸ਼ਲ ਮੀਡੀਆ ਪਲੇਟਫਾਰਮਾਂ ਨੂੰ ਉਮਰ ਨਾਲ ਸਬੰਧਤ ਸੰਕੇਤਾਂ ਦੀ ਵੱਖ-ਵੱਖ ਪੱਧਰਾਂ 'ਤੇ ਜਾਂਚ ਕਰਨੀ ਪਵੇਗੀ, ਜਿਸ ਵਿੱਚ ਇਹ ਦੇਖਣਾ ਸ਼ਾਮਲ ਹੈ ਕਿ ਖਾਤਾ ਕਿੰਨਾ ਪੁਰਾਣਾ ਹੈ ਅਤੇ ਪ੍ਰੋਫਾਈਲ ਫੋਟੋ ਤੋਂ ਉਮਰ ਦਾ ਅੰਦਾਜ਼ਾ ਲਗਾਉਣਾ ਸ਼ਾਮਲ ਹੈ। ਬੱਚੇ ਦੀ ਸਮੱਗਰੀ 'ਤੇ ਇੰਟਰੈਕਸ਼ਨ (Interaction) ਕੀ ਹਨ, ਇਸ 'ਤੇ ਵੀ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ਨੂੰ ਨਜ਼ਰ ਰੱਖਣੀ ਪਵੇਗੀ।
ਆਸਟ੍ਰੇਲੀਆ ਦੇ ਪ੍ਰਧਾਨ ਮੰਤਰੀ, ਨੌਜਵਾਨਾਂ ਅਤੇ ਮਾਹਿਰਾਂ ਦੀ ਰਾਏ
ਪ੍ਰਧਾਨ ਮੰਤਰੀ ਐਂਥਨੀ ਅਲਬਾਨੀਜ਼ ਨੇ ਕਿਹਾ ਕਿ ਆਸਟ੍ਰੇਲੀਆ ਦੇ ਪ੍ਰਧਾਨ ਮੰਤਰੀ ਹੋਣ ਦਾ ਇਹ ਇੱਕ ਮਾਣ ਵਾਲਾ ਦਿਨ ਹੈ, ਕਿਉਂਕਿ ਉਨ੍ਹਾਂ ਦੇ ਦੇਸ਼ ਵਿੱਚ 16 ਸਾਲ ਤੋਂ ਘੱਟ ਉਮਰ ਦੇ ਲੋਕਾਂ ਲਈ ਸੋਸ਼ਲ ਮੀਡੀਆ ਅਕਾਉਂਟਸ 'ਤੇ ਵਿਸ਼ਵ ਪੱਧਰ 'ਤੇ ਪਹਿਲੀ ਵਾਰ ਪਾਬੰਦੀ ਲਾਗੂ ਹੋਈ ਹੈ।
ਦੂਜੇ ਪਾਸੇ, ਆਸਟ੍ਰੇਲੀਆਈ ਨੌਜਵਾਨਾਂ ਦੇ ਮਿਲੇ-ਜੁਲੇ ਵਿਚਾਰ ਹਨ। ਕੁਝ ਇਸ ਨੂੰ ਅਪਮਾਨਜਨਕ ਮਹਿਸੂਸ ਕਰ ਰਹੇ ਹਨ ਅਤੇ ਕੁਝ ਕਹਿੰਦੇ ਹਨ ਕਿ ਉਹ ਜਲਦੀ ਹੀ ਇਸ ਤੋਂ ਉਭਰ ਜਾਣਗੇ। ਹਾਲਾਂਕਿ, ਮਾਹਿਰਾਂ ਅਤੇ ਆਲੋਚਕਾਂ ਦਾ ਕਹਿਣਾ ਹੈ ਕਿ ਇਸ ਨਾਲ ਕਮਜ਼ੋਰ ਕਿਸ਼ੋਰ ਹੋਰ ਅਲੱਗ-ਥਲੱਗ ਹੋ ਸਕਦੇ ਹਨ ਅਤੇ ਬੱਚਿਆਂ ਨੂੰ ਇੰਟਰਨੈੱਟ ਦੇ ਅਨਿਯੰਤਰਿਤ ਹਿੱਸਿਆਂ ਵਿੱਚ ਧੱਕਿਆ ਜਾ ਸਕਦਾ ਹੈ।
ਕਾਨੂੰਨ ਤੋੜਨ 'ਤੇ ਕੰਪਨੀਆਂ ਨੂੰ ਭਾਰੀ ਜੁਰਮਾਨਾ
ਪਾਬੰਦੀ ਤੋੜਨ 'ਤੇ ਮਾਪਿਆਂ ਅਤੇ ਬੱਚਿਆਂ ਨੂੰ ਕੋਈ ਸਜ਼ਾ ਨਹੀਂ ਦਿੱਤੀ ਜਾਵੇਗੀ, ਪਰ ਉਲੰਘਣਾ ਕਰਨ ਵਾਲੀਆਂ ਕੰਪਨੀਆਂ ਨੂੰ 49.5 ਮਿਲੀਅਨ ਆਸਟ੍ਰੇਲੀਆਈ ਡਾਲਰ (ਲਗਭਗ 32 ਮਿਲੀਅਨ ਅਮਰੀਕੀ ਡਾਲਰ) ਤੱਕ ਦਾ ਜੁਰਮਾਨਾ ਭੁਗਤਣਾ ਪੈ ਸਕਦਾ ਹੈ।
Get all latest content delivered to your email a few times a month.
